Khmer news / Cambodia hot news online media: 1/15 Koh Santepheap Daily

Koh Santepheap Daily

ហ៊ុន ហ៊ាន អតីតស្នងការប៉ូលិស ត្រូវបានចាប់បញ្ជូនទៅឃុំខ្លួននៅខេត្តសៀមរាប

January 14, 2011 at 6:27 PM

ហ៊ុន ហ៊ាន ត្រូវបានបញ្ជូនទៅឃុំខ្លួននៅខេត្តសៀមរាប

ខេត្ដបន្ទាយមានជ័យ ៖ តាមប្រភពព័ត៌មានក្រៅផ្លូវការនៅឡើយឱ្យដឹងថា មន្ត្រីប៉ូលិសនៃស្នងការដ្ឋានខេត្តបន្ទាយមានជ័យម្នាក់ទៀតត្រូវបានឃាត់ខ្លួននៅថ្ងៃទី១៤ មករា គឺលោកអនុសេនីយ៍ទោ ទី ណាស៊ី ដែលមានតួនាទីជាប្រធានផ្នែករដ្ឋបាលការិយាល័យប្រឆាំងគ្រឿងញៀន។ ទាក់ទិននឹងការឃាត់ខ្លួនមន្ត្រីប៉ូលិសម្នាក់ទៀតនេះ មិនត្រូវបានមន្ត្រីផ្លូវការណាមួយអះអាងដឹងទេ ហើយជុំវិញការឃាត់ខ្លួនមន្ត្រីរូបនេះក៏មិនដឹងថា មានការទាក់ទិននឹងសំណុំរឿងគ្រឿងញៀនដ៏ធំដែលអតីតស្នងការលោកហ៊ុន ហ៊ាន និងស្នងការរងលោកឈៀង សុន កំពុងត្រូវទទួលនូវដំណើរការស៊ើបអង្កេតនោះទេ ។

ប្រភពព័ត៌មានទាក់ទិននឹងអតីតស្នងការ-ស្នងការរងប៉ូលិសខេត្តបន្ទាយមានជ័យនេះ បានឱ្យដឹងថា នៅថ្ងៃទី១៤ មករា អស់លោកទាំង២ត្រូវបាននាំខ្លួនពីអង្គភាពប្រឆាំងអំពើពុករលួយទៅកាន់សាលាដំបូងខេត្តបន្ទាយមានជ័យ ហើយបើតាមប្រភពថា លោកទាំង២ក៏ត្រូវបានលោកស្រី គង់ កួយ អនុប្រធានសាលាដំបូងចេញដីកាឃុំខ្លួននៅពន្ធនាគារខេត្តសៀមរាប។ នេះជាអ្នកទី២និងទី៣ហើយដែលអតីតមន្ត្រីប៉ូលិសខេត្តបន្ទាយមានជ័័យត្រូវបានឃុំខ្លួនជាបណ្តោះអាសន្ននៅពន្ធនាគារខេត្តសៀមរាបដែលជនទី១គឺលោកនួន វណ្ណា អតីតប្រធានពន្ធនាគារខេត្តបន្ទាយមានជ័យ។ ការសំរេចឱ្យឃុំខ្លួននៅពន្ធនាគារខេត្តសៀមរាបនេះ គឺដើម្បីរក្សាសុវត្ថិភាពដល់ពិរុទ្ធដែលមានអំណាចខាងចាប់ចងទាំងនេះឱ្យគេចផុតពីការប្រឈមមុខនឹងក្រុមអ្នកទោសដែលអាចមានកំហឹងជាយថាហេតុ។ ការព្យាយាមធ្វើការសាកសួរទៅកាន់មន្ត្រីតុលាការខេត្តសៀមរាប-ឧត្តរមានជ័យ និងមន្ត្រីពន្ធនាគារខេត្តសៀមរាប ត្រូវបានទទួលការបំភ្លឺថា មិនបានដឹងថា អតីតស្នងការ-ស្នងការរងខេត្តបន្ទាយមានជ័យត្រូវបានឃុំខ្លួននៅក្នុងខេត្តសៀមរាបទេ។ មន្ត្រីនានាដែលបានសាកសួរពីដំណើរការនៃនីតិវិធីចុងក្រោយនេះ មិនត្រូវបានលំអិតឱ្យដឹងជាផ្លូវការនោះឡើយ។

ចំណែកលោកម៉ឹក ដារ៉ា អតីតប្រធានមន្ទីរប្រឆាំងគ្រឿងញៀននៃក្រសួងមហាផ្ទៃ និងមន្ត្រីក្រោមឱវាទម្នាក់គឺលោកជា ឡេង តាមប្រភពព័ត៌មានបានឱ្យដឹងថា ត្រូវបានបញ្ជូនទៅកាន់អង្គភាពប្រឆាំងអំពើពុករលួយហើយកាលពីថ្ងៃទី១៤ មករា។ មានការកត់សំគាល់ថា បន្ទាប់ពីមានការឃាត់ខ្លួនមន្ត្រីប៉ូលិសថ្នាក់ខ្ពស់ជាបន្តបន្ទាប់ដែលទំនងជាទាក់ទិននឹងសំណុំរឿងគ្រឿងញៀន រហូតមកដល់ថ្ងៃទី១៤ មករា មន្ត្រីក្រសួងមហាផ្ទៃក៏ដូចជាមន្ត្រីអង្គភាពប្រឆាំងអំពើពុករលួយ មិនបានផ្តល់ព័ត៌មានផ្លូវការណាមួយពាក់ព័ន្ធនឹងការឃាត់ខ្លួនទាំងនេះទេ ដោយបានសំអាងថា កំពុងមានការស៊ើបអង្កេត និងសាកសួរមិនអាចផ្តល់ព័ត៌មានលំអិតណាមួយបានទេ ព្រោះកំពុងស្ថិតក្នុងការស៊ើបអង្កេត។ លោកតន់ សីហតេជៈ ព្រះរាជអាជ្ញាអមសាលាដំបូងខេត្តបន្ទាយមានជ័យ ត្រូវបានព្រឹត្តិបត្រព័ត៌មានដកស្រង់ប្រសាសន៍ថា លោកហ៊ុន ហ៊ាន និងលោកឈៀង សុន ត្រូវបញ្ជូនមកតុលាការនៅថ្ងៃនេះ (១៤ មករា)។ លោកតន់ សីហតេជៈ ត្រូវបានដកស្រង់សំដីបន្តថា សំណុំរឿងនេះត្រូវតែបញ្ជូនមកតុលាការមិនឱ្យហួសថ្ងៃនេះទេ ពីព្រោះអង្គភាពប្រឆាំងអំពើពុករលួយអាចឃុំខ្លួនពួកគេបានត្រឹមតែរយៈពេល៤៨ម៉ោងប៉ុណ្ណោះ៕

នាយកុយពិតជាសោកស្តាយទ្រព្យសម្បត្តិដែលរកបានដោយញើសឈាមផ្វាល់ ប៉ុន្តែមិនប៉ះពាល់

January 14, 2011 at 6:09 PM

ខេត្តសៀមរាប ៖ តារាកំប្លែងដ៏មានប្រជាប្រិយភាពម្នាក់ប្រចាំព្រះរាជាណាចក្រកម្ពុជា គឺលោកជួង ជី ហៅនាយកុយ ដែលបានជួបគ្រោះអកុសលត្រូវចោរប្លន់យកគ្រឿងអលង្ការអស់ពីខ្លួនមានតំលៃជាង៣ម៉ឺនដុល្លារអាមេរិក កាលពីថ្ងៃទី១៣ មករា នោះបានថ្លែងថា លោកមានការសោកស្តាយបំផុតចំពោះទ្រព្យសម្បត្តិដែលបានមកដោយកម្លាំងញើសឈាមរបស់លោកដែលបាត់បង់ ប៉ុន្តែទោះជាបែបណា មិនប៉ះពាល់ដល់អាជីពកំប្លែងរបស់លោកទេ។
តារាកំប្លែងរូបនោះបាននិយាយបែបនេះនៅក្នុងបទសំភាសន៍ដាច់ដោយឡែកមួយ ជាមួយអ្នកយកព័ត៌មានកោះសន្តិភាព នៅគ្រាដែលរូបលោកទៅសំដែងក្នុងកម្មវិធីមួយ រៀបចំឡើងដោយក្រុមហ៊ុនបារីលុចសារី នៅឯក្រុងសៀមរាប កាលពីរាត្រីថ្ងៃទី១៣ មករា គឺនៅក្រោយពេលប៉ុន្មានម៉ោងតែប៉ុណ្ណោះដែលរូបលោកត្រូវបានចោរដៃឆើតមួយក្រុមភ្ជង់ប្លន់នៅមុខយានដ្ឋានមួយនារាជធានីភ្នំពេញ។

នាយកុយ មើលទៅហាក់ដូចជាមានសភាពក្រៀមក្រំចិត្តបន្តិចមែន ប៉ុន្តែនៅលើឆាករូបលោកបានប្រឹងប្រកាន់ជំហរដូចជាពុំមានរឿងអ្វីកើតឡើងចំពោះរូបលោកសោះ ដោយបានប្រឹងសំដែង ជាមួយក្រុមសំដែងរបស់លោកអស់ពីចិត្ត ធ្វើឱ្យទស្សនិកជនដែលឈរយ៉ាងកុះករនៅពីមុខឆាកសំដែង ទប់សំណើចមិនបានគ្រប់ៗគ្នា ហើយក៏ពុំបានដឹងថា លោកកុយមានរឿងគួរឱ្យអាសូរបែបនេះឡើយ។ ឆ្លើយចំពោះសំនួរដែលសួរថា តើអាចមានការប៉ះពាល់ដល់ការសំដែងរបស់លោកដែរឬយ៉ាងណា នៅពេលដែលលោកបានជួបហេតុការណ៍អកុសលចោរប្លន់បែបហ្នឹង? តារាកំប្លែងនាយកុយបានឆ្លើយដោយផ្តើមនូវសំណើចមួយ បែបបង្ខំថា "ខ្ញុំនៅតែមានទឹកចិត្តសំដែងជូនមហាជនដដែល ព្រោះទ្រព្យសម្បត្តិដែលបាត់បង់ទាំងអស់ហ្នឹងវាពិតណាស់ បានមកពីកម្លាំងញើសឈាមរបស់ខ្ញុំមែន ប៉ុន្តែវាកើតក្រោយទេ មិនអាចប្រដូចទៅនឹងកិត្តិយសដែលខ្ញុំប្រឹងប្រែងតស៊ូដោយលំបាកជាង៣០ឆ្នាំមកនេះទេ ដូច្នេះខ្ញុំមិនបណ្តោយឱ្យអាជីពវាបាត់បង់ងាយៗទៅបានទេ។ ផ្ទុយទៅវិញខ្ញុំនឹងប្រឹងប្រែងសំដែងឱ្យកាន់តែល្អជាងមុន ដូចឃើញស្រាប់ហើយ យប់នេះខ្ញុំនៅតែឡើងឆាកសំដែង ហើយមហាជននៅតែគាំទ្ររូបខ្ញុំដដែល"។

សូមបញ្ជាក់ថា តារាកំប្លែងរូបនេះត្រូវបានក្រុមចោរដែលមានគ្នាប្រមាណ៤នាក់ជិះម៉ូតូ២គ្រឿងម៉ាកហុងដាពណ៌ខ្មៅ ប្រដាប់ដោយកាំភ្លើងខ្លីធ្វើសកម្មភាពភ្ជង់ប្លន់កាលពីវេលាម៉ោង១២និង៣០នាទីថ្ងៃត្រង់ ថ្ងៃទី១៣ មករា នៅក្នុងយានដ្ឋានជួសជុលរថយន្តយីហោ «សុខ ចំរើន» ស្ថិតនៅតាមផ្លូវលេខ១៨៦ សង្កាត់ទឹកល្អក់ទី៣ ខណ្ឌទួលគោក ខណៈពេលដែលតារាកំប្លែងរូបនេះនៅក្នុងយានដ្ឋានដើម្បីមើលជាងបាញ់ថ្នាំរថយន្តម៉ាកហ៊ីយ៉ាន់ដាយរបស់លោកមួយគ្រឿងទៀត មុនពេលលោកធ្វើដំណើរទៅសំដែងនៅខេត្តសៀមរាបតាមការអញ្ជើញរបស់ក្រុមហ៊ុនបារីលុចសារី។

នាយកុយបានប្រាប់ពីហេតុការណ៍នោះថា នៅពេលដែលចោរភ្ជង់រូបលោកដោយកាំភ្លើង គឺមានការភ័យខ្លាំងណាស់ ហើយលោកបានប្រាប់ទៅចោរថា «កុំបាញ់ចង់យកអ្វីយកទៅ... សុំតែទុកជីវិតបានហើយ...»។ រួចលោកក៏ដោះគ្រឿងអលង្ការមាននាឡិកា ខ្សែ.ក ខ្សែដៃ រួមទាំងចិញ្ចៀន២វង់មានដាំពេជ្រទៅឱ្យក្រុមចោរទាំងអស់ ហើយពួកវាក៏គេចខ្លួនបាត់ទៅ។ លោកកុយបញ្ជាក់ថា «ទ្រព្យសម្បត្តិដែលក្រុមចោរប្លន់ទៅដោយសុវត្ថិភាពនោះ បើសរុបជាទឹកប្រាក់មានចំនួនជាង៣ម៉ឺនដុល្លារអាមេរិក ដែលវាបានមកពីការសន្សំដោយកម្លាំងញើសឈាមរបស់ខ្ញុំផ្ទាល់ គ្មានអំពើកេងប្រវ័ញ្ចបងប្អូនណាម្នាក់ទេ ខ្ញុំស្តាយណាស់ តែអាយុជីវិតវាសំខាន់ជាងអ្វីៗទាំងអស់»។ ស្ថិតនៅក្នុងសភាពក្រៀមក្រំ តារាកំប្លែងរូបនេះបន្តថា «ទង្វើរបស់ក្រុមលោកចោរវាជ្រុលពេកហើយ ដែលប្លន់មិនរើសមុខ សូម្បីតែរូបខ្ញុំជាសិល្បករធ្លាប់បំរើមហាជនឱ្យមានអារម្មណ៍សើចក្អាកក្អាយអស់រយៈពេលច្រើនឆ្នាំមកហើយក៏វាពុំមានការលើកលែង។ ក្នុងជីវិតរបស់ខ្ញុំនេះបានសាងកុសលច្រើនណាស់ គឺខ្ញុំតែងតែអាណិតអាសូរ និងជួយឧបត្ថម្ភចំពោះជនក្រីក្រ ចុះហេតុអ្វីហេតុការណ៍អកុសលនេះធ្លាក់មកលើរូបខ្ញុំទៅវិញ? អស់លោកចោរអើយ... ល្មមចេះភ្ញាក់ខ្លួនឈប់ដើរផ្លូវខុស ងាកមកសាងអំពើល្អនឹងគេវិញទៅដើម្បីសន្សំកុសលសំរាប់ថ្ងៃក្រោយ»៕

កិច្ចប្រជុំទេសចរណ៍អាស៊ាននៅរាជធានីភ្នំពេញនឹងធ្វើយ៉ាងណាឱ្យតំបន់អាស៊ានក្�

January 14, 2011 at 6:00 PM

រាជធានីភ្នំពេញ ៖ ថ្ងៃស្អែកទី១៥ មករា ២០១១ រាជធានីភ្នំពេញនឹងទទួលធ្វើជាម្ចាស់ផ្ទះបើកកិច្ចប្រជុំរដ្ឋមន្ត្រីទេសចរណ៍អាស៊ាន ដើម្បីជំរុញវិស័យនេះឱ្យក្លាយជាកំលាំងចលករដ៏ខ្លាំងក្លាថែមទៀត ក្នុងការស្វែងរកប្រាក់ចំណូលសេដ្ឋកិច្ច និងអភិវឌ្ឍន៍ប្រទេសជាតិ ។ អគ្គនាយកក្រសួងទេសចរណ៍លោកទិត្យ ចន្ថា បានមានប្រសាសន៍ឱ្យដឹងកាលពីល្ងាចថ្ងៃទី១៤ មករា ២០១១ នេះថា កិច្ចប្រជុំថ្នាក់រដ្ឋមន្ត្រីក្រសួងទេសចរណ៍អាស៊ាននឹងចាប់ផ្តើមពីថ្ងៃទី១៥ ដល់២១ មករា ២០១១ នៅរាជធានីភ្នំពេញដែលនឹងជ្រើសរើសយកសណ្ឋាគារជាច្រើន ជាពិសេសទីក្រុងកោះពេជ្រធ្វើជាទីតាំងប្រជុំ ។ រដ្ឋមន្ត្រីទេសចរណ៍អាស៊ាននឹងលើកយកប្រធានបទសំខាន់ៗជាច្រើនទាក់ទិននឹងវិស័យទេសចរណ៍គឺធ្វើយ៉ាងណាកែលំអប្រព័ន្ធអេកូទេសចរណ៍ក្នុងបណ្តាប្រទេសអាស៊ានទាំងអស់ឱ្យមានការទាក់ទាញ និងសន្ទុះកាន់តែខ្លាំងក្លាលើកំណើនទេសចរ... ជាពិសេសធ្វើយ៉ាងណាឱ្យអាស៊ានក្លាយជាគោលដៅទេសចរណ៍របស់ពិភពលោក មិនចាញ់អឺរ៉ុប និងទ្វីបដទៃទៀត ។

កិច្ចប្រជុំនេះនឹងលើកឡើងផងដែរ ពីការតភ្ជាប់បណ្តាញធ្វើដំណើរទាំងផ្លូវគោក អាកាស និងទឹគ ពោលគឺនឹងធ្វើការតភ្ជាប់គ្រប់មធ្យោបាយទាំងអស់ ដើម្បីឱ្យវិស័យទេសចរណ៍អាស៊ានចាប់ពីឆ្នាំ២០១១ ដល់ឆ្នាំ២០១៥ ក្លាយជាគោលដៅទេសចរណ៍ដ៏ពិសេសរបស់មនុស្សក្នុងពិភពលោក ។ ដល់ពេលនោះទេសចរណ៍នឹងក្លាយជាចលករផ្តល់អត្ថប្រយោជន៍ប្រាក់ចំណូលសេដ្ឋកិច្ចដល់ប្រទេសជាតិដ៏សំខាន់បំផុត កាត់បន្ថយភាពក្រីក្រ ជំរុញការអភិវឌ្ឍន៍ប្រទេសជាតិនីមួយៗឱ្យកាន់តែមានភាពជឿនលឿនទៅមុខ ។ សូមបញ្ជាក់ថា នៅថ្ងៃទី១៨ មករា សម្តេចអគ្គមហាសេនាបតីតេជោហ៊ុន សែន នឹងអញ្ជើញចូលរួមជាអធិបតីក្នុងកិច្ចប្រជុំនោះផងដែរ ដើម្បីផ្តល់អនុសាសន៍លើវិស័យទេសចរណ៍សំរាប់បណ្តាប្រទេសអាស៊ានទាំងអស់ ។ បច្ចុប្បន្នវិស័យទេសចរណ៍ជាវិស័យសំខាន់មួយរកប្រាក់ចំណូលសំរាប់សេដ្ឋកិច្ចជាតិលំដាប់ទី២ និងផ្តល់ការងារកំលាំងពលកម្មប្រមាណ៤០ម៉ឺននាក់ ៕

គណៈបញ្ជាការឯកភាពខណ្ឌដូនពេញរុះរើផ្ទះលួចសង់ថ្មីលើដីបឹងកក់

January 14, 2011 at 5:41 PM

រាជធានីភ្នំពេញ ៖ កាលពីព្រឹកថ្ងៃទី១៤ មករា កំលាំងចំរុះរបស់គណៈបញ្ជាការឯកភាពខណ្ឌដូនពេញ ដឹកនាំដោយលោកសុខ ពេញវុធ អភិបាលរងខណ្ឌ បានចុះទៅរុះរើផ្ទះលួចសង់ថ្មីលើដីបឹងកក់ ដែលរាជរដ្ឋាភិបាលកំពុងរៀបចំគំរោងអភិវឌ្ឍន៍ ។ ការចុះទៅរុះរើផ្ទះលួចសង់ថ្មីនេះ ត្រូវបានលោកសុខ ពេញវុធ ឱ្យដឹងថា យោងតាមលិខិតជូនដំណឹងរបស់សាលាខណ្ឌដូនពេញជាច្រើនលើក និងអនុវត្តតាមសេចក្តីប្រកាសរបស់សាលារាជធានីភ្នំពេញ និងតាមការស្នើសុំរបស់មេធាវី ដើម្បីសហការរុះរើបន្ទប់ និងផ្ទះលបលួចសង់ថ្មីបន្ថែមខុសប្រក្រតី ក្រោយពីការអង្កេតរួមជាផ្លូវការលើដីអភិវឌ្ឍន៍បឹងកក់នេះ ។

លោកអភិបាលរងខណ្ឌបញ្ជាក់ថា ក្រោយពីមានការអង្កេតលើចំនួនផ្ទះប្រជាពលរដ្ឋស្នាក់នៅពិតប្រាកដហើយ ថ្មីៗនេះស្ត្រីឈ្មោះផេង ភីរ៉ានី ស្នាក់នៅផ្ទះគ្មានលេខ ភូមិ៤ សង្កាត់ស្រះចក ខណ្ឌដូនពេញ បានលបលួចសង់ផ្ទះបន្ថែមធ្វើអំពីឈើប្រក់ស័ង្កសីដែលមានចំនួន១៩បន្ទប់ និងបានជួលទៅឱ្យអ្នកដទៃ ព្រមទាំងសាច់ញាតិរបស់ខ្លួន ជាការបំភាន់ការដោះស្រាយគោលនយោបាយតំបន់អភិវឌ្ឍន៍បឹងកក់ ។ សកម្មភាពនេះល្មើសទៅនឹងខ្លឹមសារនៃលិខិតជូនដំណឹងរបស់់រាជរដ្ឋាភិបាល និងសាលារាជធានីភ្នំពេញទាំងស្រុង ហើយសាមីខ្លួននៅតែមានះរឹងរូសមិនព្រមធ្វើការរុះរើដោយស្ម័គ្រចិត្តទេ ។

ដូច្នេះដើម្បីធានាបាននូវប្រសិទ្ធភាពនិងការអនុវត្តលិខិតលេខ១២០០ ស.ជ.ណ ចុះថ្ងៃទី១៥ កញ្ញា ២០០៨ របស់ទីស្តីការណៈរដ្ឋមន្ត្រីឱ្យមានប្រសិទ្ធភាពនោះ សាលាខណ្ឌដូនពេញដែលមានលោកសុខ សម្បត្តិ ជាអភិបាលខណ្ឌនិងជាប្រធានគណៈបញ្ជាការឯកភាពខណ្ឌ បានចាត់តាំងរូបលោកឱ្យបង្កើតគណៈកម្មការមួយដែលរួមមានសមត្ថកិច្ចចំរុះធ្វើកិច្ចការនេះ ។ នៅព្រឹកនោះ កំលាំងចំរុះមានការប៉ះទង្គិចគ្នាជាពាក្យសំដីមួយប្រាវដែរ ព្រោះភាគីខាងអ្នកស្រីផេង ភីរ៉ានី បានរារាំងមិនចង់ឱ្យគណៈកម្មការរុះរើផ្ទះ និងបន្ទប់ដែលអ្នកស្រីលបលួចសង់ថ្មីនោះ ។

មានប្រភពព័ត៌មានអះអាងថា កន្លងមកក្រុមហ៊ុនស៊ូកាកូអ៊ីន ក៏ដូចជាសាលារាជធានីភ្នំពេញដែរ បានឧបត្ថម្ភប្រាក់ជាគោលនយោបាយទៅអ្នកស្រីផេង ភីរ៉ានី ចំនួន៣ម៉ឺនដុល្លាររួចហើយ ដើម្បីឱ្យអ្នកស្រីចាកចេញពីតំបន់អភិវឌ្ឍន៍នេះទៅកសាងជីវិតថ្មី ។ ប្រាក់ចំនួន៣ម៉ឺនដុល្លារនោះគឺ ក្រុមហ៊ុនស៊ូកាកូអ៊ីនជួយ២ម៉ឺនដុល្លារ និងសាលារាជធានីភ្នំពេញ១ម៉ឺនដុល្លារ ដូច្នេះមិនមែនសាលារាជធានី និងក្រុមហ៊ុនមិនបានគិតគូរដល់អ្នកស្រីផេង ភីរ៉ានីនោះឡើយ ។
លោកសុខ ពេញវុធ បានទទូច និងសំណូមពរដល់ប្រជាពលរដ្ឋដែលស្នាក់នៅបណ្តោះអាសន្នលើដីបឹងកក់ទាំងអស់ មេត្តាយោគយល់តាមការដោះស្រាយគោលនយោបាយរវាងសាលារាជធានី និងបងប្អូនផង ។ ពេលនេះបងប្អូនបានដឹងហើយថា រាជរដ្ឋាភិបាលបានប្រគល់តំបន់បឹងកក់ទៅឱ្យក្រុមហ៊ុនស៊ូកាកូអ៊ីនអភិវឌ្ឍន៍ ហើយសាលារាជធានីមិនឱ្យបងប្អូនចាកចេញទៅដោយខ្លួនទទេនោះឡើយ គឺបានឧបត្ថម្ភជាប្រាក់គោលនយោបាយគ្រប់ៗគ្នាតាមការព្រមព្រៀង ៕

បំបែកសំបុកចែកចាយ និងប្រើប្រាស់គ្រឿងញៀននៅជ្រៃធំ

January 14, 2011 at 5:29 PM

ខេត្តកណ្តាល ៖ កំលាំងការិយាល័យប្រឆាំងការជួញដូរគ្រឿងញៀន ដឹកនាំដោយលោកវរសេនីយ៍ឯក លន់ សុផាត ស្នងការរងនគរបាលខេត្ត និងជាប្រធានលេខាធិការដ្ឋាននៃគណៈកម្មាធិការត្រួតពិនិត្យគ្រឿងញៀនខេត្ត បានធ្វើការឆែកឆេរផ្ទះជួលមួយកន្លែងនៅភូមិលេខ៨ ឃុំសំពៅពូន ស្រុកកោះធំ កាលពីវេលាម៉ោង៤និង១៥នាទីរសៀល ថ្ងៃទី១៣ មករា ឆ្នាំ២០១១ ។ ក្នុងប្រតិបត្តិការនេះបានឃាត់ខ្លួនមនុស្សប្រុសស្រីចំនួន១៣នាក់ ក្នុងនោះមានមេខ្លោងចែកចាយគ្រឿងញៀនចំនួន៣នាក់ អ្នកប្រើប្រាស់គ្រឿងញៀនចំនួន៥នាក់ និង៥នាក់ទៀតស្ថិតនៅក្នុងរង្វង់ប្រតិបត្តិការ ព្រមទាំងរឹបអូសបានវត្ថុតាងថ្នាំញៀនប្រភេទមេតំហ្វេតាមីនទឹកកក ព្រមទាំងសំភារប្រើប្រាស់មួយចំនួនទៀត ។

លោកវរសេនីយ៍ឯក លន់ សុផាត បានឱ្យដឹងថា ដោយអនុវត្តតាមបទបញ្ជារបស់លោកនាយឧត្តមសេនីយ៍អគ្គស្នងការនគរបាលជាតិ និងយោងតាមបញ្ជារបស់លោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្ត និងដោយមានការឯកភាពពីលោកព្រះរាជអាជ្ញាអមសាលាដំបូងខេត្ត កំលាំងជំនាញដឹកនាំដោយរូបលោក ផ្ទាល់បានចុះសហការជាមួយប៉ូលិសមូលដ្ឋាន និងអាជ្ញាធរមូលដ្ឋាន បានធ្វើការឆែកឆេរផ្ទះជួលមួយកន្លែងដែលសង្ស័យថា ជាទីតាំងចែកចាយនិងប្រើប្រាស់គ្រឿងញៀន ។ ក្រោយពីធ្វើការឆែកឆេរ ជាលទ្ធផលយើងរកឃើញវត្ថុតាងមានថ្នាំញៀន ប្រភេទមេតំហ្វេតាមីនទឹកកក ទម្ងន់៥០ក្រាម និង៦០កញ្ចប់ សំភារវេចខ្ចប់ និងសំភារសំរាប់ប្រើប្រាស់មួយចំនួនទៀត ព្រមទាំំងបានឃាត់ខ្លួនមនុស្សប្រុសស្រីចំនួន១៣នាក់ យកមកធ្វើការសាកសួរ ។

បន្ទាប់ពីធ្វើការសាកសួររកឃើញថា ក្នុងចំណោមមនុស្ស១៣នាក់ មាន៣នាក់ ជាមេខ្លោងចែកចាយ គឺ១-ឈ្មោះសុខ គឹមលី ភេទប្រុស អាយុ១៨ឆ្នាំ ទីលំនៅបច្ចុប្បន្ននៅភូមិលេខ៨ ឃុំសំពៅពូន ស្រុកកោះធំ ២-ឈ្មោះសំបូរ រតនៈ ហៅផាម យ៉ាំងចូវ ភេទប្រុស អាយុ២២ឆ្នាំ ទីលំនៅភូមិកោះទាវ ឃុំសំពៅពូន ស្រុកកោះធំ និង៣-ឈ្មោះង្វៀង យ៉ាំងហុង ភេទប្រុស អាយុ៤០ឆ្នាំ ជនជាតិវៀតណាម ទីលំនៅបច្ចុប្បន្ននៅសង្កាត់លេខ១២ ក្រុងហូជីមិញ ប្រទេសវៀតណាម ។ ចំណែក១០នាក់ទៀតមានអ្នកប្រើប្រាស់គ្រឿងញៀន៥នាក់ និង៥នាក់ទៀត ស្ថិតនៅក្នុងរង្វង់ប្រតិបត្តិការ ។

លោកលន់ សុផាត បានឱ្យដឹងទៀតថា ដោយអនុវត្តតាមគោលនយោបាយភូមិ-ឃុំមានសុវត្ថិភាពដែលរាជរដ្ឋាភិបាលបានដាក់ចុះ ក្នុងចំណោមចំណុចទាំង៥នោះ គឺមានការលុបបំបាត់ការជូញដូរ និងប្រើប្រាស់គ្រឿងញៀន ទើបការិយាល័យរបស់លោកខិតខំធ្វើការស្រាវជ្រាវយ៉ាងយកចិត្តទុកដាក់បំផុត រហូតដល់កំណត់មុខសញ្ញា និងរកឃើញទីតាំងចែកចាយ និងប្រើប្រាស់គ្រឿងញៀនខាងលើនេះ ។ ជនដែលត្រូវចាប់ខ្លួនរួមនឹងវត្ថុតាងត្រូវបានកសាងសំណុំរឿងបញ្ជូនទៅកាន់សាលាដំបូងខេត្ត ៕

ប៉េអឹមស្រុកសង្កែចាប់សត្វស្លាបជិត១០០០ក្បាលពេលមេព្រៃភ្លេចបង្ក្រាប

January 14, 2011 at 5:07 PM

សត្វស្លាបសរុប៨៤៥ក្បាលមាន៤ប្រភេទគឺសត្វដុំដោរ សត្វត្លុម សត្វសំបកទំពាំងនិងសត្វស្មោញ

សត្វព្រៃ៨៤៥ក្បាល រួមជាមួយឈ្មួញ៤នាក់ ត្រូវបានប្រគល់ទៅឱ្យខណ្ឌរដ្ឋបាលព្រៃឈើបាត់ដំបងជាអ្នកចាត់ការបន្ត

ខេត្តបាត់ដំបង ៖ សត្វស្លាបរស់លើផ្ទៃទឹកតំបន់បឹងទន្លេសាបជិត១០០០ក្បាលដែលពួកឈ្មួញដឹកជញ្ជូនតាមរថយន្តបំរុងយកទៅទីផ្សារត្រូវប៉េអឹមស្រុកសង្កែ ស្ទាក់ចាប់កាលពីព្រឹកថ្ងៃទី១៣ មករា តាមបណ្តោយផ្លូវជាតិលេខ៥ ក្នុងភូមិស្វាយកង់ ឃុំអន្លង់វិល ស្រុកសង្កែ ។ មន្រ្តីប៉េអឹមស្រុកសង្កែឱ្យដឹងថា សមត្ថកិច្ចស្ទាក់ចាប់រថយន្តកូរ៉េ២គ្រឿងដឹកសត្វស្លាបក្រោយពីមានការផ្តល់ព័ត៌មានថា ឈ្មួញកំពុងដឹកតាមរថយន្តចេញពីភូមិស្ទឹងចក ឃុំព្រៃតូច ស្រុកមោងប្ញស្សីឆ្ពោះទៅកាន់ផ្សារ១៣មករា (ផ្សារថ្មី) ក្រុងបាត់ដំបង ។ សត្វស្លាបសរុប៨៤៥ក្បាលមាន៤ប្រភេទគឺសត្វដុំដោរ សត្វត្លុម សត្វសំបកទំពាំងនិងសត្វស្មោញ ។ សមត្ថកិច្ចឃាត់ខ្លួនស្ត្រី៤នាក់ជាម្ចាស់សត្វព្រៃ ១-ឈ្មោះញៀវ រឿន អាយុ៥៥ឆ្នាំ ២-ឈ្មោះសឿន ហៀប អាយុ៣២ឆ្នាំ ៣-ឈ្មោះគុជ សឿន អាយុ៥១ឆ្នាំ និង៤-ឈ្មោះម៉ាក់ ម៉ៅ អាយុ៣៥ឆ្នាំ ជាឈ្មួញកណ្តាលទិញ-លក់សត្វស្លាប ។

