Khmer news / Cambodia hot news online media: 1/16 Koh Santepheap Daily

Koh Santepheap Daily

សភាពការណ៍ទុយនីស៊ីនៅតែច្របូកច្របល់ក្រោយការចាកចេញពីអំណាចរបស់ប្រធានាធិ�

January 16, 2011 at 1:29 PM

ប្រធានសភាធ្វើសច្ចាប្រនិធានចូលកាន់តំណែងជាប្រធានាធិបតីស្តីទី

ការប្លន់ក្នុងហាងទំនិញមួយក្នុងរដ្ឋធានីទុយនីស៊ី

ភាពច្របូកច្របល់លើវិថីមួយនៅរដ្ឋធានីទុយនីស៊ី

ទោះបីជាប្រធានាធិបតីទុយនីសីុលោកបេន អាលី ចាកចេញពីអំណាចក៏ដោយ ក៏សភាពការណ៍ក្នុងប្រទេសនោះនៅតែតានតឹងដែរ។ ការប្រកាសពីការចាកចេញពីអំណាចរបស់លោកប្រធានាធិបតីបេនអាលីពុំទាន់ធ្វើឱ្យសភាពការណ៍ចលាចលក្នុងប្រទេសទុយនីសីុស្ងប់ស្ថាត់នៅឡើយដែរ។ នាព្រឹកថ្ងៃទី១៥ មករា ប្រជាជនក្រុងទុយនីស អាចមើលឃើញការខូចខាតរថយន្តទាំងឡាយត្រូវដុតបំផ្លាញ ហាងទំនិញនានាត្រូវគេលើកគ្នាប្លន់ហើយស្ថានីយរថភ្លើងកណ្តាលត្រូវភ្លើងឆេះ។ ទោះបីជាបំរាមគោចរនៅតែជាធរមានក្នុងរដ្ឋធានី តែការបំពានបំរាមគោចរនេះនៅតែកើតមាន បន្ទាប់ពីការប្រកាសគេចខ្លួនរបស់ប្រមុខរដ្ឋទៅកាន់ប្រទេសអារ៉ាប៊ី សាអ៊ូឌីត។
ក្រុងទុយនីសស្ថិតក្នុងភាពតានតឹងខ្លាំងនាថ្ងៃទី១៥ មករា រីឯនៅឯទីក្រុង MONASTIR ឯណោះវិញមានកើតឧប្បតិ្តហេតុយ៉ាងបង្ហូរឈាមបំផុតមួយតាំងពីចាប់ផ្តើមចលាចលក្នុងប្រទេសទុយនីសីុតាំងពីជាង១ខែមកហើយ។ ក្នុងទីក្រុងនេះអ្នកទោសចំនួន៤០នាក់បានស្លាប់ក្នុងអគ្គីភ័យឆេះពន្ធនាគារមួយ។ សាកសពមនុស្ស៣១នាក់ត្រូវបានដឹកទៅកាន់កន្លែងតំកល់សព ហើយបន្ទាប់មកមានការបញ្ជូនសាកសពមនុស្ស១១នាក់ទៀតទៅកាន់ទីនោះ។
យោងតាមគ្រូពេទ្យនៃមន្ទីរពេទ្យមួយនៅ ក្រុង MONASTIR ចំងាយ១៦០គីឡូម៉ែត្រខាងត្បូងទីក្រុងទុយនីស៊ីថា គ្រោះអគ្គីភ័យកើតឡើងពេលពួកអ្នកទោសនាំគ្នាបះបោរដុតពូកខ្នើយក្នុងឃ្លាំងមួយនៅក្បែរអ្នកទោសជិត៩០នាក់ពេលមានការប៉ុនប៉ងទំលុះចេញពីគុក ហើយពេលនោះមានការជ្រួលច្របល់មកពីការបាញ់ប្រហារនៅក្បែរពន្ធនាគារ ។
លោកបេនអាលី ដែលរត់ភៀសខ្លួនចាប់តាំងពីថ្ងៃទី១៤ មករា មកទៅកាន់អារ៉ាប៊ី សាអ៊ូឌីត ត្រូវបានដកហូតអំណាចចេញយោងតាមការសំរេចចិត្តមួយរបស់ក្រុមប្រឹក្សាធម្មនុញ្ញដែលប្រកាសទុកអំណាចឱ្យនៅទំនេរ។ អំណាចនោះត្រូវជំនួសដោយប្រធានសភាដែលបានធ្វើសច្ចាប្រណិធានចូលកាន់តំណែងនារសៀលថ្ងៃទី១៥ មករា ។
ប្រធានសភាលោក FOUAD MEBA- ZAA បានធ្វើសច្ចាប្រណិធានចូលកាន់តំណែងប្រធានាធិបតីស្តីទី។ ប្រធានាធិបតីស្តីទីមានរយៈពេលយ៉ាងយូរបំផុតត្រឹម៦០ថ្ងៃពេលរៀបចំការបោះឆ្នោតសភាថ្មីមុនកាលកំណត់។ ប្រធានាធិបតីស្តីទីបានចាត់ឱ្យនាយករដ្ឋមន្ត្រីចប់អាណត្ លោក MOHAMMED GHANNOUCHI បំពេញបេសកកម្មបង្កើតរដ្ឋាភិបាលថ្មីមួយ ៕

កូរ៉េខាងជើងនិយាយថា ត្រៀមពិភាក្សាពីអ្វីគ្រប់យ៉ាងជាមួយកូរ៉េខាងត្បូង

January 16, 2011 at 1:29 PM

ទីភ្នាក់ងារព័ត៌មានផ្លូវការកូរ៉េខាងជើង KCNA រាយការណ៍ថា ប្រទេសកូរ៉េខាងជើងអះអាងកាលពីថ្ងៃទី១៤ មករា កន្លងមកនេះថា ខ្លួនត្រៀមពិភាក្សាពីរឿងគ្រប់យ៉ាងជាមួយកូរ៉េខាងត្បូង។
ដោយដកស្រង់សំដីរបស់អ្នកនាំពាក្យម្នាក់នៃគណៈកម្មាធិការបង្រួបបង្រួមកូរ៉េដោយសន្តិវិធី KCNA និយាយថា កូរ៉េខាងជើងយល់ថា កូរ៉េខាងត្បូងត្រូវសំរេចចិត្តធ្វើការចរចា និងពិភាក្សាគ្នាលើគ្រប់បញ្ហាទាំងអស់នៅតុចរចា ដោយកុំធ្វើការកត់សំគាល់នានាផ្សេង។ ទ្វារនៃការចរចាបានបើកចំហ។ អ្នកនាំពាក្យរូបនេះអំពាវនាវដល់កូរ៉េខាងត្បូងឱ្យប្រកាន់យកជំហរច្បាស់លាស់មួយហើយឆ្លើយតបដោយស្មោះត្រង់ចំពោះសំណើរបស់កូរ៉េខាងជើងឱ្យមានការចរចា ហើយបង្ហាញពីទឹកចិត្តស្មោះសរ។
អាជ្ញាធរកូរ៉េខាងត្បូងដែលចោទប្រកាន់កូរ៉េខាងជើងថា ខ្វះភាពស្មោះត្រង់នោះបានប្រកាន់យកជំហរអវិជ្ជមានមួយចំពោះការចរចាដែលស្នើឡើងផ្ទួនៗដោយកូរ៉េខាងជើង។ កាលពីថ្ងៃទី៥ មករា កន្លងមកនេះ កូរ៉េខាងជើងបានស្នើដល់កូរ៉េខាងត្បូងឱ្យមានការចរចាដើម្បីលុបបំបាត់ចោលការស្តាប់គ្នាមិនច្បាស់ និងការមិនជឿទុកចិត្តគ្នា ហើយបង្កើតសន្តិភាព និងភាពរុងរឿង។ កាលពីថ្ងៃទី១០ មករា ក្រុងព្យុងយ៉ាងបានបញ្ជូនសារផ្លូវការទាំងឡាយដល់កូរ៉េខាងត្បូងដើម្បីស្នើរៀបចំការប្រាស្រ័យទាក់ទងគ្នាក្នុងទីក្រុងកាអឺសុង ជាប់ព្រំដែននាថ្ងៃទី២៧ មករា ហើយពិភាក្សាពីទីកន្លែង និងកាលបរិច្ឆេទសំរាប់ការចរចាថ្នាក់រដ្ឋាភិបាលនាពេលខាងមុខ។
ដោយធ្វើមិនដឹងមិនឮពីឆន្ទៈរបស់ក្រុងព្យុងយ៉ាង ក្រុងសេអ៊ូលបានស្នើដល់កូរ៉េខាងជើងឱ្យប្រកាន់យកជាបឋមនូវឥរិយាបថទទួលខុសត្រូវមួយចំពោះការបង្កហេតុទាំងឡាយនាពេលថ្មីៗកន្លងមកនេះ ៕

ប្លន់អារ.កសំលាប់មិត្តភក្តិក្នុងចំការកៅស៊ូជប់ ត្រូវចាប់ខ្លួនឃាតកប�

January 16, 2011 at 11:48 AM

ខេត្តកំពង់ចាម ៖ សេចក្តីរាយការណ៍ចុងក្រោយពីខេត្តកំពង់ចាមបានឱ្យដឹងថា ជនសង្ស័យដែលរឹត.កសំលាប់យុវជនម្នាក់ជាមិត្តភក្តិប្លន់យកម៉ូតូម៉ាកឌ្រីម ស៊េរី២០០៨ កាលពីយប់ថ្ងៃទី១៤ មករា ២០១១ នៅក្នុងព្រៃចំការកៅស៊ូជប់ កន្លងមកនេះ ត្រូវសមត្ថកិច្ចចាប់ខ្លួនបានទាំង២នាក់ហើយ បន្ទាប់ពីស្រាវជ្រាវយ៉ាងញាប់ដៃញាប់ជើងអស់រយៈពេល២ថ្ងៃ ។

សកម្មភាពអារ.កសំលាប់នេះ គឺឃាតជនបានល្បួងមិត្តភក្តិពីផ្ទះថា ទៅដើរលេងនៅម្តុំចំការកៅស៊ូជប់ ព្រោះនៅទីនោះមានកម្មវិធីជួបជុំផឹកស៊ីផងដែរ ។ លុះពេលជិះដើរលេងដល់ព្រៃកៅស៊ូស្ងាត់ (ចំការកៅស៊ូជប់) ពួកគេទាំង២នាក់ព្រួតគ្នាវាយសំពង និងចាប់រឹត.កយុវជនម្ចាស់ម៉ូតតែម្តង ដោយប្រើខ្សែហ្វ្រាំងកង់ទាញរឹតយ៉ាងខ្លាំង បណ្តាលឱ្យដាច់រយះ.កដូចគេប្រើកាំបិតអារដូច្នេះដែរ។

យុវជនរងគ្រោះឈ្មោះសុន សុធា អាយុ១៨ឆ្នាំ ស្នាក់នៅភូមិចុងថ្នល់ សង្កាត់បឹងកុក ក្រុងកំពង់ចាម ចំណែកជនល្មើសទាំង២ឈ្មោះស្រេង ផានិត អាយុ១៨ឆ្នាំ រស់នៅភូមិតូង សង្កាត់សួង ក្រុងសួង និងម្នាក់ទៀតឈ្មោះសុខ សុផារិទ្ធ អាយុ១៩ឆ្នាំ ភូមិទី២ សង្កាត់វាលវង់ ក្រុងកំពង់ចាម ឥឡូវកំពុងត្រូវបានសមត្ថកិច្ចកសាងសំណុំរឿងបញ្ជូនទៅកាន់តុលាការចាត់ការតាមច្បាប់។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕

