ចាប់តាំងពីធ្វើផ្សព្វតាមប្រព័ន្ធ អិនធើណិត កាលពីថ្ងៃទី ០១ ខែមករា ឆ្នាំ ២០០៨ មកដល់ថ្ងៃ
ទី ០១ ខែមករា ឆ្នាំ ២០១១នេះ សារព័ត៌មាន ព្រៃនគរមានអាយុកាល ៣ឆ្នាំ ហើយតែចំពោះ
ការបោះពុម្ពជាកាសែតប្រចាំសប្តាហ៍នៅព្រះរាជាណាចក្រកម្ពុជាវិញ ទើបតែបានមួយឆ្នាំទេ ។
ការផ្សព្វផ្សាយរបស់សារព័ត៌មាន ព្រៃនគរ នេះ ក្នុងគោលបំណងចែករំលែកនូវដំណឹងផ្សេងៗទាក់
ទងនឹងជីវភាពរបស់ពលរដ្ឋខ្មែរ ដែលកំពុងរបស់នៅឯដែនដីកម្ពុជាក្រោម ឬ ភាគខាងត្បូងនៃប្រ
ទេសវៀតណាមសព្វថ្ងៃ និងនៅជុំវិញពិភពលោក ដើម្បីឲ្យជនរួមជាតិខ្មែរនៅប្រទេសកម្ពុជា និង
ក្រៅប្រទេសបានជ្រាបជាព័ត៌មាន ជាពិសេស គឺចង់បង្ហាញឲ្យមតិជាតិនិងអន្តរជាតិបានជ្រាប
ថា«ខ្មែរក្រោមជានរណា ?» ។
ចាប់តាំងពីថ្ងៃទី ០១ ខែមករា ឆ្នាំ ២០០៨ ដល់ថ្ងៃទី ០១ ខែមករា ឆ្នាំ ២០១០ សារព័ត៌មាន
ព្រៃនគរ ចេញផ្សាយប្រចាំសប្តាហ៍ តាមប្រព័ន្ធអិនធើ ណិត បានចំនួន ១០២ លេខ និងចាប់ពី
ថ្ងៃទី ០១ ខែមករា ឆ្នាំ ២០១០ ដល់ថ្ងៃទី ០១ ខែមករាឆ្នាំ ២០១១ បានបោះពុម្ពជា កាសែតប្
រចាំសប្តាហ៍នៅប្រទេសកម្ពុជាបានចំនួន ១៩ លេខ ក្រោយពី សារព័ត៌មាន ព្រៃនគរ បានទទួល
អាជ្ញា ប័ណ្ណពីក្រសួងព័ត៌មានខ្មែរកាលពីថ្ងៃទី ១១ ខែមករា ឆ្នាំ ២០១០ កន្លងទៅនេះ ។
រយៈពេល ៣ ឆ្នាំ កន្លងមក ក្រុមបុគ្គលិកនៃ សារព័ត៌មាន ព្រៃនគរ របស់យើងខ្ញុំ បានប្រឹងប្រែង
អស់ពីកម្លាំងកាយចិត្ត មិនខ្លាចការនឿយហត់ សុទ្ធតែជាអ្នកស្ម័គ្រចិត្ត ធ្វើការមិនគិតពីកម្រៃឡើយ
ដើម្បីផ្សាយជូនលោកអ្នកនូវដំណឹង និងព័ត៌មានដែលអាចជឿទុកចិត្តបាន និងជាព័ត៌មានដែល
លោកអ្នកត្រូវការស្តីអំពីជីវភាពជនជាតិដើមខ្មែរ ដែលកំពុងរស់នៅដែនដីកម្ពុជាក្រោម សព្វថ្ងៃ
ក្នុងនោះរួមមាន ការរើសអើងពូជសាសន៍ការរំលោភសិទ្ធិមនុស្ស និងការបំបិទសិទ្ធិសេរីភាព
ក្នុងការប្រតិបត្កិព្រះពុទ្ធសាសនារបស់ជនជាតិដើមខ្មែរក្រោម ពីសំណាក់អាជ្ញាធរបក្សកុម្មុយនិស្ត
វៀតណាម សព្វថ្ងៃ ។ ក្រៅពីនេះ សារព័ត៌មាន ព្រៃនគរ ក៏បានណែនាំឲ្យមិត្តអ្នកអានបានជ្រាប
អំពីភូមិសាស្ត្រនៃដែនដីកម្ពុជាក្រោមដោយមានការធ្វើអត្ថាធិប្បាយនូវចំណុចខេត្តនីមួយៗជាដើម ។
សារព័ត៌មាន ព្រៃនគរ បានចាប់បដិសន្ធិជារូបរាងឡើងកាលពីថ្ងៃទី ០១ ខែមករា ឆ្នាំ ២០០៨
