Khmer news / Cambodia hot news online media: 1/11 Cambodia News | Khmer News

Cambodia News | Khmer News - ពត៌មានខ្មែរ

វត្តកែវសិក្ខាគិរីស្វារៈជាទីកន្លែងសៀមឈ្លានពានត្រូវបានចារឹតទុក

January 11, 2011 at 2:49 AM

ដោយ ៖ កោះឯករាជ្យ
ថ្ងៃ ច័ន្ទ ទី ១០ ខែ មករា ឆ្នាំ ២០១១
Koh Santepheap Daily

ផ្ទាំងថ្ម នៅ កណ្ដាល វត្ដ កែវ សិក្ខា គិរីស្វា រៈជាទី កន្លែង សៀម ឈ្លានពាន ត្រូវ បាន ចារឹតទុក ( រូបថត ត្បែងមានជ័យ)

ខេត្តព្រះវិហារ ៖ វត្ដកែវសិក្ខាគិរីស្វារៈ ហៅវត្ដប្រាសាទព្រះវិហារ ស្ថិតនៅក្នុងទឹកដីរបស់ខ្មែរត្រូវបានកត់ត្រាទុកពីមហិច្ឆតាឈ្លានពានរបស់សៀមកាលពីជាង២ឆ្នាំមុន ។ នៅទីនោះមានផ្ទាំងថ្មមួយដុំធំជាកន្លែងដែលឧត្ដមសេនីយ៍មេបញ្ជាការទ័ពសៀមម្នាក់ឈ្មោះកាណុក បានដឹកនាំទាហានសៀមប្រមាណពី៤៥០ ទៅ៧០០នាក់ ចូលឈ្លានពានឈរជើងកាន់កាប់ក្នុងទីអារាមខ្មែរ កាលពីវេលាម៉ោង១២ និង៣៥នាទីរសៀលថ្ងៃទី១៥ កក្កដា ឆ្នាំ២០០៨កន្លងទៅ ខណៈព្រះសង្ឃខ្មែរជាច្រើនអង្គកំពុងគង់នៅទីនោះជាប្រចាំ ។

( រូបថត ត្បែងមានជ័យ)

ចំណុចនេះគឺជាទឹកដីដ៏ពិសិដ្ឋរបស់កម្ពុជា ដែលនៅថ្ងៃ្ងទី១៥ កក្កដា ២០០៨ បានត្រូវមេដឹកនាំសៀមវង្វេងប្រវត្ដិសាស្ដ្របានបញ្ជាឱ្យឧត្ដមសេនីយ៍មេទ័ពថ្មើរជើងរបស់ខ្លួនឈ្មោះកាណុកកែនប្រមូលទ័ពឈុតខ្មៅរបស់ពួកគេចូលឈ្លានពានក្នុងទឹកដីវត្ដកែវសិក្ខាគិរីស្វារៈ ។ ពេលនោះកងទ័ពខ្មែរដ៏អង់អាចក្លាហានបានធ្វើការប្រឈមមុខតបវិញដោយមិនអនុញ្ញាតឱ្យទ័ពសៀមឈរជើងទីនោះបានយូរឡើយ គឺត្រូវចាកចេញជាបន្ទាន់ពីក្នុងអធិបតេយ្យភាពរបស់ខ្មែរ ។ តែនៅពេលនោះតាមការសង្កេត ទោះកងទ័ពសៀមដកចេញពីក្នុងទឹកដីខ្មែរស្ទើរតែ១០០%ក៏ពិតមែន តែពួកជ្រុលនិយមសៀមនៅធ្វើមុខក្រាស់ដោយរក្សាកម្លាំងទ័ពរបស់ខ្លួនឱ្យឈរជើងនៅលើផ្ទាំងថ្មដ៏ធំ ដែលស្ថិតនៅកណ្ដាលបរិវេណវត្ដកែវសិក្ខាគិរីស្វារៈចំនួន១០នាក់ចាប់តាំងពីថ្ងៃទី១៥ កក្កដា ឆ្នាំ២០០៨ រហូតដល់ថ្ងៃទី១ ធ្នូ ២០១០ ទើបពួកគេបង្ខំចិត្ដចាកចេញអស់ពីក្នុងវត្ដកែវសិក្ខាគិរីស្វារៈរបស់ខ្មែរ ។

( រូបថត ត្បែងមានជ័យ)

ពេលនេះទោះបីទ័ពសៀម បានដកចេញអស់កាលពីថ្ងៃទី១ ខែធ្នូ ឆ្នាំ២០១០ កន្លងទៅនេះហើយក្ដី ក៏អ្វីដែលជាស្លាកស្នាមនៃការប្រឈមមុខនឹងគ្នារវាងខ្មែរ និងសៀមនៅលើផ្ទាំងថ្មក្នុងបរិវេណវត្តកែវសិក្ខាគិរីស្វារៈដែលឧត្ដមសេនីយ៍កាណុក មេទ័ពសៀមបានចូលឈ្លានពានត្រូវបានប្រមុខដឹកនាំនៃរាជរដ្ឋាភិបាលកម្ពុជាសំរេចឱ្យអាជ្ញាធរខេត្ដព្រះវិហារចារឹកជាស្លាកសញ្ញាសំគាល់សំរាប់បង្ហាញភ្ញៀវទេសចរជាតិ និងអន្ដរជាតិដែលចូលទៅទស្សនាប្រាង្គប្រាសាទព្រះវិហាររបស់ខ្មែរនៅលើកំពូលភ្នំដងរែកបានឃើញបានជ្រាបនូវរាល់អ្វីដែលជាសច្ចភាព និងសម្រាប់ឱ្យកូនខ្មែរជំនាន់ក្រោយបានដឹងពីប្រវត្ដិសាស្ដ្រថ្មីៗរបស់ជាតិខ្លួន ។

( រូបថត ត្បែងមានជ័យ)

លោក ស ថាវី អភិបាលរងខេត្ដព្រះវិហារ ប្រចាំការតំបន់ប្រាសាទព្រះវិហារដែលជាអ្នកដឹកនាំក្នុងការសាងសង់ស្លាកសញ្ញាសំគាល់កាលពីរសៀលថ្ងៃទី៨ មករា កន្លងទៅថ្មីៗនេះ បានមានប្រសាសន៍ឱ្យដឹងថា ស្លាកសញ្ញាដែលបានសាងសង់នៅលើផ្ទាំងថ្មនៅកណ្ដាលវត្ដកែវសិក្ខាគិរីស្វារៈ ដែលមានឆ្លាក់អក្សរដាក់ចំណងជើងថា «ទីនេះជាកន្លែងសៀមឈ្លានពាន» នោះគឺមានការអនុញ្ញាតដ៏ខ្ពង់ខ្ពស់ពីប្រមុខដឹកនាំនៃរាជរដ្ឋាភិបាលកម្ពុជា និងមានការឯកភាពពីសំណាក់គណៈមេបញ្ជាការឯកភាពសមរភូមិទិសយោធភូមិភាគទី៤ និងមេបញ្ជាការសមរភូមិទិសទី១ប្រាសាទព្រះវិហារ ។ ស្លាកសំគាល់ទីកន្លែងនោះធ្វើឡើងនៅថ្ងៃទី៣ មករា ឆ្នាំ២០១១ អំពីថ្មម៉ាប ទំហំ ០,៩០ម៉ែត្រ×១,៨០ម៉ែត្រចារឹកអក្សរធំៗពណ៌មាស បែរមុខទៅទិសខាងកើតចំគោបុរៈទី៥ ។ លោកស ថាវី បានបញ្ជាក់ឱ្យដឹងទៀតថា ស្លាកសំគាល់នោះបានសាងសង់រួចរាល់ហើយ ប៉ុន្ដែបច្ចុប្បន្នកំពុងតែរៀបចំធ្វើរបងហ៊ុមព័ទ្ធជុំវិញបរិវេណផ្ទាំងថ្មនោះ ដើម្បីការពារទៀតផង ៕