បើតាមការឆ្លើយសារភាពរបស់ឈ្មួញទាំង៤នាក់ថា ពួកគេដើរទិញពីអ្នកភូមិរស់នៅឃុំព្រៃតូច ស្រុកមោងប្ញស្សីដោយអ្នកភូមិរកបានពីតំបន់ព្រៃរនាម បឹងទន្លេសាប ផង និងនៅតាមតំបន់នានានៅក្នុងភូមិ-ឃុំពួកគេផង ។ នេះជាលើកទី៤ ហើយដែលពួកគេដឹកជញ្ជូនសត្វព្រៃដោយខុសច្បាប់យកទៅលក់លើទីផ្សារនានា ក្នុងស្រុកបាត់ដំបង ។ បច្ចុប្បន្នស្ទើរគ្រប់ទីផ្សារធំៗក្នុងក្រុងបាត់ដំបងគេប្រទះឃើញសត្វព្រៃស្ទើរគ្រប់ប្រភេទត្រូវគេដាក់លក់ ជាពិសេសសត្វស្លាបដែលរស់នៅតំបន់បឹងទន្លេសាប ។ គេឃើញមេព្រៃចេញបង្ក្រាបតែម្តងគត់កាលពីខែមុន ហើយក៏ស្ងាត់ទៅ ។ មន្ត្រីប៉េអឹមស្រុកសង្កែឱ្យដឹងថា សត្វព្រៃ៨៤៥ក្បាល រួមជាមួយឈ្មួញ៤នាក់ ត្រូវបានប្រគល់ទៅឱ្យខណ្ឌរដ្ឋបាលព្រៃឈើបាត់ដំបងជាអ្នកចាត់ការបន្តក្រោយពីសមត្ថកិច្ចសួរនាំធ្វើកំណត់ហេតុរួចមក ៕

ចោរសមុទ្រធ្វើឱ្យសេដ្ឋកិច្ចពិភពលោកខាតបង់ពី7ទៅ12ពាន់លានដុល្លារក្នុងមួយឆ�

January 14, 2011 at 4:42 PM

យោងតាមការសិក្សាមួយចេញផ្សាយកាលពីថ្ងៃទី១៣ មករា ថា ការខូចខាតដោយសារសកម្មភាពចោរសមុទ្រសំរាប់សេដ្ឋកិច្ចពិភពលោកមានប្រមាណជាពី៧ទៅ១២ពាន់លានដុល្លារក្នុងមួយឆ្នាំ ។ ពួកចោរសមុទ្រដែលធ្វើសកម្មភាពខ្លាំងតាមផ្លូវនាវាចរណ៍ក្នុងដែនសមុទ្ររបស់សូម៉ាលី ត្រូវបានគេយល់ថា ជាអ្នកទទួលខុសត្រូវលើ៩៥% នៃការខាតបង់ជាសាកល ។ នេះជាការបញ្ជាក់របស់របាយការណ៍មួយរៀបចំដោយអ្នកស្រាវជ្រាវមួយរបស់ ONE EARTH FUTURE FOUNDATION ជាមជ្ឈមណ្ឌលមួយសិក្សា និងវិភាគមានមូលដ្ឋាននៅសហរដ្ឋអាមេរិក ។ សកម្មភាពចោរសមុទ្រដទៃៗទៀត កើតមានក្នុងដែនទឹកនៃឈូងសមុទ្រ ហ្គីណេ និងនៅច្រកសមុទ្រម៉ាឡាកា ចន្លោះឥណ្ឌូណេស៊ី និងម៉ាឡេស៊ី ។ ចាប់តាំងពីឆ្នាំ២០០៦ មកមានការវាយប្រហារប្រមាណជា១.៦០០លើករបស់ពួកចោរសមុទ្រត្រូវបានជំរឿនឃើញក្នុងដែនទឹកនៃពិភពលោក បណ្តាលឱ្យមនុស្សស្លាប់យ៉ាងតិច៥៤នាក់។ តំលៃបង់ខាតសរុបត្រូវបន្ថែមប្រាក់លោះសំរាប់ការដោះលែងនាវា និងបណ្តាសមាជិកក្រុមនាវិក ប្រាក់កំរៃទាមទារដោយបណ្តាក្រុមហ៊ុនធានារ៉ាប់រង ការប្តូរផ្លូវធ្វើនាវាចរណ៍ក្នុងសមុទ្រ ការចំណាយខាងកិច្ចការពារសន្តិសុខក្នុងនោះមានការល្បាតរបស់កងនាវាចម្បាំង ព្រមទាំងតំលៃបង់ឱ្យតុលាការ ឬការបង់តំលៃដោយប្រយោលទាំងឡាយ ។
តំលៃសរុបនៃការខាតបង់ដោយសារចោរសមុទ្រមានការកើនឡើងគុណនឹង៥ ចាប់តាំងពីឆ្នាំ២០០៥មក ។ ការបង់ប្រាក់លោះគិតជាមធ្យមត្រឹមតែ១៥០.០០០ដុល្លារប៉ុណ្ណោះក្នុងឆ្នាំ២០០៥ តែក្នុងឆ្នាំ២០១០ ការបង់ប្រាក់លោះមានដល់៥,៤លានដុល្លារ ជាមួយនឹងការបង់ប្រាក់លោះច្រើនកំពូលដល់៩,៥លានដុល្លារ កាលពីខែវិច្ឆិកាកន្លងមកនេះ ជាថ្នូរនឹងការដោះលែងនាវាដឹកប្រេងកូរ៉េខាងត្បូងមួយគ្រឿង ៕

កូរ៉េខាងត្បូងទាមទារឱ្យកម្ពុជាបង់ប្រាក់ជាង2លានដុល្លារ ដល់គ្រួសារអ្នកស្លាប់�

January 14, 2011 at 4:42 PM

យោងតាមទីភ្នាក់ងារព័ត៌មានយ៉ុនហាបរបស់កូរ៉េខាងត្បូងកាលពីថ្ងៃទី១៤ មករា ថា តុលាការក្រុងសេអ៊ូល នាថ្ងៃទី១៤ មករា នោះបានទាមទារឱ្យក្រុមហ៊ុនអាកាសចរណ៍មួយរបស់កម្ពុជាបង់សំណងចំនួន៣,២ពាន់លានវ៉ុនប្រហែល២,៨លានដុល្លារអាេមរិក ដល់គ្រួសារពួកអ្នកដំណើរដែលបានស្លាប់បាត់បង់ជីវិតក្នុងឧប្បត្តិហេតុធ្លាក់យន្តហោះ នៅក្នុងប្រទេសកម្ពុជា កាលពីឆ្នាំ២០០៧ កន្លងមក ។
យន្តហោះប្រភេទ Antonov An-24 របស់ក្រុមហ៊ុន PM Tair ដែលដឹកអ្នកដំណើរ៤៤នាក់ ក្នុងនោះ១៤នាក់ជាអ្នកទេសចរជនជាតិកូរ៉េខាងត្បូងបានធ្លាក់នៅតំបន់ព្រៃភ្នំបូកគោខេត្តកំពតភាគខាងត្បូងប្រទេសកម្ពុជា កាលពីខែមិថុនា ឆ្នាំ២០០៧ កន្លងមក ដោយសារបញ្ហាអាកាសធាតុអាក្រក់បណ្តាលឱ្យស្លាប់អ្នកជិះទាំងអស់ ។ យន្តហោះនោះហោះចេញពីព្រលានយន្តហោះអន្តរជាតិក្រុងសៀមរាបបំណងទៅកាន់ខេត្តព្រះសីហនុ ប៉ុន្តែបាត់ដានទៅធ្លាក់នៅ ខេត្ត
កំពត ។
គេនៅចាំបានថា ក្នុងឧប្បត្តិហេតុធ្លាក់យន្តហោះ គួរឱ្យរន្ធត់នោះ រយៈពេល៣ទៅ៤ថ្ងៃ ទើបរកឃើញគឺធ្លាក់ក្នុងព្រៃយ៉ាងក្រាស់ដោយយន្តហោះផ្ទុះឆេះ បែកទៅជាបំណែក ហើយសពខ្លះទើរលើមែកឈើ ។
នៅឆ្នាំ២០០៨ សមាជិកគ្រួសារជនរងគ្រោះកូរ៉េខាងត្បូង១១នាក់ បានដាក់ពាក្យប្តឹងស្វះស្វែងរកការបង់ប្រាក់សំណង៤,៥ពាន់លានដុល្លារ ដោយអះអាងថា ឧប្បត្តិហេតុធ្លាក់យន្តហោះនេះបង្កឡើងដោយការធ្វេសប្រហែសរបស់ក្រុមហ៊ុនអាកាសចរណ៍នោះ ព្រមទាំងការធ្វេសប្រហែសរបស់អ្នកបើកបរ ។ យន្តហោះនេះបើកដោយជនជាតិកម្ពុជា ហើយក៏បានស្លាប់បាត់បង់ជីវិតដែរ ៕

បុរសជនជាតិបារាំងត្រូវបានចាប់ខ្លួនពាក់ព័ន្ធទិញពេស្យាចារកុមារ

January 14, 2011 at 4:35 PM

កំលាំងនគរបាលដោយមានការចូលរួមពីព្រះរាជអាជ្ញាអមសាលាដំបូងខេត្តបានចុះទៅឆែកឆេរផ្ទះសំណាក់យីហោនីកា

កុមារីរងគ្រោះឈ្មោះង្វៀន ធីស៊ីប អាយុ១៣ឆ្នាំ ជាជនជាតិវៀតណាម

ខេត្តព្រះសីហនុ ៖ ជនជាតិបារាំងម្នាក់ឈ្មោះ ORDONEZ CAHACHO JUAN ភេទប្រុស អាយុ៤៩ឆ្នាំ ជាអ្នកទេសចរកាន់លិខិតឆ្លងដែនលេខ 09DL. 71311 ផុតកំណត់ថ្ងៃទី១៣ តុលា ២០១៩ ត្រូវបានកំលាំងសមត្ថកិច្ចនគរបាលការិយាល័យប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តព្រះសីហនុ ធ្វើការឃាត់ខ្លួនកាលពីវេលាម៉ោង១០និង៣០នាតីព្រឹកថ្ងៃទី១៣ មករា ២០១១ នៅក្រុមទី១១ ភូមិ១ សង្កាត់លេខ៣ ពីបទទិញដូរពេស្យាចារអនីតិជន ។ មន្ត្រីនគរបាលការិយាល័យប្រឆាំងការជួញដូរមនុស្ស និងការពារអនីតិជនបានឱ្យដឹងថា កុមារីរងគ្រោះឈ្មោះង្វៀន ធីស៊ីប អាយុ១៣ឆ្នាំ ជាជនជាតិវៀតណាម ស្នាក់នៅផ្ទះជួលក្នុងក្រុមទី១១ ភូមិ១ សង្កាត់៣ ក្រុងព្រះសីហនុ ត្រូវបានម្តាយបង្កើតរបស់នាងលួងលោមយកទៅលក់ឱ្យបុរសជនជាតិបារាំងខាងលើ ។ ពេលនោះក៏ត្រូវកំលាំងមន្ត្រីនគរបាលការិយាល័យចុះទៅឃាត់ខ្លួនភ្លាមៗ ដើម្បីយកមកសាកសួរ ។

ប្រភពដដែលបន្តទៀតថា មកដល់ព្រឹកថ្ងៃទី១៤ មករា ជនសង្ស័យជនជាតិបារាំងនេះពុំព្រមទទួលស្គាល់កំហុសរបស់ខ្លួនឡើយ ទើបកំលាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន ដោយមានការចូលរួមពីលោកប៊ូ ប៊ុនហាង ព្រះរាជអាជ្ញាអមសាលាដំបូងខេត្តបានចុះទៅឆែកឆេរផ្ទះសំណាក់យីហោនីកា ដែលជនជាប់សង្ស័យជួលស្នាក់នៅជាប្រចាំនៅបណ្តោយវិថីឯករាជ្យក្រុម២៥ ភូមិ៣ សង្កាត់៣ ដែលមានម្ចាស់ជាជនជាតិបារាំងឈ្មោះ ORDONEZ JUANA អាយុ៥១ឆ្នាំ ស្វែងរកវត្ថុតាងបទល្មើស ។ ការឆែកឆេរនោះសមត្ថកិច្ចបានរកឃើញស្រោមអនាម័យចំនួន២ ទឹករំអិល Number Plus ចំនួន១ និងកុំព្យូទ័រ១គ្រឿងផងដែរ ។ ដោយតាមរយៈភស្តុតាងទាំងនោះសមត្ថកិច្ចនគរបាលនៃការិយាល័យប្រឆាំងការជួញដូរមនុស្ស និងការពារអនីតិជននឹងរៀបចំកសាងសំណុំរឿងតាមនីតិវិធីច្បាប់បន្តទៀត ៕

ប៉ូលិសទំនើងស័ក្តិ៤កន្លះដេញបាញ់មនុស្សផ្អើលពេញហាង រត់គេចគ្រាប់កាំភ្

January 14, 2011 at 4:30 PM

ខេត្តបន្ទាយមានជ័យ ៖ លោកប៉ូលិសស័ក្តិ៤កន្លះម្នាក់ នាយការិយាល័យប្រឆាំងភេរវកម្មដែលគេស្គាល់ថាជាកូនប្រុសអតីតស្នងការនគរបាល និងជាអភិបាលរងខេត្តបន្ទាយមានជ័យផងនោះ ត្រូវសមត្ថកិច្ចចាប់ខ្លួនជាប់ចោទពីបទប្រើប្រាស់អាវុធខុសច្បាប់បាញ់បោះសេរី និងធ្វើសកម្មភាពដេញបាញ់ម្ចាស់ភោជនីយដ្ឋានជំនោរសែសិន ដែលជាភោជនីយដ្ឋានមួយកន្លែងទំនើបជាងគេនៅក្នុងក្រុងសិរីសោភ័ណ បណ្តាលឱ្យមនុស្សរត់ជាន់គ្នា ខណៈកំពុងសប្បាយក្នុងពិធីជប់លៀងដែលក្នុងឱកាសនោះនាយក្រឹម តារាកំប្លែងល្បីឈ្មោះក៏រត់ព្រលឹងចុងសក់នឹងគេដែរ ប៉ុន្តែក្រោយមក នាយក្រឹមបានលួងលោមឱ្យបុរសជើងខ្លាំងនោះ ដាក់កាំភ្លើងចុះវិញទើបឈានទៅចាប់ខ្លួន ។

ហេតុការណ៍បាញ់បោះសេរីដូចអ្នកលេងខូវប៊យនេះបានកើតឡើង កាលពីវេលាម៉ោង១០កន្លះយប់ ថ្ងៃទី១៣ មករា ២០១១ ធ្វើឱ្យពិធីជប់លៀងសប្បាយក្លាយជារាត្រីព្រលឹងចុងសក់ ។ អ្នកខេត្តបន្ទាយមានជ័យបានអះអាងថា ប៉ូលិសទំនើងរូបនេះតែងតែបង្ករឿងរ៉ាវបាញ់បោះជាច្រើនលើក ច្រើនសាពុំខ្លាចញញើតច្បាប់អ្វីទេ ឱ្យតែផឹកស៊ីស្រវឹងម្តងៗ រហូតដល់អ្នកស្គាល់គ្នាលែងហ៊ានផឹកជាមួយទៅហើយ ។ សកម្មភាពបាញ់បោះសេរីនោះកើតឡើងក្នុងពិធីជប់លៀងឡើងកាន់មុខតំណែងរបស់លោកប្រធានមន្ទីរអប់រំយុវជន និងកីឡាខេត្តបន្ទាយមានជ័យថ្មី ដោយបានរៀបចំនៅភោជនីយដ្ឋានជំនោរសែនសិន ក្នុងនោះមានលោកឧកញ៉ា តារាកំប្លែងល្បីឈ្មោះលោកអ៊ូ ប៊ុណ្ណារ៉ាត់ ហៅនាយក្រឹម មន្ត្រីអប់រំ លោកគ្រូ មន្ត្រីគយ កងរាជអាវុធហត្ថ និងបុគ្គលិកភោជនីយដ្ឋានចូលរួមសប្បាយយ៉ាងច្រើនកុះករ ។

បន្ទាប់ពីកើតមានជម្លោះពាក្យសំដីហើយឈានទៅដល់ការបាញ់បោះប្រហែល១០គ្រាប់ ធ្វើឱ្យមនុស្សទាំងនោះខ្លះលូន ក្រាប រត់បាតជើងសព្រាត សូម្បីតែតារាកំប្លែងដ៏ល្បីឈ្មោះនាយក្រឹមក៏រត់ស្ទើរតែលស់ព្រលឹងផងដែរ...ប៉ុន្តែក្រោយមកបាននាយក្រឹមនេះឯងទៅលួងលោមប៉ូលិសស័ក្តិ៤កន្លះទំនើងឱ្យទំលាក់កាំភ្លើងចុះ រួចហើយឈានទៅធ្វើការចាប់ខ្លួនតែម្តង គឺប៉ូលិសទំនើងនេះឈ្មោះសុខ សុគន្ធ ត្រូវបានឃុំខ្លួននៅការិយាល័យបុគ្គលិកដើម្បីរៀបចំបែបបទបញ្ជូនទៅការិយាល័យវិន័យរបស់កងកំលាំងនគរបាលជាតិ និងរង់ចាំគោលការណ៍ពីថ្នាក់លើ ចាត់ការតាមច្បាប់ ៕

ឃាត់ខ្លួនជាងកាត់សក់វៀតណាមបៀតបៀនកេរ្តិ៍ខ្មាសក្មេងស្រីអាយុ១៤ឆ្នាំ

January 14, 2011 at 4:19 PM

ជនជាតិវៀតណាមវ័យចំណាស់ម្នាក់នេះ ជាជាងកាត់សក់ជាប់ចោទបៀតបៀនកេរិ៍្តខ្មាសក្មេងស្រី

ក្រុងប៉ោយប៉ែត ៖ ជនជាតិវៀតណាមវ័យចំណាស់ម្នាក់ជាជាងកាត់សក់ បានត្រូវសមត្ថកិច្ចក្រុងប៉ោយប៉ែតឃាត់ខ្លួនដោយចោទពីបទបៀតបៀនកេរិ៍្តខ្មាសក្មេងស្រីអាយុ១៤ឆ្នាំ ។ លោកអនុសេនីយ៍ទោព្រំ ពិសិដ្ឋ នាយផ្នែកព្រហ្មទណ្ឌក្រុងប៉ោយប៉ែតឱ្យដឹងថា បុរសនោះឈ្មោះច្រាំង សេង អាយុ៦៧ឆ្នាំ ស្នាក់នៅភូមិក្បាលស្ពាន សង្កាត់ប៉ោយប៉ែត ត្រូវបានឃាត់ខ្លួនកាលពីរសៀលថ្ងៃទី១២ មករា ទៅតាមពាក្យបណ្តឹងរបស់ឈ្មោះឈុន ថា ភេទប្រុស អាយុ៤៥ឆ្នាំ រស់នៅភូមិក្បាលស្ពាន ជាឪពុករបស់ក្មេងស្រីរងគ្រោះអាយុ១៤ឆ្នាំ ។

មន្ត្រីសមត្ថកិច្ចប្រាប់ថា ជាងកាត់សក់តាមផ្ទះរូបនោះបានសារភាពថា បានអោបថើបក្មេងស្រីរូបនោះលើអង្រឹងក្រោមដើមស្វាយនៅក្រោយផ្ទះរបស់នាងនៅពេលមិនឃើញមានឪពុកម្តាយរបស់នាងនៅផ្ទះ ។ លោកវរសេនីយ៍ឯកអ៊ុំ សុផល អធិការក្រុងប៉ោយប៉ែតឱ្យដឹងថា បុរសជាប់ចោទរូបនេះលោកនឹងឱ្យសមត្ថកិច្ចជំនាញកសាងសំណុំរឿងបញ្ជូនទៅកាន់សាលាដំបូងខេត្ត ៕

ឆ្នាំ២០១០ខេត្តក្រចេះគ្រោះថ្នាក់ចរាចរណ៍ថយចុះតែចំនួនមនុស្សស្លាប់កើនឡើងជិ�

January 14, 2011 at 4:17 PM

ខេត្តក្រចេះ ៖ តាមរបាយការណ៍របស់ស្នងការដ្ឋាននគរបាលខេត្តបង្ហាញថា ចំនួនគ្រោះថ្នាក់ចរាចរណ៍បានថយចុះក្នុងរយៈពេលមួយឆ្នាំ២០១០ ប៉ុន្តែចំនួនមនុស្សស្លាប់បានកើនឡើងជិតពាក់កណ្តាលបើប្រៀបធៀបទៅនឹងឆ្នាំ២០០៩ ។ កាលពីព្រឹកថ្ងៃទី១៣ ខែមករា ឆ្នាំ២០១១ នៅសាលមហោស្រពខេត្តមានបើកកិច្ចប្រជុំត្រួតពិនិត្យការអនុវត្តច្បាប់ចរាចរណ៍ផ្លូវគោក ក្រោមអធិបតីភាពលោកធុន គ្រី អភិបាលខេត្តស្តីទី ដោយមានការចូលរួមពីលោកឧត្តមសេនីយ៍ត្រីហឹម យ៉ាន ប្រធាននាយកដ្ឋានសណ្តាប់ធ្នាប់សាធារណៈ លោកឧត្តមសេនីយ៍ត្រីជួង ស៊ាងហាក់ ស្នងការនគរបាលខេត្ត និងជាប្រធានលេខាធិការដ្ឋានខេត្ត លោកមេបញ្ជាការ មេបញ្ជាការរងកងកំលាំងប្រដាប់អាវុធ អភិបាលរងស្រុក-ក្រុង លោកគ្រូអ្នកគ្រូ និងសិស្សានុសិស្សជិត៣រយនាក់ ។

លោកឧត្តមសេនីយ៍ត្រីជួង ស៊ាងហាក់ បានអានរបាយការណ៍ឱ្យដឹងថា ចំនួនអ្នកស្លាប់ដោយសារគ្រោះថ្នាក់ចរាចរណ៍នៅទូទាំងខេត្តមានចំនួន៦៨នាក់ លើសពីឆ្នាំ២០០៩ដែលមានចំនួនតែ៣៨នាក់ប៉ុណ្ណោះស្មើនឹង៤៤ភាគរយ តែចំនួនគ្រោះចរាចរណ៍មានចំនួន២០០លើក គឺថយចុះបើប្រៀបធៀបនឹងឆ្នាំ២០០៩ ដែលមានចំនួន២១៩លើក ។ ថ្វីដ្បិតគ្រោះថ្នាក់ចរាចរណ៍ថយចុះចំនួន១៩លើកមែន ប៉ុន្តែបានបង្កឱ្យស្លាប់មនុស្ស៦៨នាក់ កើនឡើងចំនួន៣០នាក់ ហើយមនុស្សរងរបួស និងការខូចខាតទ្រព្យសម្បត្តិថយចុះតែបន្តិចបន្តួចប៉ុណ្ណោះ ដែលករណីនេះនៅតែជាបញ្ហាមួយមានភាពប្រឈមនិងព្រួយបារម្ភយ៉ាងខ្លាំង ។

លោកឧត្តមសេនីយ៍ត្រីហឹម យ៉ាន ប្រធាននាយកដ្ឋានសណ្តាប់ធ្នាប់សាធារណៈ បានមានប្រសាសន៍ថា មូលហេតុដែលបង្កឱ្យមានគ្រោះថ្នាក់ចរាចរណ៍ កើតមានជាបន្តបន្ទាប់គ្រប់ទីកន្លែង គឺបណ្តាលមកពីមូលហេតុជាច្រើនដូចជា អ្នកបើកបរមិនទាន់យល់ច្បាស់អំពីច្បាប់ចរាចរណ៍ និងបំពានលើច្បាប់ចរាចរណ៍ បើកបរក្នុងល្បឿនលឿនលើសការកំណត់ និងការបញ្ជាយានយន្តស្ថិតក្នុងភាពស្រវឹងជាដើម ។ ជាមួយគ្នានេះ ស្របពេលដែលហេដ្ឋារចនាសម្ព័ន្ធមួយចំនួននៅមិនទាន់ស្ថាបនារួចរាល់ទើបការដាក់បង្ហាញនូវស្លាកសញ្ញាចរាចរណ៍នៅមានការយឺតយ៉ាវដល់អ្នកធ្វើដំណើរ ។ លោកឧត្តមសេនីយ៍បានលើកឡើងពីទិសដៅអនុវត្តបន្ត គឺជំរុញនិរន្តរភាពនៃការអនុវត្តច្បាប់ចរាចរណ៍ផ្លូវគោកឱ្យបានម៉ឺងម៉ាត់ ដោយរឹតបន្តឹងបន្ថែមតាមវិធានការច្បាប់ ផ្គួបផ្សំនឹងវិធានការរដ្ឋបាលលើលក្ខណៈបច្ចេកទេសរបស់យានយន្ត និងបន្តផ្សព្វផ្សាយច្បាប់ចរាចរណ៍ផ្លូវគោកឱ្យបានទូលំទូលាយ និងមានវិធានការបញ្ឈប់ការធ្វើអាជីវកម្មរបស់យានដ្ឋានកែច្នៃដំឡើងរថយន្តដែលខុសលក្ខណៈបច្ចេកទេស ៕

កសិករនៅស្រុកឱរ៉ាល់ទទួលបានទិន្នផលស្រូវច្រើនជាងឆ្នាំកន្លងទៅ

January 14, 2011 at 4:14 PM

ខេត្តកំពង់ស្ពឺ ៖ ប្រជាកសិករនៅក្នុងស្រុកឱរ៉ាល់មានការសប្បាយរីករាយនឹងការប្រមូលផលស្រូវឆ្នាំនេះព្រោះតែទិន្នផលស្រូវបានច្រើនជាងឆ្នាំកន្លងទៅ ដោយផ្អែកលើសក្តានុពលភូមិសាស្ត្រ និងដោយសារបច្ចេកទេសនៃការផលិត ។ តាមការកត់សំគាល់លើបរិមាណផលស្រូវដែលប្រមូលបាន ប្រជាកសិករមិនបានដឹកស្រូវចូលក្នុងជង្រុកទាំងអស់ទេ ព្រោះមានឈ្មួញចុះដើរទិញតាមផ្ទះរួចជាស្រេចដោយឱ្យ១គីឡូក្រាមតម្លៃចាប់ពី៩០០រៀល ទៅ១.០០០រៀល ជាប្រភេទស្រូវចំរុះ ។

លោកណែម វ៉ាន់ មន្ត្រីជំនាញផ្នែកកសិកម្ម បានថ្លែងថា ដោយការផលិតស្រូវរបស់ប្រជាពលរដ្ឋតាមលក្ខណៈបច្ចេកទេសត្រឹមត្រូវ ទើបធ្វើឱ្យទិន្នផលស្រូវមានការកើនឡើង ។ នេះក៏ដោយសារប្រជាពលរដ្ឋយើងយល់ដឹងពីការថែទាំនិងដាក់ជីធម្មជាតិ តាមការណែនាំបណ្តុះបណ្តាលពីមន្ត្រីកសិកម្មស្រុក សហការជាមួយអង្គការដែលជាដៃគូអភិវឌ្ឍន៍ទូទាំងស្រុកទើបធ្វើឱ្យទិន្នផលទទួលបានជាវិជ្ជមាន ។ ទោះបីជាយ៉ាងណា តម្លៃស្រូវបែរជាក៏មានការធ្លាក់ចុះជាងបណ្តាឆ្នាំមុនៗទៅវិញ ដែលធ្វើឱ្យប្រជាកសិករមានការខកចិត្តផងដែរ ។

លោកក៏ដូចជាប្រជាកសិករ សូមសំណូមទៅរដ្ឋាភិបាលនិងអង្គការដែលជាដៃគូអភិវឌ្ឍន៍ទាំងអស់ សូមជួយរកមធ្យោបាយយ៉ាងណាកុំឱ្យតម្លៃស្រូវមានការធ្លាក់ចុះនិងរកទីផ្សារដ៏ត្រឹមត្រូវចៀសវាងការកេងប្រវ័ញ្ចចំណេញហួសហេតុពីឈ្មួញកណ្តាល ព្រោះថា ទំនិញលើទីផ្សារសព្វសារពើ បានឡើងថ្លៃគ្រប់បែបយ៉ាងដែលធ្វើឱ្យសេដ្ឋកិច្ចពួកគាត់ប្រឈមនឹងបញ្ហាខាងជីវភាពនាពេលបច្ចុប្បន្ន ។ លោកបានគូសបញ្ជាក់ទៀតថា សព្វថ្ងៃនេះ ការដឹកជញ្ជូនស្រូវគឺមានភាពគគ្រឹកគគ្រេង រហូតមានការកើនឡើងលើសឆ្នាំកន្លងទៅជាងពាក់កណ្តាល ។ ប្រជាកសិករនៅស្រុកឱរ៉ាល់បានបង្ហើបឱ្យដឹងថា ពួកគាត់ត្រូវតែលក់ស្រូវខ្លះពីព្រោះនៅជាប់ជំពាក់ប្រាក់គេឬក៏ដើម្បីយកមកប្រើប្រាស់ដោះស្រាយរាល់បញ្ហាផ្សេងៗក្នុងគ្រួសារ ។ ប្រជាកសិករខ្លះធ្វើស្រូវបានលើសពីតំរូវការក្នុងគ្រួសារតែក៏មានខ្លះះមិនគ្រប់គ្រាន់ដែរ ៕

ការប្រកួតបាល់ទាត់ពានរង្វាន់សម្តេចតេជោហ៊ុន សែន

January 14, 2011 at 4:11 PM

រាជធានីភ្នំពេញ ៖ ការប្រកួតបាល់់ទាត់ពានរង្វាន់សម្តេចតេជោហ៊ុន សែន វគ្គជំរុះ៣២ក្រុមដំបូង ដែលចាប់ផ្តើមធ្វើការប្រកួតចាប់ពីថ្ងៃទី៧ មករា នៅមណ្ឌលចំនួន៤ គឺមណ្ឌលបាត់ដំបង មណ្ឌលកំពង់ធំ មណ្ឌលព្រៃវែង និងមណ្ឌលតាកែវ បានបញ្ចប់ហើយកាលពីថ្ងៃទី១៣ មករា ។ តាមការរៀបចំរបស់គណៈកម្មការបច្ចេកទេស គឺមណ្ឌលនីមួយៗមាន៨ក្រុមចែកចេញជា២គ្រុប ហើយក្នុង១គ្រុប ដែលមាន៤ក្រុមនោះ ចំរាញ់យកតែ២ក្រុមប៉ុណ្ណោះសំរាប់ ឡើងមកប្រកួតវគ្គ ជំរុះ១៤ក្រុមនៅរាជធានីភ្នំពេញជាបន្តទៀត ។ មណ្ឌលបាត់ដំបងគ្រុបA ក្រុមដែលមានឱកាសបានឡើងមកប្រកួតនៅវគ្គ១៦ក្រុមជាបន្តទៀតនោះមានក្រុមព្រែកប្រា និងក្រុមឫទ្ធិសែន និងគ្រុបB មានក្រុមបៀលប្រាយយូណាយធីត និងក្រុមបាត់ដំបងជាម្ចាស់ផ្ទះ ។

មណ្ឌលកំពង់ធំ គ្រុបC មានក្រុមព្រះខ័នរាជ្យ និងក្រុមឆ្នាំសមុទ្រ ។ គ្រុប D មានក្រុមភ្នំពេញក្រោន និងក្រុមនាគខៀវ ។ មណ្ឌលព្រៃវែង គ្រុប E មានក្រុមខេត្តស្ទឹងត្រែង និងក្រុមឆ្មាខ្មៅ ចំណែកគ្រុបF មានក្រុមក្រសួងការពារជាតិ និងក្រុមក្រសួងមហាផ្ទៃ ។ មណ្ឌលតាកែវ គ្រុប G មានក្រុមណាហ្គា និងក្រុមខេត្តតាកែវ ឯគ្រុបH មានក្រុមគិរីវង់សុខសែនជ័យ និងក្រុមខេត្តកោះកុង ។ ក្នុងចំណោម២ក្រុមនៃក្រុមនីមួយៗដែលបានលេងឈ្នះហើយត្រូវឡើងមកដល់វគ្គជំរុះ១៦ក្រុមនៅពហុកីឡដ្ឋានជាតិជាបន្តទៀតនោះ គឺនឹងត្រូវចាប់ផ្តើមប្រកួតពីថ្ងៃទី២២ ខែមករា ខាងមុខនេះហើយ ៕

ឆ្លងដែនទៅប្រទេសសៀមតាមរយៈក្រុមហ៊ុនបញ្ជូនសពមកវិញ

January 14, 2011 at 4:08 PM

ក្រុងប៉ោយប៉ែត ៖ សពពលករចំណាកស្រុកម្នាក់ត្រូវបានភាគីសៀមបញ្ជូនមកវិញតាមច្រកទ្វារប៉ោយប៉ែតប្រគល់ឱ្យក្រុមគ្រួសារយកទៅធ្វើបុណ្យនៅឯស្រុកកំណើត ។ តាមការបំភ្លឺពីស្ត្រីឈ្មោះទឹម ថូ អាយុ៤២ឆ្នាំ ត្រូវជាប្រពន្ធរបស់សព បានឱ្យដឹងថា ប្តីរបស់គាត់ដែលស្លាប់នេះមានឈ្មោះឡៃ ថង់ អាយុ៣៨ឆ្នាំ រស់នៅភូមិខ្លាឃ្មុំ ឃុំគោកធ្លកលើ ស្រុកជីក្រែង ខេត្តសៀមរាប បានទៅធ្វើការនៅប្រទេសសៀមដោយស្របច្បាប់ តាមរយៈក្រុមហ៊ុនយូមែនផៅវើររយៈពេលជាង៣ខែមកហើយ នៅខេត្តឈុនបុរី គឺធ្វើកម្មករលើកអីវ៉ាន់ដាក់រថយន្ត ។