ស្នងការថ្មីខេត្តបន្ទាយមានជ័យចូលកាន់តំណែងនៅវេលាម៉ោង២និង៣០នាទីថ្ងៃទី�

January 16, 2011 at 11:31 AM

ខេត្តបន្ទាយមានជ័យ ៖ អ្នកយកព័ត៌មានកោះសន្តិភាពប្រចាំខេត្តបន្ទាយមានជ័យ បានឱ្យដឹងនៅមុននេះបន្តិចថា ស្នងការរងនគរបាលខេត្តសៀមរាប លោកខេង ស៊ុំ នឹងត្រូវចូលកាន់តំណែងជាស្នងការនគរបាលខេត្តបន្ទាយមានជ័យជំនួសលោកឧត្តមសេនីយ៍ហ៊ុន ហ៊ាន ដែលកំពុងឃុំខ្លួននៅក្នុងខេត្តសៀមរាបពាក់ព័ន្ធនឹងបទល្មើសមួយចំនួន... ។

សេចក្តីរាយការណ៍បានបន្តថា ពិធីចូលកាន់តំណែងស្នងការនគរបាលខេត្តបន្ទាយមានជ័យនេះនឹងត្រូវប្រារព្ធធ្វើឡើងនៅវេលាម៉ោង២និង៣០នាទីរសៀលថ្ងៃចន្ទ ទី១៧ មករា ២០១១ ស្អែកនេះ ។ អ្នកនាំពាក្យក្រសួងមហាផ្ទៃលោកឧត្តមសេនីយ៍ឯកខៀវ សុភក្រ មិនបានឆ្លើយតបទៅនឹងសំណួរទាក់ទងទៅនឹងពិធីចូលកាន់តំណែងថ្មីនៃស្នងការនគរបាលខេត្តបន្ទាយមានជ័យនោះទេ ដោយថ្លែងប្រាប់កោះសន្តិភាពតាមទូរស័ព្ទដោយខ្លីថា ជាការងារចាត់តាំងផ្ទៃក្នុងរបស់ក្រសួង ។

នាវាកាហ្គោកូរ៉េខាងត្បូងត្រូវចោរសមុទ្រសូម៉ាលីប្លន់នៅមហាសមុទ្រឥណ្ឌ�

January 16, 2011 at 10:45 AM

ទីភ្នាក់ងារសារព័ត៌មានយ៉ុនហាបរបស់កូរ៉េខាងត្បូងរាយការណ៍ថា នាវាកាហ្គោមួយគ្រឿងរបស់កូរ៉េខាងត្បូងត្រូវពួកចោរសមុទ្រប្លន់នៅក្នុងមហាសមុទ្រឥណ្ឌាកាលពីថ្ងៃទី១៥ មករា កន្លងមក ។ នាវានោះចំណុះ១០.០០០តោន មានសមាជិកក្រុមនាវិក២១នាក់ ក្នុងនោះ៨នាក់ជាជនជាតិកូរ៉េខាងត្បូង ២នាក់ជនជាតិឥណ្ឌូណេស៊ី និង១១នាក់ ទៀតជាជនជាតិភូមា ដឹកគ្រឿងគីមី ធ្វើដំណើរពីប្រទេសអារ៉ាប់រួមទៅកាន់ស្រីលង្កា ហើយត្រូវពួកចោរសមុទ្រសូម៉ាលីប្លន់ក្នុងមហាសមុទ្រចន្លោះរវាងប្រទេសអូម៉ង់ និងប្រទេសឥណ្ឌា ។
នាវានោះជារបស់ក្រុមហ៊ុនដឹកជញ្ជូនតាមសមុទ្រ Somho មានមូលដ្ឋាននៅកំពង់ផែភាគខាងត្បូងទីក្រុងប៊ូសាន ប្រទេសកូរ៉េខាងត្បូង ៕

រលកអំពើហិង្សាថ្មីនៅទីក្រុងការ៉ាជី ប្រទេសប៉ាគីស្ថានស្លាប់17នាក់

January 16, 2011 at 10:38 AM

ប៉ូលិសនិយាយថា ខ្មាន់កាំភ្លើងដែលមិនស្គាល់អត្តសញ្ញាណបានបាញ់សំលាប់មនុស្ស១៧នាក់ ក្នុងរលកអំពើហិង្សាថ្មីមួយនៅក្នុងទីក្រុងមជ្ឈមណ្ឌលពាណិជ្ជកម្មការ៉ាជីរបស់ប៉ាគីស្ថាន ។
នាយប៉ូលិសក្រុងការ៉ាជី លោក Fayyar Leghari បានប្រាប់ទីភ្នាក់ងារសារព័ត៌មានរ៉យទ័រថា មនុស្សយ៉ាងហោចណាស់១៧នាក់បានត្រូវស្លាប់ក្នុងការបាញ់ប្រហារដោយពួកខ្មាន់កាំភ្លើងនៅតំបន់នានានៃទីក្រុងការ៉ាជី ។
អ្នកយកព័ត៌មានទូរទស្សន៍ក្នុងស្រុកម្នាក់ក៏ស្ថិតក្នុងចំណោមអ្នកស្លាប់ទាំងនោះដែរ ៕

រថយន្តវ៉ុលវ៉ាហ្គេន តំលៃជាង១ម៉ឺនដុល្លារ ត្រូវក្រុមអ្នកលេងវាយកំទេចគួរ�

January 16, 2011 at 10:38 AM

រថយន្តស្ព័រទំនើបម៉ាកវ៉ុលវ៉ាហ្គេនមួយគ្រឿងត្រូវយុវជនស្ទាវចំនួន៣នាក់វាយកំទេច

រាជធានីភ្នំពេញ ៖ រថយន្តស្ព័រទំនើបម៉ាកវ៉ុលវ៉ាហ្គេនមួយគ្រឿងត្រូវយុវជនស្ទាវចំនួន៣នាក់ ប្រដាប់ដោយដុំថ្ម ជើងឆ័ត្រ និងកាំភ្លើងខ្លីបាញ់គំរាមវាយកំទេច កាលពីវេលាម៉ោង៥និង៣០នាទីព្រឹកថ្ងៃទី១៦ មករា ២០១១ គឺក្រុមអ្នកលេងទាំងនោះបើករថយន្តរបស់ពួកគេតាមកៀរឱ្យរថយន្តស្ព័រទំនើបឈប់នៅចំណុចកែងផ្លូវលេខ១៥៤ និង៥៣ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រួចហើយចាប់ផ្តើមវាយកំទេចតែម្តង ។ នៅក្នុងអំពើហិង្សានេះពុំមានអ្នកណាម្នាក់របួសនោះទេ គ្រាន់តែរថយន្តស្ព័រទំនើបម៉ាកវ៉ុលវ៉ាហ្គេនត្រូវបែកកញ្ចក់មុខក្រោយ ហើយជនដៃដល់បាញ់គំរាមពីរគ្រាប់មុនពេលចាកចេញ ។

សាក្សីនៅកន្លែងកើតហេតុបានឱ្យដឹងថា មុនពេលកើតហេតុ គេបានឃើញរថយន្តស្ព័រមួយគ្រឿងស៊េរីទំនើប ពណ៌ក្រហម ម៉ាកវ៉ុលវ៉ាហ្គេន ពាក់ស្លាកលេខ ប៉ៃលិន 2A-0314 បើកបរដោយបុរសម្នាក់ ហើយមាននារីស្រស់ស្អាតម្នាក់រួមដំណើរបើកតាមបណ្តោយផ្លូវលេខ១៥៤ ឆ្ពោះទៅទិសខាងលិច លុះមកដល់កែងផ្លូវលេខ៥៣ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ ស្រាប់តែមានរថយន្តពីរគ្រឿងមួយគ្រឿង គឺម៉ាកឡិចស៊ីសស៊េរី៤៧០ ពណ៌ស្លែ និងមួយគ្រឿងទៀតម៉ាកកាមរីឆ្លាមពណ៌ស បើកតាមពីក្រោយកៀររថយន្តឱ្យឈប់ ហើយមានយុវជនទំនើង៣នាក់ចុះពីលើរថយន្តមានម្នាក់ប្រដាប់ដោយកាំ ភ្លើងខ្លីមិនចាំម៉ាកបញ្ជាឱ្យភាគីម្ចាស់រថយន្តស្ព័រ និងនារីស្រស់ស្អាតម្នាក់ទំនងជាស្រីស្នេហ៍ ចុះចេញពីក្នុងរថយន្ត ។ រួចក្រុមអ្នកលេងទាំងនោះយកដុំថ្ម និងជើងឆត្រគប់សំពងវាយបំបែកកញ្ចក់រថយន្តស្ព័រ បណ្តាលឱ្យបែកកញ្ចក់ខ្ទេចមុខក្រោយ ព្រមទាំងស្រែកគំរាមមិនឱ្យតបតទៀតផង ៕

កូរ៉េខាងជើងនិយាយថា ត្រៀមពិភាក្សាពីអ្វីគ្រប់យ៉ាងជាមួយកូរ៉េខាងត្បូង

January 16, 2011 at 10:38 AM

ខណ្ឌរដ្ឋបាលជលផលចែកកូនត្រីឱ្យប្រជាជនស្រុកបាកានចិញ្ចឹមក្នុងស្រះតាមគ�

January 16, 2011 at 10:25 AM

ខេត្តពោធិ៍សាត់ ៖ កាលពីថ្ងៃទី១៤ មករា ឆ្នាំ២០១១ លោកសេង ស៊ុនហ៊ួត នាយខណ្ឌរដ្ឋបាលជលផលពោធិ៍សាត់ បាននាំយកកូនត្រីទៅផ្តល់ជូនប្រជាពលរដ្ឋចិញ្ចឹមតាមរបៀបគ្រួសារចំនួន៤៦គ្រួសារ នៅឃុំរំលេច ស្រុកបាកាន បន្ទាប់ពីក្រុមការងាររបស់គណបក្សប្រជាជនចុះជួយខេត្តពោធិ៍សាត់ ជីកស្រះជូនគ្រួសារពលរដ្ឋរួចមក ។ លោកសេង ស៊ុនហ៊ួត បានឱ្យដឹងថា ការចែកកូនត្រីឱ្យប្រជាជនចិញ្ចឹមនេះជាលើកទី២ហើយ សំរាប់ឃុំរំលេច ។ លើកទី១មានចំនួន៥២គ្រួសារស្មើនឹង៥២ស្រះ និងលើកទី២នេះមានចំនួន៤៦គ្រួសារទៀតស្មើនឹង៤៦ស្រះ ដែលមួយស្រះផ្តល់កូនត្រី៤៥០ក្បាល ។ មន្ត្រីបច្ចេកទេស បានណែនាំដល់ប្រជាជនជាអ្នកចិញ្ចឹមថា រង់ចាំទឹកក្នុងស្រះមានពណ៌បៃតងខ្ចីសំបូរប្លុងតុងជាចំណីសិន ទើបលែងកូនត្រីចូលបាន ។ មុននឹងលែងត្រូវយកកូនត្រីទៅត្រាំក្នុងស្រះបាចទឹកលើថង់ពី១៥ទៅ២០នាទី ដើម្បីឱ្យសីតុណ្ហភាពប្រហាក់ប្រហែលគ្នាដើម្បីកាត់បន្ថយការងាប់កូនត្រី ។