ការចាប់ខ្លួនឧត្តមសេនីយ៍ សាមិត្ត វីរៈ ពាក់ព័ន្ធរឿងដីធ្លី

January 11, 2011 at 2:34 AM

ដោយ : សុពិសិដ្ឋ
ថ្ងៃទី 10 មករា 2011
CEN

លោក ឧ ត្ត ម សេនីយ៍ សា មិត្ត វីរៈ

ភ្នំពេញ: ឧត្តមសេនីយ៍ត្រី សាមិត្ត វីរៈ ត្រូវបានគេចាប់បញ្ជូនទៅឃុំខ្លួនហើយនៅរសៀលថ្ងៃនេះ ។ សមត្ថកិច្ចប៉េអឹមផ្ទៃប្រទេស និងរាជធានីបានចុះឆែកឆេរផ្ទះឧត្តមសេនីយ៍យោធាម្នាក់ឈ្មោះ សាមិត្ត វីរៈ ដែលមានឋានៈឧត្តមសេនីយ៍ត្រីជានាយរងនាយកដ្ឋានបច្ចេកទេសភស្តុភា ក្រសួងការពារជាតិ ក្រោមបទសង្ស័យពាក់ពន្ធ័រឿងដីធ្លី ។

លោក ឧ ត្ត ម សេនីយ៍ សា មិត្ត វីរៈ រូបកណ្តាលត្រូវបាន គេ ចាប់ បញ្ជូនទៅ ឃុំខ្លួន ហើយ នៅ ប៉េអឹម ផ្ទៃ ប្រទេស

ការឆែកឆេរបានចាប់ផ្តើមតាំងពីម៉ោង១១ព្រឹកថ្ងៃទី១០មករានេះនៅផ្ទះ លេខ១៣១ ផ្លូវបេតុង ស្ថិតក្នុងបុរីសាន់វ៉េ ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ ដោយមានដីការពីអយ្យការយោធា លេខ០១ចុះថ្ងៃទី១០ ១ ១១ អយ ដោយម៉ក សីហា ព្រះរាជអាជ្ញារងនៃតុលាការយោធា ។

លោកឧត្តមសេនីយ៍សៀរ សម្បត្តិ ស្នងការព័ត៌មាននៃកងរាជអាវុធហត្ថលើផ្ទៃប្រទេស និងលោកឧត្តមសេនីយ៍ហុង វិណុល ស្នងការស្រាវជ្រាវកងរាជអាវុធហត្ថលើផ្ទៃប្រទេស សហការជាមួយប៉េអឹមក្រុងភ្នំពេញ និងប៉េអឹមមូលដ្ឋាន បានចុះឆែកឆេរផ្ទះលោកឧត្តមសេនីយ៍សាមិត្ត វីរៈ បានរកឃើញវត្ថុតាងជាច្រើនដូចជាកាំភ្លើង ៥ដើមក្នុងនោះមាន អាកាមួយដើម និងកាំភ្លើងខ្លី៤ដើម រថយន្ត ៤គ្រឿង ក្នុងនោះមានឡង់គ្រីស័រ ពណ៌ខ្មៅ ២គ្រឿង សេរីឆ្នាំ៩៨ (ទី១- ស្លាកលេខខេមរភូមិន្ទ០១.២.១៦៦៦និងទី២-ស្លាកលេខខេមរភូមិន្ទ ០១.២.៣៦៦៦) ឡិចស៊ិសមួយគ្រឿង ពណ៌ខ្មៅ ស្លាកលេខភ្នំពេញ 2E 4145 និងស៊ីអវីមួយគ្រឿង ពណ៌ទឹកប្រាក់ ស្លាកលេខភ្នំពេញ 2E 7459 រួមទាំងឯកសារដីធ្លីរាប់ពាន់ហិចតានៅទូទាំងប្រទេស និងឃាត់ខ្លួនអង្គរក្សចំនួន៣នាក់ទៀត ។

ជាមួយគ្នានោះលោកឧត្តមសេនីយ៍សាមិត្ត វីរៈ ឋានន្តរស័ក្កិផ្កាយមួយ ប៉ុន្តែគាត់បានថតរូបពាក់ស័ក្កិផ្កាយបី ហើយជនសង្ស័យរូបនេះបាននិយាយបែបនៅមានអំនួតថាការថតរូបពាក់ ស័ក្តិផ្កាយបីនេះ គឺថតឲ្យហើយទៅទាន់ខ្លួនក្មេងស្អាត គង់តែឡើងដំណែងទេ ៕

ដាញ់ ម៉ូនីកា នឹងសម្រាលបុត្រីនៅក្នុងខែមករានេះ

January 11, 2011 at 2:27 AM

ដោយ : សុខុម
ថ្ងៃទី 10 មករា 2011
CEN

ដា ញ់ ម៉ូ នី កា

ភ្នំពេញ: បានឲ្យដឹងពីប្រភពស្និទ្ធនិងសាច់ញតិរបស់អតីតតារាសម្តែងខាង ទឹកភ្នែក ដាញ់ ម៉ូនីកា ថា ពេលដែលនាងចេញទៅរស់នៅអូស្ត្រាលីជាមួយប្តីនាងនោះ នាងបានត្រៀមសម្រាលកូន នៅក្នុងខែមករានេះ ហើយនាងក៏បានធានាម្តាយរបស់នាង ដើម្បីទៅកំដរមើលថែនាងក្នុងពេលសម្រាល ។

អតីតតារាសម្តែង ដាញ់ ម៉ូនីកា កំពុងស្ថិតនៅក្នុងភាពដ៏កក់ក្តៅមួយ បន្ទាប់ពីនាងបានសម្រេចចិត្តចាកចេញពីពិភពសិល្បៈ ហើយប្រគល់បេះដូង និងរាងកាយផូរផង់ដ៏គួរឲ្យស្រឡាញ់ដល់បុរសអូស្ត្រាលី ដែលមានវ័យច្រើនជាងនាងដល់ទៅពីរជួរ តែនៅពេលនេះនាងក៏បានត្រៀមខួនដើម្បីផ្តល់កំណើតដល់កូនជាទីស្រឡាញ់ របស់នាងផងដែរ ។ ប៉ុន្តែក៏មានពាក្យនិយាយឡើងដែរថា នាងគឺជាមនុស្សដែលមានសំណាងជាងតារាៗដទៃៗឯទៀត ដែលមានប្តីជាអនិកជន ហើយបែរជាត្រឡប់មកជាអ្នករកស៊ីដូចជា លក់បន្លែ លក់ថាសចម្រៀង និងមានអ្នកខ្លះទៀត ជាកម្មកររោងចក្រ ។

ថ្វីត្បិតតែស្វាមីនាងលោក ផុន ប៊ុនថែល មានវ័យ ៤០ ឆ្នាំមែន តែប្តីនាងមិនដែលឲ្យនាងធ្វើអ្វីនោះទេ គឺនៅតែផ្ទះនិងរៀនបើកបរដើម្បីយកលិខិតបញ្ជាក់តែប៉ុណ្ណោះ ។ ជាមួយគ្នានេះដែរ នាងក៏ទទួលបានការយកចិត្តដុកដាក់ ដុតដៃដុតជើងមើលថែនាងពីសំណាក់បងប្អូនខាងប្តីរបស់នាង ពេលដែលនាងជិតសម្រាលបុត្រផងដែរ ។