តាមស្ត្រីជាប្រពន្ធបន្តថា ស្រាប់តែនៅ ព្រឹកថ្ងៃទី១៣ មករា ខាងក្រុមហ៊ុនបានទូរស័ព្ទប្រាប់គាត់ជាប្រពន្ធថា ឱ្យមកចាំទទួលយកសព ប្តីនៅមាត់ច្រកទ្វារប៉ោយប៉ែត ។ ស្ត្រីជាប្រពន្ធរូបនេះបានបន្តថា ចំណែកមូលហេតុនៃការស្លាប់របស់ប្តីគាត់ត្រូវក្រុមហ៊ុនប្រាប់ថា ប្តីរបស់គាត់បានដេកស្លាប់នៅវេលាម៉ោងប្រមាណ១១យប់ ថ្ងៃទី១២ មករា ២០១១ នៅក្នុងបន្ទប់ស្នាក់នៅ ហើយនៅពេលព្រឹកឡើងដល់ពេលម៉ោងធ្វើការទើបគេដឹង ។ សពបុរសរូបនេះត្រូវបានភាគីសៀមបញ្ជូនមកវិញតាមច្រកប៉ោយប៉ែតកាលពីថ្ងៃទី១៣ មករា ដើម្បីប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត ៕

ចាប់ពិរុទ្ធជនម្នាក់តាមដីការបស់តុលាការពីបទបង្ករបួសស្នាម

January 14, 2011 at 4:05 PM

ខេត្តព្រៃវែង ៖ ជនជាប់ពិរុទ្ធឈ្មោះឃុន វ័រ អាយុ២៧ឆ្នាំ មានស្រុកកំណើតនៅភូមិព្រែកធំ ឃុំអ្នកលឿង ស្រុកពាមរក៍ ត្រូវប៉ូលិសស្រុកចាប់ខ្លួនតាមដីកា ។ តាមការឱ្យដឹងពីមន្ត្រីប៉ូលិសយុត្តិធម៌ស្រុកពាមរក៍ថា កាលពីថ្ងៃទី៥ ខែមេសា ឆ្នាំ២០០៨ នៅក្នុងភូមិមានពិធីជប់លៀងឡើងផ្ទះថ្មី ហើយឃុន វ័រ បានចូលរួមផឹកស៊ីសប្បាយដែរ ។ ពេលនោះគេឈ្លោះប្រកែកគ្នាជាមួយឈ្មោះតោ ហើយវ៉ៃតប់គ្នាបង្កឱ្យឈ្មោះតោ រងរបួស ។ អ្នករងរបួសបានដាក់ពាក្យបណ្តឹងទៅតុលាការខេត្តហើយតុលាការចេញដីកាកោះហៅឱ្យឈ្មោះឃុន វ័រ ទៅបំភ្លឺ តែគេគេចវេះជាច្រើនដង ព្រមទាំងគេចខ្លួនបាត់ ។

នៅថ្ងៃទី១១ មករា ឆ្នាំ២០១១ គេចូលស្រុកវិញក៏ត្រូវសមត្ថកិច្ចចាប់ខ្លួនតាមដីកាបញ្ជូនទៅឱ្យតុលាការ ។ នៅថ្ងៃទី១២ មករា ក្រុមគ្រួសារទៅអះអាងប្រាប់ប៉ូលិសយុត្តិធម៌ស្រុកពាមរក៍ថា ឈ្មោះឃុន វ័រ មិនបានបង្ករបួសស្នាមទៅលើឈ្មោះគោឡើយ ។ គេឆ្ងល់ថា បើមិនបង្ករបួសស្នាមទៅលើអ្នកដទៃទេ ហេតុអ្វីគេចខ្លួន? មន្ត្រីប៉ូលិសយុត្តិធម៌ស្រុកបញ្ជាក់ថា មានតែតុលាការទេជាអ្នកសំរេចយ៉ាងណានោះ ។ មន្ត្រីប៉ូលិសបានឱ្យជនល្មើសផ្តិតមេដៃដើម្បីបំពេញសំណុំរឿងបញ្ជូនខ្លួនគេទៅតុលាការ ៕

ធនាគារក្តាមត្រូវបានបង្កើតនៅតាមសហគមន៍អ្នកនេសាទ

January 14, 2011 at 3:52 PM

ខេត្តកំពត ៖ ការបង្កើតធនាគារក្តាមនៅតាមសហគមន៍អ្នកនេសាទសមុទ្រកាន់តែធ្វើឱ្យក្រុមអ្នកនេសាទ និងអាជីវករប្រមូលទិញក្តាមយល់ដឹងពីភាពវិនាសហិនហោចរបស់ក្តាមសេះ ។ និយមន័យរបស់ធនាគារក្តាម គឺជាពាក្យមួយស្ទើរតែមិនធ្លាប់ឮ ។ លោកស សូរិន ប្រធានការិយាល័យជលផលខេត្តប្រាប់ឱ្យដឹងថា ការបង្កើតធនាគារក្តាមចាប់ដំណើរការតាំងពីឆ្នាំ២០០៨មកម្ល៉េះ នៅតាមសហគមន៍៨ផ្សេងៗគ្នានៅខេត្តកំពត និងខេត្តកែប ។ ធនាគារក្តាម គឺអ្នកនេសាទទាំងឡាយដែលចាប់បានក្តាមមានពងពី សមុទ្រត្រូវគណៈកម្មការធនាគារក្តាមទិញយកទៅលែងក្នុងបែ(ទ្រុង)ដើម្បីឱ្យក្តាមពងញាស់ជាកូន ហើយលែងទៅក្នុងទឹកវិញ ។

លោកស សូរិន អះអាងថា តាមការពិនិត្យរបស់ក្រុមមន្ត្រីជលផលបានរកឃើញក្តាមញីនីមួយៗមានពងចំនួនជាងមួយលានគ្រាប់ ហើយរយៈពេលតែ៧ថ្ងៃប៉ុណ្ណោះអាចញាស់ជាកូនជ្រុះទៅសមុទ្រវិញ ។ នៅឆ្នាំ២០១០កន្លងមកនេះមិនបានប្រមូលទិញពីក្រុមអ្នកនេសាទទេ ដោយមានក្រុមឃ្លាំមើលរបស់សហគមន៍ឃើញក្តាមមានពងហើយត្រូវយកមកដាក់ក្នុងបែ ។ ធនាគារត្រូវធ្វើកំណត់ត្រាថាតើអ្នកនេសាទណាបានក្តាមពងទុកក្នុងបែច្រើនជាងគេនឹងឱ្យអ្នកនេសាទរូបនោះខ្ចីប្រាក់ ដោយមិនគិតការពីពួកគាត់ទេ ។ ទោះបីជាបែបណាក្តីក្រុមអ្នកនេសាទចាប់បានក្តាមមានពងតិចតួចបំផុត ។

លោកស៊ឹម ហ៊ឹម ប្រធានសហគមន៍អ្នកនេសាទឃុំត្រពាំងសង្កែ ស្រុកទឹកឈូមានប្រសាសន៍ថា សហគមន៍របស់លោកមិនទាន់បានបង្កើតធនាគារក្តាមនៅឡើយទេ គឺមិនទាន់មានអង្គការជួយជ្រោមជ្រែង ។ ម្យ៉ាងខ្វះថវិកាធ្វើបែ សំរាប់ដាក់ក្តាមពង ។ ចំពោះសហគមន៍អ្នកនេសាទកំពង់សាមគ្គី ឃុំកូនសត្វ គឺបង្កើតធនាគារក្តាមបានហើយតែដួលរលំទៅវិញ ដោយសហគមន៍នោះចង់បានមុខមាត់ឆាប់រហ័សពេកធ្វើឱ្យបាត់ចំណូលរបស់ក្រុមអ្នកនេសាទ ។
តាមរបាយការណ៍ជាផ្លូវការរបស់ជលផលខេត្តឱ្យដឹងថា មានក្តាមពងជាង១តោនត្រូវបានដាក់ក្នុងបែជំរុះកូនទៅក្នុងសមុទ្រវិញ ៕

រដ្ឋសភាស្វែងយល់ពីការងារអប់រំវប្បធម៌ និងធម្មការ

January 14, 2011 at 3:46 PM

រាជធានីភ្នំពេញ ៖ នៅរាជបណ្ឌិត្យសភាកម្ពុជា កាលពីថ្ងៃទី១៤ មករា មានរៀបចំកិច្ចប្រជុំពិភាក្សាអំពីការងារអប់រំ ការងារវប្បធម៌ និងការងារធម្មការ រវាងមន្ត្រីរដ្ឋសភា និងមន្ត្រីរាជបណ្ឌិត្យសភាកម្ពុជា ក្រោមអធិបតីភាពលោកជំទាវបណ្ឌិតខ្លូត ធីតា ប្រធានរាជបណ្ឌិត្យសភាកម្ពុជា ។ លោកជំទាវបណ្ឌិតខ្លូត ធីតា បានមានប្រសាសន៍ថា កិច្ចប្រជុំពិភាក្សានេះ គឺធ្វើឡើងតាមសំណើរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា ដែលបានចាត់មន្ត្រីរដ្ឋសភាចំនួន៤នាក់ ឱ្យមកសាកសួររាជបណ្ឌិត្យសភាជួយគិតមើលលើទិដ្ឋភាពសង្គមបច្ចុប្បន្ន ដែលទាក់ទងទៅនឹងការងារអប់រំ ការងារវប្បធម៌ និងការងារធម្មការជាមួយការងារនយោបាយ តើរាជបណ្ឌិត្យសភាកម្ពុជាយល់ឃើញយ៉ាងម៉េចដែរ ។

លោកជំទាវខ្លូត ធីតា បានបង្ហាញថា ការងារទាំងបីដែលពាក់ព័ន្ធនឹងនយោបាយនេះ គឺពិតជាការងារសំខាន់ និងមានប្រយោជន៍ទាំងអស់ ។ ការងារទាំងបីនេះ វាក៏ជាមូលដ្ឋានគ្រឹះរបស់ការងារនយោបាយដែរ ពីព្រោះថា បើសិនជាមនុស្សមិនបានអប់រំខ្លួនឱ្យយល់អំពីវប្បធម៌របស់ជាតិខ្លួន មិនស្គាល់អំពីសាសនាដែលមនុស្សត្រូវគោរពមានលក្ខណៈផ្សេងៗពីគ្នានោះទេ មនុស្សនោះក៏មិនអាចធ្វើនយោបាយបានដែរ ។ ដូច្នេះអ្វីៗវាសុទ្ធតែមានទំនាក់ទំនងគ្នាទាំងអស់ ។ ប៉ុន្តែអ្វីដែលសំខាន់ជាងនេះ គឺថា តើមនុស្សនោះគេត្រូវមានការចេះដឹងក្នុងកំរិតប៉ុនណា យល់កំរិតណា បើយល់ដឹងមិនដល់កំរិតធ្វើអ្វីៗក៏មិនពូកែដល់កំរិតដែរ ។

មន្ត្រីខាងរដ្ឋសភាបានសួរទៀតថា ការងារទាំងអស់នេះល្អទៅបានដោយសារអ្វី? លោកជំទាវបន្តថា ការងារនេះល្អទៅបាន គឺដោយសារថ្នាក់ដឹកនាំប្រទេសជាតិផង និងអ្នកដែលត្រូវគេគ្រប់គ្រងផងដែរ ត្រូវចេះយល់ពីគ្នា និងពូកែស្រាវជ្រាវ ដូចជាសម្តេចអគ្គមហាសេនាបតីតេជោ ហ៊ុន សែន លោកមិនត្រឹមតែឆ្លាតប៉ុណ្ណោះទេ ថែមទាំងស្គាល់ច្បាស់ពីការងារ ពូកែស្រាវជ្រាវ តស៊ូ និងស្មោះត្រង់ចំពោះជាតិមាតុភូមិ ។ បើសិនជាលោកមិនស្មោះត្រង់ចំពោះជាតិមាតុភូមិទេ ការងារគ្រប់គ្រងរបស់គាត់ក៏មិនទទួលបានជោគជ័យដូចបច្ចុប្បន្ននេះដែរ ៕

ឃ្លាតពីតុអង្គុយធ្វើការ1នាទីកាត់បន្ថយជំងឺគាំងបេះដូង

January 14, 2011 at 3:44 PM

យោងតាមការស្រាវជ្រាវមួយបានបង្ហាញថា ការក្រោកចេញពីតុធ្វើការហើយទៅនិយាយជាមួយមិត្តរួមការងាររបស់អ្នក១នាទីអាចជួយកាត់បន្ថយអត្រានៃការកើតជំងឺគាំងបេះដូង។
បណ្តាជនដែលឈប់សម្រាករយៈពេលខ្លីពីការងារក្នុងចន្លោះពេលដ៏ទៀងទាត់មួយក្នុងមួយថ្ងៃ មានការប្រឈមតិចតួចបំផុតទៅនឹងការឡើងទម្ងន់និងការឡើងឈាម។លើសពីនេះទៀតវាក៏បានជួយកាត់បន្ថយអត្រានៃការកើតជំងឺសរសៃឈាមបេះដូងបានផងដែរ។
បណ្តាអ្នកស្រាវជ្រាវបានរកឃើញថា មនុស្សដែលក្រោកឈរមួយរយៈពេលខ្លី ដែលក្នុងមួយថ្ងៃបូកសរុបទៅឈរឱ្យបានជាង២ម៉ោងមានទំហំចង្កេះកាន់តែតូចទៅរួមនឹងសម្ពាធឈាមចុះទាបផងដែរ។អំឡុងនៃការធ្វើពិសោធន៍ អ្នកស្រាវជ្រាវបានសិក្សាទៅលើទំលាប់របស់មនុស្សពេញវ័យចំនួន៤.៧៥៧នាក់។អ្នកចូលរួមធ្វើពិសោធន៍ម្នាក់ត្រូវគេបំពាក់ប្រដាប់ស្ទង់មួយគឺជាវត្ថុតូចមួយដែលពាក់នៅលើចង្កេះដើម្បីវាស់ចំនួនពេលវេលាដែលពួកគេដើរនិងរត់ ។

ទំហំចង្កេះ សម្ពាធឈាម និងកម្រិតប្រូតេអ៊ីនប្រតិករCនៅក្នុងឈាមរបស់ពួកគេ ក៏ត្រូវបានគេវាស់ស្ទង់ផងដែរ។ជាលទ្ធផលបន្ទាប់ពីការវាស់ស្ទង់ ក្រុមអ្នកស្រាវជ្រាវមកពីសាកលវិទ្យាល័យឃ្វីនស៊្លែនប្រទេសអូស្ត្រាលីបានរកឃើញថា អ្នកដែលឈប់សម្រាកភាគច្រើនមានទំហំចង្កេះតូចជាងអ្នកដែលអង្គុយធ្វើការជាប់រហូតដល់ទៅ៤សង់ទីម៉ែត្រ ៕

របរពេស្យានៅហុល្លង់ត្រៀមទទួលដំណឹងអាក្រក់ពេលរដ្ឋគ្រោងប្រមូលពន្ធ

January 14, 2011 at 3:38 PM

ពេស្យាចារជាមុខរបរដ៏កាក់កបមួយនៅក្នុងទីក្រុងអាំស្ទែរដាម ប្រទេសហុល្លង់នៅក្នុងយុគសម័យឆ្នាំ១៦០០ ដោយប្រទេសហុល្លង់នាសម័យនោះអ្នកដើរតាមសមុទ្រតែងតែមករកការកំសាន្តសប្បាយនៅទីក្រុងខាងលើយ៉ាងច្រើន។ គួរបញ្ជាក់ថា ប្រទេសហុល្លង់បានចុះបញ្ជីដល់អាជីពខាងលើជាមុខរបរស្របច្បាប់កាលពី១០ឆ្នាំមុន ប៉ុន្តែទើបប្រមូលពន្ធក្នុងពេលបច្ចុប្បន្ន។ លោកស្រីយានណេក វើហេកហ្គេន អ្នកនាំពាក្យនាយកដ្ឋានពន្ធដារបានឱ្យដឹងថា យើងនឹងចាប់ផ្តើមប្រមូលពន្ធទៅលើទីតាំងបនស្រីដែលមានទំហំធំ ក្រោយមកក៏បន្តទៅទីតាំងបំរើសេវាកម្មផ្លូវភេទខ្នាតតូច។ សំរាប់សកម្មភាពលើកនេះបានបង្កឱ្យកើតមានការប្រឆាំងនៅក្នុងក្រុមស្ត្រីពេស្យា និងផ្នែកខ្លះទៀតក៏បារម្ភថា តើច្បាប់ខាងលើអាចចូលជាធរមានបានឬអត់?

នាងសាម៉ង់តា ដែលមានអាជីពជាអ្នកបំរើផ្លូវភេទក្នុងទីក្រុងអាំស្ទែរដាមនិយាយថា ចាត់ទុកថា ជារឿងល្អមួយដែលពួកគេធ្វើបែបនេះ ហើយវាក៏ជាមុខរបរមួយដូចគ្នា និងយើងក៏គួរបង់ពន្ធ។ នាងបានបង់ពន្ធអស់រយៈជាច្រើនឆ្នាំមកហើយ និងមានអារម្មណ៍ថា ខ្លួនកំពុងមានការប្រកួតប្រជែងដោយអយុត្តិធម៌ជាមួយស្ត្រីផ្សេងដែលមិនបានបង់ពន្ធ ដែលមនុស្សភាគច្រើន(ស្ត្រីពេស្យា) ភៀសខ្លួនមកពីតំបន់អឺរ៉ុបខាងកើត។ ទោះជាយ៉ាងណាក៏ដោយ កាលពីសប្តាហ៍កន្លងមកកាសែតក្នុងស្រុកបានផ្សព្វផ្សាយទិន្នន័យដែលបញ្ជាក់ពីអាជ្ញាធរហុល្លង់ថា អាជីពជាស្ត្រីពេស្យាត្រូវតែឈានចូលក្នុងប្រព័ន្ធបង់ពន្ធដូចអាជីពផ្សេង និងបានបញ្ជាក់ថា ម្ចាស់មុខជំនួញ និងស្ត្រីពេស្យាដាក់តាំងក្នុងទូកញ្ចក់ក្នុងក្រុងអាំស្ទែរដាម ត្រូវបង់ពន្ធដោយផ្ទាល់។

តាមទិន្នន័យរបស់វិទ្យាស្ថានស្ថិតិជាតិបានធ្វើការប៉ាន់ប្រមាណថា អាជីពជាស្ត្រីពេស្យាអាចរកចំណូលបានច្រើនជាង៦៦០លានយូរ៉ូ ក្នុងមួយឆ្នាំ បើគិតជាចំណូលមធ្យមមានប្រហែល៥០យូរ៉ូ ក្នុងម្នាក់ពីប្រជាជនសរុប១៦លាននាក់នៅក្នុងប្រទេសហុល្លង់។ ក្នុងច្បាប់របស់ហុល្លង់អ្នកបំរើសេវាកម្មផ្លូវភេទ(ពេស្យាចារ)នឹងត្រូវកាត់ពន្ធក្នុងអត្រា១៩%ពីថ្លៃសេវាកម្មធម្មតា៥០យូរ៉ូ ក្នុងការធ្វើសេវាកម្មរយៈពេល១៥នាទី។ ក្រៅពីនេះ ប្រាក់ចំណូលក្រោយពីកាត់ពន្ធចាត់ទុកថា ជាប្រាក់ចំណូលរបស់អ្នកបំរើសេវាកម្ម(ពេស្យា)។ សំរាប់អ្នកដែលមានចំណូលទាបជាង១៨.០០០យូរ៉ូក្នុងមួយឆ្នាំនឹងត្រូវកាត់ពន្ធ៣៣% និងអ្នកមានចំណូលច្រើនជាង៥៤.០០០យូរ៉ូ ក្នុងមួយឆ្នាំត្រូវកាត់ពន្ធដល់ទៅ៥២%។
តាមលទ្ធផលអង្កេតកាលពីខែតុលាកន្លងមកឃើញថា នៅក្នុងទីក្រុងអាំស្ទែរដាមមានស្ត្រីពេស្យាជិត៨.០០០នាក់ និង៣.០០០នាក់ផ្តល់សេវាកម្មជ្រើសរើសតាមទូកញ្ចក់ ខណៈដែលស្ថាប័នប្រមូលទិន្នន័យធ្វើការអង្កេតខាងលើមានជំនឿថា ៤០%នៃស្ត្រីពេស្យាក្នុងទូកញ្ចក់បានចូលក្នុងប្រព័ន្ធបង់ពន្ធរួចជាស្រេច ៕

ប៉ូលិសទំនើងស័ក្តិ៤កន្លះដេញបាញ់មនុស្សផ្អើលពេញហាង រត់គេចព្រំដែនកាំភ

January 14, 2011 at 3:38 PM

ការប្រកួតកីឡាសិស្សជ្រើសរើសជើងឯកបាល់ទាត់ និងបាល់ទះនៅស្រុកឱរ៉ាល់

January 14, 2011 at 3:34 PM

ការប្រកួតកីឡាសិស្សជ្រើសរើសជើងឯកបាល់ទះនៅស្រុកឱរ៉ាល់

ការប្រកួតកីឡាសិស្សជ្រើសរើសជើងឯកបាល់ទាត់ និងបាល់ទះនៅស្រុកឱរ៉ាល់

ខេត្តកំពង់ស្ពឺ ៖ កាលពីថ្ងៃទី១២ មករា នៅវិទ្យាល័យជាស៊ឹម ស្រុកឱរ៉ាល់ មានរៀបចំបើកការប្រកួតកីឡាសិស្សជ្រើសរើសជើងឯកបាល់ទាត់ បាល់ទះប្រចាំស្រុក ដែលការប្រកួតនេះបានចាប់ផ្តើមពីថ្ងៃទី១២ រហូតដល់ថ្ងៃទី១៤ មករា ដោយមានការចូលរួមពីលោកអភិបាល អភិបាលរងស្រុក មន្ត្រី បុគ្គលិកការិយាល័យអប់រំ លោកគ្រូ អ្នកគ្រូ សិស្សានុសិស្ស និងកងកំលាំងប្រដាប់អាវុធទូទាំងស្រុកឱរ៉ាល់ ។ លោកចាប ពៅ មន្ត្រីការិយាល័យអប់រំស្រុកតំណាងឱ្យលោកព្រំ គឹមថុន ប្រធានការិយាល័យអប់រំ យុវជន និងកីឡា បានមានប្រសាសន៍ថា វិស័យអប់រំមានការរីកចំរើនគួរឱ្យកត់សំគាល់ក្នុងរយៈពេល៥ឆ្នាំកន្លងទៅនេះ ក្រោមការគ្រប់គ្រងរបស់ការិយាល័យអប់រំស្រុក។ នេះក៏ជាលើកទី៥ផងដែរ ដែលការិយាល័យអប់រំបានរៀបចំកម្មវិធីប្រកួតដើម្បីចូលរួមលើកកំពស់លើវិស័យកីឡា និងជំរុញឱ្យសិស្សានុសិស្សចូលចិត្តលេងកីឡាប្រាស់ចាកពីអំពើអបាយមុខផ្សេងៗដូចជា គ្រឿងញៀន ល្បែងសីុសងដែលបង្កអសន្តិសុខដល់សង្គមជាតិ និងបំផ្លាញអនាគតខ្លួនឯង ។

ការរៀបចំឱ្យមានការប្រកួតនេះក៏ជាការផ្តល់ឱកាសឱ្យសិស្សានុសិស្សដែលជាកីឡាករ កីឡាការិនីបានបញ្ចេញនូវសមត្ថភាពទេពកោសល្យរបស់ខ្លួន និងរឹតចំណងទំនាក់ទំនងរវាងសិស្សសាលាមួយទៅសិស្សសាលាមួយទៀតឱ្យកាន់តែស្និទ្ធស្នាលថែមមួយកំរិតទៀត ។ លោកបន្តទៀតថា បើប្រៀបធៀប៤ឆ្នាំមុន យើងសង្កេតឃើញថា ការប្រកួតនៅឆ្នាំដំបូង២០០៦-២០០៧ មានកីឡាករ កីឡាការិនីចូលរួមប្រកួតចំនួន២៦៨នាក់ ស្រី៨៦នាក់ តែមកដល់ឆ្នាំ២០០៩-២០១០ កីឡាករ កីឡាការិនីចូលរួមមានចំនួន៦៥៨នាក់ ស្រី២៧២នាក់ ។ លទ្ធផលនៃការរីកចំរើននេះបានមកពីការខិតខំប្រឹងប្រែងរបស់មន្ត្រីជំនាញ នាយកសាលា ក៏ដូចជាលោកគ្រូ អ្នកគ្រូទាំងអស់ដែលបានជំរុញ និងលើកទឹកចិត្តដល់សិស្សានុសិស្សឱ្យស្រលាញ់វិស័យកីឡា ។

កម្មវិធីប្រកួតកីឡាសិស្សជ្រើសរើសជើងឯកបាល់ទាត់ និងបាល់ទះ ដែលរៀបចំឡើងបានយ៉ាងរលូននេះមានការចូលរួមចំណែកពីសប្បុរសជនលោកចែម សារីម អភិបាលស្រុកឱរ៉ាល់ លោកហេង ណារិទ្ធ បញ្ជាការរងកងរាជអាវុធហត្ថស្រុក លោកសូ សុខុម មេបញ្ជាការផ្នែកសឹករងស្រុក និងលោកសូ ហ៊ឹម ប្រធានមណ្ឌលសុខភាពស្រុកឱរ៉ាល់ ។ លោកជា មឿន អភិបាលរងស្រុកឱរ៉ាល់ បានផ្តាំផ្ញើដល់ប្អូនៗដែលជាកីឡាករ កីឡាការិនី និងអាជ្ញាកណ្តាលទាំងអស់ឱ្យប្រឹងប្រែងធ្វើការប្រកួតដណ្តើមយកជ័យលាភីដោយយុត្តិធម៌ និងត្រូវចេះអត់អោនឱ្យគ្នាទៅវិញទៅមក ៕

ព័ត៌មានបន្ថែមជុំវិញអាជ្ញាធរសៀមប្រគល់ពលករខ្មែរ៧នាក់

January 14, 2011 at 3:28 PM

ក្រុងប៉ោយប៉ែត ៖ ប្រជាពលរដ្ឋខ្មែរចំនួន៧នាក់ ក្នុងចំណោម៣០នាក់ ដែលសមត្ថកិច្ចសៀមបានឃាត់ខ្លួនកាលពីវេលាម៉ោងជាង៦ល្ងាច ថ្ងៃទី១១ មករា នោះ ត្រូវបានប្រគល់ឱ្យអាជ្ញាធរ និងសមត្ថកិច្ចកម្ពុជាវិញ ហើយនៅវេលាម៉ោង៦និង២០នាទីល្ងាច ថ្ងៃទី១៣ មករា ។ ពលរដ្ឋទាំង៧នាក់នេះត្រូវសមត្ថកិច្ចកម្ពុជា បានទៅយកពីកន្លែងឃុំខ្លួនសៀម ក្នុងខេត្តស្រះកែវ ដោយខ្លួនឯង និងមិនមានការជូនដំណើរពីភាគីសៀមនោះទេ ។ ពួកគេទាំង៧នាក់ពេលមកដល់លើស្ពានមិត្តភាពកម្ពុជា-ថៃ ត្រូវបានទទួល និងសួរសុខទុក្ខពីសំណាក់លោកអ៊ុង អឿន អភិបាលខេត្តបន្ទាយមានជ័យ និងមន្ត្រីស្ថាប័នពាក់ព័ន្ធ ព្រមទាំងកំលាំងគ្រប់កងឯកភាពទូទាំងខេត្តផងដែរ ។

ប្រជាពលរដ្ឋទាំង៧នាក់នោះ ១-ឈ្មោះសែម មករា អាយុ២២ឆ្នាំ មកពីខេត្តកំពង់ចាម ២-ឈ្មោះតូច ទិត្យ អាយុ១៩ឆ្នាំ មកពីខេត្តកំពង់ធំ ៣-ឈ្មោះទន់ ធា អាយុ២២ឆ្នាំ មកពីខេត្តសៀមរាប ៤-ឈ្មោះយ៉ា ពៅ អាយុ២៧ឆ្នាំ មកពី ខេត្តក្រចេះ ៥-ឈ្មោះកាណាត់ អាយុ២៣ឆ្នាំ មកពី ខេត្តកំពង់ចាម និងពីរនាក់ទៀតមិនផ្តល់អត្តសញ្ញាណ ព្រោះពួកគេរវល់តែត្រេកអររត់ចុះឡើង បន្ទាប់ពីទទួលបាច់ផ្កាពីអាជ្ញាធររួច ។ ពលករទាំងនេះសុទ្ធតែប្រុសៗ ជាកម្មករធ្វើស្បែកជើងជុំគ្នានៅផ្សារឡុងគ្លឿ ស្រុកអារញ្ញ ដោយភាគីសៀមចោទប្រកាន់ពួកគេថា ចូលទៅទឹកដីសៀមដោយខុសច្បាប់ ។

តាមប្រភពព័ត៌មានពីសមត្ថកិច្ចបង្ហើបឱ្យដឹងថា កម្មករទាំង៧នាក់នោះ ត្រូវតុលាការបង្គាប់ឱ្យដាក់លុយធានានៅក្រៅឃុំក្នុងម្នាក់ៗ៣.៤០០បាត ក្រោយពីត្រូវគេនាំឡើងតុលាការសៀមនៅខេត្តស្រះកែវ កាលពីវេលាម៉ោង១០និង៣០នាទីព្រឹកថ្ងៃទី១២ មករា ។ ប្រភពដដែលបន្តថា ការយឺតយ៉ាវក្នុងការប្រគល់ ព្រោះតែភាគីសៀមចង់ដឹកពួកគេ (៧នាក់) តាមរថយន្តទ្រុងដូចពលករដទៃទៀត ប៉ុន្តែត្រូវអាជ្ញាធរសមត្ថកិច្ចកម្ពុជា សុខចិត្តសុំដឹកតាមរថយន្តសមត្ថកិច្ចមកវិញ ៕

ឆេះហាងលក់ទំនិញមួយនៅភាគខាងត្បូងចិនស្លាប់8នាក់

January 14, 2011 at 3:27 PM

អ្នកពន្លត់អគ្គីភ័យមូលដ្ឋាននិយាយថា ហាងលក់ទំនិញមួយក្នុងខេត្តហ្គង់ដុងភាគខាងត្បូងប្រទេសចិន ត្រូវភ្លើងឆេះកាលពីព្រឹកថ្ងៃទី១៤ មករា បណ្តាលឱ្យស្លាប់មនុស្ស៨នាក់ និងម្នាក់ទៀតរងរបួសធ្ងន់ធ្ងរ ។ ក្នុងគ្រោះអគ្គីភ័យនេះភ្លើងបានឆេះនៅជាន់ទី១នៃអគារហាងនោះ កំពស់៥ជាន់ស្ថិតនៅតំបន់ប្រជុំជន Zhang mutou ក្នុងទីក្រុង Dongguan ។
តាមសេចក្តីរាយការណ៍ថា មនុស្ស៣នាក់ត្រូវបានរកឃើញស្លាប់នៅកន្លែងកើតហេតុ និង៥នាក់ទៀតស្លាប់ ក្រោយពេលបញ្ជូនដល់មន្ទីរពេទ្យ។
អ្នកពន្លត់អគ្គីភ័យបានប្រើពេលជាច្រើនម៉ោងដើម្បីពន្លត់ភ្លើង ហើយបានជំលៀសមនុស្ស១៤នាក់ ដែលរស់នៅលើអគារនោះ ។ ទោះបីជាបែបណា គេនៅមិនទាន់ដឹងច្បាស់ពីមូលហេតុនៃការឆេះហាងនេះនៅឡើយទេ ប៉ុន្តែអ្នកខ្លះអះអាងថា ដោយសារទុស្សេខ្សែភ្លើង ៕

ធនាគារពិភពលោក ៖ កំណើនសេដ្ឋកិច្ចចិនធ្លាក់ចុះវិញនៅឆ្នាំ2011 និង2012

January 14, 2011 at 3:27 PM

ធនាគារពិភពលោក WB និយាយកាលពីថ្ងៃទី១៣ មករា ថា អត្រាកំណើនផលទុនក្នុងស្រុកសរុប (GDP) របស់ប្រទេសចិននឹងធ្លាក់ចុះនៅត្រឹម៨,៧ភាគរយ នៅឆ្នាំ២០១១នេះ ពី១០ភាគរយកាលពីឆ្នាំ២០១០ ហើយបញ្ហាប្រឈមចំបងនោះគឺត្រូវធានាឱ្យប្រាកដថា វិធានការប្រឆាំងអតិផរណាមិននាំឱ្យ GDP ធ្លាក់ចុះថែមទៀត ។
WB ប៉ានស្មានថា ផលទុនក្នុងស្រុកសរុប (GDP) លើសាកលលោកដែលកើនឡើង៣,៩ភាគរយ កាលពីឆ្នាំ២០១០ កន្លងមកនឹងធ្លាក់ចុះនៅត្រឹម៣,៣ភាគរយ នៅឆ្នាំ២០១១ មុនពេលកើនឡើងដល់៣,៦ភាគរយនៅឆ្នាំ២០១២ ខាងមុខ។ WB ឱ្យដឹងទៀតថា ចំពេលកំពុងមានវិធានការប្រយុទ្ធប្រឆាំងអតិផរណា និងតំលៃអចលនទ្រព្យចេះតែកើនឡើងនោះកំណើនសេដ្ឋកិច្ចរបស់ចិននឹងត្រូវរំពឹងថា នឹងធ្លាក់ចុះដល់
៨,៤% នៅឆ្នាំ២០១២ ខាងមុខនេះ ។ ប៉ុន្តែទោះបីជាកំណើន GDP ធ្លាក់ចុះក៏ដោយ ក៏ចិននៅតែជាប្រទេសមានសេដ្ឋកិច្ចលូតលាស់ជាងគេនៅអាស៊ីដដែល ។
ជាមួយគ្នានេះតាមការព្យាករណ៍របស់ធនាគារពិភពលោក WB ថា អត្រាកំណើនជាទូទៅសំរាប់បណ្តាប្រទេសកំពុងអភិវឌ្ឍន៍នៅអាស៊ីនឹងធ្លាក់ចុះនៅត្រឹម៨ភាគរយពី៩,៣ភាគរយ កាលពីឆ្នាំ២០១០ កន្លងមក ។
លោក Hans Timmer នាយកផ្នែកព្យាករណ៍ទស្សនវិស័យពីការអភិវឌ្ឍន៍របស់ WB ថ្លែងថា សំរាប់ប្រទេសចិនការព្រួយបារម្ភជាចំបងនោះគឺថាតើត្រូវធានាឱ្យមានការផ្តល់ប្រាក់កម្ចីមានការថោក ដើម្បីទប់ស្កាត់ការធ្លាក់ចុះសេដ្ឋកិច្ចនៅពេលរដ្ឋាភិបាលចាត់វិធានការទប់ស្កាត់អតិផរណា ៕