ពេលលែងមិនត្រូវឱ្យចំណីភ្លាមៗទេ បើលែងពេលព្រឹកឱ្យចំណីពេលល្ងាច ។ ការប្រើប្រាស់ជី បើទឹកឡើងពណ៌បៃតងចាស់ត្រូវឈប់បង្ហូរចូល ដែលជាកង្វះអុកស៊ីសែន បណ្តាលឱ្យត្រីងាប់បាន ។ ការបង្ហូរទឹកជីត្រូវរកពេលមានពន្លឺគ្រប់គ្រាន់ ហើយមុនភ្លៀង ឬក្រោយភ្លៀង មិនត្រូវបង្ហូរទឹកជីចូលទេ ។ ការផ្តល់ចំណីត្រូវធ្វើនៅម៉ោង៩ទៅម៉ោង១០ព្រឹក និងម៉ោង៤ទៅម៉ោង៥ល្ងាច ដែលពេលវេលានេះអាកាសធាតុមានអុកស៊ីសែនគ្រប់គ្រាន់ធ្វើឱ្យត្រីឆាប់ធំធាត់លឿន ។ ពេលមេឃត្រជាក់ត្រូវកាត់បន្ថយចំណី ហើយកណ្តៀរក៏ជាចំណីល្អសំរាប់ត្រីដែរ ។ បើសិនប្រជាពលរដ្ឋអនុវត្តន៍តាមការណែនាំ ឬក្នុងសៀវភៅ ការចិញ្ចឹមត្រីនឹងទទួលបានជោគជ័យ ហើយរយៈពេលតែ៣ខែប៉ុណ្ណោះ អាចចាប់ត្រីលក់បានជាបណ្តើរៗ ។

លោកសៅ ដារឿន អភិបាលស្រុកបាកាន បានឱ្យដឹងថា ក្រុមការងារគណបក្សប្រជាជនកម្ពុជាដែលដឹកនាំដោយលោករដ្ឋមន្ត្រី ស៊ុយ សែម ជាអ្នកជីកស្រះ ឯខណ្ឌរដ្ឋបាលជលផលជាអ្នកផ្តល់កូនត្រីឱ្យប្រជាជនចិញ្ចឹម ។ មកដល់ថ្ងៃនេះ នៅស្រុកបាកានជីកស្រះបានចំនួន៥៧៧ស្រះហើយ ។ ជំហានទី២នេះ ឃុំដែលទទួលបាន១០០ស្រះមាន ឃុំរំលេច ខ្នារទទឹង តាលោ បឹងបត់កណ្តោល និងត្រពាំងជង ។ បច្ចុប្បន្នក្រុមការងារកំពុងតែសំរុកជីកស្រះជូនប្រជាជនយ៉ាងមមាញឹកដែលនៅច្រើនឃុំ និងច្រើនគ្រួសារទៀត ។

លោកអភិបាលស្រុកបានថ្លែងអំណរគុណយ៉ាងជ្រាលជ្រៅចំពោះខណ្ឌរដ្ឋបាលជលផល ដែលបានផ្តល់កូនត្រី និងបង្រៀនបច្ចេកទេសឱ្យប្រជាជនចេះចិញ្ចឹមដោយខ្លួនឯង ។ លោកសង្ឃឹមថា ប្រជាជនស្រុកបាកានក៏ដូចជាប្រជាជនទាំងអស់នៅទូទាំងខេត្តពោធិ៍សាត់ ទាំងមូលនឹងកាត់បន្ថយភាពក្រីក្រតាមរយៈការចិញ្ចឹមត្រីតាមស្រះជាលក្ខណៈគ្រួសារ និងការធ្វើស្រែប្រាំងបន្តពីស្រែវស្សាតាមតំបន់មានប្រភពទឹកស្រេចដែលនេះគឺជាយុទ្ធសាស្ត្រដ៏ប្រពៃរបស់គណបក្សប្រជាជនកម្ពុជា និងរាជរដ្ឋាភិបាលដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីដ៏ឈ្លាតវៃ ៕

សម្តេចតេជោនាយករដ្ឋមន្ត្រី ជួបសន្ទនាជាមួយអគ្គនាយកសាជីវកម្មចិន

January 16, 2011 at 10:16 AM

រាជធានីភ្នំពេញ ៖ នៅក្នុងជំនួបសំដែងការគួរសមជាមួយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៣ មករា ឆ្នាំ២០១១ នៅភូមិគ្រឹះក្បែរវិមានឯករាជ្យ លោក LU WENJUN អគ្គនាយកសាជីវកម្ម China National Heavy Machinery ប្រទេសចិន បានមានប្រសាសន៍ថ្លែងអំណរគុណយ៉ាងជ្រាលជ្រៅចំពោះសម្តេចតេជោនាយករដ្ឋមន្ត្រីដែលបានចំណាយពេលដ៏មានតំលៃអញ្ជើញផ្តល់ជាកំលាំងលើកទឹកចិត្ត និងគាំទ្រយ៉ាងពេញទំហឹងដល់ដំណើរការបិទស្ទឹងសាងសង់ទំនប់វារីអគ្គិសនីស្ទឹងតាតៃ អនុភាព២៤៦មេហ្គាវ៉ាត់ កាលពីថ្ងៃទី១២ មករា ប្រកបដោយលទ្ធផលត្រចេះត្រចង់បំផុត ។

លោកអគ្គនាយកសាជីវកម្មមានប្រសាសន៍ បន្តថា គំរោងសាងសង់ទំនប់វារីអគ្គិសនីស្ទឹង តាតៃនឹងបញ្ចប់ដំណើរការសាងសង់នៅឆ្នាំ២០១៣ ដើម្បីផ្តល់ថាមពលអគ្គិសនីដល់ប្រជា ពលរដ្ឋកម្ពុជា។ ទាក់ទិនទៅនឹងការវិនិយោគ សាងសង់បណ្តាញចែកចាយថាមពលអគ្គិសនីនៅជុំវិញរាជធានីភ្នំពេញរបស់សាជីវកម្ម China National Heavy Machinery លោកអគ្គនាយកមានប្រសាសន៍បន្តថា ក្រុមហ៊ុនរបស់លោកកំពុងតែខិតខំប្រឹងប្រែង សាងសង់ប្រព័ន្ធចែកចាយថាមពលអគ្គិសនីឱ្យបានលឿនបំផុតដើម្បីផ្តល់ប្រភពថាមពលដល់ប្រជាពលរដ្ឋកម្ពុជា ។

មានប្រសាសន៍ក្នុងឱកាសនោះ សម្តេចតេជោនាយករដ្ឋមន្រ្តីបានបញ្ជាក់ថា ជាគោល ការណ៍រាជរដ្ឋាភិបាលកម្ពុជាមាននយោបាយរបស់ខ្លូនធ្វើយ៉ាងណាលើកទឹកចិត្តឱ្យក្រុមហ៊ុនឯកជនចូលរួមចំណែកក្នុងការដំឡើងប្រព័ន្ធចែកចាយថាមពលអគ្គិសនីឱ្យបានដល់គ្រប់ទីកន្លែងក្នុងប្រទេសកម្ពុជា ដើម្បីរួមចំណែកដល់ការអភិវឌ្ឍសេដ្ឋកិច្ចសង្គមនិងការកាត់បន្ថយភាពក្រីក្ររបស់ប្រជាពលរដ្ឋ ។ ទាក់ទិននឹងគំរោងសាងសង់ប្រព័ន្ធចែកចាយ ថាមពលអគ្គិសនីដ៏មានសារសំខាន់នេះ សម្តេចតេជោនាយករដ្ឋមន្រ្តីមានប្រសាសន៍ដោយឱ្យតំណាងក្រុមហ៊ុនធ្វើការពិភាក្សាជាមួយលោក ស៊ុយ សែម រដ្ឋមន្រ្តីក្រសួងឧស្សាហកម្មរ៉ែ និង ថាមពល ដើម្បីឱ្យដំណើរការសាងសង់ទទួលបានលទ្ធផលជោគជ័យ ៕

ចំនួនអ្នកស្លាប់ដោយសារទឹកជំនន់ និងការបាក់ដីនៅប្រេស៊ីលឡើងដល់ជិត600នាក់

January 16, 2011 at 10:09 AM

ទិដ្ឋភាពនៃការខូចខាតដោយសារទឹកជំនន់និងបាក់ដី

ទីភ្នាក់ងារសារព័ត៌មានផ្លូវការរបស់ប្រេស៊ីលរាយការណ៍ថា ចំនួនអ្នកស្លាប់ដោយសារគ្រោះទឹកជំនន់ និងការបាក់ដីបង្កឡើងដោយសារការធ្លាក់ភ្លៀងខ្លាំងវាយប្រហាររដ្ឋរីយ៉ូដឺហ្សាណេរ៉ូ កើនឡើងដល់៥៩១នាក់ហើយ ។ ភាគច្រើននៃអ្នកស្លាប់គឺនៅក្នុងទីក្រុង Nova Friburgo និងនៅក្នុងទីក្រុង Teresopolis ស្ថិតនៅតំបន់ភ្នំភាគឦសានទីក្រុងរីយ៉ូ ។
ទីភ្នាក់ងារព័ត៌មាន Agencia Brasil ឱ្យដឹងទៀតថា បុគ្គលិកជួយសង្គ្រោះមិនអាចចូលទៅដល់កន្លែងមួយចំនួនដែលរងគ្រោះធ្ងន់ធ្ងរនោះទេ ដូច្នេះចំនួនអ្នកស្លាប់អាចកើនឡើងថែមទៀត ។
ពលរដ្ឋជាច្រើនពាន់គ្រួសារកំពុងរស់នៅតាមចង្កេះភ្នំ និងនៅតាមមាត់ទន្លេ ប្រឈមមុខនឹងគ្រោះថ្នាក់ត្រូវទឹកភក់ហូរកប់ ឬកួចនាំទៅ
ឆ្ងាយ។
កាលពីថ្ងៃទី១៥ មករា កន្លងមក ប្រធានាធិបតីប្រេស៊ីល លោកស្រីឌីលម៉ា រ៉ូសេហ្វ បានជិះយន្តហោះកាត់ពីលើតំបន់រងគ្រោះដោយទឹកជំនន់ដើម្បីពិនិត្យតំបន់នេះជាលើកដំបូងក្រោយពីលោកស្រីធ្វើសច្ចាប្រណិធានចូលកាន់តំណែង ។ ដោយការព្យាករណ៍ឃើញថា នឹងមានភ្លៀងធ្លាក់ខ្លាំងទៀតអាជ្ញាធរប្រេស៊ីលបានបញ្ជាឱ្យជំលៀសមនុស្ស៥.០០០គ្រួសារ ដែលរស់នៅតំបន់ងាយរងគ្រោះដោយទឹកជំនន់ និងការបាក់ដី ៕