ដោយមានព្រះតេជព្រះគុណ សឺង យ៉ឹងរតនា នៅវត្តខេមររង្សី ទីក្រុងស្សាហូសេ រដ្ឋកាលីហ្វនៀ
សហរដ្ឋអាមេរិក ជាចាងហ្វាងការផ្សាយ និងព្រះតេជព្រះគុណ ថាច់ ប្រីជា គឿននៅទីក្រុង
ភ្នំពេញ ប្រទេសកម្ពុជាជានិពន្ធ នាយកព្រមទាំងមានបុគ្គលិកមួយចំនួនទៀតនៅប្រទេសកម្ពុជា
និងនៅកម្ពុជាក្រោមបានស្ម័គ្រចិត្តជួយផងដែរ ។ ដល់ថ្ងៃទី ០១ ខែមករា ឆ្នាំ ២០១០
សារព័ត៌មាន ព្រៃនគរ មាន លោក លី ឈូន ជាអ្នកទទួលខុសត្រូវផ្នែកច្បាប់ ក្នុងការសុំច្បាប់
បោះពុម្ពកាសែតនៅប្រទេសកម្ពុជាធ្វើជាចាងហ្វាង ។
រយៈពេល ៣ ឆ្នាំ នៃការផ្សាយរបស់យើងកន្លងមកនេះ ទោះបីមានឧបសគ្គខ្លះ ដោយមានការ
គំរាមកំហែងផ្នែកសន្តិសុខ ពីសំណាក់រដ្ឋាភិបាលវៀតណាម ទៅលើក្រុមការងាររបស់យើងក្តី
តែយើងនៅតែខំប្រឹងពុះពារ ដើម្បីបន្តការផ្សាយជាធម្មតា ។ ម្យ៉ាងទៀត ការផ្សាយរបស់ សារព័ត៌មាន
ព្រៃនគរ ក៏គង់មិនផុតពីមានការខ្វះខាតផ្នែកបច្ចេកទេស និងកំ ហុសឆ្គងផ្សេងៗ ដោយអចេតនា
មិនខាន ឡើយ ។ ទុកជាយ៉ាងនេះក្តី យើងខ្ញុំក្រុមការផ្សាយនៃ សារព័ត៌មាន ព្រៃនគរ មានមោទន
ភាពខ្លាំងណាស់ ដែលបានបំរើលោកអ្នកនិងសង្គមជាតិខ្មែរ ជាពិសេសគឺជាតិខ្មែរក្រោម ដែលកំពុង
តែឋិតនៅក្រោមនឹមអាណានិគម បក្សកុម្មុយនិស្ត នៃប្រទេសសាធារណរដ្ឋសង្គមនិយមវៀតណាម
សព្វថ្ងៃ ។ អ្វីដែលជាមោទនភាព និងក្តីរីករាយខ្លាំងជាងនេះទៀតនោះ គឺ ពេលដែលយើងបានដឹង
ថា សារព័ត៌មាន ព្រៃនគរ មានអ្នកនិយមចូលចិត្តអានច្រើននៅលើគេហទំព័រ ក៏ដូចជាការជួយគាំទ្រ
អានតាមកាសែតដែលបានបោះពុម្ពនៅប្រទេសកម្ពុជា ។ នេះហើយគឺជាពានរង្វាន់ដ៏ធំមួយសម្រាប់
លើកទឹកចិត្ត ដល់ក្រុមការងារយើងខ្ញុំ ដើម្បីបន្តផ្សព្វផ្សាយតទៅមុខទៀត ។ យើងខ្ញុំប្តេជ្ញាចិត្តថា
នឹង ប្រឹងប្រែងអស់ពីកម្លាំងកាយចិត្តដើម្បីបន្តការផ្សាយក្នុងឆ្នាំ ២០១១ នេះឲ្យកាន់តែប្រសើរជាង
មុនថែមទៀត ។
ឆ្នាំថ្មី ២០១១ នេះ យើងខ្ញុំ សូមប្រសិទ្ធិពរដល់មិត្តអ្នកអាន នៅគ្រប់ទិសទីបានជួបតែសេចក្តីសុខ
សេចក្តីចម្រើន គ្រប់គ្រប់ទិនទិវារាត្រីកុំបីខាន ជាពិសេសបានទទួលពុទ្ធពរ ៤ ប្រការ គឺអាយុ វណ្ណៈ
សុខៈ ពលៈ កុំបីឃ្លៀងឃ្លាត ឡើយហោង ៕
សហរដ្ឋអាមេរិក ថ្ងៃទី ០១ ខែមករា ព.ស.២៥៥៤ គ.ស.២០១១
ក្រុមការផ្សាយនៃ សារព័ត៌មាន ព្រៃនគរ
0 comments:
Post a Comment