ត្រីប្រហុកខែខ្នើតនេះបានកើនឡើង៤ថ្ងៃប្រមូលបានជាង២ពាន់តោន

January 14, 2011 at 3:20 PM

ខេត្តកំពង់ឆ្នាំង ៖ លោកកែវ ថា នាយខណ្ឌរដ្ឋបាលជលផលកំពង់ឆ្នាំង បានអះអាងថា ត្រីប្រហុកក្នុងខែខ្នើតនេះបានកើនឡើងគួរកត់សំគាល់បើប្រៀបធៀបឆ្នាំកន្លងទៅ រយៈពេល៤ថ្ងៃ គឺចាប់ពីថ្ងៃទី៥ដល់ថ្ងៃទី៨ កើត ខែបុស្ស ត្រូវនឹងថ្ងៃទី៩ ដល់១២ មករា ឆ្នាំ២០១១នេះ ត្រីប្រហុកប្រមូលបាន២.០៤៤តោន នៅតាមបណ្តាឡូត៍នេសាទនានាក្នុងខេត្តកំពង់ឆ្នាំង ។ បើប្រៀបធៀបឆ្នាំ២០១០ កន្លងទៅរយៈពេលដូចគ្នានេះដែរ គឺបានកើនឡើងដល់២០ភាគរយ ។

លោកនាយខណ្ឌរដ្ឋបាលជលផលកំពង់ឆ្នាំងបានបញ្ជាក់ថា នៅថ្ងៃ៩ កើត ត្រូវនឹងថ្ងៃទី១៣ មករា កន្លងទៅនេះ ត្រីប្រហុកកំពុងត្រូវទ្វេដង រហូតដល់ផុតខ្នើតខែបុស្សនេះ ដែលតំលៃ១គីឡូក្រាមត្រឹម៦០០រៀលទៅ១.០០០រៀលប៉ុណ្ណោះ នៅតាមបណ្តាឡូត៍នេសាទ ។ លោកបន្តថា ទិន្នផលត្រីឆ្នាំនេះសង្ឃឹមថា នឹងកើនឡើងជាងឆ្នាំចាស់ នេះក៏ដោយសារអំណោយផលទឹកទន្លេឡើង-ស្រកផង និងមួយវិញទៀត គឺមន្ត្រីជំនាញបានប្រឹងប្រែងអស់លទ្ធភាពដើម្បីទប់ស្កាត់ និងបង្ក្រាបរាល់បទល្មើសនេសាទមានដូចជាឆក់ លប ឬអួន ស្បៃមុង ការកាប់ព្រៃលិចទឹកជាដើម ។ល។

នៅតាមស្រុកមួយចំនួនដែលមានភូមិសាស្ត្រជាប់មាត់ទន្លេ គេឃើញប្រជាពលរដ្ឋជិះរទេះគោ គោយន្ត រ៉ឺម៉កម៉ូតូ ខ្លះម៉ូតូផ្ទាល់ខ្លួនបាននាំគ្នាមកកាត់ត្រីប្រហុកយ៉ាងណែនណាន់តាន់តាប់ ពិសេសនៅស្រុកកំពង់ត្រឡាច ។ ចំណែកអាជ្ញាធរមូលដ្ឋានតាមដងទន្លេវិញ ក៏ជួយសំរួលឱ្យបងប្អូនដែលមកពីឆ្ងាយមានកន្លែងសំរាក និងស្នាក់នៅដើម្បីធ្វើត្រីប្រហុក លើសពីនេះទៀតបានចាត់កំលាំងការពារសុវត្ថិភាពបងប្អូនទាំងនោះផងដែរ ។

គួរបញ្ជាក់ថា នៅភូមិសែប និងភូមិតាជេស ស្រុកកំពង់ត្រឡាច បងប្អូនដែលទិញត្រីប្រហុក គាត់ទិញពីក្រុមប្រជាពលរដ្ឋបណ្តែតមងនៅទីនោះតែម្តង គឺមិនបានទិញពីឡូត៍នេសាទផ្ទាល់ទេ ព្រោះត្រីប្រហុករបស់ឡូត៍នេសាទទាំងនោះគេលក់ទៅឱ្យក្រុមឈ្មួញវៀតណាមតែប៉ុណ្ណោះ ព្រោះគេទិញច្រើន ចំណែកប្រជាពលរដ្ឋមួយគ្រួសារមកធ្វើត្រីប្រហុកត្រឹមតែ៣០ទៅ៤០គីឡូក្រាម គឺត្រូវទិញពីអ្នកបណ្តែតមង ៕

ជនមុខសញ្ញាចោរកម្មធ្វើសកម្មភាពប៉ុនប៉ងរំលោភត្រូវអស់លក្ខណ៍

January 14, 2011 at 3:16 PM

ខេត្តក្រចេះ ៖ សមត្ថកិច្ចស្រុកសំបូរ បានឃាត់ខ្លួនជនសង្ស័យម្នាក់ ពីបទប៉ុនប៉ងរំលោភសេពសន្ថវៈទៅលើនាងក្រមុំតែមិនបានសំរេច ។ ជនសង្ស័យម្នាក់នេះជាមុខសញ្ញារបស់ប៉ូលិសលើករណីចោរកម្ម ដែលតុលាការបានចេញដីកាតាមចាប់ខ្លួនផងដែរ ។ ហេតុការណ៍នេះបានកើតឡើងកាលពីវេលាម៉ោង៣រសៀល ថ្ងៃទី១១ មករា នៅចំណុចលើច្រាំងទន្លេ ស្ថិតក្នុងឃុំកំពង់ចាម ស្រុកសំបូរ ។ តាមប្រភពមន្ត្រីប៉ូលិសឱ្យដឹងថា ជនសង្ស័យរូបនេះឈ្មោះទូច ភារុំ ហៅប្រុស អាយុ២៧ឆ្នាំ ស្រុកកំណើតនៅឃុំថ្មគ្រែ ស្រុកចិត្របុរី មុខរបរមិនពិតប្រាកដ ។

ប្រភពដដែលបានបន្តថា កាលពីវេលាម៉ោង៣រសៀលថ្ងៃទី១១ មករា ជនសង្ស័យបានធ្វើសកម្មភាពចាប់រំលោភទៅលើនារីរងគ្រោះអាយុ១៦ឆ្នាំ នៅច្រាំងទន្លេ ស្ថិតក្នុងឃុំកំពង់ចាម ស្រុកសំបូរ ខណៈដែលនារីរងគ្រោះបានចុះទៅច្រាំងទន្លេ ដើម្បីយកសន្ទូចឱ្យបងប្រុស ហើយជននេះឆ្លៀតឱកាសបានធ្វើសកម្មភាពចាប់រំលោភតែមិនបានសំរេចដូចបំណងទេ ដោយសារពេលកំពុងធ្វើសកម្មភាពនោះនារីរងគ្រោះបានរើប្រវាយស្រែកហៅឱ្យគេជួយ ក៏ត្រូវបានបងប្រុសរត់ទៅជួយទាន់ ។ រីឯជនសង្ស័យបន្ទាប់ពីធ្វើសកម្មភាពចាប់រំលោភមិនបានសំរេចក៏រត់ចូលព្រៃគេចខ្លួន តែត្រូវក្រុមគ្រួសាររបស់នារីរងគ្រោះប្ដឹងសមត្ថកិច្ចប៉ូលិសនៃអធិការដ្ឋានស្រុកតាមចាប់ខ្លួនបានក្នុងរយៈពេលមួយថ្ងៃបន្ទាប់ ។

មន្ដ្រីប៉ូលិសបានបន្តទៀតថា ជនសង្ស័យជាមុខសញ្ញាដែលប៉ូលិសកំពុងតាមប្រមាញ់ឃាត់ខ្លួនទៅតាមអំណាចដីការលេខ២៣១.នខ២០១០ ចុះថ្ងៃទី១៤ ខែធ្នូ ឆ្នាំ២០១០ របស់លោកតូច សាខឿន ចៅក្រមស៊ើបសួរនៃសាលាដំបូងខេត្ដពីបទចោរកម្ម ដោយជននេះនិងបក្សពួកបានធ្វើសកម្មភាពលួចទូករបស់ប្រជាពលរដ្ឋនៅឃុំថ្មគ្រែ ស្រុកចិត្របុរី មួយគ្រឿង ដែលបានប្រព្រឹត្ដនៅថ្ងៃទី១២ ខែធ្នូ ឆ្នាំ២០១០ កន្លងទៅ ហើយរត់គេចខ្លួន ។ ជនជាប់ចោទត្រូវកំលាំងសមត្ថកិច្ចកសាងសំណុំរឿងចាត់វិធានការបន្ដរទៅតាមផ្លូវច្បាប់ ៕

ក្រុមអាវលឿងគំរាមធ្វើការប្រមូលផ្តុំគ្នារហូតដល់ លោកអាប់ភីស៊ីត ចុះចេញ�

January 14, 2011 at 3:06 PM

សកម្មជនក្រុមឈ្មោះបណ្តាញអ្នកស្នេហាជាតិថៃ ឬក្រុមអាវលឿង បានគំរាមថា ពួកគេនឹងកេណ្ឌមនុស្សឱ្យបាន៥០.០០០នាក់ ធ្វើបាតុកម្មនៅបរិវេណខាងមុខក្រសួងការពារប្រទេស ប្រឆាំងលោកនាយករដ្ឋមន្ត្រីអាប់ភីស៊ីត ហើយនឹងបន្តការធ្វើបាតុកម្មរបស់ពួកគេរហូតដល់លោកអាប់ភីស៊ីត យល់ព្រមចុះចេញពីតំណែង ។ ក្រុមជ្រុលនិយមសៀមនេះបានគំរាមដូច្នេះក្រោយពីពួកគេបញ្ចប់ ការធ្វើបាតុកម្មនៅបរិវេណទល់មុខក្រសួងការបរទេស និងនៅវិមានរដ្ឋាភិបាលទាមទារឱ្យលោកអាប់ភីស៊ីត ឆ្លើយតបតាមការទាមទាររបស់ពួកគេទាក់ទិននឹងពលរដ្ឋថៃ៧នាក់ដែលត្រូវបានចាប់ខ្លួន ដោយអាជ្ញាធរកម្ពុជាកាលពីថ្ងៃទី២៩ ធ្នូ កន្លងមក ។
បាតុកម្មរបស់ក្រុមជ្រុលនិយមសៀម កាលពីថ្ងៃទី១៣ មករា ដឹកនាំ ដោយលោក Chaiwat Sinsuwong បានហែក្បួនទៅកាន់ក្រសួងការបរទេសនៅវេលារសៀល ដើម្បីដាក់សំពាធឱ្យលោកកាស៊ីត ភិរម្យ រដ្ឋមន្ត្រីការបរទេស និងលោកនាយករដ្ឋមន្ត្រី អាប់ភីស៊ីត ចុះចេញពីតំណែងដោយក្រុមនេះចោទប្រកាន់ពីបទបរាជ័យក្នុងការជួយសង្គ្រោះពលរដ្ឋថៃ៧នាក់នោះ ។
ក្រោយពីបញ្ចប់ការធ្វើបាតុកម្មរបស់ខ្លួន ក្រុមនេះបានធ្វើកិច្ចប្រជុំរយៈពេលមួយម៉ោងដើម្បីរិះរកមធ្យោបាយធ្វើយ៉ាងណាឱ្យលោកកាស៊ិត ភិរម្យ និងលោកអាប់ភីស៊ីត ចុះចេញពីតំណែងឱ្យខាងតែបាន ។
លោក Chaiwat Sinsuwong អះអាងថា លោកអាប់ភីស៊ីត មិនគួរដឹកនាំប្រទេសតទៅទៀតទេ ក្រោយពីបានទទួលស្គាល់ថា ពលរដ្ឋថៃទាំង៧នាក់នោះបានឈ្លានពានចូលទឹកដីកម្ពុជា ដោយខុសច្បាប់ ។ លោកអះអាងទៀតថា នឹងមានមនុស្សដល់ទៅ៥០.០០០នាក់ ចូលរួមក្នុងការប្រមូលផ្តុំលើកចុងក្រោយរបស់ពួក
គេ ។
ទាក់ទិនទៅនឹងគំរោងរបស់ក្រុមនេះដែលគំរាមធ្វើបាតុកម្ម នៅច្រកឆ្លងកាត់ព្រំដែនកម្ពុជា-ថៃ នៅខេត្តស្រះកែវ លោក Chaiwat និយាយថា ក្រុមរបស់លោកនឹងពិភាក្សាគ្នាបន្ថែមទៀត ហើយនឹងប្រកាសពីការសំរេចចិត្តរបស់ពួកគេនៅម៉ោង១១ព្រឹកថ្ងៃទី១៤ មករា ។
ដោយឡែកគេហទំព័រ MCOT របស់ថៃកាលពីថ្ងៃទី១៣ មករា បានផ្សាយថា ចំពេលកំពុងមានភាពតានតឹងជាថ្មីរវាងប្រទេសថៃ និងប្រទេសកម្ពុជាក្រោយពីការចាប់ខ្លួនពលរដ្ឋថៃ៧នាក់ ពីបទចូលទឹកដីកម្ពុជាដោយខុសច្បាប់លោកកាស៊ីត ភិរម្យ រដ្ឋមន្ត្រីការបរទេសថៃ រំពឹងថា រូបលោកនឹងជួបពិភាក្សាជាមួយសមភាគីកម្ពុជា លោកឧបនាយករដ្ឋមន្ត្រីហោ ណាំហុង ប៉ុន្តែលោកកាស៊ីត មិនបានបង្ហើបឱ្យដឹងអំពីប្រធានបទនៃការពិភាក្សានោះនៅឡើយ
ទេ ។ បើតាមអ្នកវិភាគមួយចំនួនថា ការពិភាក្សានោះគឺគ្មានអ្វីក្រៅពីបញ្ហាពលរដ្ឋថៃ៧នាក់នោះឡើយ ។
លោកកាស៊ីត បានព្រលយពាក្យដូចនេះក្រោយពីតុលាការកម្ពុជាបានសំរេចផ្តល់ការនៅក្រៅឃុំដោយបង់ប្រាក់ធានាដល់ជនជាប់ចោទ២នាក់ក្នុងចំណោមជនជាប់ចោទ៧នាក់គឺលោក Panich Viketsreth សមាជិកសភាគណបក្សប្រជាធិបតេយ្យកំពុងកាន់អំណាចរបស់លោកអាប់ភីស៊ីត និងអ្នកស្រី Naruemol Chitwaratana នៃបណ្តាញប្រជាជនប្រឆាំងអំពើពុករលួយក្រោយពីត្រូវឃុំខ្លួននៅពន្ធនាគារព្រៃ.សក្នុងប្រទេសកម្ពុជាអស់រយៈពេល២សប្តាហ៍ ។
គេហទំព័រ MCOT បានដកស្រង់សំដីលោកកាស៊ីត ដែលថ្លែងថា រូបលោកនឹងជួបពិភាក្សាជាមួយលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា នៅក្នុងប្រទេសឥណ្ឌូណេស៊ីក្នុងឱកាសនៃកិច្ចប្រជុំថ្នាក់រដ្ឋមន្ត្រីការបរទេសនៃប្រទេសនៅតំបន់អាស៊ីអាគ្នេយ៍ដែលគ្រោងធ្វើចាប់ពីថ្ងៃទី១៥ ដល់ថ្ងៃទី១៧ មករា ។
តុលាការកម្ពុជាកាលពីថ្ងៃទី១៣ មករា កន្លងមក បានសំរេចឱ្យជនជាប់ចោទសៀម២នាក់ ក្នុងចំណោមជនជាប់ចោទ៧នាក់ នៅក្រៅឃុំដោយការបង់ប្រាក់ធានាចំនួន១០.០០០បាត ក្នុងម្នាក់ប្រហែល១លានរៀល ប៉ុន្តែត្រូវត្រៀមខ្លួនឡើងតុលាការទៀតនៅពេលត្រូវកោះហៅ ។
ក្រោយពីលោក Panich Wikitsreth បាននៅក្រៅឃុំដោយការបង់ប្រាក់ធានាលោកនាយករដ្ឋមន្ត្រីអាប់ភីស៊ីត បានទូរស័ព្ទទៅលោកឱ្យពាំនាំសារលិខិតរបស់លោក (អាប់ភីស៊ីត) ទៅប្រាប់ពលរដ្ឋ៥នាក់ទៀតថា រដ្ឋាភិបាលនឹងខិតខំប្រឹងប្រែងឱ្យអស់ពីសមត្ថភាពដើម្បីជួយពួកគេ ៕

លោកម៉េដវេដេវទទួលស្គាល់ថា ការតស៊ូប្រឆាំងអំពើពុករលួយទៅមុខតិចតួច

January 14, 2011 at 3:01 PM

ប្រធានាធិបតីរុស្ស៊ីលោកឌីមីទ្រីម៉េដវេដេវ ទទួលស្គាល់កាលពីថ្ងៃទី១៣ មករា ថា ការតស៊ូប្រឆាំងអំពើពុករលួយដែលចាត់ទុកថា ជាឧបសគ្គសំខាន់ចំពោះវិនិយោគបរទេសនោះមានការរីកទៅមុខតិចតួចនៅរុស្ស៊ី ។ ប្រមុខរដ្ឋរុស្ស៊ីដែលអាណត្តិរបស់លោកត្រូវបញ្ចប់ក្នុងឆ្នាំ២០១២បានធ្វើការប្រយុទ្ធ ដើម្បីលុបបំបាត់ចោលអំពើពុករលួយដែលនោះជាអាទិភាពមួយក្នុងចំណោមអាទិភាពរបស់លោកពេលលោកឡើងកាន់អំណាចក្នុងក្តីសង្ឃឹមធ្វើសេរីភាវូនីយកម្មប្រព័ន្ធនយោបាយជាមរតកបន្សល់ទុកដោយអ្នកកាន់អំណាចមុនលោកគឺ លោកវ៉្លាឌីមៀរ ពូទីន បច្ចុប្បន្នជានាយករដ្ឋមន្ត្រី។
ក្នុងឱកាសនៃកិច្ចប្រជុំមួយរបស់ក្រុមប្រឹក្សាប្រឆាំងអំពើពុករលួយលោកម៉េដវេដេវថ្លែងថា លោកអ្នកដឹងច្បាស់ហើយពីសភាពការណ៍ ។ យើងទទួលស្គាល់ថា យើងទទួលបានជ័យជំនះតិចតួចក្នុងទិសដៅនេះ ។
យោងតាមចំណាត់ថ្នាក់របស់អង្គការតម្លាភាពអន្តរជាតិដែលមានទីស្នាក់ការនៅទីក្រុងប៊ែរឡាំងថា រុស្ស៊ីស្ថិតក្នុងចំណាត់ថ្នាក់ទី១៥៤ក្នុងចំណោមប្រជាជាតិ១៧៨ដែលមានអំពើពុករលួយលើពិភពលោក។ ក្នុងឆ្នាំ២០១០ រុស្ស៊ី ស្ថិតិមកនៅចំណាត់ថ្នាក់ទី១៤៦ ៕

សាលាក្តីគំរោងបើកសវនាការលសំណុំរឿង002ខែមិថុនា

January 14, 2011 at 2:58 PM

រាជធានីភ្នំពេញ ៖ យោងតាមមន្រ្តីសាលាក្តីខ្មែរក្រហមឲ្យដឹងថាសាលាក្តីគម្រោង ការបើកសវនាការជម្រះទោសសំណុំរឿង០០២ នៅខែមិថុនា ឆ្នាំ២០១១ ។ ក្នុងសំនុំរឿង០០២មានជនជាប់ចោទ៤រូបគឺលោក អៀង សារី លោក ខៀវ សំផន លោក នួន ជា និងលោកស្រី អៀង ធីរិទ្ធ ។ សាលាក្តីបន្តថាដើមបណ្ដឹងសំណុំរឿង០០២ ចំនួន២.១២៤នាក់ កំពុងចង់ដឹង និងចង់បានសំណងជំងឺចិត្តជាក់ស្ដែង ចំពោះអ្វីដែលពួកគាត់បានរងគ្រោះនៅក្នុងរបបខ្មែរក្រហមកន្លងមក នៅគ្រាដែលសំណុំរឿង ០០២ នឹងផ្ដើមជម្រះទោសនៅខែមិថុនា ឆ្នាំ២០១១ ខាងមុខ ។ កាលពីថ្ងៃទី៣០ ខែធ្នូ ឆ្នាំ២០១០ប្រជាពលរដ្ឋរងគ្រោះនៅក្នុងរបបខ្មែរក្រហមមកពីខេត្តកំពត និងខេត្តកំពង់ចាម ថតរូបអនុស្សាវរីយ៍ជាមួយមន្ត្រីសាលាក្ដីខ្មែរក្រហម នៅសាលសវនាការនៃសាលាក្ដីខ្មែរក្រហម នារាជធានីភ្នំពេញ ។

ស្របពេលជាមួយគ្នានេះដែរអង្គភាពគាំពារជនរងគ្រោះនៅ ក្នុងរបបខ្មែរក្រហមនៃសាលាក្ដីខ្មែរក្រហម មានគម្រោងការបើកវេទិកាថ្នាក់តំបន់សំខាន់មួយ លើកទី២ នៅក្នុងខេត្តកំពត នៅថ្ងៃទី១៧ ខែមករា ឆ្នាំ២០១១ ខាងមុខនេះ ដើម្បីពិភាក្សាផ្ដោតលើការទាមទារសំណងជំងឺចិត្តនៅក្នុងសំណុំរឿង ០០២ ដែលនឹងចាប់ផ្ដើមបើកការជម្រះទោសលើអតីតមេដឹកនាំក្នុងរបបខ្មែរ ក្រហមជាន់ខ្ពស់ មានលោក អៀង សារី លោក ខៀវ សំផន លោក នួន ជា និងលោកស្រី អៀង ធីរិទ្ធ នៅខែមិថុនា ឆ្នាំ២០១១ ខាងមុខ ។

ដើមបណ្ដឹងរដ្ឋប្បវេណីសំណុំរឿង ០០២នេះ មានចំនួន ២.១២៤នាក់ នៅក្នុងនោះមានជនជាតិខ្មែរ ជនជាតិចាម ខ្មែរកម្ពុជាក្រោម និងជនជាតិវៀតណាម ដែលជាជនរងគ្រោះនៅក្នុងរបបខ្មែរក្រហម កាលពីចន្លោះឆ្នាំ១៩៧៥ ដល់ឆ្នាំ ១៩៧៩ កន្លងទៅ ។ គេនៅចាំបានថាសាលាក្តីបានបើកវេទិកាថ្នាក់តំបន់លើក ទី១ បានធ្វើទ្បើងនៅក្នុងខេត្តក្រចេះ និងវេទិកាលើកទី២នេះ នៅក្នុងខេត្តកំពត និងមានប្រជាពលរដ្ឋចំនួន ៣៥០នាក់ចូលរួមមកពីខេត្តចំនួន៥ ក្នុងនោះមានខេត្តកែប ខេត្តកំពត ខេត្តតាកែវ ខេត្តកោះកុង និងខេត្តព្រះសីហនុ ដែលនឹងបានជួបជាមួយព្រះរាជអាជ្ញា ចៅក្រម និងមន្ត្រីរដ្ឋបាលនៃសាលាក្ដីខ្មែរក្រហម តំណាងស្ថានទូតអាល្លឺម៉ង់ និងស្ថានទូតបារាំង នៅថ្ងៃទី១៧ ខែមករា ឆ្នាំ២០១១ ខាងមុខនេះ។

មន្ត្រីសាលាក្តីបន្តថា នៅក្នុងសំណុំរឿង០០១ របស់ ឌុច មេគុកទួលស្លែង គឺមានដើមបណ្ដឹងរដ្ឋប្បវេណីចំនួន ៩០នាក់ បើធៀបទៅនឹងសំណុំរឿង០០២ មានដើមបណ្ដឹងរដ្ឋប្បវេណីចំនួន ២.១២៤នាក់ គឺសំខាន់បំផុតគឺថា ការបណ្ដុះបណ្ដាលបងប្អូនដែលជាដើមបណ្ដឹងរដ្ឋប្បវេណីនៃសំណុំរឿង០០២ គាត់ត្រៀមខ្លួន ដើម្បីចូលរួមនៅក្នុងសំណុំរឿង០០២ តើគាត់ត្រូវត្រៀមលក្ខណៈយ៉ាងដូចម្ដេចក្នុងនាមគាត់ជាដើមបណ្ដឹង រដ្ឋប្បវេណី? តើសហការជាមួយខាងមេធាវីដើមបណ្ដឹង រដ្ឋប្បវេណី។

មន្ត្រីសម្របសម្រួលនៃអង្គភាពគាំពារជនរងគ្រោះ លោក អ៊ឹម សុភា បានមានប្រសាសន៍ថា កន្លងមកដើមបណ្ដឹងរដ្ឋប្បវេណីសំណុំរឿង០០២នេះ បានដាក់សំណុំឯកសារទាមទារសំណងជំងឺចិត្តចំនួន ៤ប្រភេទ មានដូចជា ទី១ ការអប់រំ ទី២ ឯកសារកត់ត្រាទុក ទី៣ ការធ្វើឲ្យមានការចងចាំជាទូទៅ និងទី៤ ការស្ដារនីតិសម្បទាផ្លូវចិត្ត ឬវិបត្តិផ្លូវចិត្តដល់ជនរងគ្រោះ ៕

កាត់បន្ថយឯកអភ័យឯកសិទ្ធិមួយផ្នែករបស់ប្រមុខរដ្ឋាភិបាលអ៊ីតាលី

January 14, 2011 at 2:47 PM

អភ័យឯកសិទ្ធិពុំត្រូវទទួលការកាត់ក្តីនៅតុលាការដែលប្រមុខរដ្ឋាភិបាលអ៊ីតាលី លោកស៊ីលវីយ៉ូ ប័រលូស្កូនី ទទួលបានរហូតដល់ពាក់កណ្តាលខែតុលា ត្រូវបានតុលាការធម្មនុញ្ញអ៊ីតាលីដកចេញមួយផ្នែកកាលពីថ្ងៃទី១៣ មករា ។ យោងតាមបណ្តាម៉ាស៊ីនឃោសនាក្នុងស្រុកថា ចៅក្រមទាំង១៥រូប របស់តុលាការធម្មនុញ្ញបានជ្រើសរើសយកដំណោះស្រាយសំរបសំរួលមួយរវាងការបដិសេធ ឬការយល់ព្រមនៃច្បាប់មានឈ្មោះថា «ការរារាំងស្របច្បាប់» ដែលអាចឱ្យលោកប័រលូស្កូនី ចៀសផុតពីការឡើងតុលាការបើដរាបណាលោកនៅធ្វើប្រមុខរដ្ឋាភិបាល ។ តុលាការសំរេចកាត់បន្ថយការអនុវត្តច្បាប់នេះដែលអនុម័តកាលពីខែមេសា កន្លងមកនេះ ហើយមានសុពលភាពរហូតដល់ខែតុលា ឆ្នាំ២០១១ តែពុំលុបចោលសុពលភាពនៃច្បាប់នេះឡើយ ។ តុលាការលុបចោលជាពិសេសនូវលក្ខណៈស្វ័យប្រវត្តិដែលអាចឱ្យលោកប័រលូស្កូនី ចៀសផុតពីការឡើងតុលាការ ខណៈដែលប្រមុខរដ្ឋាភិបាលរូបនេះជាកម្មវត្ថុនៃរឿងក្តី២ នៅទីក្រុងមីឡានពីបទក្លែងបន្លំពន្ធ និងអំពើពុករលួយរបស់សាក្សី ។ ប្រមុខរដ្ឋាភិបាលអ៊ីតាលីទទួលការចោទប្រកាន់ពីបទសូកប៉ាន់ អតីតមេធាវីមួយរូប លោក DAVID MILLS ដើម្បីឱ្យមេធាវីរូបនេះផ្តល់ភស្តុតាងក្លែងក្លាយ ។ លោកក៏ជាប់សង្ស័យដែរ ពីបទពង្វាងយកមូលនិធិ និងក្លែងបន្លំពន្ធក្នុងការលក់សិទ្ធិទូរទស្សន៍ ៕

លើកគ្នាអបអរពីជោគជ័យនៃការតវ៉ាក្រោយសង្កថារបស់ប្រធានាធិបតីទុយនីស៊ី

January 14, 2011 at 2:45 PM

កាលពីយប់ថ្ងៃទី១៣ មករា ក្រោយពីសង្កថាតាមទូរទស្សន៍របស់ប្រធានាធិបតីទុយនីសីុដែលបញ្ជាក់ថា លោកនឹងមិនឈរឈ្មោះសំរាប់ការបោះឆ្នោតប្រធានាធិបតីឆ្នាំ២០១៤ ទៀត ហើយប្រកាសពីការបញ្ចុះតំលៃនំបុ័ង និងផ្តល់សេរីភាពដល់ការបញ្ចេញមតិហ្វូងមនុស្សបានលើកគ្នាស្រែកអបអរពីជោគជ័យនៃការតវ៉ារបស់ខ្លួន។
ក្រោយចប់សង្កថានាយប់ថ្ងៃទី១៣ មករា នោះរបស់លោកប្រធានាធិបតីបេនអាលី ប្រជាជនរដ្ឋធានីទុយនីសជាច្រើនពាន់នាក់ពុំអើពើនឹងបំរាមគោចរបានលើកគ្នាមកកាន់កណ្តាលទីក្រុង និងតាមបណ្តាមហាវិថីជាយក្រុងសំដែងចលនារីករាយយ៉ាងខ្លាំង ដោយនាំគ្នាស្រែកពីជ័យជំនះនៃការតវ៉ារបស់ពួកគេ ហើយមានការចុចស៊ីប្លេយានយន្តយ៉ាងកងរំពង។ ក្នុងសង្កថាលោកប្រធានាធិបតីបេនអាលីបានសំរាលភាពតានតឹងនៅទីក្រុងទុយនីស និងតំបន់ជុំវិញ ដោយប្រកាសពីការសំរេចចិត្តសំខាន់ៗជាច្រើន។ សេចក្តីសំរេចចិត្តដំបូងគេលោកថា លោកនឹងមិនឈរឈ្មោះបោះឆ្នោតសំរាប់អាណត្តិទី៦ក្នុងឆ្នាំ២០១៤ទៀតឡើយ ហើយក្នុងពេលលោកនៅកាន់អំណាចលោកនឹងរៀបចំឱ្យមានលទ្ធិប្រជាធិបតេយ្យ។ លោកថ្លែងថា លែងមានប្រធានាធិបតីអស់មួយជីវិត ដូចការចែងនៃរដ្ឋធម្មនុញ្ញទៀតហើយ។ លោកបញ្ជាក់ថា សភាពការណ៍បច្ចុប្បន្នចាំបាច់ត្រូវមានការផ្លាស់ប្តូរយ៉ាងច្រើន។
មនុស្ស៦៦នាក់បានត្រូវស្លាប់តាំងពីចាប់ផ្តើមភាពចលាចលនៅទុយនីស៊ីស្ទើរតែពេញមួយខែមក។ នេះជាតួលេខរបស់សហព័ន្ធអន្តរជាតិនៃសម្ព័ន្ធសិទ្ធិមនុស្ស FIDH ។ តុល្យការនេះមានការកើនឡើង ដោយនារសៀលថ្ងៃទី១៣ មករា បាតុករម្នាក់ទៀតត្រូវប៉ូលិសបាញ់ស្លាប់ក្នុងសង្កាត់មួយនៃទីក្រុងទុយនីស ៕

រដ្ឋមន្ត្រីការពារប្រទេសកូរ៉េខាងត្បូង និងអាមេរិកនឹងជួបពិភាក្សាពីការ

January 14, 2011 at 2:45 PM

រដ្ឋមន្ត្រីការពារប្រទេសកូរ៉េខាងត្បូង និងរដ្ឋមន្ត្រីការពារប្រទេសសហរដ្ឋអាមេរិកគ្រោងជួបពិភាក្សាគ្នាអំពីការជំរុញការកំញើញប្រឆាំងការបង្កហេតុរបស់កូរ៉េខាងជើង ។
រដ្ឋមន្ត្រីការពារប្រទេសសហរដ្ឋអាមេរិក លោករ៉ូប៊ែត ហ្គេត ដែលអញ្ជើញទៅបំពេញទស្សនកិច្ចនៅទីក្រុងប៉េកាំង និងទីក្រុងតូក្យូ នឹងឈប់សំចតរយៈពេលខ្លីក្នុងទីក្រុងសេអ៊ូល នៅថ្ងៃទី១៤ មករា ដើម្បីជួបពិភាក្សាជាមួយសមភាគីកូរ៉េខាងត្បូងលោក Kim Kwan-Jin ជាការជួបគ្នាលើកដំបូងចាប់តាំងពីលោក Kim Kwan-Jin កាន់តំណែងជារដ្ឋមន្ត្រី ការពារប្រទេសពីខែធ្នូ ឆ្នាំ២០១០ មក ។
តាមប្រភពព័ត៌មានថា ប្រមុខការពារប្រទេសទាំង២នឹងពិភាក្សាគ្នាអំពីការកំញើញប្រឆាំងកូរ៉េខាងជើងកុំឱ្យកូរ៉េខាងជើងបង្កហេតុទៀត ។
បច្ចុប្បន្នក្រុងសេអ៊ូល និងក្រុងវ៉ាស៊ីនតោនបានសហការគ្នាដើម្បីឆ្លើយតបចំពោះភាពតានតឹងចេះតែកើនឡើងនៅឧបទ្វីបកូរ៉េ ដោយធ្វើសមយុទ្ធយោធារួមគ្នាជាច្រើនកាលពីចុងឆ្នាំ២០១០ ៕