ទាហានអាមេរិក3នាក់ស្លាប់នៅអ៊ីរ៉ាក់

January 16, 2011 at 10:07 AM

កងទ័ពអាមេរិករាយការណ៍ថា ទាហានអាមេរិក៣នាក់បានស្លាប់ក្នុងឧប្បត្តិហេតុ២ ដែលកើតឡើងកាលពីថ្ងៃទី១៥ មករា នៅអ៊ីរ៉ាក់។
ក្នុងសេចក្តីប្រកាសមួយកងទ័ពអាមេរិកបញ្ជាក់ថា ទាហាន២នាក់ស្លាប់ និងម្នាក់ទៀតត្រូវរបួសក្នុងពេលធ្វើប្រតិបត្តិការនាភាគខាងជើងអ៊ីរ៉ាក់ ។ ក្នុងឧប្បត្តិហេតុមួយទៀត ទាហានអាមេរិកម្នាក់បានស្លាប់ក្នុងប្រតិបត្តិការនាភាគកណ្តាលអ៊ីរ៉ាក់ ។ នេះគឺជាឧប្បត្តិហេតុដំបូង បណ្តាលឱ្យទាហានអាមេរិកស្លាប់នៅអ៊ីរ៉ាក់ក្នុងឆ្នាំ២០១១ ដែលធ្វើឱ្យចំនួនទាហានអាមេរិកស្លាប់នៅប្រទេសនេះចាប់តាំងពីអាមេរិកចូលធ្វើអន្តរាគមន៍មកឡើងដល់៤.៤៣៣នាក់ ។
នាពាក់កណ្តាលឆ្នាំ២០១០ កងទ័ពអាមេរិកដែលដាក់ពង្រាយនៅអ៊ីរ៉ាក់បានកាត់បន្ថយមកនៅត្រឹមចំនួន៥០.០០០នាក់ ។ សហរដ្ឋអាេមរិកថ្លែងថា កងទ័ពអាមេរិកដែលស្ថិតនៅអ៊ីរ៉ាក់គឺដើម្បីបំពេញបេសកកម្មជួយទ្រទ្រង់ និងបណ្តុះបណ្តាល។ កងទ័ពអាមេរិកនឹងដកចេញអស់ពីអ៊ីរ៉ាក់ នាដំណាច់ឆ្នាំ២០១១ យោងតាមកិច្ចព្រមព្រៀងមួយដែលចុះហត្ថលេខាកាលពីឆ្នាំ២០០៨ រវាងអ៊ីរ៉ាក់ និងសហរដ្ឋអាមេរិក ៕

យុទ្ធសាស្ត្រទេសចរណ៍អាស៊ាន គឺផ្លាស់ប្តូរបទពិសោធន៍ មន្ត្រី និងការតភ្ជាប់�

January 16, 2011 at 10:02 AM

រាជធានីភ្នំពេញ ៖ កិច្ចប្រជុំទេសចរណ៍អាស៊ានបានលើកយកប្រធានបទយុទ្ធសាស្ត្រទេសចរណ៍សំរាប់ឆ្នាំ២០១១ ដល់២០១៥ កាលពីព្រឹកទី១៥ មករា ២០១១ នៅសណ្ឋាគារសូហ្វីតែលភ្នំពេញ ភូគីត្រា អតីតសណ្ឋាគារភ្នំពេញ ស្ថិតក្នុងសង្កាត់ទន្លេបាសាក់ រាជធានីភ្នំពេញ ដោយមានថ្នាក់អគ្គនាយកទេសចរណ៍គ្រប់បណ្តាប្រទេសអាស៊ាន ទាំងអស់ចូលរួមជជែកពិភាក្សា ដើម្បីជំរុញវិស័យនេះឱ្យក្លាយជាកំលាំងចលករដ៏ខ្លាំងក្លាថែមទៀត ក្នុងការទាក់ទាញភ្ញៀវទេសចរ ស្វែងរកប្រាក់ចំណូលសេដ្ឋកិច្ច និងអភិវឌ្ឍន៍ប្រទេសជាតិ ។

កិច្ចប្រជុំថ្នាក់អគ្គនាយក និងបន្តទៅថ្នាក់រដ្ឋមន្ត្រីក្រសួងទេសចរណ៍អាស៊ាននេះគឺធ្វើយ៉ាងណាកែលំអប្រព័ន្ធអេកូទេសចរណ៍ក្នុងបណ្តាប្រទេសអាស៊ានទាំងអស់ឱ្យមានការទាក់ទាញ និងសន្ទុះកាន់តែខ្លាំងក្លាលើកំណើនទេសចរ... ជាពិសេសធ្វើយ៉ាងណាឱ្យអាស៊ានក្លាយជាគោលដៅទេសចរណ៍របស់ពិភពលោក មិនចាញ់អឺរ៉ុប និងទ្វីបដទៃទៀត ។ ក្នុងកិច្ចប្រជុំបានផ្តោតលើការផ្លាស់ប្តូរបទពិសោធន៍ និងសំរេចឱ្យមានថ្នាក់អគ្គនាយក ឬមន្ត្រីជាន់ខ្ពស់ទៅសិក្សាស្វែងយល់ពីតំបន់ទេសចរណ៍ និងកិច្ចការទេសចរណ៍រវាងគ្នានឹងគ្នាទៅវិញទៅមក ដើម្បីបានទុនមកកែលំអ និងអភិវឌ្ឍន៍ប្រទេសរៀងៗខ្លួន ។

កិច្ចប្រជុំដែលនឹងប្រព្រឹត្តទៅចាប់ពីថ្ងៃទី១៥ ដល់២១ មករា ២០១១ នេះ នឹងលើកឡើងផងដែរ ពីការតភ្ជាប់បណ្តាញធ្វើដំណើរទាំងផ្លូវគោក អាកាស និងទឹក ពោលគឺនឹងធ្វើការតភ្ជាប់គ្រប់មធ្យោបាយទាំងអស់ ដើម្បីឱ្យវិស័យទេសចរណ៍អាស៊ានចាប់ពីឆ្នាំ២០១១ ដល់ឆ្នាំ២០១៥ ក្លាយជាគោលដៅទេសចរណ៍ដ៏ពិសេសរបស់មនុស្សក្នុងពិភពលោក ។ ដល់ពេលនោះទេសចរណ៍នឹងក្លាយជាចលករផ្តល់អត្ថប្រយោជន៍ប្រាក់ចំណូលសេដ្ឋកិច្ចដល់ប្រទេសជាតិដ៏សំខាន់បំផុត កាត់បន្ថយភាពក្រីក្រ ជំរុញការអភិវឌ្ឍន៍ប្រទេសជាតិនីមួយៗឱ្យកាន់តែមានភាពជឿនលឿនទៅមុខ ។

សូមបញ្ជាក់ថា នៅថ្ងៃទី១៨ មករា សម្តេចអគ្គមហាសេនាបតីតេជោហ៊ុន សែន នឹងអញ្ជើញចូលរួមជាអធិបតីក្នុងកិច្ចប្រជុំនោះផងដែរ ដើម្បីផ្តល់អនុសាសន៍លើវិស័យទេសចរណ៍សំរាប់បណ្តាប្រទេសអាស៊ានទាំងអស់ ។ បច្ចុប្បន្នវិស័យទេសចរណ៍ជាវិស័យសំខាន់មួយរកប្រាក់ចំណូលសំរាប់សេដ្ឋកិច្ចជាតិលំដាប់ទី២ និងផ្តល់ការងារកំលាំងពលកម្មប្រមាណ៤០ម៉ឺននាក់ ៕

សមត្ថកិច្ចឃាត់ខ្លួនក្រុមជនលួចគាស់កំណល់ផ្លូវដែកចំនួន៦ដើម

January 16, 2011 at 9:33 AM

សមត្ថកិច្ចបង្ហាញដែកកំណល់រថភ្លើងដែលបានរឹបអូស

ខេត្តព្រះសីហនុ ៖ បុរសចំនួន២នាក់ ត្រូវកងរាជអាវុធហត្ថស្រុកព្រៃនប់ឃាត់ខ្លួន ខណៈពេលដឹកដែកកំណល់ផ្លូវរថភ្លើងជាច្រើនដើមតាមម៉ូតូអូសរ៉ឺម៉ក១គ្រឿងបំរុងយកទៅលក់។ ហេតុការណ៍នេះកើតឡើងកាលពីថ្ងៃទី១៣ មករា វេលាម៉ោង៦និង៣០នាទីល្ងាច តាមបណ្តោយផ្លូវជាតិលេខ៤ ស្ថិតក្នុងភូមិសំរ៉ុង ឃុំសំរ៉ុង ស្រុកព្រៃនប់ ខេត្តព្រះសីហនុ។ តាមលោកអនុសេនីយ៍ឯក ញ៉ែម ចំរើន មេបញ្ជាការកងរាជអាវុធហត្ថស្រុកព្រៃនប់ឱ្យដឹងថា បុរសទាំង២នាក់ ម្នាក់ឈ្មោះអ៊ុត ប្រុស អាយុ៣១ឆ្នាំ និងឈ្មោះថេវ តឹង អាយុ៤៣ឆ្នាំ រស់នៅភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ ជាអ្នកទិញរបស់អេតចាយ។ អ្នកទាំង២ត្រូវកម្លាំងរបស់លោកឃាត់ខ្លួន រួមទាំងវត្ថុតាងដែកកំណល់ផ្លូវរថភ្លើងចំនួន៦ដើម ដែលពួកគេដឹកតាមម៉ូតូអូសរទេះ១គ្រឿងបំរុងយកទៅលក់។ ពេលពួកគេទៅដល់ចំណុចខាងលើត្រូវកម្លាំងរបស់លោកចាប់តែម្តង។

លោកអនុសេនីយ៍ឯកបន្តទៀតថា បន្ទាប់ពីឃាត់បានជនសង្ស័យទាំង២ លោកស្រាវជ្រាវបន្ត រួមទាំងមានចំលើយសារភាពពីជនសង្ស័យផងនោះ លោកដឹកនាំកម្លាំងទៅផ្ទះអ្នកទទួលទិញក្នុងភូមិបន្ទាយប្រីយ៍ ឃុំអណ្តូងថ្ម ស្រុកព្រៃនប់ ហើយរកឃើញដែកកំណល់ផ្លូវរថភ្លើងដែលត្រូវកាត់ក្នុង១ដើមជា២កំណាត់ ចំនួន២២កំណាត់ ចំណែកឯម្ចាស់ផ្ទះដែលទទួលទិញដែកកំណល់រទេះភ្លើងត្រូវបាននាំទៅកាន់ស្នាក់ការកងរាជអាវុធហត្ថស្រុក រួចបញ្ជូនទៅកាន់ទីបញ្ជាការកងរាជអាវុធហត្ថខេត្តដើម្បីចាត់ការតាមនីតិវិធីច្បាប់។

ទាក់ទិននឹងរឿងនេះលោកទិត វុទ្ធី អភិបាលស្រុកព្រៃនប់ដែលទៅពិនិត្យមើលវត្ថុតាង និងជនសង្ស័យនៅស្នាក់ការកងរាជអាវុធហត្ថឱ្យដឹងថា នេះគឺជាបទល្មើសមួយដែលសង្គមជាតិស្អប់ខ្ពើមបំផុត។ បច្ចុប្បន្នផ្លូវរថភ្លើងមួយខ្សែនេះរាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន បាននិងកំពុងតែដំឡើងយ៉ាងរលូន។ លោកអភិបាលស្រុកបានកោតសរសើរកងរាជអាវុធហត្ថស្រុកព្រៃនប់ ដែលតាមចាប់បានទាំងចោរលួចសម្បត្តិជាតិ ទាំងអ្នកទិញ៕