អ្នកស្រី ម៉ែន ចាន់ណារី បានអះអាងកន្លងមកថា គាត់តែងតែទៅណាមកណាជាមួយកូនស្រីរបស់គាត់ ហើយគាត់ធ្លាប់និយាយថា កូនម៉ូនីកានិងសម្រាលបុត្រី នៅក្នុងខែមករា ឆ្នាំ២០១១ ។ ហើយអ្នកស្រីនឹងចំណាយពេលយ៉ាងតិច ៦ខែ ដើម្បីមើលថែកូន និង ចៅរបស់គាត់ ទម្រាំតែនាងរឹងដៃរឹងជើងវិញ ។ មិនតែប៉ុណ្ណោះ ម៉ូនីកា បានព្យាយាមចង់ឲ្យម្តាយរបស់នាងមកនៅជិតនាង ហើយត្រូវបានស្វាមីរបស់នាងព្រមធ្វើតាម ក៏បានមកលេងស្រុកខ្មែរក្នុងរយៈពេលខ្លី ដើម្បីធានាម្តាយក្មេកយកទៅមើលថែប្រពន្ធ ដែលជិតសម្រាលកូន ។

ប្រភពមួយពីមិត្តភក្តិ របស់តារាល្បីឈ្មោះរូបនេះបានឲ្យដឹងផងដែរថា ស្វាមីអាកាទើបតែមកលេងស្រុកយើងកាលពីថ្ងៃទី១៩ ធ្នូកន្លងទៅ ដោយប្រថុចញ៉ុច គឺគាត់មកលេងបានតែប៉ុន្មានថ្ងៃ ដោយឆ្លៀតប៉ុន្មានថ្ងៃនេះ គាត់ក៏បានធានាម្តាយក្មេកយកទៅអូស្ត្រាលី ព្រោះថានៅសល់តែប៉ុន្មានថ្ងៃទៀត អាកាសម្រាលកូនហើយ ។

ពេលនេះគាត់ប្រហែលជានាំម្តាយក្មេកគាត់ទៅដល់អូស្ត្រាលីហើយក៏មិនដឹង ពួកយើងទាំងអស់ដែលជាមិត្តភក្តិក៏មិនដឹងដំណឹងនេះផង កុំតែស្វាមីអាកាគាត់ Call មកលេង ពេលដែលគាត់មកដល់ស្រុកយើង កុំអីយើងក៏មិនដឹងថា ម៉ាក់អាកា ទៅណាដែរ ។

អ្នកនាងដ៏តូចច្រឡឹងរូបនេះបានត្រៀមប្រសូត្របុត្រីម្នាក់ជាចំណង ស្នេហ៍ដ៏កក់ក្តៅជាមួយស្វាមីនាង ៕

ថន លក្ខិណា ត្រៀមឡើងផ្ទះល្វែងថ្មីតម្លៃជាង១០ម៉ឺន

January 11, 2011 at 2:23 AM

ដោយ : សាវរក្ស
ថ្ងៃទី 10 មករា 2011
CEN

ភ្នំពេញ: ដោយបានទទួលព័ត៌មានមកថា ថន លក្ខិណា បានចែកលិខិតអញ្ជើញឡើងផ្ទះល្វែងថ្មីនៅពាក់ កណ្ដាលខែមករាខាងមុននេះ ។ ហើយនាងបានបដិសេធនូវព័ត៌មានផ្ដេសផ្ដាសមិនពិតថា ផ្ទះល្វែងថ្មីដែល មានតម្លៃជាង១០ម៉ឺនដុល្លារនៅម្ដុំដេអិន ត្រូវម្ចាស់ស្នេហ៍នាងជាអ្នកទិញឱ្យ ។ នៅព្រឹកថ្ងៃទី៧ខែមករា ២០១១ វេលាម៉ោង៩ព្រឹកខាងស៊ីអ៊ីអិនបានធ្វើការទំនាក់ទំនងទៅលក្ខិណា ដើម្បីសាកសួរព័ត៌មានខ្លះៗ ដែលទាក់ទងនឹងការឡើងផ្ទះថ្មីនេះ តែត្រូវនាងប្រាប់ថា នាងកំពុងជាប់រវល់ ៕

រដ្ឋាភិបាលនិងអង្គការសង្គមស៊ីវិលពិភាក្សាសេចក្តីព្រាងច្បាប់សមាគមនិងអង្គការ�

January 11, 2011 at 2:16 AM

ដោយ ជន សក្តា
វីអូអេ ខ្មែរ | ភ្នំពេញ
ថ្ងៃច័ន្ទ, 10 ខែមករា 2011

ក្រុម អង្គការ សង្គម ស៊ីវិល ធ្វើ ការ ប្រជុំ ក្នុង វេទិកា សាធារណៈ។ (រូបថត៖ វីអូអេ ខ្មែរ)

តំណាងរដ្ឋាភិបាល និងអង្គការសង្គមស៊ីវិលបានពិភាក្សាគ្នាយ៉ាងតឹងតែងលើសេចក្តីព្រាងច្បាប់សមាគមនិងអង្គការក្រៅរដ្ឋាភិបាលដែលអង្គការសង្គមស៊ីវិលបានពិពណ៌នាហៅថា ជាការគំរាមកំហែង និងគាបសង្កត់លើសកម្មភាព និងសិទ្ធិសេរីភាពរបស់ពួកគេ។

លោក ស ខេង រដ្ឋមន្ត្រីក្រសួងមហាផ្ទៃបានលើកទឹកចិត្តដល់អង្គការក្រៅរដ្ឋាភិបាលទាំងអស់ចូលរួមផ្តល់មតិយោបល់នានា ដើម្បីដាក់បញ្ចូលទៅក្នុងសេចក្តីព្រាងច្បាប់នេះឱ្យច្បាប់នេះកាន់តែល្អប្រសើរមុននឹងដាក់ជូនរដ្ឋាភិបាល និងរដ្ឋសភា។

នៅថ្ងៃច័ន្ទនេះ លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ បានបដិសេធការលើកឡើង ការព្រួយបារម្ភរបស់អង្គការសង្គមស៊ីវិលដែលថា សេចក្តីព្រាងច្បាប់អំពីសមាគមនិងអង្គការក្រៅរដ្ឋាភិបាលមានគោលដៅគំរាមកំហែង និងបំភិតបំភ័យប្រឆាំងនឹងអង្គការសង្គមស៊ីវិល។

អង្គការក្រៅរដ្ឋាភិបាលមួយចំនួនបានសម្តែងការព្រួយបារម្ភអំពីការគំរាមកំហែងនៃការព្យួរ ឬការ បញ្ចប់សកម្មភាពរបស់ពួកគេ ការរឹតបន្តឹងសេរីភាព និងសិទ្ធិបុគ្គល នីតិវិធីចុះបញ្ចី កាតព្វកិច្ចរបស់ អង្គការសង្គមស៊ីវិល ដើម្បីរាយការណ៍ពីសកម្មភាពនានា លក្ខខណ្ឌនៃថវិកា និងផែនការសកម្មភាព នៅក្រោមច្បាប់សមាគម និងអង្គការក្រៅរដ្ឋាភិបាលថ្មីនេះ។

មនុស្សប្រមាណ៣០០នាក់ពីអង្គការក្រៅរដ្ឋាភិបាលជាតិ និងបរទេស ព្រមទាំងតំណាងអង្គទូតបរទេសប្រចាំនៅក្នុងទីក្រុងភ្នំពេញ បានចូលរួមនៅក្នុងការពិគ្រោះយោបល់សាធារណៈលើសេចក្តី ព្រាងច្បាប់ស្តីពីសមាគមនិងអង្គការក្រៅរដ្ឋាភិបាល ដើម្បីធ្វើការពិភាក្សារវាងតំណាងក្រសួងមហាផ្ទៃ និងអង្គការសង្គមស៊ីវិលនៅសណ្ឋាគារកាំបូឌីយ៉ាណា។

លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ បានបញ្ជាក់នៅក្នុងសិក្ខាសាលានេះថា បើ រដ្ឋាភិបាលមានផែនការគំរាមកំហែង ឬគាបសង្កត់លើអង្គការសង្គមស៊ីវិលនោះ រដ្ឋាភិបាលមិនអនុញ្ញាតឱ្យមានអង្គការក្រៅរដ្ឋាភិបាលប្រមាណ៣០០០ដែលបានចុះបញ្ចីនៅទីស្តីការគណៈរដ្ឋមន្ត្រី និងក្រសួងមហាផ្ទៃនោះទេ ហើយច្បាប់នេះក៏មិនត្រូវបានយកមកពិគ្រោះយោបល់ជាសាធារណៈថ្ងៃនេះដែរ។

«អង្គការក្រៅរដ្ឋាភិបាលបានលើកឡើងថា រដ្ឋាភិបាលមានបំណងដើម្បីគំរាមកំហែង និងគាបសង្កត់ទៅលើសមាគម និងអង្គការក្រៅរដ្ឋាភិបាល។ ជំហររបស់រដ្ឋាភិបាលមិនមានជំហរបែបនេះទេ ហើយសុំជំទាស់ទៅនឹងអ្វីដែលបានលើកឡើងនេះ។ មានមូលហេតុពីរយកមកអះអាងថា រដ្ឋាភិបាលគ្មានការគំរាមកំហែង ឬគ្មានបំណងគំរាមកំហែង»។

លោកឧបនាយករដ្ឋមន្ត្រីស ខេងបានបញ្ជាក់ថា អង្គការក្រៅរដ្ឋាភិបាលជាតិ និងបរទេសនៅក្នុង ប្រទេសកម្ពុជាបានធ្វើសកម្មភាពយ៉ាងសកម្មគ្រប់ផ្នែកលើការអភិវឌ្ឍលើវិស័យសេដ្ឋកិច្ច និងសង្គម កិច្ចព្រមទាំងការកសាង និងការពង្រឹងលទ្ធិប្រជាធិបតេយ្យនិងការតស៊ូមតិដែលរដ្ឋាភិបាលចាត់ទុក ថា ជាសកម្មភាពរួមចំណែកយ៉ាងសំខាន់ដែលមិនអាចខ្វះបានដល់ការអភិវឌ្ឍន៍កម្ពុជា។

លោក ស៊ិន សុមុន្នី ប្រធានអង្គការ Medicam បានបញ្ជាក់ថា អង្គការសង្គមស៊ីវិលមានការព្រួយបារម្ភអំពីភាពមិនច្បាស់លាស់នៃនិយមន័យ ដំណើរការនីតិវិធីចុះបញ្ចី ដើម្បីអនុវត្តសកម្មភាពការងារ និងលក្ខន្តិកៈបង្កើតសមាគម និងអង្គការក្រៅរដ្ឋាភិបាល។

សេចក្តីថ្លែងការណ៍របស់អង្គការក្រៅរដ្ឋាភិបាលបានបញ្ជាក់ថា ខ្លឹមសារនៃសេចក្តីព្រាងច្បាប់បច្ចុប្បន្នរឹតបន្តឹងដល់ការងាររបស់អង្គការក្រៅរដ្ឋាភិបាលទាំងអស់នេះ ពីព្រោះវាបង្កើតជាឧបសគ្គចម្បងនៅក្នុងការចុះបញ្ជី និងការអនុវត្តសកម្មភាពរបស់ពួកគេ។ សេចក្តីថ្លែងការណ៍បានបន្តថា ផលវិបាកដែលកើតចេញពីច្បាប់នេះបានធ្វើឱ្យថយចុះនូវការផ្តល់មូលនិធិសម្រាប់ការអភិវឌ្ឍគម្រោងសំខាន់ៗជាច្រើន ដែលបាននឹងកំពុងអនុវត្តដោយសហការជាមួយរាជរដ្ឋាភិបាលនៅពេលបច្ចុប្បន្ន ហើយកាត់បន្ថយប្រភពមូលនិធិ ដែលគ្រោងនឹងផ្តល់ឱ្យថ្មីទៀតសម្រាប់ការអភិវឌ្ឍរយៈពេលយូរអង្វែងផងដែរ។

សេចក្តីថ្លែងការណ៍បានបន្ថែមថា អង្គការក្រៅរដ្ឋាភិបាលក្នុងស្រុក និងអន្តរជាតិទាំងអស់មានការ ព្រួយបារម្ភយ៉ាងខ្លាំងអំពីផលវិបាក ដែលអាចនឹងកើតមានឡើងនៅពេលដែលច្បាប់នេះត្រូវបានអនុម័ត និងចូលជាធរមាន ប្រសិនបើគ្មានការកែប្រែទេនោះ។

លោក នុត សាអាន រដ្ឋលេខាធិការក្រសួងមហាផ្ទៃ បានថ្លែងថា លោកនឹងទទួលយកអនុសាសន៍ទាំងអស់របស់អង្គការសង្គមស៊ីវិលទៅជូនរដ្ឋមន្ត្រីក្រសួងមហាផ្ទៃ និងក្រសួងការបរទេសដើម្បីពិចារណា និងសម្រេច៕

នាយករដ្ឋមន្ត្រីប្រកាសមិនលូកដៃចូលក្នុងបញ្ហាជនជាតិថៃ៧នាក់

January 11, 2011 at 2:02 AM

ដោយ វោហារ ជាតិ
2011-01-10
វិទ្យុអាស៊ីសេរី

ជាថ្មីម្ដងទៀត លោកនាយករដ្ឋមន្ត្រី ហ៊ុន សែន បានប្រកាសជាសាធារណៈថា លោកមិនលូកដៃចូលក្នុងកិច្ចការផ្ទៃក្នុងរបស់តុលាការកម្ពុជា ក្នុងរឿងក្ដីជនជាតិថៃ ៧នាក់ ដែលកំពុងជាប់ចោទពីបទបានឆ្លងចូលទឹកដីខ្មែរខុសច្បាប់នោះទេ។

ជនជាតិ ថៃ ៣ នាក់ (ឯកសណ្ឋាន អ្នក ទោស) ក្នុង ចំណោម ៧ នាក់ ដើរ ចេញ ពី តុលាការ រាជធានី ភ្នំពេញ នៅ យប់ ថ្ងៃ ទី ៦ ខែ មករា ឆ្នាំ ២០១១ បន្ទាប់ ពី តុលាការ សាកសួរ ជា លើក ទី ២។ (RFA/Mom Sophon)

ថ្លែងនៅក្នុងពិធីចែកសញ្ញាបត្រឲ្យនិស្សិតវិទ្យាស្ថាន វ៉ាន់ដាគណនេយ្យ ក្នុងទីក្រុងភ្នំពេញ នៅថ្ងៃច័ន្ទ ទី១០ ខែមករា លោកនាយករដ្ឋមន្ត្រីបានសុំឲ្យមជ្ឈដ្ឋានជាតិ អន្តរជាតិ រួមទាំងអង្គការសហប្រជាជាតិផង កុំឲ្យលូកដៃធ្វើអន្តរាគមន៍ក្នុងរឿងថៃ ជាប់ទោសនេះ រួមទាំងថ្នាក់ដឹកនាំភាគីរដ្ឋាភិបាលថៃផង។

លោក ហ៊ុន សែន បានថ្លែងទៀតថា ៖ «ហើយបំផុសពាក្យចចាមអារ៉ាមថា ថាក់ស៊ីន ឬបក្សភឿថៃ ចង់ធ្វើអន្តរាគមន៍។ សុំប្រាប់ទៅថា អត់បានទេ! មកពីជ្រុងណាក៏អត់បានដែរ មកពីអង្គការសហប្រជាជាតិក៏អត់បានដែរ ហើយសាលក្រមចូលស្ថាពរហើយ ត្រូវ ២ ភាគ ៣ ជាប់គុកសិន បានពិនិត្យលើកលែងទោសយ៉ាងណានោះ?»។