ផឹកទឹកត្នោតជូរស្រវឹងខឹងម្តាយមិនឱ្យលុយដុតផ្ទះចោលឆេះម៉ដ្ឋ

January 14, 2011 at 2:32 PM

ខេត្តកណ្តាល ៖ បុរសម្នាក់ត្រូវបានប៉ូលិសស្រុកកោះធំចាប់ខ្លួនកាលពីវេលាម៉ោង១០និង១៥នាទីព្រឹក ថ្ងៃទី១៣ មករា ២០១១ បន្ទាប់ពីបុរសរូបនោះផឹកទឹកត្នោតជូរស្រវឹងត្រឡប់មកផ្ទះវិញ រករឿងម្តាយ ហើយបានដុតផ្ទះខ្លួនឯងឆេះម៉ដ្ឋ កាលពីវេលាម៉ោង៩និង៣០នាទីយប់ថ្ងៃទី១២ ធ្នូ នៅភូមិស្វាយតាមេម ឃុំព្រែកស្តី ស្រុកកោះធំ ។ ផ្ទះដែលត្រូវបុរសចិត្តភ្លើងដុតឆេះម៉ដ្ឋរួមទាំងសំភារប្រើប្រាស់ផងនោះទំហំ៤ម៉ែត្រ គុណនឹង៥ម៉ែត្រ គឺផ្ទះតៀមផ្ទាល់ដីធ្វើអំពីឈើប្រក់ស័ង្កសី ។

លោកសឹក ស៊្រុន នាយផ្នែកព្រហ្មទណ្ឌស្រុកកោះធំបានឱ្យដឹងថា ជនដែលត្រូវឃាត់ខ្លួនឈ្មោះថូ សុខលីម អាយុ២៤ឆ្នាំ មុខរបរនេសាទ។ ការឃាត់ខ្លួនបុរសនេះគឺធ្វើតាមពាក្យបណ្តឹងម្តាយ ឈ្មោះពេញ ផាន អាយុ៤៥ឆ្នាំ រស់នៅភូមិ-ឃុំកើតហេតុខាងលើ ។ យោងតាមសំដីម្តាយឈ្មោះពេញ ផាន ឱ្យដឹងទៀតថា នៅល្ងាចថ្ងៃទី១២ មករា កូនចង្រៃឈ្មោះថូ សុខលីម បានចេញពីផ្ទះទៅហូបទឹកត្នោតជូរជាមួយមិត្តភក្តិនៅក្នុងភូមិ ។ លុះត្រឡប់មកផ្ទះវិញនៅម៉ោង៩និង៣០នាទីយប់ឈ្មោះថូ សុខលីម មានសភាពស្រវឹងជោគជាំ ហើយបានឈ្លោះប្រកែកជាមួយរូបគាត់ជាម្តាយពីរឿងសុំលុយធ្វើសោហ៊ុយទៅភ្នំពេញដើម្បីរកការងារធ្វើ ប៉ុន្តែរូបគាត់មិនព្រមឱ្យ ព្រោះខ្លាចវាយកទៅចាយទៀត...ក៏កើតជាជម្លោះទាស់ពាក្យសំដីគ្នាឡើង ហើយគាត់ក៏ដើរចេញទៅផ្ទះអ្នកជិតខាងបាត់ទៅបន្តិចក្រោយមកស្រាប់តែគេផ្អើលអាកូនចង្រៃនេះដុតផ្ទះចោលតែម្តង ៕

សាច់ញាតិ វីរៈ ស៊ុមខ្វាមឃីត មិនត្រូវអនុញ្ញាតឱ្យចូលសួរសុខទុក្ខ ខណៈជនជាប់ចោទថៃ៣

January 14, 2011 at 11:53 AM

រាជធានីភ្នំពេញ ៖ សាច់ញាតិ និងមិត្តភក្តិរបស់ជនជាប់ចោទថៃឈ្មោះ វីរៈ ស៊ុមខ្វាមឃីត ដែលកំពុងជាប់ឃុំនៅគុកព្រៃ.សក្នុងរាជធានីភ្នំពេញ ត្រូវបានឆ្មាំគុកបណ្តេញចេញទៅក្រៅបរិវេណ មិនអនុញ្ញាតឱ្យចូលទៅជួប វីរៈ ស៊ុមខ្វាមឃីត ទេ ខណៈពួកគេប៉ុនប៉ងចូលទៅរកសួរសុខទុក្ខកាលពីវេលាម៉ោង១០ ព្រឹក ថ្ងៃទី១៤ មករា ២០១១ នៅពន្ធនាគារព្រៃ.ស ។ ចំណែកជនជាប់ចោទថៃ៣នាក់ក្នុងចំណោម៥នាក់ ដែលលេចឮដំណឹងថា មេធាវីការពារក្តីរបស់ពួកគេកំពុងស្វះស្វែងឱ្យមានការអនុញ្ញាតស្ថិតនៅក្រៅឃុំនោះ ក៏ពុំទាន់ទទួលបានលទ្ធផលវិជ្ជមាននៅឡើយដែរ។
ជាមួយគ្នានេះអ្នកកាសែតបរទេស និងកម្ពុជាជាច្រើន ដែលបានទៅរង់ចាំកកកុញនៅមុខបរិ វេណពន្ធនាគារព្រៃ.សដើម្បីចង់ដឹងពីលទ្ធផល ទាំងការចូលទៅសួរសុខទុក្ខ វីរៈ ស៊ុមខ្វាមឃីត និងការដោះលែងជនជាតិថៃ៣នាក់ផងនោះ ត្រូវបានចាកចេញវិញទាំងការខកចិត្ត ។ ឆ្មាំពន្ធនាគារព្រៃ.សបាននិយាយប្រាប់ថា មិនមានការដោះលែង ឬអនុញ្ញាតឱ្យជនជាតិថៃ៣នាក់ក្នុងចំណោម៥នាក់ស្ថិតនៅក្រៅឃុំនោះទេ នាព្រឹកនេះ (ទី១៤ មករា ២០១១) ចំណែកឯសាច់ញាតិរបស់ឈ្មោះ វីរៈ ស៊ុមខ្វាមឃីត ក៏មិនត្រូវអនុញ្ញាតឱ្យចូលសួរសុខទុក្ខដែរ ព្រោះគ្មានលិខិតអនុញ្ញាតពីក្រសួងមហាផ្ទៃ ឬលិខិតអនុញ្ញាតពីតុលាការ...ប៉ុន្តែគេមានលិខិតអនុញ្ញាតពីស្ថានទូតថៃតែប៉ុណ្ណោះ ។
លោក ប៉ិច វិច្ឆិកា មេធាវីការពារក្តីជនជាប់ចោទថៃ៣នាក់ក្នុងចំណោម៥នាក់ បានមានប្រសាសន៍ថា មកដល់វេលាម៉ោងថៃត្រង់ ទី១៤ មករា ២០១១ នេះ លោកមិនទាន់ទទួលបានព័ត៌មានពីខាងតុលាការពាក់ព័ន្ធនឹងការអនុញ្ញាតឱ្យជនជាប់ចោទថៃ៣នាក់ស្ថិតនៅក្រៅឃុំនៅឡើយទេ ៕

កាស៊ីត ភីរម្យ រំពឹងថានឹងជួបឧបនាយករដ្ឋមន្រ្តី ហោ ណាំហុង ខណៈក្រុមអាវលឿង បង្កើនការ�

January 14, 2011 at 11:53 AM

លោកឧបនាយករដ្ឋមន្រ្តី ហោ ណាំហុង និងលោកកាស៊ីត ភីរម្យ

ប្រភពពីប្រទេសថៃ ៖ យោងតាមបណ្តាញ ព័ត៌មានក្នុងប្រទេសថៃបានឱ្យដឹងថា លោក កាស៊ីត ភីរម្យ រដ្ឋមន្រ្តីការបរទេសថៃរំពឹងថា នឹងបានជួបជាមួយលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីការបរទេសកម្ពុជា នាឱកាសប្រជុំរដ្ឋមន្រ្តីការបរទេស ដែលនឹងប្រព្រឹត្តទៅឆាប់ៗនេះក្នុងប្រទេសឥណ្ឌូណេស៊ី ។
ក្រុមអ្នកតាមដានបានលើកឡើងថា ការជួបគ្នារវាងប្រមុខការទូតទាំង២ កម្ពុជា-ថៃ នោះ អាននឹងកើតមានពិតប្រាកដ...ហើយថាពួកលោកនឹងពិភាក្សាគ្នាផងដែរ ទាក់ទិននឹងជនជាប់ចោទថៃ៧នាក់ ដែលជាប់ឃុំក្នុងប្រទេសកម្ពុជា ប៉ុន្តែលទ្ធផលយ៉ាងណានោះពិបាកស្មានណាស់។
ជាមួយគ្នានេះផងដែរ បណ្តាញអ្នកស្នេហាជាតិថៃហៅថា ក្រុមអាវលឿង បានអះអាងថា ពួកគេនឹងប្រមូលមនុស្សយ៉ាងហោចណាស់៥ម៉ឺននាក់ ធ្វើបាតុកម្មនៅមុខវិមានរដ្ឋាភិបាលនា ទីក្រុងបាងកក សប្តាហ៍ក្រោយ ប្រយោជន៍ ទាមទារឱ្យលោកនាយករដ្ឋមន្រ្តី អាប់ភីស៊ីត វេចាជីវ៉ា និងលោកកាស៊ីត ភីរម្យ រដ្ឋមន្រ្តីការបរទេសចុះចេញពីតំណែង ពាក់ព័ន្ធនឹងកំសោយក្នុងការធ្វើឱ្យពលរដ្ឋថៃ៧នាក់រួចខ្លួនពីការចាប់ឃុំឃាំងរបស់អាជ្ញាធរកម្ពុជាកាលពីព្រឹកថ្ងៃទី២៩ ធ្នូ ២០១០ ៕

នាយករដ្ឋមន្ត្រីជប៉ុនត្រូវប្រកាសពីការរុះរើរដ្ឋាភិបាលលោក

January 14, 2011 at 10:59 AM

នាយករដ្ឋមន្ត្រីជប៉ុនលោកណាអូតូកាន ថ្លែងកាលពីថ្ងៃទី១៣ មករា ថា លោកនឹងរុះរើរដ្ឋាភិបាលរបស់លោក ដើម្បីបង្កើតរដ្ឋាភិបាលដែលខ្លាំងមួយ ។ ក្នុងកិច្ចប្រជុំមួយរបស់គណបក្សកាន់អំណាចនៅជីបាលោកបានថ្លែងថា ការរុះរើរដ្ឋាភិបាលនឹងថ្នាក់ដឹកនាំរបស់គណបក្សប្រជាធិបតេយ្យនិងត្រូវធ្វើនាថ្ងៃទី១៤ មករា ដើម្បីបង្កើតក្រុមដែលរឹងមាំមួយក្នុងគោលបំណងធ្វើការកែទំរង់ប្រទេស ។ លោកកានបានបដិសេធពាក្យដែលថា ការផ្លាស់ប្តូរនេះដើម្បីផ្លាស់ប្តូរសមាជិក២រូបរបស់រដ្ឋាភិបាលក្នុងនោះរួមមានប្រមុខខុទ្ទកាល័យលោកសេនហ្គោគូ យ៉ូស៊ីតូ ដែលទទួលការដកសេចក្តីទុកចិត្តដោយព្រឹទ្ធសភាគ្រប់គ្រងដោយគណបក្សប្រឆាំងកាលពីខែវិច្ឆិកាកន្លងមកនេះ ។

ក៏ប៉ុន្តែលោកកានត្រូវការនូវការគាំទ្ររបស់គណបក្សប្រឆាំង ដើម្បីឱ្យមានការអនុម័តលើថវិការដ្ឋាសំរាប់ឆ្នាំសារពើពន្ធ២០១១ ដែលចាប់ផ្តើមពីថ្ងៃទី១ មេសា ខាងមុខនេះទៅដោយទាមទារឱ្យមានការចាកចេញរបស់បណ្តារដ្ឋមន្ត្រីដែលដកសេចក្តីទុកចិត្ត ។ ថវិការដ្ឋនេះមានដល់ទៅប្រមាណជា៩២.៤០០.០០០.០០០.០០០ យេន ។ លោកសេនហ្គោគូ អាចត្រូវជំនួសដោយលោកយូគីអូ អឺដា បច្ចុប្បន្នជាអគ្គលេខាធិការរងរបស់គណបក្សប្រជាធិបតេយ្យ ៕

សមត្ថកិច្ចចាប់ខ្លួនយុវសិស្សដែលវាយ និងគប់ដុំថ្មសំលាប់មនុស្ស

January 14, 2011 at 10:57 AM

ជនសង្ស័យដែលត្រូវចាប់ខ្លួន ឈ្មោះយ័ន គុយហេងដែលជាជនដៃដល់វាយ និងគប់ដុំថ្មសំលាប់ទៅលើយុវជនម្នាក់

រាជធានីភ្នំពេញ ៖ យុវសិស្សវិទ្យាល័យជា ស៊ីម សន្ធរម៉ុក ម្នាក់ដែលជាជនដៃដល់វាយ និងគប់ដុំថ្មសំលាប់ទៅលើយុវជនម្នាក់ កាលពីវេលាម៉ោង១០និង១៥នាទីយប់ថ្ងៃទី១០ មករា នៅមុខមន្ទីរពេទ្យព្រះកុសុមៈ ក្នុងសង្កាត់ទឹកល្អក់ទី២ ខណ្ឌទួលគោក ត្រូវសមត្ថកិច្ចខណ្ឌទួលគោក សហការជាមួយស្នងការដ្ឋានខេត្តព្រះសីហនុ និងស្នងការខេត្តកំពត ស្រាវជ្រាវចាប់ខ្លួនបានកាលពី វេលាម៉ោង១២ថ្ងៃត្រង់ថ្ងៃទី១៣ មករា នៅចំណុចភូមិព្រែកអំពិល ឃុំកោះតូច ស្រុកទឹកឈូ ខេត្តកំពត ។

ជនសង្ស័យដែលត្រូវចាប់ខ្លួន ឈ្មោះយ័ន គុយហេង ភេទប្រុស អាយុ១៩ឆ្នាំ ជាសិស្សថ្នាក់ទី១២ វិទ្យាល័យជា ស៊ីម សន្ធរម៉ុក មានទីលំនៅផ្ទះជួលលេខ៤៤ ផ្លូវលេខ១៣៨ សង្កាត់ទឹកល្អក់ទី១ ខណ្ឌទួលគោក និងមានស្រុកកំណើតនៅមណ្ឌលទី៣ សង្កាត់លេខ២ ក្រុងព្រះសីហនុ ខេត្តព្រះសីហនុ ។ គួររំលឹកថា កាលពីវេលាម៉ោង១០និង១៥នាទីយប់ ថ្ងៃទី១០ មករា ជនសង្ស័យ រួមទាំងបក្សពួកប្រមាណ៦ទៅ៧នាក់ បានធ្វើសកម្មភាពគប់ និងវាយទៅលើឈ្មោះជា ហ៊ុល ហៅតឿ ភេទប្រុស អាយុ២៣ឆ្នាំ មានទីលំនៅផ្ទះជួល សង្កាត់ទឹកល្អក់ទី១ ខណ្ឌទួលគោក បណ្តាលឱ្យស្លាប់នៅពេលបញ្ជូនទៅកាន់មន្ទីរពេទ្យព្រះកុសុមៈ បានប្រមាណជាង៥ម៉ោង ។ បន្ទាប់ពីវាយសំលាប់មនុស្សរួចមក ជនសង្ស័យបានរត់គេចខ្លួនទៅស្រុកកំណើតខេត្តព្រះសីហនុ ហើយពេលដឹងខ្លួនថា សមត្ថកិច្ចកំពុងស្វែងរកតាមចាប់ ក៏គេចខ្លួនទៅផ្ទះបងប្អូនខេត្តកំពតបន្តទៀត ត្រូវសមត្ថកិច្ចតាមចាប់បានតែម្តង ៕

អ្នកលេងកាំភ្លើងអាកាបាញ់រះកក្រើកភូមិបង្កឱ្យមនុស្សភ័យខ្លាចរត់ស្ទើរ�

January 14, 2011 at 10:49 AM

បុរសម្នាក់បានយកកាំភ្លើងអាកាបាញ់រះកក្រើកពេញភូមិទៅលើគ្រួសារមួយ

ហេតុការណ៍បាញ់រះនោះត្រូវងាប់មេគោ១ក្បាល និងរងរបួសមេគោ១ក្បាលផងដែរ

រាជធានីភ្នំពេញ ៖ បុរសដែលគេស្គាល់មុខច្បាស់ម្នាក់បានស្ពាយកាំភ្លើងអាកាបាញ់រះកក្រើកពេញភូមិទៅលើគ្រួសារមួយមានគ្នាពីរនាក់ប្តី-ប្រពន្ធ បណ្តាលឱ្យរត់ប៉ផាប់ពភីងស្ទើរលស់ព្រលឹង និងបង្កឱ្យប្រជាពលរដ្ឋភ័យរន្ធត់យ៉ាងខ្លាំង កាលពីវេលាម៉ោង១២និង៥៥នាទីរំលងអធ្រាត្រឈានចូលថ្ងៃទី១៤ មករា ២០១១ ស្ថិតក្នុងភូមិត្រពាំងថ្លឹង សង្កាត់ពន្សាំង ខណ្ឌដង្កោ ។ បុរសរងគ្រោះឈ្មោះអឿន សំអូន ហៅយក់ អាយុ២៦ឆ្នាំ មានប្រពន្ធឈ្មោះជា ចាន់ អាយុ២៤ឆ្នាំ ស្នាក់នៅភូមិកើតហេតុខាងលើ បាននិយាយឱ្យដឹងថា បុរសជនដៃដល់ត្រូវបានស្គាល់មុខ និងឈ្មោះច្បាស់ណាស់ ប៉ុន្តែមិនទាន់បង្ហើបឱ្យដឹងនៅឡើយទេ ព្រោះទុកឱ្យប៉ូលិសស៊ើបអង្កេតក្រសោបជននេះ ។

កាលពីវេលារំលងអធ្រាត្របុរសនោះបានមកធ្វើជាសួររកលុយ និងគំរាមរកប្លន់ ប៉ុន្តែពួកគាត់ពីរនាក់ប្តី-ប្រពន្ធបានអង្វរករថា អត់លុយទេ...ក្រីក្រណាស់...ស្រាប់តែជននោះដេញបាញ់យកម៉ាឈ្នះដៃតែម្តង បណ្តាលឱ្យពួកគាត់រត់គេចស្ទើរដាច់ខ្យល់ ។ ហេតុការណ៍បាញ់រះនោះត្រូវបានគេសរុបប្រហែល១៦ទៅ១៨គ្រាប់ មានស្នាមធ្លុះធ្លាយនៅលើផ្ទះជនរងគ្រោះងាប់មេគោ១ក្បាល និងរងរបួសមេគោ១ក្បាលផងដែរ ហើយឥឡូវនេះប៉ូលិសកំពុងតាមរកមុខសញ្ញាអ្នកលេងកាំភ្លើងវែងយ៉ាងញាប់ដៃញាប់ជើង ៕

យ៉ុង ចាន់កន្និកា ផ្កាមួយទងនៅតែរីកក្នុងសួនសិល្បៈ

January 14, 2011 at 10:48 AM

កញ្ញាយ៉ុង ចាន់កន្និកា ច្រៀងនៅលើវេទិកាប្រគំតន្ត្រី

រាជធានីភ្នំពេញ ៖ ក្នុងវ័យ២២ឆ្នាំ កញ្ញាយ៉ុង ចាន់កន្និកា បានដុះដាលចេញពីសាកលវិទ្យាល័យភូមិន្ទវិចិត្រសិល្បៈកាលពីឆ្នាំ២០០០ ។ មុនពេលរីកដុះដាលក្នុងអាជីពចំរៀង នាងប្រឡងច្រៀងក្នុងកម្មវិធី «ពន្លកតារា» របស់ស្ថានីយទូរទស្សន៍ប៉ុស្តិ៍លេខ៥ ជាប់ចំណាត់ថ្នាក់លេខ២ ដោយច្រៀងបទ «ស្នេហ៍ក្រោមម្លប់ជ្រៃ» ។ តាំងពីពេលនោះមក នាងបណ្តែតជីវិតចូលប្រឡូកក្នុងវិស័យសិល្បៈចំរៀងរហូតដល់សព្វថ្ងៃនេះ ។ នាងថតសម្លេងចូលស៊ីឌី និងថតកាយវិការខារ៉ាអូខេ ឱ្យផលិតកម្មជាច្រើនទាំងក្នុង និងក្រៅប្រទេស ដូចជាផលិតកម្ម SSB រៃមាស តោមាស SM ជាដើម ។

ដោយសារតែមានរូបសម្ផស្សស្រស់ស្អាត មានទឹកដមសម្លេងពីរោះធ្វើឱ្យប្រិយមិត្តទស្សនិកជនគាំទ្រនាងយ៉ាងច្រើនរហូតមានកេរ្តិ៍ឈ្មោះល្បី ។ ជាពិសេសនោះ នាងកាន់តែល្បីខ្លាំងតាមរយៈបទ «វាចាស្រីឡង់សេ» ។ ក្រោយពេលមានកេរ្តិ៍ឈ្មោះល្បីមក កញ្ញាស្រីតូច្រឡឹងចាន់កន្និកា ធ្លាប់បានចេញទៅសម្តែងនៅប្រទេសបារាំង២ដង និងប្រទេសអូស្ត្រាលី២ដង ។ កញ្ញាយ៉ុង ចាន់កន្និកា លេចមុខក្នុងវិស័យសិល្បៈចំរៀងតាំងពីនៅក្មេងរហូតពេលនេះ ពេញវ័យហើយកាន់តែលូតលាស់ខ្លាំងឡើងក្នុងអាជីពរបស់ខ្លួន ។ នាងប្រកាន់យកអាជីពនេះយ៉ាងខ្ជាប់ខ្ជួន ហើយបានសមបំណងរបស់ខ្លួន។

ក្រៅពីបង្ហាញមុខតាមកម្មវិធីប្រគំតន្ត្រីរបស់ស្ថានីយទូរទស្សន៍នានា គេឃើញនាងផងដែរក្នុងកម្មវិធីខារ៉ាអូខេរបស់ស្ថានីយទូរទស្សន៍មួយ ។ កញ្ញាយ៉ុង ចាន់កន្និកា ក្រៅពីអាជីពជាតារាចំរៀង និងសំដែងកាយវិការខារ៉ាអូខេ នាងមានហាងលក់សំលៀកបំពាក់ទាន់សម័យ និងហាងអ៊ុតសក់មួយនៅសង្កាត់បឹងកេងកងទី២ ខណ្ឌចំការមន ។ ទាក់ទិននឹងរឿងស្នេហា កញ្ញាយ៉ុង ចាន់កន្និកា អះអាងថា នាងមិនទាន់មានជាប់ពាក់ព័ន្ធជាមួយបុរសណាម្នាក់ទេ ៕

នៅខេត្តកំពង់ធំឪពុកម្តាយស្វែងរកកូនក្រមុំដល់ខេត្តបាត់ដំបង

January 14, 2011 at 10:36 AM

ឪពុកម្តាយបង្ហាញរូបថតកូនស្រីដែលកំពុងតាមរក

ខេត្តបាត់ដំបង ៖ ប្តីប្រពន្ធមួយគ្រួសារនៅឯខេត្តកំពង់ធំ បានប្រឹងប្រែងយ៉ាងខ្លាំងដើម្បីស្វែងរកកូនក្រមុំរបស់គាត់ដែលបានបាត់ខ្លួនកាលពីព្រឹកថ្ងៃទី១១ មករា ខណៈដែលនាងជិតដល់ថ្ងៃចូលរោងការទៅហើយនោះ ។
ប្តីប្រពន្ធនេះបានមកកាន់ស្នងការដ្ឋានខេត្តបាត់ដំបងនៅរសៀលថ្ងៃទី១៣ មករា ដើម្បីដាក់ពាក្យបណ្តឹងសុំឱ្យសមត្ថកិច្ចជួយអន្តរាគមន៍ ក្រោយពីពួកគាត់ដឹងថា កូនស្រីគាត់ត្រូវគេល្បួងនាំមកកាន់ខេត្តបាត់ដំបង ។ ប្តី ប្រពន្ធនេះបានបង្ហាញ និងចែករូបថតកូនស្រីរបស់គាត់ជាច្រើនសន្លឹកនៅតាមទីប្រជុំជននានាក្នុងក្រុងបាត់ដំបង ដើម្បីស្នើដល់មជ្ឈដ្ឋាននានាជួយពិនិត្យ និងជួយផ្តល់ព័ត៌មានបើសិនប្រទះឃើញរូបនាងនៅកន្លែងណាមួយ ។

គ្រួសារនេះប្តីឈ្មោះគុំ គេន អាយុ៣៩ឆ្នាំ និងប្រពន្ធឈ្មោះប៉ែន គា អាយុ៣៧ឆ្នាំ រីឯកូនស្រីដែលបាត់ខ្លួនឈ្មោះគួន គន្ធា អាយុ១៩ឆ្នាំ រស់នៅភូមិបឹងរលំ ឃុំឈើទាល ស្រុកសណ្តាន់ ខេត្តកំពង់ធំ ។ តាមការបំភ្លឺពីអ្នកស្រីប៉ែន គា ជាម្តាយនាងក្រមុំនេះបានឱ្យដឹងថា កូនស្រីគាត់បាត់ខ្លួនកាលពីព្រឹកថ្ងៃទី១១ មករា ក្រោយពីរូបគាត់ជូននាងឡើងរថយន្តពីខេត្តព្រះវិហារឱ្យត្រឡប់មកផ្ទះនៅឯខេត្តកំពង់ធំ ។ ប៉ុន្តែនាងមិនចូលផ្ទះ ហើយអ្នកស្រីបានដឹងនៅវេលាម៉ោង៧យប់ថ្ងៃដដែលក្រោយពីគាត់ទូរស័ព្ទមិនចូល ។

អ្នកស្រីប៉ែន គា បានបញ្ជាក់ថា ក្រោយពីដឹងថា បាត់កូនស្រីមិនឃើញចូលផ្ទះ អ្នកស្រី និងស្វាមីបានស្វះស្វែងរកកូនស្រីគ្រប់ទីកន្លែង តែគ្មានតំរុយសោះ លុះក្រោយមកទើបមានដំណឹងពីអ្នករត់តាក់ស៊ីថា កូនស្រីគាត់បានជិះតាក់ស៊ីមកកាន់ខេត្តបាត់ដំបង ហើយគេឃើញមាននារីវ័យក្មេង២នាក់ស្លៀកពាក់ខ្លីមកចាំទទួលនាងនៅចំណតរថយន្តផ្សារបឹងឈូក ក្រុងបាត់ដំបង ។ គ្រួសារនេះនិយាយថា គាត់បានបង្ហាញរូបថត និងចែកចាយរូបថតនាងគ្រប់ទីកន្លែង និងតាមផ្ទះសំណាក់ផង ដើម្បីឱ្យគេជួយផ្តល់ដំណឹងនេះបើគេប្រទះឃើញកូនស្រីរបស់គាត់ ។ អ្នកស្រីប៉ែន គា បានបញ្ជាក់ទៀតថា កាលពី១ខែមុន គាត់ដឹងថា មានស្ត្រីម្នាក់នៅបាត់ដំបងទូរស័ព្ទច្រឡំលេខចូលទូរស័ព្ទកូនស្រីគាត់ ហើយតាំងពីពេលនោះមក គាត់ឮកូនស្រីទំនាក់ទំនងគ្នាជាមួយស្ត្រីនោះជាបងធម៌ ប្អូនធម៌រហូតមក ។ គាត់សង្ស័យថា កូនស្រីគាត់អាចត្រូវស្ត្រីរូបនោះទំនាក់ទំនងឱ្យមកកាន់ខេត្តបាត់ដំបងនេះហើយ។

អ្នកស្រីនិយាយថា កូនស្រីគាត់បានបិទទូរស័ព្ទមិនអាចទាក់ទងបានទេរហូតមកដល់ពេលនេះ ។ អ្នកស្រីប្រាប់ថា កូនស្រីគាត់ដែលបាត់ខ្លួននេះនឹងចូលរោងការនៅក្នុងខែក្រោយនេះហើយ ។ គ្រឿងអលង្ការ និងសំភារផ្សេងៗដែលមានជាប់ខ្លួនកូនស្រីគាត់មានតំលៃប្រហែលជិត១.០០០ដុល្លារ ដូច្នេះបើបងប្អូនប្រទះឃើញនាង សូមជួយផ្តល់ដំណឹងតាមទូរស័ព្ទលេខ ០៨៨ ៩១០ ៣៣២១, ០៨៨ ៩៣០ ៩៧៣២ អ្នកស្រីនឹងជូនសគុណជាទីគាប់ចិត្ត ។ ការតាមរកកូននេះមិនទាន់មានពន្លឺនៅឡើយទេ ៕

ពួកអ្នកគាំទ្រលោកហ្សេបាបូវាយប្រហារលើរថយន្ត អ.ស.ប នៅកូដឌីវ័រ

January 14, 2011 at 10:30 AM

កងកំលាំងដែលស្មោះត្រង់នឹងប្រធានាធិបតីផុតអាណត្តិកូដឌីវ័រ ដែលពុំព្រមចាកចេញពីអំណាចបានចាប់ផ្តើមកាលពីថ្ងៃទី១៣ មករា វាយប្រហារ និងដុតរថយន្តទាំងឡាយរបស់ អ.ស.ប នៅប្រទេសនេះដែលញ៉ាំងឱ្យមានភាពតានតឹងរវាងរដ្ឋអំណាចគ្រប់គ្រងដោយលោកហ្សេបាបូ និងអង្គការអន្តរជាតិ ដែលគាំទ្រប្រធានាធិបតីឈ្នះឆ្នោតលោកអាឡាស់ សាន អ៊ូអាតារ៉ា ។

អគ្គលេខាធិការ អ.ស.ប សំដែងការព្រួយបារម្ភយ៉ាងខ្លាំងចំពោះការចាប់ផ្តើមវាយប្រហារ និងដុតបណ្តារថយន្តរបស់ អ.ស.ប ដោយកងកំលាំងរៀបរយ និងមិនរៀបរយរបស់លោកហ្សេបាបូ ។ អ្នកនាំពាក្យរបស់លោកបាន គីមូន លោក MARTIN NESIRKY ថ្លែងនៅទីក្រុងញូវយ៉កថា មានការវាយប្រហារប្រភេទនេះចំនួន៦លើក កាលពីថ្ងៃទី១៣ មករា ក្នុងនោះរថយន្តយោធាមួយគ្រឿងរបស់ អ.ស.ប ត្រូវដុតបំផ្លាញ ។ យោងតាមបណ្តាអ្នកទទួលខុសត្រូវអ.ស.ប ថា រថយន្តសង្គ្រោះមួយគ្រឿងរងការគប់ដុំថ្ម បណ្តាលឱ្យអ្នកបើក និងគ្រូពេទ្យម្នាក់ត្រូវរបួស ។

បណ្តាអ្នកទទួលខុសត្រូវ អ.ស.ប អះអាងថា កងកំលាំងស្មោះត្រង់នឹងលោកហ្សេបាបូ បានផ្លាស់ប្តូរយុទ្ធវិធី ដោយមិនធ្វើការប្រឈមមុខខាងយោធា តែជំរុញឱ្យប្រជាជនជាអ្នកវាយប្រហារលើបណ្តារថយន្តរបស់ អ.ស.ប វិញ។ ប្រការនេះធ្វើឱ្យស្មុគស្មាញដល់ភារកិច្ចរបស់ពួកមួយខៀវ អ.ស.ប ដែលមានទាហាន និងប៉ូលិស១០.០០០នាក់ ក្នុងការតបតវិញចំពោះការវាយប្រហារទាំងនេះ ព្រោះ អ.ស.ប ពុំចង់ឱ្យបណ្តាជនស៊ីវិលត្រូវរបួស ៕

ចោរភ្ជង់ប្លន់នាយកុយកណ្តាលរាជធានីភ្នំពេញអស់ជាង៣ម៉ឺនដុល្លារ

January 14, 2011 at 10:28 AM

កំពូលតារាកំប្លែងប្រចាំប្រទេសកម្ពុជា នាយកុយ ដែលមានឈ្មោះក្នុងបញ្ជីជាតិជួង ជី អាយុ៥៤ឆ្នាំ

នៅមុខយានដ្ឋានជួសជុលរថយន្តសុខ ចំរើន តាមផ្លូវលេខ២៦១ កែងនឹងផ្លូវលេខ១៦៦ សង្កាត់ទឹកល្អក់៣ ខណ្ឌទួលគោក

កំពូលតារាកំប្លែងនាយកុយ ត្រូវចោរ៤នាក់តាមប្លន់ប្រមូលយកអស់ជាង៣ម៉ឺនដុល្លារ នៅមុខយានដ្ឋានជួសជុលរថយន្ត

គ្រឿងអលង្ការមានខ្សែ.ក១ខ្សែធំ ចិញ្ចៀនពេជ្រ២វង់ នាឡិកា១គ្រឿង ខ្សែដៃ១ខែ សរុបជាទឹកប្រាក់ជាង៣ម៉ឺនដុល្លារ