រត់ជាន់គ្នានៅរដ្ឋភាគខាងត្បូងប្រទេសឥណ្ឌាស្លាប់ជាង100នាក់

January 16, 2011 at 9:24 AM

ទិដ្ឋភាពប្រមូលផ្តុំនៃមនុស្សមុនមានការរត់ជាន់គ្នា

មនុស្សយ៉ាងហោចណាស់១០៩នាក់បានស្លាប់បាត់បង់ជីវិតយ៉ាងអាណោចអាធ័មនៅក្នុងហេតុការណ៍រត់ជាន់គ្នាដែលកើតឡើងកាលពីយប់ថ្ងៃទី១៥ មករា កន្លងមក នៅរដ្ឋកឺរ៉ាឡាភាគខាងត្បូងប្រទេសឥណ្ឌា ។ ការរត់ជាន់គ្នានេះជាសោកនាដកម្មយ៉ាងអាក្រក់មួយក្នុងប្រវត្តិសាស្ត្ររបស់រដ្ឋកឺរ៉ាឡា ក្នុងរយៈពេល៦០ឆ្នាំ កើតឡើងក្នុងអំឡុងពេលនៃការប្រារព្ធពិធីបុណ្យMaravilakku រំលឹកការបញ្ចប់នៃការធ្វើធម្មយាត្រាទៅកាន់វត្ត Lord Ayyappa ដោយសារក្នុងអំឡុងពេលនោះអ្នកធ្វើធម្មយាត្រាក្នុងចំនួនដ៏ច្រើនប្រមូលផ្តុំគ្នាបន់ស្រន់បួងសួងនៅបរិវេណទល់មុខចេតិយមួយ ។
លោក Jai Kumar រដ្ឋមន្ត្រីក្រសួងសន្តិសុខរដ្ឋកឺរ៉ាឡាឱ្យដឹងថា ពួកអ្នកធ្វើធម្មយាត្រាវិលត្រឡប់មកចូលរួមពិធីបុណ្យសាសនាហិណ្ឌូនៅវិហារមួយ ហើយនៅពេលនោះរថយន្តអ្នកធ្វើធម្មយាត្រាមួយគ្រឿងបានក្រឡាប់បណ្តាលឱ្យរត់ជាន់គ្នាតែម្តង ។
តាមប្រភពព័ត៌មានថា អភិបាលរដ្ឋកឺរ៉ាឡា នឹងទទួលខុសត្រូវសំរាប់ការចំណាយលើការព្យាបាលជនរងគ្រោះទាំងអស់ ។
ក្នុងឧប្បត្តិហេតុរត់ជាន់គ្នានោះក៏មានមនុស្ស៥០នាក់ទៀតរងរបួសផងដែរក្នុងនោះ៧នាក់របួសធ្ងន់ធ្ងរ ៕

ឈើគ្រញូងនៅតែមានសកម្មភាពដឹកយកទៅលក់នៅប្រទេសវៀតណាម

January 16, 2011 at 9:20 AM

មន្ត្រីប៉ូលិសប្រគល់ឈើគ្រញូងឱ្យមេព្រៃរក្សាទុក

ខេត្តកំពង់ចាម ៖ នារសៀលថ្ងៃទី១៣ មករា ឆ្នាំ២០១១ លោកវរសេនីយ៍ឯកជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌ បានសំរេចប្រគល់ឈើគ្រញូងដែលរឹបអូសបានពីរថយន្តកាមរីពណ៌សមួយគ្រឿង ដែលបង្កគ្រោះថ្នាក់ចរាចរណ៍នាពេលកន្លងទៅថ្មីៗនេះ ឱ្យទៅកំលាំងរដ្ឋបាលព្រៃឈើកំពង់ចាម តាមរយៈលោកវរសេនីយ៍ត្រីចាន់ ហោ នាយរងការិយាល័យកណ្តាលយុត្តិធម៌ ដើម្បីកសាងសំណុំរឿងបញ្ជូនទៅកាន់សាលាដំបូងខេត្តធ្វើការស្រាវជ្រាវរកម្ចាស់ ។ លោកសឿង សុផន នាយរងផ្នែករដ្ឋបាលព្រៃឈើត្រើយស្តាំ បានប្រាប់ឱ្យដឹងថា រថយន្តដឹកឈើនេះបានបង្កគ្រោះថ្នាក់ចរាចរណ៍នៅលើកំណាត់ផ្លូវជាតិលេខ៧ ត្រង់ភូមិអំពិលលើ ឃុំអំពិល ស្រុកកំពង់សៀម កាលពីវេលាម៉ោង១០និង៣០នាទីយប់ថ្ងៃទី៦ មករា កន្លងទៅ ហើយត្រូវបានកំលាំងនគរបាលនាំយកឈើទាំងនោះមករក្សាទុកនៅស្នងការដ្ឋាននគរបាលខេត្តជាបណ្តោះអាសន្ន ។

លោកសឿង សុផន បានប្រាប់បន្តថាបន្ទាប់ មករូបលោកបានធ្វើការទំនាក់ទំនងតាមរដ្ឋបាលដោយស្នើសុំយកឈើទាំងនោះ ក្រោយពីមន្ត្រីរដ្ឋបាលព្រៃឈើក្រោមឱវាទបានមករាប់វាស់វែងឃើញមានឈើចំនួន៣ប្រភេទក្នុងនោះរួមមានឈើគ្រញូង ផ្ចិក និងគ្រើល មានចំនួន៥ផ្លាន ។ ឈើទាំងអស់នោះត្រូវបានលើកដាក់លើរ៉ឺម៉កម៉ូតូដឹកយកទៅរក្សាទុកនៅខណ្ឌរដ្ឋបាលព្រៃឈើកំពង់ចាម ដើម្បីកសាងសំណុំរឿងបញ្ជូនទៅកាន់សាលាដំបូងខេត្តធ្វើការស្រាវជ្រាវតាមរកម្ចាស់ឈើ ឱ្យមកទទួលខុសត្រូវ ។ មន្ត្រីនគរបាលស្រុកកំពង់សៀមមួយរូបបាន ប្រាប់ឱ្យដឹងដែរថា ក្រោយពីមានឧប្បត្តិហេតុ គ្រោះថ្នាក់ចរាចរណ៍នៅម្តុំមុខរោងចក្រកាត់ដេរ ស្រុកកំពង់សៀម បង្កឡើងដោយរថយន្តដឹកឈើគ្រញូង បានបើកបោះពួយយ៉ាងលឿនចេញមកពីទិសខាងលិចក្នុងគោលបំណងឆ្ពោះទៅព្រំ ដែនវៀតណាម បានបុកជាមួយរថយន្តកាមរីមួយគ្រឿងម៉ាកដូចគ្នាជិះគ្នា២នាក់ (ប្តីប្រពន្ធ) ធ្វើដំណើរបញ្រ្ចាសទិសគ្នាលាន់ដូចរន្ទះ ខណៈដែលរថយន្តដឹកឈើគ្រញូងបានព្យាយាមវ៉ារថយន្ត១គ្រឿងនៅខាងមុខទើបបង្កឱ្យមានគ្រោះថ្នាក់កើតឡើង ។

ក្រោយពេលកើតហេតុ គេឃើញអ្នកជិះនៅក្នុងរថយន្តទាំង២គ្រឿងរងរបួសធ្ងន់ទាំងអស់គ្នា ។ អ្នកបើកបររថយន្តដឹកឈើគ្រញូងត្រូវបានគេនាំទៅសង្រ្គោះនៅមន្ទីរពេទ្យ តែដោយរបួសធ្ងន់ធ្ងរពេកទើបត្រូវបានបញ្ជូនបន្តទៅសង្រ្គោះនៅរាជធានីភ្នំពេញ ហើយរហូតមកដល់ព្រឹកថ្ងៃទី១៤ មករា ២០១១ គេនៅមិនទាន់ស្គាល់អត្តសញ្ញាណនៅឡើយ ។ តាមមន្ត្រីសមត្ថកិច្ចបានប្រាប់ថា នៅដើម ឆ្នាំ២០១១នេះ ក្នុង១យប់ៗមានរថយន្តកាមរីដឹកឈើគ្រញូងប្រមាណ៣ទៅ៤គ្រឿងបានបើកឆ្លងកាត់ស្ពានគីហ្ស៊ុណាចេញពីត្រើយខាងលិចឆ្ពោះទៅត្រើយខាងកើតទន្លេមេគង្គ យកទៅលក់នៅព្រំដែនប្រទេសវៀតណាម ហើយមិនដែលឃើញសមត្ថកិច្ចណាចុះចាប់ទេ ។ ប្រហែលជាកន្លះខែមុននេះ មានរថយន្តប្រភេទយីឌុបធុនយក្ស១គ្រឿងបានផ្ទុកឈើគ្រញូងចេញពីត្រើយខាងលិចឆ្លងស្ពានទៅត្រើយខាងកើតត្រូវបានគេបង្ហើបប្រាប់ថា មានឈ្មួញល្បីឈ្មោះម្នាក់ចេញមុខរត់ការដែលជននោះធ្លាប់ត្រូវបានសាលាដំបូងខេត្ត ចេញដីកាតាមស្វែងរកចាប់ខ្លួននៅក្នុងឆ្នាំ២០១០ផងដែរ ៕

ទាហានឈុតខ្មៅសៀមតវ៉ាឱ្យរើទំនប់ដែលធ្វើកាត់អូរព្រំដែនទប់ទឹកហូរបុក

January 16, 2011 at 9:10 AM

ក្រុងប៉ោយប៉ែត ៖ កំលាំងទាហានឈុតខ្មៅសៀមដែលមានទាំងឯកសណ្ឋាន និងស៊ីវិល កាលពីវេលាម៉ោង៩និង៤៥នាទីព្រឹកថ្ងៃទី១៤ មករា បាននាំកម្មករមានខ្មែរមានសៀមជាង១០នាក់ មកតវ៉ាសុំឱ្យមានការរើទំនប់ដ៏តូចមួយដែលបានធ្វើកាត់អូរព្រំដែន ។ ទំនប់មួយនេះត្រូវបានធ្វើឡើងដោយក្រុមហ៊ុនកាស៊ីណូ ដើម្បីការពារទឹកជំនន់ដែលបានបុកខ្លាំងបណ្តាលឱ្យបាក់ច្រាំងអូរខាងទឹកដីកម្ពុជានាពេលកន្លងមក ។ ការចូលមករបស់ទាហានឈុតខ្មៅសៀមនាព្រឹកនោះពុំមានអាវុធទេ ប៉ុន្តែក្រុមកម្មករមានចបជីកមកជាមួយក្នុងបំណងរើទំនប់ឱ្យមានស្ថានភាពដូចដើមវិញ ។ ទាហានឈុតខ្មៅសៀមបាននិយាយថា ការបិទអូរព្រំដែនជារឿងមិនត្រឹមត្រូវ ។ អូរព្រំដែននេះជាអូររួមនៃប្រទេសទាំងពីរហើយក៏ចង់ឱ្យអូរព្រំដែនមួយនេះមានទឹកហូរដូចដើមវិញ តាមធម្មជាតិ ។

ទោះបីជាបែបណា ការចូលមកអូរព្រំដែន ដើម្បីតវ៉ានោះពុំបានសំរេចទេ ដោយសមត្ថកិច្ចនិងមន្ត្រីកម្ពុជាបានប្រាប់ឱ្យខាងថៃធ្វើឯកសារតាមផ្លូវច្បាប់មក នោះខាងកម្ពុជា នឹងធ្វើការរុះរើទំនប់ភ្លាម ។ ទំនប់ដែលបង្កឱ្យមានការតវ៉ានេះ បើតាមតំណាងក្រុមហ៊ុនកាស៊ីណូហ្គោលឌិនក្រោន បានឱ្យដឹងថា ការធ្វើទំនប់នេះគឺតាំងពីមុនរដូវទឹកជំនន់មកម្លេះ ហើយការធ្វើនេះក៏មិនមានបំណងអ្វីឱ្យប៉ះពាល់ដល់ទំនាក់ទំនងរវាងប្រទេសទាំងពីរទេ ។ ផ្ទុយទៅវិញគឺធ្វើគ្រាន់តែការពារកុំឱ្យទឹកបុកខ្លាំងបាក់ច្រាំងខាងកម្ពុជាប៉ុណ្ណោះ ព្រោះចំណុចនោះជាចំណុចកែង ហើយបើបណ្តោយឱ្យទឹកហូរបុកពេញទំហឹងយូរៗទៅ វានឹងបាក់ច្រាំង ។