ការអះអាងនេះ ធ្វើឡើងបន្ទាប់ពីកាសែតថៃ បាងកកប៉ុស្តិ៍ ចុះថ្ងៃទី៨ ខែមករាថា លោក ថាក់ស៊ីន ស៊ីណាវ៉ាត្រ (Thaksin Shinawatra) អតីតនាយករដ្ឋមន្ត្រីថៃ ដែលកំពុងរស់នៅនិរទេសខ្លួននៅបរទេស ហើយដែលធ្លាប់ធ្វើជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា បានស្ម័គ្រចិត្តចូលខ្លួនជួយធ្វើអន្តរាគមន៍ដោះលែងជនជាតិថៃទាំង ៧នាក់ ដែលជាប់ឃុំនៅគុកព្រៃស ក្នុងប្រទេសកម្ពុជានោះ បានរួចទោសវិញ។

ជនជាតិថៃ ៧នាក់ ដែលក្នុងនោះមានអ្នកតំណាងរាស្ត្រថៃ ម្នាក់ផងដែរនោះ ត្រូវបានកងការពារព្រំដែនកម្ពុជា ចាប់ខ្លួននៅថ្ងៃទី២៩ ខែធ្នូ ឆ្នាំ២០១០ កន្លងទៅ បន្ទាប់ពីបានឆ្លងចូលក្នុងដែនដីខ្មែរ នៅក្នុងភូមិសាស្ត្រខេត្តបន្ទាយមានជ័យ។

លោកនាយករដ្ឋមន្ត្រី ហ៊ុន សែន បានបង្ហើបថា នៅយប់ថ្ងៃចាប់ខ្លួនជនជាតិថៃទាំង ៧នាក់នោះ ក្នុងទូរស័ព្ទដៃរបស់លោកមានលេខហៅចូលពីក្រៅប្រទេស ១០លើក តែលោកខកខានមិនបានទទួល ដោយសារតែលោកមិនបានដឹង ព្រោះទូរស័ព្ទមិនដាក់សំឡេងរោទ៍ ក៏ប៉ុន្តែលោកមិនបានបញ្ជាក់ឈ្មោះអ្នកដែលហៅចូលនោះទេ។ លោកក៏បានសម្ដែងការភ្ញាក់ផ្អើលផងដែរថា ហេតុអ្វីបានជាក្នុងចំណោមជនជាតិថៃ ដែលត្រូវបានចាប់ខ្លួននោះ មានលេខទូរស័ព្ទដៃរបស់លោកជាប់នឹងខ្លួន?

យ៉ាងណាក្ដី លោកនាយករដ្ឋមន្ត្រីបានបញ្ជាក់ថា លេខទូរស័ព្ទដៃរបស់លោកបានផ្តល់ឲ្យមន្ត្រីថៃម្នាក់ ដែលលោកមិនបានបញ្ចេញឈ្មោះ កាលពីឆ្នាំទៅមិញ ដើម្បីសន្ទនាគ្នាពីរឿងសង់ផ្លូវក្បែរព្រំដែនខ្មែរ-ថៃ ៖ «ដូចបង្កប់យ៉ាងម៉េច ផ្គត់ផ្គង់អីយ៉ាងម៉េច សរសេរដោយពិរុទ្ធជនម្នាក់នៅមន្ទីរព្រៃស ហើយសរសេរផ្ញើចេញក្រៅលេខទូរស័ព្ទខ្ញុំសុទ្ធ។ ងាប់តែម្ដង! អ៊ីចឹងមានន័យថា ការចូលមកនេះមានការរៀបចំដោយច្បាស់ ឲ្យទាំងលេខរបស់ ហ៊ុន សែន មកជាមួយ ហើយលេខទូរស័ព្ទហ្នឹងត្រូវបានប្ដូរគ្នាតាំងពីខែធ្នូ ឆ្នាំ២០០៩ ទាក់ទងអារឿងផ្លូវលេខ៦៨ អ៊ីចឹង! រឿងនេះអត់ធម្មតាប៉ុន្មាន»។

ស្របពេលដែលលោកនាយករដ្ឋមន្ត្រីប្រកាសដូច្នេះ ជនជាតិថៃមួយក្រុម ដែលគេហៅថា បណ្ដាញអ្នកស្នេហាជាតិថៃ កំពុងស្វះស្វែងរកវិធីច្បាប់ដើម្បីសុំដោះលែងជនជាប់ចោទថៃ ទាំងនោះឲ្យនៅក្រៅឃុំ។

លោក ខារួន សៃង៉ាំ (Karoon, Sai-ngam) អតីព្រឹទ្ធសភាថៃ និងបច្ចុប្បន្នជាអ្នកច្បាប់ថៃ បានថ្លែងប្រាប់អ្នកកាសែតខ្មែរនៅមុខតុលាការក្រុងភ្នំពេញ នៅព្រឹកថ្ងៃទី១០ ខែមករាថា ការប្រឹងប្រែងរបស់ក្រុមលោកនៅថ្ងៃដំបូងនេះ មិនបានលទ្ធផលអ្វីទេ។

លោក ខារួន សៃង៉ាំ បញ្ជាក់ជាភាសាខ្មែរថា ៖ «ឥឡូវនេះឡើងតុលាការហើយ។ ពួកខ្ញុំមកនេះអាចជួយអ្វីបានខ្លះ ធ្វើយ៉ាងណាធ្វើឲ្យបងប្អូនបានហក់(ទៅ)ប្រទេសថៃដោយសុវត្ថិភាព»។

តុលាការកម្ពុជា បានបញ្ចប់ការសាកសួរជនជាប់ចោទទាំង ៧នាក់ ហើយបានចោទថា ពួកគេបានបំពានចូលដែនដីកម្ពុជា ខុសច្បាប់ និងបានចូលមូលដ្ឋានយោធាខ្មែរដោយមិនមានការអនុញ្ញាត ដែលផ្អែកលើច្បាប់ព្រហ្មទណ្ឌកម្ពុជា ពួកគេត្រូវជាប់គុកពី ៦ខែ ទៅ ១ឆ្នាំ និងពិន័យប្រាក់ចាប់ពី ២លានរៀល ដល់ ៤លានរៀល ប្រសិនបើតុលាការរកឃើញកំហុសឆ្គងរបស់ពួកគេដូចការចោទប្រកាន់ពិតមែន។

លោក កែ សាខន អនុប្រធានតុលាការក្រុងភ្នំពេញ មានប្រសាសន៍ថា ជនជាតិថៃ ៧នាក់នោះ បានសារភាពថា ពួកគេបានចូលដីខ្មែរខុសច្បាប់មែន។ លោកបន្តថា តុលាការក្រុងភ្នំពេញ នៅមិនទាន់បានកំណត់ថ្ងៃសវនាការជនជាតិថៃទាំង ៧នាក់នោះនៅឡើយទេ ហើយចៅក្រមកំពុងដំណើរការស៊ើបអង្កេតរឿងនេះបន្ថែមទៀត៕

លោក ហ៊ុន សែន មិនទទួលការស្នើអន្តរាគមន៍សម្រាប់ជនជាតិថៃទាំង៧នាក់ឡើយ

January 11, 2011 at 1:56 AM

ដោយ លាង ដឺលុច
ថ្ងៃ ចន្ទ 10 មករា 2011
RFI

សំណុំរឿងជនជាតិថៃទាំង៧នាក់ដែលអាជ្ញាធរកម្ពុជាកំពុងឃុំ ខ្លួននោះ នៅតែជាព័ត៌មានក្តៅគគុកសំរាប់កម្ពុជា និងថៃ។ មេធាវីរបស់ជនជាប់ចោទទាំង៧នាក់នោះ បានដាក់លិខិតទៅតុលាការរាជធានីភ្នំពេញដើម្បីស្នើសុំធានាកូនក្តី របស់ពួកគេអោយនៅក្រៅឃុំបណ្តោះអាសន្នហើយ។ នេះជាការសុំធានាតាមផ្លូវច្បាប់។ ប៉ុន្តែ ប្រសិនបើមានការស្នើអន្តរាគមពីភាគីថៃនោះ លោកនាយករដ្ឋមន្ត្រីហ៊ុន សែនបានចេញមុខប្រកាសសាជាថ្មីរួចហើយនៅព្រឹកថ្ងៃចន្ទនេះ ច្រានចោលរាល់បំណងស្នើអន្តរាគមន៍នានា ក្នុងការធានាជនជាតិថៃទាំង៧នាក់នៅក្រៅឃុំ។