រូបថតអនុស្សាវរីយ៍ការសំដែងរបស់នាយកុយលើឆាក

រាជធានីភ្នំពេញ ៖ តារាកំប្លែងលោកជួង ជី ហៅ នាយកុយ ត្រូវក្រុមចោរប្លន់ប្រដាប់អាវុធ៤នាក់ មានកាំភ្លើងខ្លីចំនួន២ដើម បានធ្វើសកម្មភាពភ្ជង់ប្លន់យ៉ាងស្ងៀមស្ងាត់ដោះយកគ្រឿងអលង្ការអស់ពីខ្លួនគិតជាប្រាក់ប្រមាណជាង៣ម៉ឺនដុល្លារ ហើយគេចខ្លួនបាត់យ៉ាងរហ័ស ។ អំពើប្លន់នេះបានកើតឡើងកាលពីវេលាម៉ោង១២និង៣០នាទីកណ្តាលថ្ងៃត្រង់ ថ្ងៃទី១៣ មករា នៅក្នុងយានដ្ឋានជួសជុលរថយន្តយីហោសុខចំរើន ស្ថិតនៅតាមផ្លូវលេខ២៦១ កែងផ្លូវលេខ១៨៦ សង្កាត់ទឹកល្អក់ទី៣ ខណ្ឌទួលគោក ខណៈពេលដែលនាយកុយ ជិះរថយន្តម៉ាកឡង់គ្រីស្ស័រ ពណ៌ស្លែមួយគ្រឿង ទៅឈប់មុខយានដ្ឋាន ហើយចុះទៅឈរមើលជាងបាញ់ថ្នាំរថយន្តម៉ាកហ៊ីយ៉ាន់ដាយ មួយគ្រឿងដែលគាត់យកទៅឱ្យជាងបាញ់ថ្នាំរយៈពេល៣ថ្ងៃមកហើយ ។

លោកជួង ជី ហៅកុយ អាយុ៥៤ឆ្នាំ ជាតារាកំប្លែងមានឈ្មោះល្បីក្នុងព្រះរាជាណាចក្រកម្ពុជា និងមានលំនៅឋានលេខ២៤ ផ្លូវលេខ២៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ដោយសារតែអាជីពជាអ្នកកំប្លែងល្បីឈ្មោះលោកជួង ជី មានជីវភាពធូរធារ និងជាអ្នកលេងខ្លួនផង បានពាក់គ្រឿងអលង្ការពេជ្រមានតំលៃ មានប្លាកដៃ និងខ្សែ.កមាសយ៉ាងធំ មានចិញ្ចៀនពេជ្រ ព្រមទាំងនាឡិកាដៃដាំពេជ្រ គួរឱ្យញាក់សាច់ទៀតផង ។
តាមមន្ត្រីសមត្ថកិច្ចឱ្យដឹងថា ក្រុមចោរមានបក្សពួកចំនួន៤នាក់ ជិះម៉ូតូម៉ាកហុងដា C125 ពណ៌ខ្មៅ មានកាំភ្លើងខ្លីចំនួន២ដើម សុទ្ធតែពាក់ម៉ាស់មុខ និងពាក់មួកការពារសុវត្ថិភាពបានធ្វើសកម្មភាពចូលភ្ជង់ប្លន់លោកនាយកុយដល់ក្នុងយានដ្ឋាន រួចជិះគេចខ្លួនទៅបាត់ ។ គ្រឿងអលង្ការដែលត្រូវចោរប្លន់យកទៅនោះត្រូវសមត្ថកិច្ចឱ្យដឹងថា រួមមានខ្សែ.កមាស១ខ្សែ ចិញ្ចៀនពេជ្រចំនួន២វង់ ខ្សែដៃ១ខ្សែ និងនាឡិកាដៃ១គ្រឿង ដែលសរុបជាទឹកប្រាក់ប្រមាណជាង៣ម៉ឺនដុល្លារ ។ ទោះបីជាយ៉ាងណាបន្ទាប់ពីត្រូវក្រុមចោរភ្ជង់ប្លន់យកអស់ នាយកុយ ពុំបានទៅដាក់ពាក្យបណ្តឹងនៅប៉ុស្តិ៍ប៉ូលិសទេ គឺគាត់បានជិះរថយន្តទៅផ្ទះរៀបចំធ្វើដំណើរទៅខេត្តសៀមរាប ដើម្បីចូលរួមលេងឆាកកំប្លែងទីនោះ និងមិនដឹងថា លោកមានអារម្មណ៍សំដែងឱ្យគេសើចបាន ឬយ៉ាងណានោះទេ ។

តាមព័ត៌មានឱ្យដឹងថា រយៈពេល៣ថ្ងៃមក ហើយលោកជួង ជី ហៅកុយ បានយករថយន្តម៉ាកហ៊ីយ៉ាន់ដាយ មានស្លាកលេខភ្នំពេញ 3A-5772 ទៅឱ្យជាងបាញ់ថ្នាំនៅយានដ្ឋានជួសជុលរថយន្តសុខចំរើន ជាកន្លែងកើតហេតុខាងលើ ។ នៅវេលាម៉ោង៦ព្រឹក ថ្ងៃទី១៣ មករា នាយកុយ បានជិះរថយន្តមួយគ្រឿងពណ៌ស្ករ រួមជាមួយមិត្តភក្តិទៅមើលរថយន្តរបស់គាត់ក្នុងយានដ្ឋានម្តងមកហើយ ។ លុះទៅវេលាមុនពេលកើតហេតុ នាយកុយ បានជិះរថយន្តមា៉កឡង់គ្រីះស្ស័រ ពណ៌ស្លែ មួយគ្រឿងតែឯង មកឈប់អែបមុខយានដ្ឋានរួចដើរចូលទៅមើលជាងជួសជុលរថយន្តរបស់ខ្លួន ហើយត្រូវក្រុមចោរចូលទៅធ្វើសកម្មភាពប្លន់តែម្តង ។ តាមសាក្សីជាជាងជួសជុលរថយន្តបានឱ្យដឹងថា នៅពេលដែលនាយកុយ ទៅដល់មិនទាន់បានប៉ុន្មានផង ស្រាប់តែមានក្រុមចោរប្លន់ចំនួន៤នាក់ ជិះម៉ូតូ២គ្រឿង ម៉ាកហុងដា ពណ៌ខ្មៅ សុទ្ធតែបិទស្លាកលេខជិត ពាក់មួកសុវត្ថិភាព និងពាក់ម៉ាស់មុខបានមកឈប់មុខយានដ្ឋាន ហើយ៣នាក់បានដើរចូលទៅក្នុងធ្វើសកម្មភាពប្លន់ ឯម្នាក់ឈរចាំម៉ូតូនៅខាងក្រៅ ។

តាមព័ត៌មានបន្តទៀតថា ខណៈពេលនោះគេឃើញចោរប្លន់ម្នាក់ បានចូលទៅភ្ជង់កាំភ្លើងខ្លីចំទ្រូងនាយកុយ ហើយដៃម្ខាងលូកទាញដោះយកខ្សែ.ក ។ ភ្លាមនោះ នាយកុយស្រែកថា «ចាំអញដោះឱ្យ» ព្រមទាំងដោះខ្សែ.កឱ្យទៅក្រុមចោរ បន្ទាប់មកក៏ដោះប្លាកដៃ នាឡិកា និងចិញ្ចៀនទំលាក់ទៅលើដី ហើយក្រុមចោរបានរើសយកទាំងអស់ រួចក៏ដើរតំរង់ម៉ូតូជិះគេចខ្លួនបាត់ទៅ ដោយសុវត្ថិភាព ។ តាមព័ត៌មានបន្តទៀតថា បន្ទាប់ពីក្រុមចោរចេញទៅបាត់ នាយកុយ ក៏បានឡើងជិះរថយន្តរបស់ខ្លួនត្រឡប់ទៅផ្ទះវិញដែរ យ៉ាងស្ងៀមស្ងាត់ ។ ក្រោយមកក៏មានការភ្ញាក់ផ្អើល ហើយសមត្ថកិច្ចបានចុះទៅសួរនាំនាយកុយ ដល់ផ្ទះនៅមុខមន្ទីរពេទ្យព្រះកុសុមៈ ។ លុះក្រោយមកនាយកុយ ក៏បានធ្វើដំណើរចេញពីផ្ទះដោយប្រាប់សមត្ថកិច្ចថា ជាប់រវល់ទៅខេត្តសៀមរាប ។

តាមការសន្និដ្ឋាន ក្រុមចោរអាចតាមដានលោកនាយកុយ ជាយូរថ្ងៃមកហើយ ជាឱកាសល្អ ក៏បានធ្វើសកម្មភាពចូលភ្ជង់ប្លន់តែម្តង ។ តាមសំដីលោកនាយកុយ ឱ្យដឹងតាមទូរស័ព្ទប្រាប់កោះសន្តិភាពថា នៅពេលដែលរូបលោកកំពុងតែមើលជាងជួសជុលរថយន្ត ស្រាប់តែក្រុមចោរចូលទៅភ្ជង់គំរាមបាញ់សំលាប់ និងទាញដោះយកខ្សែ.ក តែលោកប្រាប់ចោរថា «កុំបាញ់... ចាំអញដោះឱ្យ» ហើយរូបលោកក៏បានដោះខ្សែ.កឱ្យ ហើយដោះនាឡិកា ប្លាកដៃ ចិញ្ចៀនពេជ្រ រួមទាំងទូរស័ព្ទ២គ្រឿង បោះចូលទៅក្រោមរថយន្តកូរ៉េ ហើយត្រូវក្រុមចោរយកជើងកាយរើសយកទាំងអស់ ។ តែទូរស័ព្ទ២ គ្រឿងចោររើសហើយមិនយកទេ វាទុកឱ្យវិញ ។

លោកនាយកុយ បានឱ្យដឹងទៀតថា បន្ទាប់ពីលោកត្រូវចោរប្លន់ លោកបានជិះរថយន្តទៅផ្ទះ ហើយត្រូវសមត្ថកិច្ចចុះទៅសួរនាំដល់ផ្ទះ ។ ក្រោយមក លោកក៏បានធ្វើដំណើរទៅខេត្តសៀមរាប ចូលរួមក្នុងកម្មវិធីបារីលុចសារី ដែលក្រុមហ៊ុនបានអញ្ជើញទៅបើកឆាកកំប្លែង ។ នៅវេលាម៉ោង៤និង៦នាទីល្ងាចថ្ងៃដដែល លោកប្រាប់ថា ធ្វើដំណើរទៅដល់ខេត្តកំពង់ធំហើយ ។ លោកនាយកុយ ឱ្យដឹងទៀតថា គ្រឿងអលង្ការដែលចោរប្លន់យកមានតំលៃជាង៣ម៉ឺនដុល្លារ ។ អំពើប្លន់បែបនេះ គឺជាការកត់សំគាល់មួយនៅប្រទេសកម្ពុជា ដោយសារតែជាករណីប្លន់ទៅលើតារាកំប្លែងឈរលំដាប់លេខ១ គឺនាយកុយ ។ តាមពិតទៅ ទ្រព្យសម្បត្តិដែលក្លាយជាចំណីចោរទាំងកណ្តាលថ្ងៃត្រង់នេះ គឺជាទ្រព្យសម្បត្តិដែលបានមកដោយសុចរិតបំផុត មិនបានទៅប្រព្រឹត្តអំពើពុករលួយ ឬកេងប្រវ័ញ្ចដល់នរណាម្នាក់ឡើយ ទីបំផុតបានក្លាយជាចំណីចោរទៅវិញ ៕

ជនជាតិថៃទល់ដែនប្រមូលផ្តុំគ្នាប្រឆាំងពួកអាវលឿង

January 14, 2011 at 10:00 AM

សិស្ស-និស្សិត រាប់ពាន់នាក់រង់ចាំបំបែកពួកអាវលឿង

ប្រជាពលរដ្ឋខ្មែរ៧នាក់ត្រូវបានភាគីថៃដោះលែង

លោកផានិក និងអ្នកស្រីណារឿមមុល ត្រូវបានអនុញ្ញាតឱ្យនៅក្រៅឃុំ ជាបណ្តោះអាសន្ន

ទីបំផុតការប្រកាសតតូងតតាងរបស់មេដឹកនាំពួកអាវលឿងថា នឹងកេណ្ឌគ្នាមកអុកឡុកតំបន់ព្រំដែនក្នុងខេត្តស្រះកែវ ទល់មុខច្រកទ្វារអន្តរជាតិប៉ោយប៉ែតបានត្រូវបង្ខំចិត្ត «លេបទឹកមាត់ដ៏ស្អុយ» របស់ខ្លួនវិញហើយ នោះគឺការពន្យារពេលដោយមិនទាន់កំណត់កាលបរិច្ឆេទជាថ្មីថា ធ្វើនៅថ្ងៃណាទេ ។ ការប្រកាសពន្យារពេលនេះ ដោយសារតែមានការជំទាស់ដ៏ខ្លាំងក្លាពីសំណាក់ប្រជាពលរដ្ឋថៃរស់នៅតាមបណ្តោយព្រំដែនជាប់ប្រទេសកម្ពុជា បានប្រមូលផ្តុំគ្នារាប់ពាន់នាក់រង់ចាំស្វាគមន៍សំពងពួកអាវលឿង ព្រោះតែពួកនេះបង្កឱ្យមានការប៉ះពាល់ដល់ការរស់នៅរបស់ពួកគេ មិនខុសពីអ្នកខេត្តស៊ីសាកេតកាលពីប៉ុន្មានឆ្នាំមុនបាននាំគ្នាបញ្ចេញប្រតិកម្ម និងក្លាយជាហិង្សាបំបែកហ្វូងពួកអាវលឿងដែលនាំគ្នាយាយីអុកឡុកធ្វើឱ្យជីវភាពពួកគេប្រឈមនឹងការលំបាក ។

យោងតាមកាសែតឌឹណេស្សិនរបស់ថៃ ថ្ងៃទី១៣ មករា ផ្សាយថា ពលរដ្ឋថៃនៅទល់ដែនប្រមាណ១.៥០០នាក់មកពីស្រុកចំនួន៤ នៅខេត្តស្រះកែវ ជាប់តំបន់ព្រំដែនកម្ពុជា-ថៃ បានប្រមូលផ្តុំគ្នានៅបរិវេណទល់មុខសាលាស្រុកអារញ្ញ និងនៅតាមបណ្តោយព្រំដែន ដើម្បីធ្វើបាតុកម្មប្រឆាំងបណ្តាញអ្នកស្នេហាជាតិថៃ ឬក្រុមអាវលឿង ដែលគំរាមធ្វើដំណើរមកកាន់ស្រុកអារញ្ញ ហើយធ្វើបាតុកម្មឱ្យបិទច្រកឆ្លងកាត់ព្រំដែនអារញ្ញប៉ោយប៉ែត ។
អ្នកភូមិទល់ដែនថៃទាំងនោះនិយាយថា ការទទួលខុសត្រូវចំពោះការជួយពលរដ្ឋថៃ៧នាក់ដែលកំពុងជាប់ឃុំឃាំងនៅគុកព្រៃ.សក្នុងប្រទេសកម្ពុជាគឺស្ថិតលើរដ្ឋាភិបាល និងក្រសួងការបរទេស ប៉ុណ្ណោះ មិនមែនស្ថិតលើក្រុមអាវលឿងស្អីនោះទេ និងជាពិសេសគឺស្ថិតលើទិដ្ឋភាពច្បាប់ ។ អ្នកដែលរស់នៅតាមបណ្តោយព្រំដែនថៃនឹងប្រឈមមុខនឹងគ្រោះថ្នាក់សេដ្ឋកិច្ច ឬគ្រោះថ្នាក់ផ្សេងទៀត ប្រសិនបើក្រុមអាវលឿងធ្វើបាតុកម្មនៅតំបន់ព្រំដែន ។
ជាមួយគ្នានេះ នាយប៉ូលិសខេត្តស្រះកែវ លោក Theerayuth Thammasaroj បានបញ្ជាឱ្យប៉ូលិសនៅស្រុកជាប់ព្រំដែនចំនួន៤បង្កើតប៉ុស្តិ៍ឆែកឆេរ ដើម្បីឆែកឆេររថយន្តចេញ-ចូលតំបន់ព្រំដែនក្រែងមានលាក់អាវុធបង្កភាពអសន្តិសុខ ។ បញ្ជីឈ្មោះសមាជិកបណ្តាញអ្នកស្នេហាជាតិថៃ និងស្លាកលេខរថយន្តរបស់ក្រុមនេះត្រូវបានចែកជូនទៅឱ្យប៉ូលិសដែលឈរជើងនៅតាមប៉ុស្តិ៍ឆែកឆេរក្នុងទឹកដីខ្លងឡឹក ឬក្នុងស្រុកអារញ្ញទាំងមូល ដើម្បីបង្កលក្ខណៈងាយស្រួលផ្នែកសណ្តាប់ធ្នាប់ ធ្វើយ៉ាងណាឱ្យវាស្ថិតក្នុងភាពជាប្រក្រតី ។

លោកស៊ូថេប ៖ ពួកអាវលឿងមិន អាចបិទច្រកព្រំដែនបានឡើយ

ជាមួយគ្នានេះ កាសែតបាងកកប៉ុស្តិ៍នៅថ្ងៃទី១៣ មករា នោះដែរ បានដកស្រង់សំដីលោកស៊ូថេប ធឿកស៊ូបាន់ ឧបនាយករដ្ឋមន្ត្រីថៃដែលថ្លែងថា រដ្ឋាភិបាលក្រោមការដឹកនាំរបស់លោកអាប់ភីស៊ីត វ៉េចាជីវ៉ា នឹងមិនអនុញ្ញាតឱ្យបណ្តាញអ្នកស្នេហាជាតិថៃ ឬក្រុមអាវលឿងនោះបិទប៉ុស្តិ៍ឆែកឆេរព្រំដែនសំខាន់ៗ នៅស្រុកអារញ្ញខេត្តស្រះកែវឡើយ ព្រោះការបិទព្រំដែននេះជាការរំលោភបំពានសិទ្ធិពលរដ្ឋថៃផ្សេងទៀតដែលរស់នៅតាមបណ្តោយព្រំដែន ។ ឧបនាយករដ្ឋមន្ត្រីថៃរូបនេះបានបញ្ជាឱ្យអាជ្ញាធរនៅតំបន់ព្រំដែនបំពេញតួនាទីរៀងខ្លួនដូចធម្មតា ។

ដោយឡែក នៅព្រឹកថ្ងៃទី១៣ មករា ផងដែរ ក្រុមជ្រុលនិយមអាវលឿងសៀមបានទៅប្រមូលផ្តុំគ្នានៅបរិវេណទល់មុខវិមានរដ្ឋាភិបាល ក្នុងទីក្រុងបាងកក ដើម្បីទាមទារឱ្យលោកនាយករដ្ឋមន្ត្រីអាប់ភីស៊ីត ឆ្លើយតបតាមការទាមទាររបស់ពួកគេទាក់ទិននឹងពលរដ្ឋថៃ៧នាក់ ដែលកំពុងជាប់ឃុំឃាំងនៅពន្ធនាគារព្រៃ.ស ក្នុងរាជធានីភ្នំពេញ ។ ក្រុមជ្រុលនិយមនេះ ក៏មានផែនការដាក់ញត្តិថ្វាយព្រះមហាក្សត្រភូមិបុល អាឌុលយ៉ាដេត ចោទ ប្រកាន់រដ្ឋាភិបាលលោកអាប់ភីស៊ីត ពីបទបរាជ័យក្នុងការជួយពលរដ្ឋថៃ៧នាក់នោះ ។

លោក Chaiwat Sinsuwong មេដឹកនាំសំខាន់មួយរូបរបស់បណ្តាញអ្នកស្នេហាជាតិថៃ ក្រុមអាវលឿង កាលពីថ្ងៃទី១២ មករា និយាយថា ក្រុមរបស់ខ្លួននឹងធ្វើបាតុកម្មបិទច្រកព្រំដែនអចិន្ត្រៃយ៍អារញ្ញ-ប៉ោយប៉ែត ជាពិសេសបិទច្រកព្រំដែនណាដែលផ្តល់ផលប៉ះពាល់ដល់កម្ពុជា ដើម្បីគាបសង្កត់កម្ពុជាឱ្យដោះលែងពលរដ្ឋថៃ៧នាក់នេះ ។ ប៉ុន្តែទោះបីបែបណា គំរោងរបស់ក្រុមជ្រុលនិយមនេះនឹងត្រូវបរាជ័យយ៉ាងអាម៉ាស់ ព្រោះមិនអាចធ្វើទៅបានឡើយ ។

សេចក្តីរាយការណ៍ពីប៉ោយប៉ែត

នៅថ្ងៃទី១៣ មករា ប្រជាពលរដ្ឋកម្ពុជាដែលឆ្លងទៅមកធ្វើការ រកស៊ីនៅផ្សាររុងក្លឿលើទឹកដីសៀម មុនពេលបើកច្រកទ្វារព្រំដែនឃើញថា មានចំនួនតិចជាងសព្វមួយដង ដោយមិនមានការរង់ចាំត្រៀបត្រាកកកុញដូចកាលពីពេលមុនៗទេ គឺពេលបើកទ្វារព្រំដែននាំគ្នាចូលត្រឹមមួយប្រាវក៏អស់ ។ ប៉ុន្តែនៅម៉ោងប្រហែល៧និង៣០នាទីព្រឹក គឺក្រោយពេលបើកទ្វារព្រំដែនកន្លះម៉ោង ប្រជាពលរដ្ឋខ្មែរចូលទៅហូរហែដូចសព្វមួយដងវិញ ។
ដោយឡែកភ្ញៀវអន្តរជាតិ ពិសេសភ្ញៀវថៃដែលតែងចូលមកលេងនៅកាស៊ីណូសំរាប់ថ្ងៃទី១៣ មករា បើគិតត្រឹមម៉ោង១២ថ្ងៃត្រង់ មានការថយចុះយ៉ាងគំហុក គឺស្ទើរតែ៧០% ដោយរថយន្តដែលរង់ចាំដឹកភ្ញៀវចូលកាស៊ីណូនីមួយៗបានឈប់សំចតពុំសូវមានសកម្មភាពក្នុងការដឹកជញ្ជូនទេ ។ ជាការពិតគឺគ្រប់គ្នាមានការបារម្ភពីការគំរាមរបស់ក្រុមអាវលឿងសៀម ។

ចំពោះការថយចុះចំនួនភ្ញៀវថៃនេះមិនចំពោះតែភ្ញៀវចូលលេងកាស៊ីណូទេ សូម្បីតែភ្ញៀវថៃដែលត្រូវទៅកំសាន្តកន្លែងផ្សេងៗតាមបណ្តាខេត្តក៏មានការថយចុះដែរ ។ ក្រុមសន្តិសុខកាស៊ីណូដែលឈរការពារនៅកន្លែងដឹកភ្ញៀវចូលកាស៊ីណូជាច្រើននាក់ប្រាប់ថា ភ្ញៀវចូលលេងកាស៊ីណូមានចំនួនថយចុះស្ទើរតែជាងពាក់កណ្តាល ។ ចំណែកឯទិន្នន័យចំនួនភ្ញៀវថៃចូលមកកម្ពុជាតាមរយៈក្រុមហ៊ុនទៅខេត្តសៀមរាបសំរាប់ថ្ងៃទី១៣ មករា ដែលទទួលបានពីមន្ត្រីប៉ូលិសទេសចរច្រកទ្វារអន្តរជាតិប៉ោយប៉ែត ក៏មានចំនួនចុះទាបផងដែរ ។ សំរាប់ទំនិញដែលកម្មករអូសរទេះនាំចូលពីសៀម ក៏មានចំនួនថយចុះ ឯរថយន្តដឹកទំនិញសព្វសារពើចូូលមកពីសៀមសំរាប់វេលាព្រឹកចាប់ពីម៉ោង៧ដល់ម៉ោង១០និង៤០នាទី មានសភាពស្ងប់ស្ងាត់ លុះចាប់ពីម៉ោង១០និង៤០នាទីមក ទើបមានការដឹកជញ្ជូនចូលមកធម្មតា ។

ចំនួនភ្ញៀវចំរុះជាតិសាសន៍សំរាប់ថ្ងៃទី១២ មករា មានចំនួន៤៣៥នាក់ ប៉ុន្តែសំរាប់ថ្ងៃទី១៣ មករា ភ្ញៀវចំរុះមានចំនួនត្រឹមតែ២៣៨នាក់ប៉ុណ្ណោះ ។ នេះបើតាមរបាយកាណ៍ដែលទទួលបានពីប៉ូលិសទេសចរច្រកទ្វារប៉ោយប៉ែត ហើយបើប្រៀបធៀបនឹងថ្ងៃទី១២ មករា ឃើញថា មានការថយចុះស្ទើរតែពាក់កណ្តាល ។ បើតាមការឱ្យដឹងពីមន្ត្រីជំនាញច្រកទ្វារប៉ោយប៉ែតថា ទំនិញនាំចូលពីសៀមសំរាប់ថ្ងៃ១៣ មករា មានការថយចុះបន្តិច ។
ហេតុដែលបណ្តាលឱ្យមានការស្ងប់ស្ងាត់ចំនួនភ្ញៀវក៏ដូចជាទំនិញចេញ-ចូលមានថយចុះនេះគឺកើតដោយសារលេចឮថា ក្រុមអាវលឿងគ្រោងធ្វើព្យុះភ្លៀងក្នុងស្រុកអារញ្ញ ឬតាមបន្ទាត់ព្រំដែនជាប់កម្ពុជា ។

សភាពការណ៍លើទឹកដីថៃ

ស្របពេលដែលលេចឮព័ត៌មានថា ក្រុមអាវលឿងមួយចំនួនមកស្រុកអារញ្ញនិងមួយចំនួនធំទៀតនឹងបន្តមកពីតាមបណ្តាខេត្តផ្សេងៗនោះមន្ត្រីទំនាក់ទំនងព្រំដែនកម្ពុជាឱ្យដឹងថា តាំងពីរសៀលថ្ងៃទី១២ មករា រហូតមកទល់ថ្ងៃទី១៣ មករា សមត្ថកិច្ចនិងប្រជាពលរដ្ឋថៃបានពង្រឹងកំលាំងយ៉ាងច្រើនសន្ធឹកសន្ធាប់នៅចំណុចផ្លូវបំបែកជាបួន ចំណុចនាឡិកាក្នុងស្រុកអារញ្ញនៃខេត្តស្រះកែវ ដើម្បីទប់ទល់ជាមួយក្រុមអាវលឿង ។ កន្លែងផ្លូវបំបែកនោះមានប្រជាពលរដ្ឋមកពីតាមបណ្តាភូមិ-ឃុំមួយចំនួនតាមស្រុកដែលជាប់ព្រំដែននៃខេត្តស្រះកែវ នៅចាំទប់ទល់ស្វាគមន៍ដោយហិង្សាជាមួយពួកអាវលឿង ។

នៅក្នុងផ្សាររុងក្លឿទឹកដីថៃ ប្រជាពលរដ្ឋដែលចេញពីផ្សាររុងក្លឿនិយាយថា សំរាប់ព្រឹកថ្ងៃទី១៣ មករា អាជីវករលក់ដូររបស់ថៃមានចំនួនថយចុះច្រើនស្ទើរតែស្ងាត់ គឺមានតែខ្មែរចូលទៅច្រើនជាង ។ ចំណែកឯតាមបន្ទាត់ព្រំដែនខាងជើងផ្លូវជាតិលេខ៥ ចាប់ពីក្រុងប៉ោយប៉ែតទៅស្រុកអូរជ្រៅបើតាមការឱ្យដឹងពីកំលាំងជួរមុខតាមទូរស័ព្ទថា នៅថ្ងៃ១៣ មករា ពុំទាន់មានអ្វីកើតឡើងទេ ប៉ុន្តែមានការប្រុងជើងការខ្ពស់ដដែល ។ សំរាប់ច្រករបៀងគ្រប់ច្រកត្រូវភាគីសៀមហាមឃាត់មិនឱ្យឆ្លងទៅមកទេ ព្រោះខ្លាចកើតមានបញ្ហា ។ តាមព័ត៌មានចុងក្រោយឱ្យដឹងថា ពលរដ្ឋខ្មែរ៧នាក់ដែលអាជ្ញាធរសៀមចាប់ខ្លួនបញ្ជូនទៅតុលាការនោះ ត្រូវអភិបាលខេត្តស្រះកែវ នាំខ្លួនមកប្រគល់ឱ្យអាជ្ញាធរខេត្តបន្ទាយមានជ័យលើស្ពានមិត្តភាពច្រកប៉ោយប៉ែតវិញហើយ ៕

ជនជាតិសៀមជាប់ចោទ២នាក់ ត្រូវបានអនុញ្ញាតឱ្យនៅក្រៅឃុំ ជាបណ្តោះអាសន្នក្នុងចំណោម៧នាក់

រាជធានីភ្នំពេញ ៖ ជនជាប់ចោទជនជាតិសៀម២នាក់ នៅព្រឹកថ្ងៃទី១៣ មករា ត្រូវបានតុលាការកម្ពុជាសំរេចអនុញ្ញាតឱ្យនៅក្រៅឃុំជាបណ្តោះអាសន្ន តែស្ថិតក្រោមការតាមដានរបស់តុលាការគឺមានន័យថា បើពេលណាតុលាការកោះហៅនឹងត្រូវបង្ហាញខ្លួន ។ ជនជាតិសៀមដែលត្រូវបានធានាឱ្យនៅក្រៅឃុំនេះ គឺលោកផានិក វិគិតសេត ជាអ្នកតំណាងរាស្ត្រក្រុងបាងកក មកពីគណបក្សប្រជាធិបតេយ្យ និងអ្នកស្រីណារឿមមុល ជិតវ៉ារ៉ាត់តាណា ជាមេផ្ទះ ។ ជនជាប់ចោទសៀមទាំង២នាក់ ត្រូវបានស្ថានទូតថៃប្រចាំកម្ពុជាទៅទទួលយកពីពន្ធនាគារព្រៃសនៅវេលាម៉ោងជាង៩ព្រឹក ។ មិនមានព័ត៌មានលំអិតឱ្យដឹងក្រៅពីនេះទេថា តើជន៥នាក់ទៀតនឹងអាចត្រូវធានាឱ្យនៅក្រៅឃុំឬបែបណានោះទេ ពិសេសជន២នាក់គឺវីរ៉ាស៊ុមខ្វាមឃីត និងអ្នកស្រីរ៉ាត់ទ្រី ប៉ៃប៉ូតាណាប៉ៃបូន ដែលជាប់ចោទពីបទចារកម្ម ទំនងមិនអាចមានសិទ្ធិនៅក្រៅឃុំទេ ។

លោកអាប់ភីស៊ីត វេចាជីវ៉ា នាយករដ្ឋមន្ត្រីថៃ ត្រូវបានដកស្រង់សំដីដោយកាសែតថៃថា លោកបានដឹងថា ជនជាតិថៃ២នាក់ក្នុងចំណោម៧នាក់ ត្រូវបានតុលាការកម្ពុជាផ្តល់ការធានាឱ្យនៅក្រៅឃុំ ប៉ុន្តែកំពុងរង់ចាំលទ្ធផលការដាក់ឱ្យនៅក្រៅឃុំនូវជនជាតិថៃ៥នាក់ដែលនៅសល់ ព្រោះយើងត្រូវការជួយទាំងអស់គ្នា ។ កាសែតថៃកាលពីថ្ងៃទី១៣ មករា បានផ្សាយថា បច្ចុប្បន្ន ជនជាតិថៃទាំង២នាក់ ដែលទទួលបានការធានាឱ្យនៅក្រៅឃុំ បានចាកចេញពីពន្ធនាគារ និងស្ថិតនៅក្នុងស្ថានទូតថៃក្នុងរាជធានីភ្នំពេញ ។ លោកផានិក វិគិតសេត ជាតំណាងរាស្ត្រក្រុងបាងកក មកពីគណបក្សប្រជាធិបតេយ្យបានជួបប្រពន្ធនិងកូនវិញ តែសំរាប់ជនជាតិថៃ៥នាក់ដែលនៅសល់ បច្ចុប្បន្នមិនទាន់មានការពិចារណាលើពាក្យស្នើសុំឱ្យនៅក្រៅឃុំទេ ។ ទោះជាយ៉ាងណាក៏ដោយស្ថានទូតនិងមន្ត្រីគ្រប់រូបត្រៀមខ្លួនក្នុងការតស៊ូរឿងក្តីដើម្បីឱ្យជនជាតិថៃទាំង៥នាក់រួចផុតពីរឿងក្តីនិងត្រឡប់់ទៅប្រទេសថៃឱ្យបានឆាប់ ។

កាសែតដដែលបានបន្តថា ទាក់ទិននឹងរឿងរ៉ាវធ្វើបាតុកម្មបិទព្រំដែនរបស់ក្រុមអាវលឿង លោកស៊ូថេប ធឿកស៊ូបាន់ ឧបនាយករដ្ឋមន្ត្រីថៃបានឱ្យដឹងថា ការជួយជនជាតិថៃទាំង៧នាក់នៅកម្ពុជា គឺនាយករដ្ឋមន្ត្រីបានប្រគល់តួនាទីឱ្យក្រសួងការបរទេសដំណើរការដើម្បីកុំឱ្យកើតមានភាពច្របូកច្របល់ និងមានជំនឿចិត្តថាការពិភាក្សា ចរចា ឬសហការការងារជាវិធីសាស្រ្តដ៏ល្អ ។ ចំណែកករណីក្រុមអាវលឿងមានគំរោងធ្វើបាតុកម្មបិទច្រកព្រំដែនកម្ពុជា-ថៃ គួរតែធ្វើការពិចារណាកុំឱ្យខុសច្បាប់ ។ ការប្រើកំលាំងបិទច្រកចេញ-ចូលតាមព្រំដែនជារឿងមិនត្រឹមត្រូវ ដូច្នេះក្រុមអាវលឿងដែលយកកម្លាំងមកប្រើប្រាស់មិនអាចធ្វើបានឡើយ ៕