ដោយឡែក ចំណុចកែងត្រង់ទប់ទំនប់តូចដែលធ្វើឡើងពីដីច្រកក្នុងការ៉ុងនេះគឺនៅខាងមុខទំនប់ប្រហែលជិត៥ម៉ែត្រ គេជីកកូនប្រឡាយតូចមួយវាងម្ខាងអូរពីខាងសៀមដែលជាហេតុធ្វើឱ្យកំលាំងឈុតខ្មៅសៀមមានប្រតិកម្មមកទាមទារសុំឱ្យលុបវិញផងដែរ ។ ជុំវិញការជីកកូនប្រឡាយតូចនេះ ត្រូវបានតំណាងក្រុមហ៊ុនកាស៊ីណូខាងលើបដិសេធថា ខាងក្រុមហ៊ុនអត់ដឹងទេ ។ ទោះបីជាបែបណា កំលាំងឈុតខ្មៅសៀម និងកម្មករដែលមានទាំងខ្មែរទាំងសៀមបានវិលត្រឡប់ទៅវិញ ក្រោយពីស្តាប់ហេតុផលពីមន្ត្រី និងសមត្ថកិច្ចកម្ពុជាថា នឹងធ្វើការរុះរើទំនប់នេះវិញប្រសិនបើភាគីថៃដាក់ឯកសារមកតាមផ្លូវច្បាប់នោះ ៕

ប៉ូលិសម្នាក់បាញ់ផ្អើលពេលផឹកស៊ី លស់ព្រលឹងទាំងនាយក្រឹម

January 16, 2011 at 9:03 AM

លោកស័ក្តិ៤កន្លះ សុខ សុគន្ធ និងកាំភ្លើងដែលដកហូត

មន្ដ្រីកងរាជអាវុធហត្ថពិនិត្យអាវុធដែលដកហូត

ខេត្តបន្ទាយមានជ័យ ៖ មន្ត្រីប៉ូលិសស័ក្តិ៤ កន្លះម្នាក់ ជានាយការិយាល័យប្រឆាំងភេរវកម្មនៃស្នងការដ្ឋាននគរបាលខេត្ត ត្រូវបានឃាត់ខ្លួនពីបទប្រើប្រាស់អាវុធខុសច្បាប់ និងធ្វើសកម្មភាពដេញបាញ់ម្ចាស់ភោជនីយដ្ឋានជំនោរសែសិន ដែលជាភោជនីយដ្ឋានមួយទំនើបជាងគេនៅក្នុងក្រុងសិរីសោភ័ណ កាលពីវេលាម៉ោង១០និង៣០នាទីយប់ ថ្ងៃទី១៣ មករា បង្កឱ្យមានការលស់ព្រលឹងមនុស្សមិនតិចនាក់ទេ រាប់ទាំងអស់លោកឧកញ៉ា មន្ត្រីសំខាន់ៗមួយចំនួនក្នុងខេត្ត និងក្នុងនោះក៏មានវត្តមានលោកអ៊ូ ប៉ុណ្ណារ៉ាក់ ហៅនាយក្រឹម ផងដែរ ។ បន្ទាប់ពីកើតហេតុការណ៍នេះត្រូវបានគេមើលឃើញថា ហាក់បីដូចជាមានបញ្ហាមិនឈប់ឈរទាក់ទិននឹងមន្ត្រីប៉ូលិសខេត្ត បន្ទាប់ពីអតីតស្នងការ ស្នងការរង ប្រធានពន្ធនាគារ និងប្រធានការិយាល័យគ្រឿងញៀនបានក្លាយជាជនជាប់ចោទជាបន្តបន្ទាប់ដោយសារបញ្ហាអាស្រូវនៃសំណុំរឿងគ្រឿងញៀន និងពុករលួយ ហើយពេលនេះទៀតប្រធានការិយាល័យមួយទៀតក៏ជួបបញ្ហាដែលខ្លួនឯងបានបង្កការបាញ់បោះដោយអាវុធផ្អើលពេញភោជនីយដ្ឋាន ។

សកម្មភាពបាញ់បោះនេះកើតឡើងបន្ទាប់ពីមានកម្មវិធីជប់លៀងថ្ងៃឡើងកាន់មុខតំណែងថ្មីរបស់លោកប្រធានមន្ទីរអប់រំយុវជន និងកីឡាខេត្តនៅឯមន្ទីរអប់រំ យុវជន និងកីឡារួចមកហើយក៏មានការបន្តរៀបចំកម្មវិធីមួយកន្លែងទៀតនៅភោជនីយដ្ឋានជំនោរសែសិន ដែលក្នុងនោះមានការចូលរួមពីអស់លោកឧកញ៉ា មន្ត្រីអប់រំ មន្ត្រីគយ មន្ត្រីកងរាជអាវុធហត្ថ និងបុគ្គលិកភោជនីយដ្ឋានជាច្រើននាក់ទៀត និងក្នុងនោះក៏មានវត្តមាននាយក្រឹមជាតារាកំប្លែងមួយរូបផងដែរ ។ នៅក្នុងហេតុការណ៍នោះបានធ្វើឱ្យអ្នកខ្លះលូនចូលក្រោមតុ ខ្លះរត់បាតជើងសព្រាតហើយសូម្បីតែតារាកំប្លែងនាយក្រឹមក៏រត់ស្ទើរតែលស់ព្រលឹងផងដែរ ។ លោកនាយការិយាល័យស្រាវជ្រាវបទល្មើសកងរាជអាវុធហត្ថខេត្ត ដែលបានធ្វើអន្តរាគមន៍ក្នុងបាតុភាពផ្ទះអាវុធនេះបានឱ្យដឹងថា មន្ត្រីប៉ូលិសដែលប្រើប្រាស់អាវុធ និងបាញ់ប្រហារប៉ុនប៉ងធ្វើមនុស្សឃាតផងដែរនោះ ឈ្មោះសុខ សុគន្ធ មានឋានន្តរស័ក្តិវរសេនីយ៍ទោ និងមានតួនាទីជានាយការិយាល័យប្រឆាំងភេរវកម្មនៃស្នងការដ្ឋាននគរបាលខេត្ត ។

តាមសាក្សីជាច្រើននាក់នៅកន្លែងកើតហេតុបានឱ្យដឹងថា មុនដំបូងជនសង្ស័យមន្ត្រីប៉ូលិសរូបនេះបានមកពីជប់លៀងនៅមន្ទីរអប់រំ យុវជន និងកីឡាខេត្ត ក្នុងអាការស្រវឹងខ្លាំង ដោយបើកបររថយន្ត១បាំងកន្លះ ម៉ាកតូយ៉ូតា តាកូម៉ា ពណ៌ស្លែរ តែម្នាក់ឯង មកកាន់ភោជនីយដ្ឋានជំនោរសែសិន ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ដើម្បីបន្តការផឹកស៊ីតទៅទៀត ។ តាមប្រភពបានឱ្យដឹងថា ក្នុងអាការស្រវឹងធ្លាក់ភ្នែក មន្ត្រីប៉ូលិសរូបនេះបានយកកែវស្រាបៀរដើរចូលទៅជល់នឹងមន្ត្រីអប់រំមួយចំនួនក្នុងនោះមានលោកឧកញ៉ាម្នាក់ដែលរួមតុជាមួយលោកអ៊ូ ប៊ុណ្ណារ៉ាត់ហៅនាយក្រឹម ។ ក្នុងតុនោះក៏មាននាយចយ ព្រមទាំងក្រុមអ្នកកំប្លែងជាច្រើននាក់ទៀត ដែលគេបានរៀបចំតុមួយនៅមុខវេទិកាតន្ត្រីរបស់ហាង ។

តាមប្រភពព័ត៌មានបន្តថា មន្ត្រីប៉ូលិសរូបនេះពេលនោះបានហៅនាយក្រឹមថា អាម៉ាក និងវាយក្បាលលេងផង បើទោះបីជានាយក្រឹមមានអាយុបងគេដល់ទៅ២០ឆ្នាំ និងមិនចូលចិត្តឫកពារបែបនេះក្តី ។ ពេលនោះដែរ ក៏ជួបម្ចាស់ភោជនីយដ្ឋានជំនោរសែសិន លោកឈុន ម៉ៅ ហើយសួររកម្ចាស់រថយន្តមួយគ្រឿងដែលម្ចាស់កំពុងផឹកស៊ីនៅក្យុសមួយ និងបានដឹកដៃទៅកាន់ទីនោះដែលមានលោកវរសេនីយ៍ឯក វង្ស ធី មេបញ្ជាការរងកងរាជអាវុធហត្ថខេត្ត លោកហែម ម៉ានិត អនុប្រធានសាខាគយ និងរដ្ឋាករខេត្ត លោកប៉ាម ឡាត់ លោកនី ជាមន្ត្រីគយ និងលោកអ៊ាក់ ផល្លា ចៅក្រមសាលាដំបូងខេត្ត ។ ជាមួយគ្នានេះដែរ ម្ចាស់ហាងបានសុំទោសថា ខ្លួនឈឺពុំអាចផឹកបានទេ ពេលនោះមន្ត្រីប៉ូលិសដែលស្រវឹងធ្លាក់ភ្នែកបានដើរចូលទៅក្នុងក្យូសនោះ ព្រោះស្គាល់លោកអនុប្រធានសាខាគយដែលជិះរថយន្តតូយូតាឡិចស៊ីស ពណ៌ស ។ បន្តិចក្រោយមកការប៉ះទង្គិចជាពាក្យសំដីគ្នាបានកើតឡើងដោយឈ្មោះសុខ សុគន្ធ ហៅលោកវង្ស ធី ថា បងៗតែលោកវង្ស ធី បានណែនាំថា ឯងគួរហៅខ្ញុំថា ពូវិញ ព្រោះខ្ញុំរាប់អានគ្នានឹងលោកឧត្តមសេនីយ៍សុខ សារេត អតីតស្នងការប៉ូលិស និងជាអតីតអភិបាលរងខេត្ត ដែលបច្ចុប្បន្នជាអនុប្រធានសាលាបណ្ឌិតសភានគរបាលកម្ពុជា ដែលជាឪពុករបស់ឯង គឺខ្ញុំ និងគាត់បានរាប់អានគ្នាជាបង និងប្អូន ។ ពេលនោះលោកសុខ សុគន្ធ ដែលមានសភាពស្រវឹងដាបមានការខឹងសម្បារយ៉ាងខ្លាំងក៏បានយកកៅអី និងប្រើដៃជើងវាយបំផ្លាញសំភារក្នុងក្យូសនោះខ្ទេចខ្ទី ថែមទាំងវាយម្ចាស់ហាងលោកឈុន ម៉ៅ ត្រូវមួយកៅអី និងទាត់មួយជើង ហើយក៏ត្រូវលោកឈុន ម៉ៅ វាយតបវិញត្រូវ១ដៃដែរ ។ ពេលនោះលោកសុគន្ធ បានរត់ទៅកាន់រថយន្តរបស់ខ្លួនយកកាំភ្លើងខ្លីមួយដើមម៉ាកឡុក ផលិតនៅប្រទេសចិន មកដេញបាញ់លោកឈុន ម៉ៅ ជាច្រើនគ្រាប់ ធ្វើឱ្យម្ចាស់ភោជនីយដ្ឋានរូបនេះភ័យព្រលឹងចុងសក់ រីឯមនុស្សដែលកំពុងផឹកស៊ីនៅ ទីនោះខ្លះលូនក្រាបយកតែប្រាសអាយុរៀងខ្លួន ។ បន្ទាប់មកលោកសុខ សុគន្ធ បានយកកៅអីវាយទៅលើរថយន្តម៉ាកតូយ៉ូតាហៃឡែនដឺ ពណ៌ទឹកមាស របស់ម្ចាស់ហាង បណ្តាលឱ្យបែកកញ្ចក់ក្រពឹតជញ្ជាំង និងបែកភ្លើងស្តុបក្រោយខាងស្តាំទៀតផង ។