លោក ហ៊ុន សែន នាយករដ្ឋមន្ត្រីកម្ពុជា (© សុវណ្ណារ៉ា)

កាលពីរសៀលថ្ងៃចន្ទទី១០មករានេះ មេធាវីជនជាតិថៃទាំង៧នាក់ បានដាក់លិខិតទៅតុលាការរាជធានីភ្នំពេញ ដើម្បីស្នើសុំតុលាការដោះលែងកូនក្តីរបស់ពួកគេអោយនៅក្រៅឃុំបណ្តោះអាសន្ន។ មេធាវីមួយរូបក្នុងចំណោមមេធាវី២រូបរបស់ជនជាតិថៃគឺលោក ពេជ្រ វិច្ឆិកាបានបញ្ជាក់អោយដឹងថា តាមនីតិវិធី ចៅក្រមនឹងត្រូវឆ្លើយតបពាក្យស្នើសុំនេះក្នុងរង្វង់រយៈពេល៥ថ្ងៃ។

ការស្នើសុំរបស់មេធាវីរបស់ជនជាប់ចោទជនជាតិថៃទាំង៧នាក់ ធ្វើឡើងចំពេលដែលកាសែតថៃបានផ្សព្វផ្សាយផងដែរថា ប្រមុខការទូតថៃ លោកកាស៊ីត ភិរម្យកំពុងរៀបចំឯកសារដើម្បីស្នើអន្តរាគមន៍ អោយមានការដោះលែងជនជាតិថៃទាំង៧នាក់អោយនៅក្រៅឃុំ។ កាលពីព្រឹកថ្ងៃចន្ទនេះដែរ មានវត្តមានក្រុមអាវលឿង៣នាក់ និងអ្នកកាសែតថៃផងបានព្យាយាមចូលជួបមន្ត្រីតុលាការខ្មែរដើម្បីស្វែងរកដោះលែងជនជាតិថៃអោយនៅក្រៅឃុំ។

មិនទាន់ដឹងថា តុលាការរាជធានីភ្នំពេញសម្រេចយ៉ាងណាចំពោះការស្នើរបស់មេធាវីនៅឡើយទេ។ ប៉ុន្តែ នៅក្នុងបំណងស្វែងរកការដោះលែងជនជាតិថៃទាំង៧នាក់នេះដដែលបើទោះជានឹងអាចមានអន្តរាគមន៍ពីភាគីថៃ ពីខាងរដ្ឋាភិបាលថៃ និងពីខាងភាគីថៃដែលគាំទ្រលោកថាក់ស៊ីន ស៊ីណាវ៉ាត់ មករដ្ឋាភិបាលកម្ពុជាក៏ដោយនោះ សំណើនេះនឹងមិនទទួលបានផលល្អឡើយ។ ប្រមុខរដ្ឋាភិបាលកម្ពុជាលោកហ៊ុន សែនបានចេញមុខប្រកាសជាថ្មីម្តងទៀតកាលពីព្រឹកមិញនេះ ប្រកាសច្រានចោលរាល់សំណើអន្តរាគមន៍ទាំងឡាយ ទោះមកពីទិសណាក៏ដោយ។ ហេតុផលគឺមានតែមួយ សម្រាប់លោកនាយករដ្ឋមន្ត្រីហ៊ុន សែន។ ពោលគឺរដ្ឋាភិបាលមិនអាចលូកដៃចូលក្នុងឯករាជ្ភាពរបស់តុលាការបានឡើយ។

នៅឯព្រំដែនប្រាសាទព្រះវិហារឯណោះវិញ ភាគីទាហានថៃនៅតែមានបំណងចង់បញ្ជូនទាហានរបស់ខ្លួនអោយចូលមកឈរជើងនៅក្នុងវត្តកែវសិក្ខាគិរីស្វារៈវិញ។ នៅក្នុងន័យបដិសេធបំណងរបស់ទាហានថៃយ៉ាងនេះ លោកឧត្តមសេនីយទោ ស្រី ឌឹកមេបញ្ជាការកងពលធំអន្តរាគមន៍លេខ៣ ប្រចាំការទិសប្រាសាទព្រះវិហារបានថ្លែងប្រាប់វិទ្យុបារាំងអន្តរជាតិនៅថ្ងៃចន្ទនេះថា អ្វីៗមិនអាចវិលត្រឡប់ទៅក្រោយវិញបានឡើយ៕

ក្បួនហាត់ប្រាណ ៨ យ៉ាង ជួយបង្កើន គុណភាព ជីវិតផ្លូវភេទ

January 11, 2011 at 1:46 AM

សរសេរដោយ ភ្នំពេញដេលីញូវ
ច័ន្ទ, 10 មករា 2011

ប្រសិនបើអាច ធ្វើឱ្យរាងកាយ មានភាព ស្វិតស្វាញ បង្កើននូវភាព អំណត់ និង ហ្វឹកហាត់ ប្រជុំសាច់ដុំ ឱ្យបានរឹងមាំនោះ គឺពិតជាមាន អំណោយផលល្អ ដល់ជីវិតផ្លូវភេទ ជាក់ជាមិនខាន ។ ខាងក្រោមនេះ គឺជាក្បួន ហាត់ប្រាណ ៨ យ៉ាង ដើម្បីជួយ បង្កើនគុណភាព ជីវិតផ្លូវភេទ ៖

ក្បួនហាត់ប្រាណ ផ្នែកដងខ្លួនខាងលើ

កាលបើអវយវៈ ផ្នែកខាងលើ កាន់តែមាន កម្លាំងមាំមួន រយៈពេលនៃ ការរួមភេទ ក៏អាចបន្ត បានកាន់តែយូរ ហើយអារម្មណ៍ សប្បាយរីករាយ ក៏កាន់តែ ពុះកញ្ជ្រោល ផងដែរ ។

១- ធ្វើចលនា ងើបចុះងើបឡើង
ត្រូវដេកផ្កាប់មុខ ដោយសណ្តូក ជើងឱ្យត្រង់ ដោយចុងជើង ដាក់គងនៅពីលើ បាល់មូលមួយ និង ច្រត់បាតដៃទាំង ២ លើកម្រាល បន្ទាប់មកត្រូវធ្វើ ចលនាងើបចុះ ងើបឡើង ដែលគេនិយម ហៅថា ចលនា "អាវ៉ង់" ។ ចលនានេះគឺជា លំហាត់ប្រាណ ផ្នែកស្មា និង ទ្រូង ជាពិសេស វាស័ក្តិសមទៅនឹង បុរសដែលនិយម ចូលចិត្តប្រើក្បាច់ ប្រុសនៅលើ ។ នៅពេលដែល សង្កេតឃើញថា ដៃទាំងគូ ហាក់ដូចជា ថមថយកម្លាំងបន្តិច ទៅហើយនោះ អាចឈប់សម្រាក បន្តិចដោយរក្សា ឥរិយាបថ ដូចដើម ដដែល ហើយរង់ចាំពេល មានកម្លាំង ឡើងវិញ ទើបធ្វើចលនា ងើបចុះងើបឡើង សាជាថ្មី ។