( ប៊ុនណាក់+សុខលី+អរុណ )

...កាប់គល់លាស់ត្រួយ... បន្ទាប់ពីបទបញ្ជាធ្វើបាន១ប្រាវ ភ្លេចវិធានការភ្លៀងរលឹម

January 14, 2011 at 9:56 AM

សភាជាតិនៃព្រះរាជាណាចក្រកម្ពុជាយើងបានអនុម័តច្បាប់ដ៏ល្អផូរផង់ជាច្រើន ប៉ុន្តែច្បាប់ទាំងនេះហាក់ដូចជានៅលើតែក្រដាសគ្មានន័យ ព្រោះច្បាប់ខ្លះនោះពុំត្រូវបានយកមកប្រើប្រាស់សំរាប់ដាក់ទោសទណ្ឌដល់ការប្រព្រឹត្តល្មើសដូចជាការឃុបឃិតរវាងមន្ត្រីទុច្ចរិត ជាមួយឈ្មួញខិលខូចក្នុងអាជីវកម្មឈើខុសច្បាប់ សត្វព្រៃបទល្មើសនេសាទ ការនាំចូលទំនិញខូចគុណភាព ការគេចពន្ធ និងការដឹកទំនិញលើសចំណុះដែលធ្វើឱ្យខូចផ្លូវ បាក់ស្ពានជាដើម ។ ការខ្វះឆន្ទៈ និងខ្វះចំណាត់ការបានក្លាយជាកត្តាជំរុញមន្ត្រីខិលខូច ក៏ដូចជាជនទុច្ចរិតប្រព្រឹត្តល្មើសក្លាយជាទំលាប់ដើម្បីជាប្រយោជន៍បុគ្គល និងបក្សពួកខ្លួន ។

ការបង្ក្រាបព្រៃឈើទ្រង់ទ្រាយធំនាពេលកន្លងមក និងការបោសសំអាតរាល់ការប្រើប្រាស់ស្លាកលេខយានយន្ត ខ.ម និង ន.ប និងពិសេសជាងនេះទៀតនោះ គឺការគេចវេះពីការបង់ពន្ធដូចជាពន្ធនាំចូល ពន្ធលើមធ្យោបាយយានយន្តជាដើម។ល។ គឺមិនអាចខ្វះបានពីបទបញ្ជាខ្លាំងៗរបស់សម្តេចតេជោនាយករដ្ឋមន្ត្រីនោះទេ ទើបឃើញសកម្មភាពបង្ក្រាបមានភាពសកម្ម និងមានប្រសិទ្ធភាព ដូចជាការបង្ក្រាបលើបទល្មើសព្រៃឈើស្លាកលេខយានយន្ត ខ.ម និង ន.ប ការកាត់កន្ទុយរថយន្ត ដែលច្នៃដើម្បីដឹកលើសទំនង់ជាដើម។ល។ ទោះបីជាបែបណា ភាពអសកម្មទាំងនេះបែរជាលាស់ត្រួយលូតលាស់ឡើងវិញ ដែលយើងឃើញរៀងរាល់ថ្ងៃ ដូចជាបទល្មើសព្រៃឈើ ការប្រើប្រាស់ស្លាកលេខយានយន្ត ខ.ម និង ន.ប លើដងផ្លូវពិសេសក្នុងរាជធានី ភ្នំពេញ ព្រមទាំងការឃើញរាល់ថ្ងៃការប្រើរថយន្តដឹកទំនិញដ៏វែងរបស់ក្រុមហ៊ុនមួយចំនួន ពិសេសក្រុមហ៊ុនដែលតែងតែលើកដាក់ទំនិញនៅតាមបណ្តោយផ្លូវ២០០៤ ខណៈពេលដែលចំណាត់ការរបស់អាជ្ញាធរពាក់ព័ន្ធកំពុងតែលែងដៃលើការងារដែលជាប្រយោជន៍ជាតិ សង្គម ដែលសាធារណៈជនគាំទ្រ ហើយចំណាត់ការរបស់អាជ្ញាធរលើបទលហុខ្លះកំពុងបន្តគ្មានថ្ងៃស្រាកស្រាន្តដូចជា ការផាកពិន័យលើម៉ូតូមិនដាក់កញ្ចក់ មិនពាក់មួកសុវត្ថិភាពជាដើម ។

ទោះជាយ៉ាងណា ប្រជាពលរដ្ឋមានការគាំទ្រទាំងស្រុង និងស្អប់ខ្ពើមរាល់សកម្មភាពអសកម្មទាំងឡាយដែលផ្ទុយនឹងច្បាប់ មិនថាការមិនពាក់មួកសុវត្ថិភាពក្នុងពេលបើកបរ មិនដាក់កញ្ចក់ ការយកឈ្មោះវត្តធ្វើជាស្លាកលេខយានយន្តជាដើម ។ ពិតជាគួរឱ្យថ្កោល ទោសណាស់ ។ ទន្ទឹមនឹងនេះ ក៏មានក្តីសង្ឃឹមដែរថា អាជ្ញាធរគួរយកច្បាប់ដែលមានបច្ចុប្បន្នមកអនុវត្ត និងបន្តអនុវត្តលើបទបញ្ជារបស់សម្តេចតេជោនាយករដ្ឋមន្ត្រីឱ្យបានខ្ជាប់ខ្ជួន សំដៅបោសសំអាតសកម្មភាពអសកម្មដើម្បីជាផលប្រយោជន៍ជាតិ និងសង្គម ៕

ចំនួនអ្នកស្លាប់ដោយសារគ្រោះទឹកជំនន់ និងការបាក់ដីនៅប្រេស៊ីលឡើងដល់៤៦៤នាក់

January 14, 2011 at 9:53 AM

គ្រោះធម្មជាតិទឹកជំនន់ ការបាក់ដី និងខ្យល់ព្យុះ ដែលវាយប្រហារលើទីក្រុងរីយ៉ូដឺហ្សាណេរ៉ូ

អាជ្ញាធរមូលដ្ឋាននិយាយកាលពីល្ងាចថ្ងៃទី១៣ មករា ថា គិតត្រឹមថ្ងៃទី១៣ មករា ចំនួនអ្នកស្លាប់ដោយសារគ្រោះធម្មជាតិទឹកជំនន់ ការបាក់ដី និងខ្យល់ព្យុះ ដែលវាយប្រហារយ៉ាងធ្ងន់ធ្ងរ លើទីក្រុងរីយ៉ូដឺហ្សាណេរ៉ូ របស់ប្រទេសប្រេស៊ីល កើនឡើងដល់៤៦៤នាក់ហើយ ។ គ្រោះធម្មជាតិនេះជាបាតុភូតធម្មជាតិធ្ងន់ធ្ងរបំផុត វាយប្រហាររដ្ឋរីយ៉ូក្នុងប្រវត្តិសាស្ត្ររបស់ប្រទេសប្រេស៊ីល ។ វាធ្វើឱ្យពលរដ្ឋប្រេស៊ីលជួបផលវិបាកធ្ងន់ធ្ងរដោយផ្លូវថ្នល់ត្រូវកាត់ផ្តាច់ ហើយគ្មានភ្លើងអគ្គិសនី និងទឹកស្អាតប្រើប្រាស់ ។

មនុស្ស១៣.០០០នាក់បានបង្ខំចិត្តចាកចេញពីផ្ទះសំបែងរបស់ខ្លួន ហើយ៦.០០០នាក់ទៀតត្រូវរស់នៅក្នុងជំរកបណ្តោះអាសន្នតាមសាលារៀននិងកន្លែងផ្សេងៗ ។ ជាមួយគ្នានេះ កាលពីព្រឹកថ្ងៃទី១៣ មករា កន្លងមក ប្រធានាធិបតីប្រេស៊ីលដែលទើបឡើងកាន់តំណែងលោកស្រីឌីលម៉ា រ៉ូសសៃហ្វ និងអភិបាលរដ្ឋរីយ៉ូ បានអញ្ជើញទៅកាន់តំបន់រងគ្រោះ ហើយលោកស្រីរ៉ូហ្វសេហ្វ បានសន្យាថានឹងជួយតំបន់រងគ្រោះទាំងនោះ ។ អាជ្ញាធររដ្ឋរីយ៉ូឱ្យដឹងទៀតថា ចំនួនអ្នកស្លាប់អាចកើនឡើងច្រើនថែមទៀត ខណៈក្រុមអ្នកជួយសង្គ្រោះកំពុងស្រាវជ្រាវរកជនរងគ្រោះដែលកប់ក្នុងដី ៕

រដ្ឋមន្ត្រីមហាផ្ទៃកូវ៉ែតសុំលាលែងចេញពីតំណែង

January 14, 2011 at 9:50 AM

មន្ត្រីរដ្ឋាភិបាលនិយាយថា រដ្ឋមន្ត្រីមហាផ្ទៃកូវ៉ែត លោក Sheikh Jaber Khaled Al-Sabah បានដាក់ពាក្យសុំលាលែងចេញពីតំណែងកាលពីថ្ងៃទី១៣ មករា កន្លងមក ដោយសារការស្លាប់អ្នកទោសម្នាក់ដែលតាមការចោទប្រកាន់ថា ស្លាប់ដោយសារការធ្វើទារុណកម្មរបស់ប៉ូលិស ។ មន្ត្រីដដែលបានប្រាប់ទីភ្នាក់ងារសារព័ត៌មានបារាំង AFP ថា លោក Sheikh Al-Sabah បានដាក់ពាក្យសុំលាលែងចេញពីតំណែងជូនលោកនាយករដ្ឋមន្ត្រី ដើម្បីធ្វើការសំរេចថា តើត្រូវទទួលយកសំណើនេះ ឬក៏អត់ ។

ទោះបីជាបែបណា លោក Sheikh Al-Sabah មិនធ្វើអត្ថាធិប្បាយលើព័ត៌មានអំពីការដាក់ពាក្យសុំលាលែងចេញពីតំណែងរបស់លោកទេ ប៉ុន្តែគេហទំព័រមួយបានចេញផ្សាយព័ត៌មានដោយដកស្រង់សំដីលោកដែលថ្លែងថា «ខ្ញុំបានដាក់ពាក្យសុំលាលែងចេញពីតំណែងដើម្បីជាការទទួលខុសត្រូវចំពោះកាតព្វកិច្ចរបស់ខ្ញុំ ។ ខ្ញុំមិនសមដឹកនាំក្រសួងដែលផ្តល់ទុក្ខលំបាកដល់ពលរដ្ឋនោះទេ» ។ សមាជិកសភាគណបក្សប្រឆាំងអ៊ិស្លាមបានស្វាគមន៍សំណើរបស់លោក Sheikh Al-Sabah ។ គណៈកម្មការមួយដែលតែងតាំងដោយក្រសួងមហាផ្ទៃកូវ៉ែត រកឃើញថា អ្នកទោសដែលស្លាប់នោះឈ្មោះ Mutairi បានស្លាប់នៅប៉ុស្តិ៍ប៉ូលិស ហើយត្រូវបានសង្ស័យថា ស្លាប់ដោយសារការធ្វើទារុណកម្ម ៕

រឿងមាន់ពងលើស្រូវ សង្គមស៊ីវិលគាំទ្រដែលចាប់ខ្លួនមន្ត្រីខិលខូចដោយអង្គភាពប

January 14, 2011 at 9:39 AM

រាជធានីភ្នំពេញ ៖ ការឃាត់ខ្លួនលោកឧត្តមសេនីយ៍ឯក ម៉ឹក ដារ៉ា ដែលជាអគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន និង ជាប្រធានមន្ទីរប្រឆាំងគ្រឿងញៀន រួមជាមួយសហការីរបស់លោកគឺស័ក្តិ៤កន្លះ ជា ឡេង កាលពីថ្ងៃទី១២ មករា បានធ្វើឱ្យមានការចាប់អារម្មណ៍ពីគ្រប់មជ្ឈដ្ឋាន បន្ទាប់ពីការឃាត់ខ្លួនអតីតស្នងការ និងស្នងការរងខេត្តបន្ទាយមានជ័យ ដែលមិនមានប្រភពផ្លូវការណាមួយបានប្រកាសឱ្យដឹងនៅឡើយ ពីទោសកំហុសដែលត្រូវចោទប្រកាន់ដោយគ្រាន់តែប្រភពក្រៅផ្លូវការឱ្យដឹងថា មានការទាក់ទិននឹងបញ្ហាគ្រឿងញៀន ។ ទោះបីជាបែបណា បញ្ហាសង្ស័យពីការទាក់ទិននឹងគ្រឿងញៀនដូចគ្នា ក៏ត្រូវបានគេផ្តោតទៅលើប្រធានមន្ទីរប្រឆាំងគ្រឿងញៀនគឺលោកឧត្តមសេនីយ៍ឯកម៉ឹក ដារ៉ា និងមន្ត្រីក្រោមឱវាទ មួយរូបដែលមានតួនាទីស្នូលរបស់ខ្លួនសំរាប់ការបង្ក្រាប បែរជាមានទោសក្នុងបទទាក់ទិននឹងគ្រឿងញៀនទៅវិញ ។ តាមប្រភពមិនផ្លូវការឱ្យដឹងនៅថ្ងៃទី១៣ មករា ថា លោកម៉ឹក ដារ៉ា ត្រូវបាននាំខ្លួនទៅសាកសួរនៅអង្គភាពប្រឆាំងអំពើពុករលួយហើយក្នុងថ្ងៃដដែលនេះក៏បានបញ្ជូនមកកាន់នាយកដ្ឋានអន្តរាគមន៍ក្រសួងមហាផ្ទៃវិញ ។ ចំណែកមន្ត្រីក្រោមឱវាទឋានៈប្រធានការិយាល័យគឺលោកជា ឡេង ត្រូវបានឃុំខ្លួននៅកន្លែងផ្សេងគ្នា ។

លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍ប្រាប់អ្នកកាសែតថា នៅថ្ងៃទី១២ មករា សមត្ថកិច្ចនគរបាលនៃអគ្គស្នងការដ្ឋាននគរបាលជាតិរបស់ក្រសួងមហាផ្ទៃ បានសហការជាមួយអង្គភាពប្រឆាំងអំពើពុករលួយ កោះអញ្ជើញលោកឧត្តមសេនីយ៍ឯក ម៉ឹក ដារ៉ា ដើម្បីមកសាកសួរព័ត៌មានមួយចំនួន ហើយរហូតមកដល់ព្រលប់ថ្ងៃទី១២ មករានោះ លោកឧត្តមសេនីយ៍ឯក ម៉ឹក ដារ៉ា ស្ថិតនៅក្រោមការឃុំគ្រងរបស់សមត្ថកិច្ចក្រសួងមហាផ្ទៃនៅឡើយ ។ យ៉ាងណាក៏ដោយ អ្នកនាំពាក្យក្រសួងមហាផ្ទៃ មិនបានអត្ថាធិប្បាយលំអិតជុំវិញសំណុំរឿងពុករលួយ ពាក់ព័ន្ធនឹងបញ្ហាគ្រឿងញៀនដ៏ធំនៅខេត្តបន្ទាយមានជ័យ ថាតើជាប់ពាក់ព័ន្ធនឹងមន្ត្រីជាន់ខ្ពស់ក្នុងជួររដ្ឋាភិបាល ឬក៏មានការចាប់ឃាត់ខ្លួនឧត្តមសេនីយ៍ណាផ្សេងទៀតនោះទេ ។

សូមរំលឹកថា លោកឧត្តមសេនីយ៍ត្រីហ៊ុន ហ៊ាន អតីតស្នងការនគរបាលខេត្តបន្ទាយមានជ័យ និងលោកវរសេនីយ៍ឯក ឈៀង សុន ស្នងការរងខេត្តបន្ទាយមានជ័យ ត្រូវបានដកហូតមុខតំណែងកាលពីថ្ងៃទី៧ មករា និងត្រូវឃាត់ខ្លួនជាបន្តបន្ទាប់ ។ កាលពីថ្ងៃអង្គារទី១១ មករា អតីតមេប៉ូលិសខេត្តបន្ទាយមានជ័យ ជាប់ព្រំដែនប្រទេសថៃទាំង២រូប ត្រូវបានបញ្ជូនចេញពីក្រសួងមហាផ្ទៃទៅកាន់អង្គភាពប្រឆាំងអំពើពុករលួយរបស់លោកឱម យ៉ិនទៀង ។
ការចាប់ខ្លួនអតីតមេប៉ូលិសខេត្តបន្ទាយមានជ័យខាងលើនេះ ត្រូវបានគេបង្ហើបឱ្យដឹងថា អាចជាប់ពាក់ព័ន្ធនឹងសំណុំរឿងគ្រឿងញៀនដ៏ធំមួយ ដែលមេប៉ូលិសទាំង២រូបបានដោះលែងជនល្មើសជាថ្នូរនឹងលុយសូកប៉ាន់យ៉ាងច្រើន។ លោកស៊ាន បូរ៉ាត អនុប្រធានអង្គភាពប្រឆាំងអំពើពុករលួយ បានថ្លែងប្រាប់ក្រុមអ្នកកាសែត នៅក្រសួងព័ត៌មាន ក្នុងពេលចុះផ្សព្វផ្សាយច្បាប់ពីការប្រកាសទ្រព្យសម្បត្តិថា អតីតមេប៉ូលិសខេត្តបន្ទាយមានជ័យ និងជនសង្ស័យមួយចំនួន ដែលជាប់ពាក់ព័ន្ធនឹងសំណុំរឿងគ្រឿងញៀននេះ ត្រូវបានចោទប្រកាន់ពីបទពុករលួយ ។ ក្រោយការសាកសួរចប់សព្វគ្រប់ អ្នកទាំងនោះ នឹងត្រូវបញ្ជូនទៅតុលាការដើម្បីកាត់ទោស ។

មន្ដ្រីសង្គមស៊ីវិលគ្រោងចេញសេចក្ដីថ្លែងការណ៍រួមគាំទ្រអង្គភាពប្រឆាំងអំពើពុករលួយដែលបានចាប់មន្ដ្រីខិលខូចសមាគមការពារសិទ្ធិមនុស្សមួយចំនួននៅក្នុងប្រទេសកម្ពុជា គ្រោងនឹងចេញសេចក្ដីថ្លែងការណ៍រួមមួយនៅពេលខាងមុខឆាប់ៗនេះ ដើម្បីលើកទឹកចិត្ដដល់សមាជិកអង្គភាពប្រឆាំងអំពើពុករលួយ ដែលបានបញ្ចេញស្នាដៃក្នុងការបំពេញភារកិច្ចវែកមុខមន្ត្រីអសកម្មយកមកទទួលខុសត្រូវចំពោះមុខច្បាប់ ។ ការថ្លែងយ៉ាងដូច្នេះគឺនៅចំពេលដែលរាជរដ្ឋាភិបាលកម្ពុជាកំពុងបើកយុទ្ធនាការឃាត់ខ្លួនមន្ដ្រីជាន់ខ្ពស់ជាច្រើននាក់ ក្នុងនោះមានចាប់ពីមន្ដ្រីថ្នាក់មធ្យម រហូតដល់ថ្នាក់ឧត្ដមសេនីយ៍ បន្ទាប់ពីរកឃើញថា មានជាប់ពាក់ព័ន្ធជាមួយអំពើពុករលួយ និង បទល្មើសយោធាផងដែរ ។

ប្រធានកម្មវិធីស៊ើបអង្កេតបទរំលោភសិទ្ធិមនុស្សរបស់សមាគមអាដហុកប្រចាំរាជធានីភ្នំពេញ លោក ចាន់ សាវ៉េត កាលពីរសៀលថ្ងៃទី១៣ ខែមករា បានថ្លែងថា សមាគម «អាដ ហុក» រួមទាំងសមាគមការពារសិទ្ធិមនុស្សមួយចំនួនទៀតនៅក្នុងប្រទេសកម្ពុជាមានគម្រោងចេញសេចក្ដីថ្លែងការណ៍រួមមួយ ដើម្បីសំដែងនូវការកោតសសើដល់អង្គភាពប្រឆាំងអំពើពុករលួយ ចំពោះសកម្មភាពលេចធ្លោមួយចំនួនក្នុងការចាប់់ខ្លួនមន្ត្រីអសកម្មយកមកប្រឈមនឹងផ្លូវច្បាប់ ។ លោកបានបន្ដថា យើងនឹងរៀបចំលិខិតនេះនៅសប្ដាហ៍ក្រោយ ដោយមូលហេតុសង្គមស៊ីវិលទាំងអស់ មានការគោរពកោតសរសើរយ៉ាងខ្លាំងនូវស្នាដៃដ៏ប៉ិនប្រសប់ក្នុងការវែកមុខមនុស្សអាក្រក់ដែលបានលាក់ខ្លួនជាយូរមកហើយក្នុងជួររដ្ឋាភិបាល ។ អ្នកទាំងនោះភាគច្រើនជាអ្នកប្រព្រឹត្តអំពើខុសច្បាប់ឬនៅពី ក្រោយខ្នងក្រុមឧក្រិដ្ឋជន ដូចជាជួញដូរគ្រឿងញៀន អំពើពុករលួយ បង្កជាហានិភ័យយ៉ាងច្រើនដល់សង្គមជាតិយើង ជាពិសេសអំពើរំលោភសិទ្ធិមនុស្ស ដែលជាមូលហេតុចំបងក្នុងការអូសច្បាប់ប្រទេសឱ្យធ្លាក់ទៅរកភាពកំសោយ ។

ប្រធានកម្មវិធីស៊ើបអង្កេតរូបនេះបានបន្ថែមទៀតថា តាមការកត់សំគាល់ឃើញចាប់តាំងពីអង្គភាពប្រឆាំងអំពើពុករលួយចាប់ផ្ដើមដំណើរការជាផ្លូវការរហូតមក អង្គភាពនេះបានចាប់ខ្លួនមន្ដ្រីចំនួន៧រូបហើយ ហើយពេលថ្មីៗនេះមានឧត្ដមសេនីយ៍ផ្កាយ៣យោធាចំនួន២នាក់ និងឧត្ដមសេនីយ៍ប៉ូលិសចំនួន២នាក់ដូចគ្នា ក្រៅពីនេះនៅមានប្រធានគុក និងព្រះរាជអាជ្ញាមួយរូបផងដែរ ។ កាលពីថ្ងៃទី១១ ខែមីនា ឆ្នាំ២០១០ រដ្ឋសភាដែលជាស្ថាប័នកំពូលនៃប្រទេសកម្ពុជា បានអនុម័តច្បាប់ស្ដីពីការប្រឆាំងអំពើពុករលួយ ដែលមាន៩ជំពូក និង៥៧មាត្រា ។ បន្ទាប់ពីច្បាប់នេះត្រូវបានប្រកាសឱ្យប្រើ រាជរដ្ឋាភិបាលបានបង្កើតឱ្យមានក្រុមប្រឹក្សាជាតិប្រឆាំងអំពើពុករលួយ និងអង្គភាពប្រឆាំងអំពើពុករលួយដែលមាន លោកឱម យ៉ិនទៀង ជាប្រធាន ដើម្បីបោសសំអាតរាល់អំពើពុករលួយ ហើយមានមន្ដ្រីរដ្ឋាភិបាលមួយចំនួនត្រូវបានចាប់ខ្លួនជាបន្ដបន្ទាប់ដោយដើមហេតុចេញពីការប្រព្រឹត្តិអំពើពុករលួយ មុននឹងលេចចេញនូវបទល្មើសផ្សេងៗទៀត ។

គួរកត់សំផងដែរថា លោកសាមិត្ដ វីរៈ និងលោកពើយ ប៉ែល ដែលអះអាងខ្លួនគាត់ទាំងពីរនាក់ថាជាឧត្ដមសេនីយ៍ យោធា ត្រូវបានចាប់ខ្លួនជាបន្ដបន្ទាប់កាលពីថ្ងៃទី១០និង១២ ខែមករា តាមអំណាចដីកាអយ្យការយោធាដោយចោទប្រកាន់ថា ពួកគាត់ទាំងពីរនាក់ បានប្រព្រឹត្តបទល្មើសយោធាជាច្រើនករណី ។ ទន្ទឹមនឹងនេះខាងឧត្ដមសេនីយ៍ប៉ូលិសក៏មានការចាប់ខ្លួនជាបន្ដបន្ទាប់ដែរ ដោយកាលពីថ្ងៃទី១០ ខែ មករា ស្នងការ-ស្នងការរងខេត្ដបន្ទាយមានជ័យ គឺលោកឧត្ដសេនីយ៍ត្រី ហ៊ុន ហ៊ាន និងលោកវរសេនីយ៍ ឈៀង សុន ដែលមុននេះលោកទទូលបន្ទុកជាប្រធានការិយាល័យភស្ដុភារ និងហិរញ្ញវត្ថុពីបទប្រព្រឹត្តអំពើពុករលួយ ។ ក្រោយបន្ដិចមក លោកឧត្ដមសេនីយ៍ឯក ម៉ឹក ដារ៉ា ជាអគ្គលេខាធិការនៃអាជា្ញធរជាតិប្រយុទ្ធប្រឆាំងគ្រឿងញៀន រួមទាំងមន្ដ្រីថ្នាក់ក្រោមម្នាក់ទៀតរបស់លោកក៏ត្រូវបានចាប់ខ្លួន បញ្ជូនទៅឱ្យអង្គភាពប្រឆាំងអំពើពុករលួយសាកសួរផងដែរ ។ ក្រៅពីនោះនៅមានលោកនួន វណ្ណា អតីតប្រធានពន្ធនាគារខេត្ដបន្ទាយមានជ័យ រួមទាំងលោកតុប ចាន់សេរីវុធ អតីតព្រះរាជអាជ្ញាអមសាលាដំបូងខេត្តពោធិ៍សាត់ ក៏ត្រូវបានចាប់ខ្លួននិងឃុំនៅក្នុងពន្ធនាគាររួចមកហើយដែរ ។

អ្នកនាំពាក្យអង្គភាពប្រឆាំងអំពើពុករលួយនៃប្រទេសកម្ពុជា លោកកែវ រ៉េមី បានថ្លែងប្រាប់តាមទូរស័ព្ទកាលពីថ្ងៃទី១៣ មករា ថា លោកនួន វណ្ណា និងលោកតុប ចាន់សេរីវុធ ទាំង២នាក់នេះត្រូវបានចងក្រងសំណុំរឿងបញ្ជូនទៅតុលាការរួចហើយ ចំណែកករណីលោកឧត្ដមសេនីយ៍ប៉ូលិសដែលត្រូវបានចាប់ខ្លួននាពេលថ្មីៗនេះ កំពុងតែស៊ើបសួរដើម្បីបន្ដនីតិវិធី ។ ដោយឡែកទាក់ទិននឹងការចាប់ខ្លួនឧត្ដមសេនីយ៍យោធាក្លែងក្លាយ គឺលោកពើយ ប៉ែល និងលោកសាមិត្ដ វីរៈ នោះ លោកកែវ រ៉េមី ប្រាប់ឱ្យដឹងថា វាទំនងជាគេមិនបញ្ជូនមកកាន់អង្គភាពប្រឆាំងអំពើពុករលួយទេ ពីព្រោះពួកគាត់ជាប់ពាក់ពន្ធ័ជាមួយបទល្មើសយោធាគឺជាសមត្ថកិច្ចតុលាការសឹក ៕

អំណោយសប្បុរសជន៣០ដុល្លារជូនដល់ទារកកើតមកគ្មានលលាដ៍ក្បាល

January 14, 2011 at 9:32 AM

ខេត្តស្វាយរៀង ៖ អំណោយសប្បុរសជនដែលមានទឹកប្រាក់ចំនួន៣០ដុល្លារ ត្រូវបានភ្នាក់ងារកោះសន្តិភាព លោកវ៉ាន់ ប៊ុនធឿន កាលពីថ្ងៃទី១២ មករា វេលាម៉ោង៩ព្រឹក យកទៅប្រគល់ជូនម្តាយទារកអភ័ព្វកើតមកគ្មានលលាដ៏ក្បាល ចេញខួរនៅខាងក្រៅ ឈ្មោះ សរ សម្ផស្ស អាយុ១៩ឆ្នាំ នៅភូមិព្រះទន្លេ សង្កាត់សង្ឃ័រ ក្រុងស្វាយរៀង ។ ប្រាក់អំណោយនេះកោះសន្តិភាពបានទទួលពីលោកខាន់ សុផេង នៅរាជធានីភ្នំពេញ ។

គួររំលឹកថា ទារកអភ័ព្វនោះបានប្រសូតចេញពីផ្ទៃម្តាយកាលពីថ្ងៃទី៣១ ធ្នូ ឆ្នាំ២០១០ វេលាម៉ោង១២ថ្ងៃត្រង់ នៅមណ្ឌលសុខភាពសង្ឃ័រ ហើយដោយសារជីវភាពក្រីក្រ ស្ត្រីជាម្តាយបានត្រឡប់មកអាំងភ្លើងនៅផ្ទះតាមក្បួនបុរាណ ហើយទារកនោះក៏បានស្លាប់ទៅវិញនៅថ្ងៃទី៣ មករា ឆ្នាំ២០១១ វេលាម៉ោង៣រសៀល ។ បច្ចុប្បន្នស្ត្រីជាម្តាយពុំទាន់មានសុខភាពល្អនៅឡើយទេ ។

នាង សរ សម្ផស្ស និងម្តាយរបស់នាងមានចិត្តត្រេកអរយ៉ាងខ្លាំង ខណៈដែលកំពុងខ្វះខាតមានសប្បុរសជនផ្តល់ក្តីមេត្តាជួយឧបត្ថម្ភអំណោយដ៏ថ្លៃថ្លាជាប្រាក់ដល់រូបនាង ដើម្បីទិញថ្នាំផឹកព្យាបាលបន្ត និងសល់ប្រាក់មួយចំនួននាងនឹងធ្វើចង្ហាន់ប្រគេនព្រះសង្ឃ ដើម្បីឧទ្ទិសមគ្គផលដល់កូនប្រុសអភ័ព្វនេះពេលកើតជាតិណាៗសូមឱ្យមានរូបរាងកាយល្អដូចគេ ។ នាងបានជូនពរដល់សប្បុរសជនឱ្យជួបនូវពុទ្ធពរបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕

អធិបតេយ្យភាពរបស់កម្ពុជា សៀមត្រូវតែគោរព ការចាប់ខ្លួនជនជាតិសៀមទាំង ៧នាក់ មិ

January 14, 2011 at 9:25 AM

ក្នុងរយៈពេលជិតពីរសប្តាហ៍កន្លងទៅនេះ មានការធ្វើសេចក្តីអត្ថាធិប្បាយជាច្រើនក្នុងចំណោមមជ្ឈដ្ឋានជាតិ និងអន្តរជាតិជុំវិញការចាប់ខ្លួនជនជាតិថៃទាំង៧នាក់ដោយអាជ្ញាធរកម្ពុជា កាលពីថ្ងៃទី២៩ ធ្នូ ឆ្នាំ២០១០ ដែលជនជាតិថៃទាំង៧នាក់ ក្នុងនោះមានវីរ៉ា ស៊ុមខ្វាមឃីត ដែលជាមេដឹកនាំម្នាក់នៃចលនាសម្ព័ន្ធប្រជាជន ដើម្បីលទ្ធិប្រជាធិបតេយ្យថៃ និងម្នាក់ទៀត ជាសមាជិកសភាមកពីគណបក្សប្រជាធិបតេយ្យដែលកំពុងគ្រប់គ្រងអំណាចរបស់ប្រទេសថៃ បានឆ្លងចូលមកក្នុងទឹកដីកម្ពុជា ដោយខុសច្បាប់ ហើយបានចូលមកក្នុងតំបន់យោធារបស់កម្ពុជា ។ ការចាប់ខ្លួនជនជាតិថៃទាំង៧នាក់នេះ បានធ្វើឡើងបន្ទាប់ពីទំនាក់ទំនងរវាងប្រទេសកម្ពុជា និងថៃមានភាពល្អប្រសើរ បន្ទាប់ពីមានជំនួបច្រើនលើករវាងនាយករដ្ឋមន្ត្រីនៃប្រទេសទាំងពីរ ដែលបានធ្វើឱ្យស្ថានការណ៍វិលត្រឡប់ទៅរកដូចមុនថ្ងៃ១៥ កក្កដា ឆ្នាំ២០០៨វិញ ។ ក៏ប៉ុន្តែសារព័ត៌មានថៃខ្លះបានលើកឡើងថា ការចាប់ខ្លួនជនជាតិថៃទាំង៧នាក់ បានធ្វើឡើងក្នុងទឹកដីថៃ ដែលការលើកឡើងនេះ ផ្ទុយពីការពិតទាំងស្រុង ។