តាមសាក្សីក្នុងហេតុការណ៍នោះបានបង្ហើបឱ្យដឹងថា ក្នុងខណៈនោះមន្ត្រីប៉ូលិសរូបនេះនៅមិនទាន់អស់ចិត្តទេ បានមូរជើងខោកាន់កាំភ្លើងខ្លីតាមរកម្ចាស់រថយន្ត ប៉ុន្តែពេលនោះគេសង្កេតឃើញនាយក្រឹ តាមអង្វរករ និងលួងលោមរហូតដកហូតយកកាំភ្លើងនោះបាន ។ បើតាមប្រភពព័ត៌មានពីលោកវរសេនីយ៍ឯក ចាន់ កុសល ស្នងការនគរបាលស្តីទីបានឱ្យដឹងថា មន្ត្រីប៉ូលិសឈ្មោះសុខ សុគន្ធ ត្រូវបានលោកបញ្ជាឱ្យឃាត់ខ្លួននៅការិយាល័យបុគ្គលិក ដើម្បីរៀបចំបែបបទដាក់ពិន័យ ហើយនឹងរង់ចាំគោលការណ៍ពីថ្នាក់លើថា តើទង្វើបែបនេះត្រូវដោះស្រាយបែបណា? តាមមន្ត្រីប៉ូលិសខេត្តដែលសុំមិនបញ្ចេញឈ្មោះបានឱ្យដឹងថា លោកសុខ សុគន្ធឱ្យតែផឹកស៊ីស្រវឹងតែងតែបង្ករឿងរ៉ាវមិនដែលខាន។ លើកនេះចាត់ទុកថា វាមិនធ្ងន់ធ្ងរប៉ុន្មានក្នុងការដេញបាញ់ម្ចាស់ភោជនីយដ្ឋាននោះ បើសិនជាបាញ់ស្លាប់មនុស្សវិញ ប្រហែលជាកាន់តែធ្ងន់ធ្ងរមិនខាន ។ នេះជាកំហុសឆ្គងមួយគួរឱ្យស្តាយ ៕

ឧបទ្ទវហេតុធ្លាក់យន្តហោះនៅភ្នំបូកគោឆ្នាំ២០០៧ មានការទាមទារសំណងដល់គ្រួសាររង

January 16, 2011 at 8:43 AM

ទិដ្ឋភាពក្នុងអំឡុងពេលរកឃើញយន្តហោះដែលធ្លាក់

យោងតាមទីភ្នាក់ងារព័ត៌មានយ៉ុនហាបរបស់កូរ៉េខាងត្បូងកាលពីថ្ងៃទី១៤ មករា ថា តុលាការក្រុងសេអ៊ូល នាថ្ងៃទី១៤ មករា នោះបានទាមទារឱ្យក្រុមហ៊ុនអាកាសចរណ៍មួយរបស់កម្ពុជាបង់សំណងចំនួន៣,២ពាន់លានវ៉ុនប្រហែល២,៨លានដុល្លារអាមេរិក ដល់គ្រួសារពួកអ្នកដំណើរដែលបានស្លាប់បាត់បង់ជីវិតក្នុងឧប្បត្តិហេតុធ្លាក់យន្តហោះ នៅក្នុងប្រទេសកម្ពុជា កាលពីឆ្នាំ២០០៧ កន្លងមក ។ យន្តហោះប្រភេទ Antonov An-24 របស់ក្រុមហ៊ុន PM Tair ដែលដឹកអ្នកដំណើរ៤៤នាក់ ក្នុងនោះ១៤នាក់ជាអ្នកទេសចរជនជាតិកូរ៉េខាងត្បូងបានធ្លាក់នៅតំបន់ព្រៃភ្នំបូកគោខេត្តកំពតភាគខាងត្បូងប្រទេសកម្ពុជា កាលពីខែមិថុនា ឆ្នាំ២០០៧ កន្លងមក ដោយសារបញ្ហាអាកាសធាតុអាក្រក់បណ្តាលឱ្យស្លាប់អ្នកជិះទាំងអស់ ។ យន្តហោះនោះហោះចេញពីព្រលានយន្តហោះអន្តរជាតិក្រុងសៀមរាបបំណងទៅកាន់ខេត្តព្រះសីហនុ ប៉ុន្តែបាត់ដានទៅធ្លាក់នៅ ខេត្តកំពត ។

គេនៅចាំបានថា ក្នុងឧប្បត្តិហេតុធ្លាក់យន្តហោះ គួរឱ្យរន្ធត់នោះ រយៈពេល៣ទៅ៤ថ្ងៃ ទើបរកឃើញគឺធ្លាក់ក្នុងព្រៃយ៉ាងក្រាស់ដោយយន្តហោះផ្ទុះឆេះ បែកទៅជាបំណែក ហើយសពខ្លះទើរលើមែកឈើ ។ នៅឆ្នាំ២០០៨ សមាជិកគ្រួសារជនរងគ្រោះកូរ៉េខាងត្បូង១១នាក់ បានដាក់ពាក្យប្តឹងស្វះស្វែងរកការបង់ប្រាក់សំណង៤,៥ពាន់លានដុល្លារ ដោយអះអាងថា ឧប្បត្តិហេតុធ្លាក់យន្តហោះនេះបង្កឡើងដោយការធ្វេសប្រហែសរបស់ក្រុមហ៊ុនអាកាសចរណ៍នោះ ព្រមទាំងការធ្វេសប្រហែសរបស់អ្នកបើកបរ ។ យន្តហោះនេះបើកដោយជនជាតិកម្ពុជា ហើយក៏បានស្លាប់បាត់បង់ជីវិតដែរ ។

លោកម៉ៅ ហាវណ្ណាល់ រដ្ឋលេខាធិការអាកាសចរណ៍មិនអាចទាក់ទងសុំការបំភ្លឺបានទេពីព័ត៌មាននេះ ។ លោកកុយ គួង អ្នកនាំពាក្យក្រសួងការបរទេសបានមានប្រសាសន៍ថា លោកមិនទាន់បានឃើញសំណើណាមួយទាក់ទិននឹងការទាមទារសំណងនោះនៅឡើយទេត្រឹមម៉ោងនេះ ដូច្នេះលោកមិនអាចធ្វើអត្ថាធិប្បាយបានឡើយ ។ ទាក់ទិននឹងការទាមទារសំណងនេះ មិនទាន់មានព័ត៌មានផ្លូវការនៅឡើយទេពីបញ្ហានេះ តែទោះបីជាបែបណាឧបទ្ទវហេតុនោះពិតជាគួរឱ្យរន្ធត់ពន់ពេក ដែលពេលនោះសម្តេចតេជោ ហ៊ុន សែន បានជំរុញឱ្យមានការស្វែងរកយ៉ាងសកម្មបំផុតបន្ទាប់ពីយន្តហោះនោះបានបាត់ពីប្រព័ន្ធរ៉ាដា ៕

រថយន្តកាមរីធ្លាក់ប្រឡាយផ្ងារពោះព្រោះអ្នកបើកបរវិលមុខ

January 15, 2011 at 2:11 PM

ពេលរថយន្តធ្លាក់ប្រឡាយប្រពន្ធនិងប្អូនគាត់ម្នាកមិនរងរបួសទេ ព្រោះប្រឡាយពុំមានទឹក

រាជធានីភ្នំពេញ ៖ រថយន្តកាមរីឆ្លាមមួយគ្រឿងបានធ្លាក់ប្រឡាយផ្ងារជើងដោយសារតែអ្នកបើកបរវិលមុខខ្លាំង ។ នេះជាការអះអាងរបស់ម្ចាស់រថយន្ត ។ ករណីនេះកើតឡើងនៅវេលាម៉ោង៧និង៣០នាទីព្រឹកថ្ងៃទី១៤ មករានៅតាមដងផ្លូវលេខ២០១០ ភូមិទឹកថ្លា សង្កាត់ទឹកថ្លា រាជធានីភ្នំពេញ ។ ពេលរថយន្តធ្លាក់ប្រឡាយនោះអ្នកជិះ៣នាក់គេចផុតពីការរងរបួស ហើយបញ្ចៀសបានគ្រោះថ្នាក់តាមដងផ្លូវជាយថាហេតុ ។

យោងតាមសំដីអ្នកបើកបររថយន្តឈ្មោះឃូ ឈុនម៉េង ភេទប្រុស អាយុ៤៥ឆ្នាំ ជាអាជីវកររស់នៅភូមិព្រែកតាខ្មៅ សង្កាត់ដើមមៀន ក្រុងតាខ្មៅ ខេត្តកណ្តាល ឱ្យដឹងថា គាត់បើករថយន្តកាមរីឆ្លាម ពាក់ស្លាកលេខ2A-4624 ពីជើងទៅត្បូងតាមដងផ្លូវ២០១០ ឆ្ពោះទៅចូលរួមពិធីមង្គលការបងប្អូន ។

ពេលទៅដល់កន្លែងកើតហេតុគាត់វិលមុខខ្លាំង ស្របពេលមានជំងឺលើសឈាមផងនោះ ក៏ជ្រុលចង្កូតទៅប៉ះម៉ូតូសេ១០០ កូរ៉េ មួយគ្រឿង ហើយដោយសារគាត់ជាន់ហ្វ្រាំងខ្លាំងពេកបណ្តាលឱ្យរថយន្តធ្លាក់ប្រឡាយផ្ងារជើងតែម្តង ។ ចំពោះអ្នកជិះម៉ូតូរងរបួសស្រាល ។ ប្រភពដដែលបន្តថា ពេលរថយន្តធ្លាក់ប្រឡាយប្រពន្ធនិងប្អូនគាត់ម្នាកមិនរងរបួសទេ ព្រោះប្រឡាយពុំមានទឹក ។ ម្ចាស់បានហៅរថយន្តទៅស្ទូចរថយន្តរបស់ខ្លួនយកទៅជួសជុល ៕

ទិវាស្រែបង្ហាញអំពីការដាំដុះតាមបែបបច្ចេកទេស

January 15, 2011 at 10:04 AM

ខេត្តព្រៃវែង ៖ កាលពីព្រឹកថ្ងៃទី១៣ មករា នៅវាលស្រែក្នុងភូមិសំរោង ឃុំល្វា ស្រុកព្រះស្តេច មានរៀបចំពិធីទិវាស្រែបង្ហាញអំពីការដាំដុះតាមបែបបច្ចេកទេសនិងតាមទំលាប់ ដែលរៀបចំនិងឧបត្ថម្ភថវិកាដោយសហភាពអឺរ៉ុប ក្រោមអធិបតីភាពលោកយស់ មុន្នី ប្រធានមន្ទីរកសិកម្មខេត្ត ។ អញ្ជើញចូលរួមក្នុងពិធីនោះដែររួមមានលោកបណ្ឌិតអ៊ាន រ៉ូសែល ទីប្រឹក្សាម្ចាស់គំរោងដែលជាតំណាងឱ្យម្ចាស់ជំនួយសហភាពអឺរ៉ុប អ្នកស្រីឃុន គីមលន់ ប្រធានការិយាល័យកសិកម្មស្រុក លោកមេភូមិ មេឃុំ និងប្រជាកសិករជាច្រើននាក់ទៀត ។