២-ធ្វើចលនាដេកផ្ងារ ដោយចំកោង ក្បាលជង្គង់មកមុខ
ត្រូវដេកផ្ងារ ដោយចំកោង ក្បាលជង្គង់ មកមុខ ប្រើដៃទាំង ២ ដាក់ត្រង់ គន្លាក់ជង្គង់បត់ និង ប្រឹង ទាញជង្គង់ ឱ្យមកប៉ះត្រង់ ដើមទ្រូង ជាច្រើនលើក ច្រើនសា ហើយមួយលើកៗ ត្រូវរក្សាឱ្យបាន ៣០ វិនាទី ។ ការធ្វើ ចលនាបែបនេះ កាន់តែច្រើនដង គឺកាន់តែល្អ ។

៣- ចលនា អង្គុយលុតជង្គង់ ទម្រេតដងខ្លួន មកក្រោយ
នៅក្នុងជីវិតផ្លូវភេទ បុរសពេលខ្លះ អាចប្រើ ក្បាច់លុតជង្គង់ និង នៅពេលដែល ភាគីខាងស្រី ដេកផ្ងារដោយ បង្ហើបត្រគាក ឡើងលើ ។ ដូច្នេះខាង បុរសគឺពិតជា ត្រូវការប្រើថាមពល ចេញពីចំណុចផ្នែក ខាងក្រោម នៃឆ្អឹងខ្នង និង សាច់ដុំភ្លៅ ។

ដើម្បីបង្កើន ថាមពលនេះ ឱ្យកាន់តែខ្លាំង គឺអាចលុតជង្គង់ នៅពីលើកម្រាលទន់ ដោយបញ្ឈរដងខ្លួន ត្រង់ទៅលើ និង ប្រឹងទម្រេតខ្លួន មកក្រោយ ។ ចលនាបែបនេះ ត្រូវរក្សាឱ្យបានពី ២ ទៅ ៣ វិនាទី ដោយធ្វើ សាចុះសាឡើង ឱ្យបានច្រើនលើកច្រើន សាទៀតផង ។

៤- ចលនាបន្ទន់ជើង ទៅមុខ និង ចុចចុះក្រោម
ពេលខ្លះ លោកប្តីអាច ឈរនៅគែមគ្រែ ដើម្បីប្រើក្បាច់ ប្រយុទ្ធជាមួយ នឹងប្រពន្ធ ។ ការហ្វឹកហាត់ ចលនាមួយនេះ គឺអាចបង្កើនជីវិត ផ្លូវភេទឱ្យកាន់តែ ពុះកញ្ជ្រោលខ្លាំងឡើង ។ ដំបូងត្រូវបោះ ជំហានជើងឆ្វេង ទៅមុខដោយ បន្ទន់ក្បាលជង្គង់ និង ចុចចុះក្រោម រហូតទាល់តែ សាច់ដុំភ្លៅ ផ្នែកខាងក្រោយ លាតត្រង់ ។ ក្រោយពីរក្សា ចលនានេះបាន ៣០ វិនាទី ត្រូវផ្លាស់ពីជើងម្ខាង ទៅជើងម្ខាងទៀត ។

ក្បួនលំហាត់ប្រាណ ដើម្បីបង្កើន ភាពអំណត់

បង្កើនថាមពល សាច់ដុំពេញទាំង រាងកាយ ឱ្យកាន់តែមាំមួន ដើម្បីអូសបន្លាយ ពេលវេលា នៃការរួមភេទ កាន់តែយូរ ។

៥- ចលនាដេកផ្ងារ បង្ហើបកំប៉េះគូទ
ចំពោះបុរស ដែលនិយមចូលចិត្ត ប្រើក្បាច់ស្រីលើ ប្រុសក្រោម គឺត្រូវហ្វឹកហាត់ លំហាត់ប្រាណ ឱ្យបានច្រើន ។
ដំបូងត្រូវដេកផ្ងារ ដោយបញ្ឈរ ក្បាលជង្គង់ ទាំង គូ និង ប្រឹងបង្ហើបគូទ ឱ្យផុតពីកម្រាល និង ប្រឹងបង្រួញសាច់ដុំពោះ គឺធ្វើយ៉ាងណា រក្សាដងខ្លួនឱ្យ ស្ថិតក្នុងបន្ទាត់ខ្សែត្រង់ ។

៦- ចលនាដេកផ្កាប់មុខ និង រុលទៅមុខ
វាត្រូវទៅនឹង បុរសដែលចូលចិត្ត ស្នៀតប្រយុទ្ធ ប្រុសនៅពីលើ ។ កន្ធែកដើមដៃ និង ស្មា ហើយបាតដៃ ទាំងគូច្រត់លើកម្រាល ដោយធ្វើចលនា កម្រើកដងខ្លួន និង រុលទៅមុខយឺតៗ ប្រៀបដូចជា សត្វក្រពើវារ នៅលើគោក ។

៧- ចលនាដេកផ្ងារ និង លូកដៃទាញ ជើងម្ខាង
ការឧស្សាហ៍ ហ្វឹកហាត់ក្បួន លំហាត់នេះ គឺអាចកែសម្រួល ចរន្តឈាមរត់ នៃសាច់ដុំត្រគាក និង មានភាពរឹងមាំ ហើយអាចទប់ទល់ ស្នៀតប្រយុទ្ធ គ្រប់បែបយ៉ាង ។

ដំបូងត្រូវដេកផ្ងារ បញ្ឈរជង្គង់ ដោយប្រើដៃឆ្វេង ប្រឹងទាញជើងស្តាំ ទាល់តែក្បាលជង្គង់ មកនៅកៀកនឹង ដើមទ្រូង ។ ចលនាបែបនេះ គឺត្រូវផ្លាស់ប្តូរ ពីម្ខាងទៅម្ខាងទៀត ។

៨- ចលនាជើងម្ខាង ធាក់ថយក្រោយ
បាតដៃទាំងគូ និង ក្បាលជង្គង់ទាំងគូ ផ្អឹបជាប់ នឹងកម្រាល សណ្តូកជើងស្តាំ ត្រង់មកក្រោយ និង បង្ហើបឡើង ហើយធ្វើចលនា ងាកឆ្វេងងាកស្តាំ ដោយម្ខាងៗឱ្យបាន ៥ ដង ទើបដាក់ជើងចុះ ដោយថ្នមៗ និង ផ្លាស់ពីជើងស្តាំ មកជើងឆ្វេងម្តង ៕

ផលិតផលល្អឯក ទាំង៨ ក្នុងពីព័ណ៏ ឆ្នាំ ២០១១

January 11, 2011 at 1:30 AM

សរសេរដោយ ភ្នំពេញដេលីញូវ
ច័ន្ទ, 10 មករា 2011

កុំព្យូទ័រ tablet ប្រភេទ Motorola Xoom ត្រូវបាន ជ្រើសរើសជា ផលិតផល លេចធ្លោបំផុត ដែលនេះធ្វើឧ្យ វាបានឈរ លំដាប់ខ្ពស់ជាង ផលិតផលដទៃ នៅក្នុងពិព័រណ៏ CES 2011 ។
Tablet ជាច្រើនប្រភេទ រាប់មិនអស់ ដែលមាននៅក្នុង ពិធីតាំងពិព័ណ៍ អ៊ិឡិចត្រូនិក ទើបបានបញ្ចប់ នៅឯ Las Vegas (អាមេរិក) កាលពីម្សិលមិញ ដែលរួមមាន ដូចជា BlackBerry PlayBook, Toshiba Android Tablet និង Samsung Sliding PC…។
Motorola Xoom គឺជាផលិតផល សម្បូរដោយ មុខងារ ចាំបាច់ជាច្រើន ជាមួយនិងគ្រឹះ Android 3.0 Honeycomb ដែលជា hardware ផ្តល់នូវតម្រូវការ របស់អ្នកប្រើប្រាស់ រួមមាន chip ប្រភេទគុណ ពីរតណរភ្ជាប់ 4G រន្ធ HDMI និង camera ផ្នែកខាងមុខ និងក្រោយ ព្រមទាំងអេក្រង់ ១០អ៊ិញ ទាំងនេះបាន បង្ហាញថាវាអាច ត្រូវបានគេយក មកប្រៀបធៀប ជាមួយ Apple iPad ។
ក្រុមអ្នកបច្ចេកវិទ្យា សង្ឃឹមថាកុំព្យូទ័រ tablet នេះ នឹងមិនក្លាយជា "គ្រាប់បែក" នោះទេ ខណះពេលដែល វាត្រូវបានបញ្ចេញ ពីរោងចក្រនា ត្រីមាសទីមួយ ដូចជា Palm Pre (ដែលជា ផលិតផលល្អឯក ក្នុង CES 2009) ដែលត្រូវបាន ជ្រើសរើស ដោយ CNet អ្នកជ្រើសរើស ផលិតផល សម្រាប់ CES ។