មតិជាតិ និងអន្ដរជាតិបានយល់ដឹងយ៉ាងច្បាស់ថា ខ្សែបន្ទាត់ព្រំដែនអន្ដរជាតិរវាងកម្ពុជា និងថៃត្រូវបានកសាងឡើងដោយអនុសញ្ញាឆ្នាំ១៩០៤ និងសន្ធិសញ្ញា ឆ្នាំ១៩០៧ ហើយផែនទី អន្ដរជាតិឆ្នាំ១៩០៨ ត្រូវបានផលិត និងចែកចាយដល់ប្រទេសពាក់ព័ន្ធ និងដល់បណ្ដាប្រទេស ដទៃទៀតដូចជាអង់គ្លេស សហរដ្ឋអាមេរិក អាល្លឺមង់ និងរុស្ស៊ី។ល។ ហើយប្រទេសទាំងពីរកម្ពុជា និងថៃ បានប្រើប្រាស់ផែនទីអន្ដរជាតិឆ្នាំ១៩០៨អស់រយៈពេលជាង១០០ឆ្នាំមកហើយ។ ពិសេសនៅក្នុងឆ្នាំ១៩៦២ ក្នុងរឿងក្ដីអំពីប្រាសាទព្រះវិហារ តុលាការយុត្ដិធម៌អន្ដរជាតិក្រុងឡាអេ បានប្រើប្រាស់ផែនទីឆ្នាំ១៩០៨ ដើម្បីសម្រេចក្ដី ហើយបានរកឃើញនូវសុពលភាព និងនីត្យានុកូលភាព អន្ដរជាតិនៃផែនទីឆ្នាំ១៩០៨ ដែលផែនទីឆ្នាំ១៩០៨ មានតម្លៃលើសលប់លើបញ្ញត្ដិនៃកិច្ចព្រមព្រៀងអន្ដរជាតិស្ដីពីព្រំដែនឥណ្ឌូចិន កម្ពុជា និងថៃ ឆ្នាំ១៩០៤ និង១៩០៧។ ខ្សែបន្ទាត់ព្រំដែនអន្ដរជាតិរវាងកម្ពុជា និងថៃមានអាយុជាង១០០ឆ្នាំ ជាខ្សែបន្ទាត់ព្រំដែនច្បាស់លាស់ និងស្ថារពរ ដែលគ្មានតំបន់ជម្លោះអ្វីឡើយរវាងប្រទេសទាំងពីរ។

ការឆ្លងចូលទៅក្នុងទឹកដីកម្ពុជាដោយខុសច្បាប់ និងចូលទៅក្នុងតំបន់យោធាកម្ពុជាដោយ ជនជាតិថៃទាំង៧នាក់ ត្រូវបានអាជ្ញាធរកម្ពុជាចាប់ខ្លួនក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្ដបន្ទាយមានជ័យ ដែលជាភូមិសាស្ដ្រស្ថិតក្នុងទឹកដីកម្ពុជា។ រូបភាពវីដេអូឃ្លីប ដែលត្រូវអាជ្ញាធរកម្ពុជារឹបអូសបាន ដែលថតដោយជនជាតិថៃទាំង៧នាក់ បានបង្ហាញយ៉ាងច្បាស់លាស់អំពីទីតាំងនៃភូមិសាស្ដ្រនោះ គឺស្ថិតនៅក្នុងទឹកដីកម្ពុជាពិតប្រាកដ ដែលគេមិនអាចប្រកែកបាន។ យោងតាមរូបភាពវីដេអូឃ្លីប គឺជាភស្ដុតាងមួយបានបង្ហាញនូវអំពើនៃការឆ្លងចូលដោយខុសច្បាប់ និងចូលទៅក្នុងតំបន់យោធាកម្ពុជាដោយជនជាតិថៃទាំង៧នាក់ ដែលអំពើទាំងនេះបានរំលោភទាំងស្រុងទៅលើអធិបតេយ្យ និងធ្វើឱ្យប៉ះពាល់ដល់សន្ដិសុខជាតិរបស់កម្ពុជា។ ការឆ្លងចូលមកក្នុងទឹកដីកម្ពុជា និងចូលក្នុងតំបន់យោធាកម្ពុជាដោយជនជាតិថៃទាំង៧នាក់ គឺជាអំពើធ្វើឡើងតាមផែនការគិតទុកជាមុនរបស់ជនជាតិថៃទាំង៧នាក់នេះ។

ក្រោយពីបានចាប់ខ្លួនជនជាតិថៃទាំង៧នាក់នេះ និងដោយបានពិនិត្យមើលឃើញនូវភស្ដុតាងដែលអាជ្ញាធរកម្ពុជារឹបអូសបាន គឺមន្ដ្រីជាន់ខ្ពស់នៃរដ្ឋាភិបាលថៃ ក្នុងនោះរដ្ឋមន្ដ្រីការបរទេសថៃ កាស៊ីត ភិរម្យ ក៏បានទទួលស្គាល់ថា ជនជាតិថៃទាំង៧នាក់នោះ ពិតជាបានឆ្លងចូលទៅក្នុងទឹកដីកម្ពុជាដោយខុសច្បាប់ និងបានចូលទៅក្នុងតំបន់យោធាកម្ពុជាមែនក្នុងពេលចាប់ខ្លួននោះ។ នៅថ្ងៃទី១១ ខែមករា តាមការចុះផ្សាយរបស់សារព័ត៌មានអាយអិន អិន អនឡាញរបស់ថៃ ដោយស្រង់សំដីរបស់ឧត្ដមសេនីយ៍ទោ ថៈវ៉ាត់ឆៃ សមុតសាខន បានថ្លែងថា «ថៃត្រូវទទួលស្គាល់ថា ថៃ៧នាក់បានបំពានចូលទឹកដីកម្ពុជាតាមអំពើចិត្ដ ដែលមិនបានជូនដំណឹងដល់សមត្ថកិច្ចជាមុន ប្រសិនបើបានជូនដំណឹងជាមុននោះក៏នឹងគ្មានបញ្ហាពិបាកដោះស្រាយតាមក្រោយទេ។ បើសិននរណាចូលក្នុងទឹកដីថៃក្នុងលក្ខណៈបែបនេះ ក៏ត្រូវចាប់ខ្លួនដូចគ្នា ព្រោះជារឿងសេចក្ដីថ្លៃថ្នូរ ត្រូវតែផ្ដល់កិត្ដិយសឱ្យគ្នាទៅវិញទៅមក»។
នៅក្នុងពិភពលោកសម័យទំនើបនេះ រដ្ឋស៊ីវិល័យមួយត្រូវប្រកាន់យកនីតិរដ្ឋក្នុងទំនាក់ទំនងអន្ដរជាតិរបស់ខ្លួនជាមួយបណ្ដារដ្ឋនានា ដើម្បីរក្សាបានសុខសន្ដិភាព ស្ថិរភាព និងសណ្ដាប់ ធ្នាប់ពិភពលោក។ ដូច្នេះហើយ ករណីជនជាតិថៃទាំង៧នាក់ដែលត្រូវបានចាប់ខ្លួនក្នុងទឹកដីកម្ពុជា គឺត្រូវធ្លាក់ទៅក្នុងប្រព័ន្ធច្បាប់របស់កម្ពុជា ក្នុងឋានៈកម្ពុជាជារដ្ឋអធិបតេយ្យមួយ។

ករណីនេះ គ្រាន់តែជាសមត្ថកិច្ចធម្មតារបស់ប្រទេសនីមួយៗ ហើយអាស្រ័យទៅតាមច្បាប់របស់ប្រទេសនោះ ក្នុងចំណាត់ការតាមនីតិវិធីធម្មតានៃតុលាការរបស់ប្រទេសនីមួយៗ ដែលប្រទេសដទៃទៀតត្រូវតែគោរព ហើយមិនអាចប្រទេសដទៃទៀតលូកដៃចូលក្នុងកិច្ចការផ្ទៃក្នុងរបស់ប្រទេសមួយបានឡើយ។ រហូតមកដល់ពេលនេះ រដ្ឋាភិបាលនៃប្រទេសថៃទំនងជាបានយល់ដឹងអំពីប្រព័ន្ធច្បាប់កម្ពុជា ដោយបានណែនាំឱ្យក្រសួងការបរទេសថៃយកចិត្ដទុកដាក់អំពីជនជាតិថៃទាំង៧នាក់នេះ ហើយព្រមជាមួយគ្នានោះ ថៃក៏ត្រូវតែរក្សានូវទំនាក់ទំនងទ្វេភាគីរវាងប្រទេសទាំងពីរ។ នេះជាឥរិយាបថធម្មតាក្នុងទំនាក់ទំនងអន្ដរជាតិដែលរដ្ឋាភិបាលថៃត្រូវប្រកាន់យក ដើម្បីរក្សាចំណងមិត្ដភាពរវាងរដ្ឋនិងរដ្ឋ ហើយប្រទេសទាំងពីរសម្លឹងមើលឃើញនូវផលប្រយោជន៍យូរអង្វែងក្នុងក្របខណ្ឌនៃកិច្ចសហប្រតិបត្ដិការ និងការអភិវឌ្ឍដែលមានតម្លៃលើសលប់ពីករណីធម្មតាមួយ ដែលត្រូវដំណើរការតាមនីតិវីធីច្បាប់៕

ដោយ ៖ ឡុង សាគុណ

ប្រជាពលរដ្ឋក្រីក្រ អ្នកផ្ទុកមេរោគអេដស៍ កុមារកំព្រា ជនពិការចាស់ជរា និងអ្នកគ្មាន

January 14, 2011 at 9:09 AM

លោកជំទាវបណ្ឌិត ប៊ុន រ៉ានី ហ៊ុន សែន ក្នុងពិធីចែកអំណោយកាកបាទក្រហម

ប្រជាពលរដ្ឋទាំងជាង២ពាន់គ្រួសារបានទទួលអំណោយ

ខេត្តឧត្តរមានជ័យ ៖ លោកជំទាវបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានអញ្ជើញចុះចែកអំណោយដល់ប្រជាពលរដ្ឋក្រីក្រ អ្នកផ្ទុកមេរោគអេដស៍ កុមារកំព្រា ជនពិការ និងចាស់ជរាគ្មានទីពឹងចំនួន២.០៥២គ្រួសារមកពីស្រុក-ក្រុងចំនួន៥ ក្នុងខេត្ដឧត្ដរមានជ័យ ដែលពិធីចែកអំណោយនោះ បានធ្វើឡើងនៅសាលាបឋមសិក្សាសំរោង ស្ថិតក្នុងសង្កាត់សំរោង ក្រុងសំរោង ខេត្ដឧត្ដរមានជ័យ កាលពីថ្ងៃទី១៣ ខែមករា ។ ប្រជាពលរដ្ឋទាំងអស់នោះមកពីស្រុក-ក្រុងចំនួន៥ មានក្រុងសំរោង ស្រុកបន្ទាយអំពិល ស្រុកចុងកាល់ ស្រុកអន្លង់វែង និងស្រុកត្រពាំងប្រាសាទ ដោយក្នុង១គ្រួសារៗទទួលបានអង្ករ៣០គីឡូក្រាម មីយើង១០កញ្ចប់ ត្រីខ៥កំប៉ុង សារុង១ ក្រមា១ អាវយឺតដៃវែង១ មុង១ ភួយ១ កំណាត់ស១ដុំ នំបុ័ងសាប២ ទឹកបរិសុទ្ធឱរ៉ាល់២ដប និងថវិកាចំនួន៤ម៉ឺនរៀល ។

ដោយឡែកជនពិការ៧នាក់ ម្នាក់ៗទទួលបានរទេះ១គ្រឿង ថវិកា១ម៉ឺនរៀល។ ចំណែករទេះជនពិការ៤៣គ្រឿងទៀត បានផ្ដល់ជូនកាកបាទក្រហមខេត្ដសម្រាប់ទុកចែកជូនជនពិការនៅពេលក្រោយ។ ក្រៅពីនេះនៅមានថ្នាំពេទ្យមួយចំនួនទៀតត្រូវបានផ្ដល់ជូនមន្ទីរពេទ្យបង្អែក និងចែកថវិកាជូនលោកគ្រូ អ្នកគ្រូ និងយុវជនកាកបាទក្រហម អ្នកស្ម័គ្រចិត្ដ ព្រមទាំងសិស្សានុសិស្សផងដែរ។ ក្នុងនោះក៏មានការប្រគល់ជូនរថយន្ដ១គ្រឿងដល់សាខាកាកបាទក្រហមកម្ពុជា ខេត្ដឧត្ដរមានជ័យ ដែលជាអំណោយរបស់លោកនាយឧត្ដមសេនីយ៍ គន់ គីម នាយសេនាធិការចម្រុះនៃកងយោធពលខេមរភូមិន្ទ និងក្រុមការងារថ្នាក់កណ្ដាលចុះជួយខេត្ដឧត្ដរមានជ័យ។

នៅក្នុងឱកាសនោះលោកប៉ិច សុខិន អភិបាលខេត្ដ និងជាប្រធានកិត្ដិយសសាខាកាកបាទក្រហមកម្ពុជា ខេត្ដឧត្ដរមានជ័យ បានមានប្រសាសន៍ថា ក្នុងនាមគណៈអភិបាលខេត្ដ ក្រុមប្រឹក្សាខេត្ដ មន្ដ្រីរាជការ អាជ្ញាធរមូលដ្ឋានគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋ និងក្នុងនាមខ្លួនលោកផ្ទាល់សូមសម្ដែងនូវកតញុតាធម៌ និងការគោរពដឹងគុណដ៏ស្មោះអស់ពីដួងចិត្ដចំពោះ ទឹកចិត្ដមនុស្សធម៌ដ៏ប្រពៃថ្លៃថ្លាគ្មានពីរ របស់លោកជំទាវប្រធានកាកបាទក្រហមកម្ពុជា ដែលតែងតែនឹករលឹក និងព្រួយបារម្ភជានិច្ច អំពីសុខទុក្ខរបស់ប្រជាជន។

លោកបានបញ្ជាក់ថា ទឹកចិត្ដ និងសកម្មភាពដ៏ប្រសើរថ្លៃថ្លារបស់លោកជំទាវបានឆ្លុះបញ្ចាំងនូវគោលបំណងយ៉ាងជាក់លាក់នោះគឺមនុស្សធម៌។ មហាកិត្ដិនាមដ៏ល្បីល្បាញនេះ បានរសាត់ជ្រួតជ្រាបសុសសាយនៅក្នុងស្រទាប់កូនខ្មែរទាំងអស់់ទូទាំងព្រះរាជាណាចក្រកម្ពុជា មិនតែប៉ុណ្ណោះនៅលើឆាកអន្ដរជាតិថែមទៀត រហូតដល់លោកជំទាវបានទទួលនូវការលើកសរសើរ និងផ្ដល់នូវកិត្ដិនាមជា ឥស្សរជនឆ្នើមថ្នាក់ជាតិក្នុងភាពជាអ្នកដឹកនាំប្រយុទ្ធប្រឆាំងនឹងជំងឺអេដស៍នៅតំបន់អាស៊ីប៉ាស៊ីហ្វិកទៀតផង ។

ពេលជួបសំណេះសំណាលជាមួយប្រជាពលរដ្ឋនៅទីនោះ លោកជំទាវបណ្ឌិត ប៊ុន រ៉ានី ហ៊ុន សែន បានសម្ដែងនូវភាពរីករាយ និងក្ដីនឹករលឹកដល់ប្រជាពលរដ្ឋទាំងអស់ និងបានជម្រាបជូននូវការសាកសួរសុខទុក្ខ របស់សម្ដេចអគ្គមហាទាំងបីដែលសម្ដេចតែងតែគិតគូរពីសុខទុក្ខប្រជាពលរដ្ឋទូទាំងប្រទេស។ លោកជំទាវបានមានប្រសាសន៍ថា ការគិតគូរដល់ប្រជាពលរដ្ឋ និងចែកអំណោយដល់ប្រជាពលរដ្ឋក្រីក្រ គឺយើងតែងតែធ្វើគ្រប់ខេត្ដ-ក្រុង ទោះបីលោកជំទាវមិនបានអញ្ជើញមកជួបសំណេះសំណាល និងចែកដោយផ្ទាល់ក្ដី ក៏នៅមានតំណាងកាកបាទក្រហមកម្ពុជាគ្រប់លំដាប់ថ្នាក់ រួមទាំងថ្នាក់សាខាផងបានអញ្ជើញចុះជួយដោយផ្ទាល់ ដល់ប្រជាពលរដ្ឋក្រីក្រជួបការលំបាកទាន់ពេលវេលា។

លោកជំទាវបណ្ឌិត ប៊ុន រ៉ានី ហ៊ុន សែន បានជម្រាបជូនប្រជាពលរដ្ឋថា រាល់ជំនួយឧបត្ថម្ភដែលបានយកមកចែកជូនដល់ប្រជាពលរដ្ឋនារយៈកាលកន្លងមកក៏ដូចជាថ្ងៃនេះ គឺសុទ្ធតែបានមកពីការចូលរួមចំណែកគ្រប់បែបយ៉ាងពីសំណាក់សប្បុរសជនទាំងក្នុង និងក្រៅប្រទេសតាមរយៈការអំពាវនាវរបស់លោកជំទាវផ្ទាល់។ លោកជំទាវបានបន្ដថា នៅក្នុងសកម្មភាពមនុស្សធម៌នេះដែរ ក៏មិនអាចកាត់ផ្ដាច់បានឡើយពីការចូលរួមសហប្រតិបត្ដិការរបស់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធដែលកន្លងមកបានពុះពារគ្រប់ការលំបាក ដើម្បីធានាដល់ការជួយសង្គ្រោះប្រជាពលរដ្ឋពេលជួបគ្រោះធម្មជាតិ ឬឧប្បត្ដិហេតុផ្សេងៗបានទាន់ពេលវេលា។ ពាក់ព័ន្ធដល់ការរស់រានមានជីវិតឡើងវិញ របស់ប្រជាជាតិកម្ពុជា បន្ទាប់ពីរបបប្រល័យពូជសាសន៍ត្រូវផ្តួលរំលំ លោកជំទាវបណ្ឌិត ប៊ុន រ៉ានី ហ៊ុន សែន បានរំលឹកដល់ថ្ងៃទី៧ មករា ឆ្នាំ១៩៧៩ ដែលជាថ្ងៃរំដោះប្រជាពលរដ្ឋកម្ពុជាទូទាំងប្រទេស ឱ្យរួចផុតពីការសម្លាប់រង្គាលនៃរបបយង់ឃ្នងឃោរឃៅ៣ឆ្នាំ៨ខែនិង២០ថ្ងៃ។ ដូច្នេះប្រជាពលរដ្ឋដែលបានរស់រានមានជីវិតបានចាត់ទុកថ្ងៃទី៧ មករា គឺជាថ្ងៃកំណើតទី២ របស់ខ្លួន។

លោកជំទាវបណ្ឌិតបានថ្លែងដោយក្តីមោទនភាពយ៉ាងជ្រាលជ្រៅក្រៃលែង ចំពោះភាពជោគជ័យនៃបេសកកម្មមនុស្សធម៌របស់កាកបាទក្រហមកម្ពុជា ចាប់ពីថ្នាក់កណ្ដាលរហូតដល់ថ្នាក់សាខា អនុសាខាកាកបាទក្រហមរាជធានី-ខេត្ដទាំង២៤ ដែលបានខិតខំប្រឹងប្រែងបំពេញភារកិច្ចទៅតាមគោលដៅរៀងៗខ្លួន រួមទាំងការគាំទ្រពីរាជរដ្ឋាភិបាល ដៃគូនានា ក៏ដូចជាពីគ្រប់មជ្ឈដ្ឋានសប្បុរសជន ក្នុងគោលដៅតែមួយដូចៗគ្នា គឺអភិវឌ្ឍប្រទេស និងកាត់បន្ថយភាពក្រីក្ររបស់ប្រជាពលរដ្ឋ។

ជាមួយគ្នានោះដែរលោកជំទាវបណ្ឌិតបានសំណូមពរដល់ប្រជាពលរដ្ឋទាំងអស់ដែលមានបំណងចង់ចេញទៅរកការងារធ្វើ ឬប្រកបរបររកស៊ីនៅប្រទេសថៃដោយគ្មានច្បាប់ទម្លាប់ សូមមេត្ដាកុំទៅឱ្យសោះ។ លោកជំទាវចាត់ទុកថា ការអំពាវនាវបែបនេះ គឺក្នុងគោលបំណងដើម្បីថែរក្សាសុវត្ថិភាពផ្ទាល់ខ្លួនរបស់បងប្អូន។ ព្រោះថា ការជ្រើសរើសវិធីបែបនេះគ្មានផលល្អណាមួយសម្រាប់យើងឡើយ ប្រសិនបើយើងចូលទៅក្នុងទឹកដីប្រទេសមួយនោះ គឺនឹងនាំឱ្យយើងជួបគ្រោះថ្នាក់ទៅវិញទេ ហេតុនេះគួរស្វែងរកការងារធ្វើ ឬប្រកបរបររកស៊ីនៅក្នុងប្រទេសយើងវិញប្រសើរជាង។ ក៏ដូចជាការអំពាវនាវទូទៅដែរ លោកជំទាវបណ្ឌិត ប៊ុន រ៉ានី ហ៊ុន សែន បានផ្ដោតជាសំខាន់ទៅលើបញ្ហាគ្រឿងញៀន ជំងឺអេដស៍ អំពើហិង្សាក្នុងគ្រួសារ ការថែទាំសុខភាព ក្នុងខណៈស្ដ្រីមានផ្ទៃពោះ គឺក្នុងគោលបំណងតែមួយគត់ដើម្បីសង្គមគ្រួសារក៏ដូចជា សង្គមជាតិទាំងមួលជួបសុភមង្គល ភាពសុខដុមរមនា និងការអភិវឌ្ឍក្រោមទឹកមុខប្រកបដោយភាពញញឹមសប្បាយរីករាយជារៀងរហូត។ នៅក្នុងឱកាសនោះ លោកជំទាវបណ្ឌិត ប៊ុន រ៉ានី ហ៊ុន សែន បានជូនថវិកាចំនួន៥ម៉ឺនដុល្លារបន្ថែមពីលើថវិកាសប្បុរសជន៥ម៉ឺនដុល្លារ សរុបទាំងអស់១០ម៉ឺនដុល្លារដើម្បីកសាងអគារទីស្នាក់ការសាខាខេត្ដ ព្រមទាំងចាត់ចែងថវិកាមួយចំនួនទៀតសម្រាប់បម្រើដល់ការជីកស្រះទឹកស្អាតជូនប្រជាជនក្នុងមូលដ្ឋានខេត្ដទាំងមូលផងដែរ៕

៣នាក់ច្រៀងខារ៉ាអូខេគ្មានប្រាក់ឱ្យម្ចាស់ហាង២នាក់រត់គេចខ្លួន

January 14, 2011 at 7:49 AM

ខេត្តបន្ទាយមានជ័យ ៖ បុរសម្នាក់ក្នុងចំណោមបក្សពួក៣នាក់ បានត្រូវប៉ូលិសចាប់ឃាត់ខ្លួនកាលពីព្រឹកថ្ងៃទី១១ មករា ឆ្នាំ២០១១ នៅចំណុចផ្ទះខារ៉ាអូខេមួយកន្លែង ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ក្រោយពីចូលច្រៀងខារ៉ាអូខេ ហើយគ្មានលុយឱ្យម្ចាស់ហាង ។ លោកវរសេនីយ៍ត្រីរ៉ែម វីរៈ អធិការនគរបាលក្រុងសិរីសោភ័ណបានឱ្យដឹងថា បុរសដែលត្រូវឃាត់ខ្លួននេះឈ្មោះសាន ផុន ហៅម៉ៅ អាយុ៣២ឆ្នាំ មានទីលំនៅភូមិបាណយ សង្កាត់ទឹកថ្លា ក្រុងសិរីសោភ័ណ ។ ចំណែកបក្សពួកគេ២នាក់ទៀតគេចខ្លួនបាត់ ម្នាក់ឈ្មោះវ៉ាន់ នី ភេទប្រុស អាយុ៥០ឆ្នាំ នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ និងម្នាក់ទៀតឈ្មោះជឿន លន់ ភេទប្រុស អាយុ៤៦ឆ្នាំ នៅភូមិអូរអំបិល សង្កាត់អូរអំបិល ។ បុរសទាំង៣នាក់ខាងលើនេះ កាលពីយប់ថ្ងៃទី១០ មករា ឆ្នាំ ២០១១ បានចូលទៅផឹកស៊ី និងច្រៀងខារ៉ាអូខេនៅហាងមួយក្នុងភូមិ១ សង្កាត់ព្រះពន្លា ក្រុង សិរីសោភ័ណ ដែលមានម្ចាស់ឈ្មោះមឿន ស្រីពៅ ភេទស្រី អាយុ៣៨ឆ្នាំ សរុបប្រាក់អស់ចំនួន៤៨ម៉ឺនរៀល ។

នៅចំពោះមុខសមត្ថកិច្ចជនឈ្មោះសាន ផុន ហៅម៉ៅ បានឆ្លើយថា មុនចូលច្រៀងខារ៉ាអូខេពួកគេនាំគ្នាផឹកទឹកត្នោតជូររហូតដល់ស្រវឹងរៀងៗខ្លួនទៅហើយ ពេលនោះស្រាប់តែឈ្មោះជឿន លន់ បបួលមកច្រៀងខារ៉ាអូខេដោយអះអាងថា ខ្លួនគាត់ជាអ្នកចេញលុយ ។ ក្រោយពីផឹកស៊ីច្រៀងខារ៉ាអូខេចប់នៅម៉ោង១២យប់ ម្ចាស់ហាងគិតលុយអស់៤៨ម៉ឺនរៀល បែរជាឈ្មោះជឿន លន់ គ្មានលុយឱ្យគេ ក៏នាំគ្នាដេកនៅទីនោះមួយយប់ ។ លុះភ្លឺឡើងឈ្មោះវ៉ាន់ នី និងឈ្មោះជឿន លន់ បាននិយាយប្រាប់ម្ចាស់ហាងថា គាត់ទៅរកលុយមកសងដោយឱ្យខ្លួននៅចាំទីនោះ តែចាំបាត់ៗរហូតដល់ម៉ោង១០ព្រឹកថ្ងៃទី១១ មករា ក៏នៅពុំទាន់ឃើញគាត់យកលុយមកសងម្ចាស់ហាងសោះ បន្ទាប់មកស្រាប់តែឃើញឪពុករបស់ខ្លួន និងប៉ូលិសមកឃាត់ខ្លួននាំមកកាន់អធិការដ្ឋាននគរបាលក្រុង ដើម្បីធ្វើការសាកសួរ ។ លោកអធិការនគរបាលក្រុងបានឱ្យដឹងថា បុរសឈ្មោះសាន ផុន ហៅម៉ៅ ត្រូវបានកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីមានវិធានការបន្តតាមច្បាប់ ចំណែកបក្សពួកគេ២នាក់ទៀត សមត្ថកិច្ចបន្តធ្វើការស្រាវជ្រាវ ដើម្បីនាំខ្លួនមកសាកសួរផងដែរ ៕

ទង់ជាតិនៃព្រះរាជាណាចក្រកម្ពុជាមិនដូចគ្នា មិនដឹងជាស្ថាប័នណាមួយជាអ្នក

January 14, 2011 at 7:12 AM

រាជធានីភ្នំពេញ ៖ គ្មានន័យអ្វីត្រូវទំលាក់កំហុស ឬក៏មួលបង្កាច់ក្នុងចេតនាបែបណាមួយឡើយ តែក្នុងស្មារតីជាតិនិយម បញ្ហាទង់ជាតិ គឺសំខាន់ខ្លាំងណាស់។ យើងតែងតែឃើញជំលោះជាតិសាសន៍នានាលើពិភពលោកដែលគេយកទង់ជាតិប្រទេសជាសត្រូវមកហែក ឬដុតចោលជាកាយវិការប្រឆាំងទៅនឹងជាតិសាសន៍នោះ។ សំរាប់យើងជាខ្មែរក៏ឈឺចាប់ដូចគ្នាដែរប្រសិនបើជាតិសាសន៍ណាមួយធ្វើមិនគប្បីមកលើទង់ជាតិរបស់ខ្លួន។

អ្វីមួយដែលត្រូវនិយាយពេលនេះគឺអ្នកអានរបស់កោះសន្តិភាពផ្ញើរបាយការណ៍តាមអ៊ីម៉ែលដោយភ្ជាប់រូបទង់ជាតិ២មកជាមួយផង។ បើយើងមិនចាប់អារម្មណ៍ពិតជាមិនដឹងថាខុសគ្នាទេ តែបើសិនជាយើងប្រៀបធៀបទៅនឹងគំរូទង់ជាតិក្នុងឧបសម្ព័ន្ធទី១នៃរដ្ឋធម្មនុញ្ញទើបយើងដឹងថា មានលក្ខណៈខុសគ្នា ដូច្នេះគួរគប្បីត្រួតពិនិត្យច្បាស់លាស់មុនពេលបោះពុម្ពជាផ្លូវការ។

ជាការកត់សំគាល់នៅពេលមានបុណ្យជាតិម្តងៗ ដូចជាព្រះរាជពិធីចំរើនព្រះជន្ម ពិធីឡើងគ្រងរាជ្យ បុណ្យឯករាជ្យ បុណ្យអុំទូកជាដើមនៅតាមស្ថាប័នរដ្ឋ ឯកជនគេតែងឃើញមានការដោតលំអទង់ជាតិ ពិសេសតាមដងផ្លូវសាធារណៈក្នុងរាជធានីភ្នំពេញ។ ទង់ជាតិដែលលំអមិនថា តាមដងផ្លូវសាធារណៈ និងតាមស្ថាប័នកំពូលៗ របស់ជាតិ ដូចជារដ្ឋសភា វិមានឯករាជ្យ វិមានរដ្ឋាភិបាលនោះទេ គេសង្កេតឃើញថា ទង់ជាតិទាំងអស់នោះខុសពីទង់ជាតិដែលស្ថិតក្នុងឧបសម្ព័ន្ធទី១នៃរដ្ឋធម្មនុញ្ញត្រង់កន្លែងបង្អួច និងជណ្តើររបស់រូបប្រាសាទអង្គរវត្ត។ សួរថាតើចំណុចខុសគ្នានេះគួរត្រូវកែលំអឡើងវិញឬទេ?

សន្តិសុខឯកជន២នាក់ត្រូវឃាត់ខ្លួនព្រោះបង្កគ្រោះថ្នាក់ចរាចរណ៍

January 13, 2011 at 5:39 PM

រាជធានីភ្នំពេញ ៖ សន្តិសុខឯកជន២នាក់ត្រូវប៉ូលិសចាប់ឃុំខ្លួននៅអធិការដ្ឋានខណ្ឌសែនសុខ ដោយសារតែបង្កគ្រោះថ្នាក់ចរាចរណ៍ធ្វើឱ្យមនុស្សពីរនាក់រងរបួសធ្ងន់ និងម្នាក់ទៀតរបួសស្រាល ចំណែករថយន្តទំនើបមួយគ្រឿងរងការខូចខាតយ៉ាងដំណំ ។ ករណីនេះកើតឡើងនៅវេលាម៉ោង១០យប់ថ្ងៃទី១២ មករា នៅមុខហាងពីរ៉ាមីតក្នុងសង្កាត់ភ្នំពេញថ្មី ខណ្ឌសែនសុខ ។ សន្តិសុខ២នាក់នោះ ១-ឈ្មោះមាស សុវណ្ណ ភេទប្រុស អាយុ២៨ឆ្នាំ មាននាទីយាមម៉ូតូ-រថយន្តនៅហាងពីរ៉ាមីត ក្នុងសង្កាត់ភ្នំពេញថ្មី ខណ្ឌសែនសុខ និង២-ឈ្មោះជីម រាម ភេទប្រុស អាយុ២៥ឆ្នាំ ជាសន្តិសុខឯកជន នៅសង្កាត់ទឹកថ្លា ខណ្ឌសែនសុខ ។

រីឯអ្នករងរបួសធ្ងន់២នាក់នោះឈ្មោះរស្មី ភេទប្រុស អាយុប្រមាណ២០ឆ្នាំ បាក់ដងកាំបិតស្មាស្តាំនិងម្នាក់ទៀតឈ្មោះគឹម ស៊ុន ភេទប្រុស អាយុ២១ឆ្នាំ បាក់ម្រាមដៃ ។ អ្នកទាំងពីរស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ កំពុងព្យាបាលនៅមន្ទីរពេទ្យឯកជនមួយក្នុងខណ្ឌទួលគោក ។ ចំពោះរថយន្តទំនើបម៉ាកឡង់គ្រីស្ស័រ ឆ្នាំ២០១០ ពណ៌ពងមាន់ គ្មានស្លាកលេខបានរងការខូចខាតចង្កៀងមុខ ហើយអ្នកបើកបរត្រូវគេបង្ហើបឱ្យដឹងថា ឈ្មោះដារ៉ា ហៅភ័ន្ត តែទីលំនៅត្រូវប៉ូលិសលាក់មិនឱ្យអ្នកកាសែតដឹងទេ ។

លោកម៉ក់ ហុង អធិការប៉ូលិសខណ្ឌសែនសុខ ឱ្យដឹងថា ប៉ូលិសឃាត់ខ្លួនសន្តិសុខ២នាក់ដោយមានបញ្ជាពីព្រះរាជអាជ្ញារងសាលារាជធានីភ្នំពេញ ។ សន្តិសុខ២នាក់នោះបានប្រើដំបងគប់ទៅលើយុវជន៣នាក់ដែលកំពុងជិះម៉ូតូ C100 ស៊េរី៩៦ គ្មានស្លាកលេខ គ្មានកញ្ចក់ និងមិនពាក់មួក ហើយគេចទៅបុកចំរថយន្តទំនើបឡង់គ្រីស្ស័រដែលកំពុងបើកបញ្ច្រាសទិសគ្នា ។ ហេតុការណ៍នោះបណ្តាលឱ្យយុវជនទាំង៣នាក់រងរបួសធ្ងន់ដោយសារដួលម៉ូតូ ។
លោកបន្តទៀតថា ក្រោយកើតហេតុភ្លាម ប៉ូលិសទៅដល់ ហើយនាំអ្នករងគ្រោះទៅមន្ទីរពេទ្យ ។ ចំណែកសន្តិសុខ២នាក់នោះត្រូវបានឃាត់ខ្លួន ។ ប្រភពព័ត៌មានពីកន្លែងកើតហេតុឱ្យដឹងថាសន្តិសុខប្រើដំបងគប់ទៅលើយុវជន៣នាក់នោះ ដោយសារតែជិះម៉ូតូទៅរករឿងពួកគេដែលកំពុងឈរយាមរថយន្ត និងម៉ូតូនៅមុខហាងពីរ៉ាមីត តែមិនដឹងថា មកពីរឿងអ្វីទេ ៕