ក្រោយពីបានស្តាប់របាយការណ៍របស់លោកអាន ព័រ ជាជំទប់ទី១ ឃុំល្វារួចមក អ្នកស្រីឃុន គីមលន់ ប្រធានការិយាល័យកសិកម្មស្រុកបានធ្វើការបកស្រាយពន្យល់ដល់ប្រជាកសិករស្តីពីសញ្ញានិងរោគសញ្ញាថ្នាំពុលកសិកម្មការដុះលូតលាស់របស់ដំណាំស្រូវ និងមតិរបស់ប្រជាកសិករដែលជាតំណាងតាមភូមិនីមួយៗធ្វើការពន្យល់និងណែនាំបន្ថែម ។ អ្នកស្រីឃុន គីមលន់ បានសំណូមពរដល់ប្រជាកសិករឱ្យចេះប្រើប្រាស់ថ្នាំដែលផ្សំឡើងដោយធម្មជាតិ ដូចជា ពពួករុក្ខជាតិដែលមានជាតិល្វីង និងរុក្ខជាតិដែលមានជាតិពុលបុកបញ្ចូលគ្នាត្រាំឱ្យបានកន្លះខែ ទើបយកទៅបាញ់ ឬប្រើប្រាស់សំរាប់កំចាត់សត្វមមៀចត្នោតនិងសត្វដង្កូវជាដើម ។ នេះជាវិធីងាយមានប្រសិទ្ធភាព មិនប៉ះពាល់ដល់សុខភាព ហើយមិនខាតបង់ថវិកាផង ។

លោកបណ្ឌិតអ៊ាន រ៉ូសែល តំណាងឱ្យម្ចាស់ជំនួយសហភាពអឺរ៉ុបបានមានប្រសាសន៍ថា ជួសមុខឱ្យម្ចាស់ជំនួយក្រោយពីបានដើរពិនិត្យមើលការធ្វើស្រែរបស់បងប្អូនប្រជាកសិករតាំងពីពេលសាប ដកស្ទូងរហូតមកដល់ស្រូវទុំ លោកសប្បាយចិត្តណាស់ព្រោះឃើញស្រូវមានទិន្នផលល្អបងប្អូនសប្បាយចិត្ត នេះដោយសារបងប្អូនចេះងាកមកធ្វើស្រែតាមបច្ចេកទេសបានល្អប្រសើរ ។ លោកបន្តថា លោកនឹងពាំនាំសេចក្តីសប្បាយរីករាយរបស់ប្រជាកសិករក៏ដូចជាសេចក្តីស្នើសុំរបស់បងប្អូនកសិករដែលមានការខ្វះខាតដូចជាពូជល្អៗ ឬអ្នកបច្ចេកទេសផ្នែកដំណាំ ប្រាប់ម្ចាស់ជំនួយឱ្យមកជួយដល់បងប្អូនបន្តទៀត ។

លោកយស់ មុន្នី ប្រធានមន្ទីរកសិកម្មខេត្ត ព្រៃវែងបានមានមតិសំណេះសំណាលជាមួយប្រជាកសិករថា ការធ្វើស្រែបានផលល្អបែបនេះក៏ដោយសារការយកចិត្តទុកដាក់ពីរាជរដ្ឋាភិបាលដែលមានសម្តេចទាំង៣ ជាប្រមុខដឹកនាំ ។សម្តេចលោកបានខិតខំរកវិធីសាស្ត្រគ្រប់បែបយ៉ាងតាំងពីរកអ្នកផ្តល់ជំនួយ អ្នកបច្ចេកទេសផ្នែកកសិកម្ម ស្រូវពូជជាដើម ដើម្បីជួយឱ្យបងប្អូនធ្វើស្រែបានផលច្រើន ។ លោកបានមានប្រសាសន៍បន្តថា ឥឡូវនេះលោកហ៊ី បាវី ប្រធានកំពង់ផែរាជធានីភ្នំពេញ ក៏បានជួយជ្រោមជ្រែងគ្រប់បែបយ៉ាងតាំងពីប្រឡាយមេ ទឹក បង្គោលភ្លើង តភ្លើងពីប្រទេសវៀតណាមមកឱ្យបងប្អូនប្រើប្រាស់ ។ ក្នុងនោះដែរ លោកបញ្ជាក់ថា ស្រូវយើងឆ្នាំនេះក្នុងទឹកដីខេត្តព្រៃវែង វ៉ាដាច់ខេត្តតាកែវ និងបាត់ដំបង ដោយសារខេត្តបាត់ដំបងត្រូវបានចែកជាពីរផ្នែក ទៅជាខេត្តបន្ទាយមានជ័យមួយទៀត ។

លោកបានឱ្យដឹងទៀតថា ក្រៅពីទុកហូបនិងការនាំចេញទៅលក់នៅប្រទេសវៀតណាមដែលក្នុង១ឆ្នាំៗ ក្នុងខេត្តព្រៃវែងនាំស្រូវចេញទៅលក់បានពី១លានទៅ២លានតោន ហើយនៅសល់ស្រូវរាប់ពាន់តោនទៀត ។ លោកបានឱ្យដឹងថា ស្រូវដែលយើងធ្វើបានផលល្អច្រើនមាន៣ប្រភេទ គឺ១-ពូជស្រូវស្រាល មានអ៊ីអ៊ែរ 66 សែនពិដោរ ជលសារ ២-ពូជស្រូវកណ្តាលមាន ផ្ការំដួល ផ្ការំដេង ផ្ការមាត់ ផ្កាចន្ទសែនស (ហៅផ្កាខ្ញី) និង៣-ស្រូវធ្ងន់ មាន រាំងជ័យ ៥៤,៥៦ សំរាប់ឱ្យបងប្អូនជ្រើសរើសយកមកធ្វើទៅតាមលក្ខណៈនៃដីនិងពេលវេលា ។ លោកបានផ្តាំផ្ញើឱ្យបងប្អូនប្រជាកសិករទាំងអស់ត្រូវយកចិត្តទុកដាក់ធ្វើស្រែតាមបែបបច្ចេកទេសទើបបានផលច្រើន និងត្រូវចេះប្រមូលផលស្រូវឱ្យបានទាន់ពេលវេលាដូចពាក្យចាស់លោកថា «ច្រូតស្រូវទុំបាន៣ ច្រូតស្រូវខ្ចីបាន៤» ៕

មន្ត្រីប៉ូលិស២៣៤នាក់ បានទទួលវិញ្ញាបនបត្រក្រោយការសិក្សាអំពីក្រមព្រហ្មទ

January 15, 2011 at 8:54 AM

ពិធីនេះប្រារព្ធនៅព្រឹកថ្ងៃទី១៤ មករា នៅអគ្គស្នងការដ្ឋាននគរបាលជាតិ

មន្ត្រីប៉ូលិស២៣៤នាក់ បានទទួលវិញ្ញាបនបត្រក្រោយការសិក្សាអំពីក្រមព្រហ្មទណ្ឌថ្មី

រាជធានីភ្នំពេញ ៖ មន្ត្រីប៉ូលិសចំនួន២៣៤នាក់ បានទទួលវិញ្ញាបនបត្រពីលោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្តាល យុត្តិធម៌ តំណាងឱ្យលោកនាយឧត្តមសេនីយ៍អគ្គស្នងការនគរបាលជាតិ ដែលបានចូលរួមបិទវគ្គគ្រូបង្គោលស្តីពីក្រមព្រហ្មទណ្ឌថ្មីវគ្គ២ ដែលបានសិក្សាអស់រយៈពេល៥ថ្ងៃកន្លងមក ។ ពិធីនេះប្រារព្ធនៅព្រឹកថ្ងៃទី១៤ មករា នៅអគ្គស្នងការដ្ឋាននគរបាលជាតិ ។

លោកឧត្តមសេនីយ៍ឯក ម៉ក់ ជីតូ ជំនួសមុខឱ្យលោកនាយឧត្តមសេនីយ៍អគ្គស្នងការនគរបាលជាតិ បានមានប្រសាសន៍ថា ក្រមព្រហ្មទណ្ឌជាអត្ថបទច្បាប់មួយដែលប្រមូលផ្តុំនូវបទប្បញ្ញត្តិព្រហ្មទណ្ឌសម្ព័ន្ធត្រឹមត្រូវ មានភាពរលូន និងស៊ីសង្វាក់គ្នា ជាឧបករណ៍ជំនួយដ៏មានសារសំខាន់ដែលបង្កលក្ខណៈងាយស្រួលក្នុងការប្រើប្រាស់សំរាប់កំលាំងអនុវត្តច្បាប់ ។ លោកឧត្តមសេនីយ៍ បានសំណូមពរដល់សិក្ខាកាមទាំងអស់ដែលបានសិក្សាយល់ដឹងអំពីគោលការណ៍ទូទៅនៃក្រមព្រហ្មទណ្ឌ ត្រូវបន្តធ្វើស្វ័យសិក្សាឱ្យបានចាំស្ទាត់នូវមាត្រាដែលចែងអំពីទោសទណ្ឌ ដើម្បីបង្កើនភាពងាយស្រួលក្នុងការអនុវត្ត ។

លោកឧត្តមសេនីយ៍បន្តថា ដើម្បីធានាឱ្យមានប្រសិទ្ធភាពនៃការអនុវត្តច្បាប់នេះ ការងារអប់រំផ្សព្វផ្សាយ និងបណ្តុះបណ្តាលជាកិច្ចការបន្ទាន់ ហេតុនេះទើបលោកនាយឧត្តមសេនីយ៍នេត សាវឿន បានដាក់បញ្ជាឱ្យរៀបចំវគ្គបណ្តុះបណ្តាលគ្រូបង្គោលជាលក្ខណៈបន្ទាន់ ដើម្បីឱ្យគ្រូបង្គោលទាំងអស់មានលទ្ធភាពយកចំណេះដឹងដែលទទួលបានពីការសិក្សានេះ ទៅបណ្តុះបណ្តាលបន្តដល់មន្ត្រីនៅក្នុងអង្គភាពរបស់ខ្លួនតាមបណ្តាមូលដ្ឋានឱ្យបានឆាប់រហ័ស ។

គួរបញ្ជាក់ថា ក្នុងពិធីបិទវគ្គនេះក៏មានការចូលរួមពីលោកប៊ុន ហុន អនុរដ្ឋលេខាធិការក្រសួងយុត្តិធម៌ និងលោកផូវ សុភី អគ្គនាយកនៃអគ្គនាយកដ្ឋានស្រាវជ្រាវអភិវឌ្ឍន៍វិស័យយុត្តិធម៌ និងជាគ្រូឧទ្ទេសនាមផងដែរ ។ នេះក៏ជាវគ្គទី២ ផងដែរ បន្ទាប់ពីវគ្គសិក្សាគ្រូបង្គោលស្តីអំពីក្រមព្រហ្មទណ្ឌថ្មីទី១ ដែលបានបញ្ចប់កាលពីថ្ងៃទី២៥ ធ្នូ ឆ្នាំ២០១០ កន្លងទៅនេះ ៕