Xoom អេក្រង់1.280 x 800 pixel, chip Nvidia Tegra 2, RAM 1 GB, camera 5 megapixel ថត video HD, អង្គចងចាំ 32 GB, មាន Wi-Fi, Bluetooth និង ថ្មអាចថត video បាន ១០ម៉ោង ជាប់ៗគ្នា ។

Razer Switchblade ជាគំរូ netbook concept, ដែលប្រើប្រាស់ chip Atom ជាមួយនិងអេក្រង់ touchcrean និងក្តារចុច ដែលអាចបញ្ជា game កំពុងលេងបាន ។ Razer អះអាងថា នេះគឺជា ផលិតផលមួយ នឹងផ្លាស់ប្តូរ ការលេង game នា ពេលអនាគត ។

ការប្រកាសដ៏គួរ ចាប់អារម្មណ៍មួយ នៅឯ CES នោះដែរគឺ Sony មានបំពាក់ ម៉ាស៊ីនបញ្ចាំង ទៅក្នុងសេរី camcorder Handycam HDR-PJ (700-1.000 USD ដែលបានបញ្ចេញ ពីឃ្លាំងកាលពី ខែមិនា) ដែលអនុញ្ញតិមើល video បន្តផ្ទាល់ជាមួយ នឹងទំហំ ៦០អ៊ិញ ជំនួសអេក្រង់ LCD ដ៏តូច នៅលើម៉ាស៊ីន ។

ឧបករណ៍កំសាន្ត ក្នុងគ្រួសារល្អឯក៖ ក្បាល Blu-ray ត្រូវបានគេផលិត ទៅជាតូច ពីមួយជំនាន់ ទៅមួយជំនាន់ ប៉ុន្តែ Samsung នៅតែអាចធ្វើឧ្យ មានការភ្ញាក់ផ្អើល ខណះរចនា BD-D7000 ស្រដៀងនឹងក្បាល DVD ភ្ជាប់ពីខាងក្រៅ រួមជាមួយ ក្តារ ចុចបញ្ជា touchcreen និងមានភ្ជាប់ Wi-Fi និង 3D ។

បច្ចេកវិទ្យា កុំព្យូទ័រល្អឯក៖ Sandy Bridge សេរី chip Core i របស់ Intel ត្រូវបាន ផលិតឡើង តាមរបៀប 32 nm ដែលវាមាន ល្បឿនលឿនជាង និងស៊ីភ្លើងតិច ព្រមទាំង Graphic ទាន់សម័យ ដោយមាន CPU និង GPU ស្ថិតក្នុង die តែមួយ (single-die) ។ ប្រភេទ laptop ជាច្រើនដែល ប្រើប្រាស់ chip នេះ ត្រូវបានប្រកាស ឧ្យដិងរួចហើយ ។

គំរូ prototype ល្អឯក៖ Laptop Toshiba Qosmio ជួយឧ្យអ្នក ប្រើប្រាស់អាច ស្រមៃឃើញ ការមើល 3D ដែលមិនត្រូវការ វែនតា វានឹងអស្ចារ្យ យ៉ាងណា បើទោះជាគុណភាព នៃរូបភាពមិនទាន់ បានល្អឥតខ្ជោះ ។

Smartphone ល្អឯក៖ Motorola Atrix 4G គឺជា smartphone មួយ ដែលល្អបំផុត លើពិភពលោក ជាមួយនឹង chip Nvidia Tegra 2 ប្រភេទទ្វេគុណ 1 GHz, RAM 1 GB និង ថ្ម “អស្ចារ្យ” 1.930 mAh ។ Atrix មានអេក្រង់ touchsceen 4 inch qHD 24-bit និងអង្គចងចាំ NAND Flash 16 GB, Android 2.2, camera 5 megapixel ថត video HD និង camera VGA ខាងមុខ ព្រមទាំងមាន ប្រព័ន្ធថត ក្រយៅដៃ និងប្រើប្រាស់ microphone ចំនួនពីរ ដើម្បីកាត់បន្ថយ សម្លេងរំខាន ហើយវា ក៏មាន Wi-Fi លំដាប់ N ផងដែរ ។

ផលិតផលនេះ នឹងត្រូវបានលក់ ក្នុងត្រីមាសទីមួយ ។

TV ល្អឯក៖ Vizio XVT3D6SP ត្រូវបានបំពាក់ ដោយគ្រឹះ Internet Google TV ជាមួយនឹងទំហំ 47 និង 55 inch, ភ្លើង LED ព្រមទាំងមាន ល្បឿនបង្ហាញរូ បភាព 480 Hz និងមានជំនួយ 3D ផងដែរ ៕

យន្តហោះអ៊ីរ៉ង់ធ្លាក់ ស្លាប់ ៧១ នាក់

January 11, 2011 at 12:59 AM

សរសេរដោយ ភ្នំពេញដេលីញូវ
ច័ន្ទ, 10 មករា 2011

យ៉ាងហោចណាស់ ៧១ នាក់ស្លាប់ ហើយរងរបួស ៣៥ នាក់ នៅក្នុងពេលដែល យន្តហោះ ប៊ូអ៊ីង ៧២៧ ១ គ្រឿង របស់អ៊ីរ៉ង់ ធ្លាក់ទៅក្នុងទឹកដី ដោយសារតែ អាកាសធាតុ ។ នៅលើយន្តហោះ មានមនុស្ស អ្នកដំណើរ ៩៤ នាក់ និង ក្រុមបើកបរ ១២ នាក់ ។ យន្តហោះ ហោះពីទីក្រុង តេអេរ៉ង់ ទៅទីក្រុង Urumiyeh ។ យន្តហោះធ្លាក់ នៅពេលចុះចត នៅទីក្រុង Urumiyeh ។

Cambodia Gets First Commercial Cow Farm

January 11, 2011 at 12:52 AM

BY Jenara Nerenberg
Jan 10, 2011
www.fastcompany.com

The country’s current supply of fresh milk is entirely imported, but that is about to change with the introduction of New Zealand’s Holstein cows.

Cambodia is set to get its first commercial cow farm this year with construction on a 247-acre farm breaking ground this month.

Cambodia’s current supply of fresh milk is 100% imported and the cow farm is meant to change that–and as Cambodia is still largely agricultural, it’s surprising that commercial cow farms don’t already exist.

There was talk of an earlier joint cow farm venture between Cambodia’s Mong Reththy Group (MRG) and the British farming company, Lordswood Farms, last year, but it’s not clear if that panned out.

Either way, Cambodia is taking a leap in agricultural innovations this year and the farm that’s set to open is a joint venture between the Cambodian 7NG Group and Sweden's HPT Dairy Company. They entered into a $250 million deal whereby the highly productive Holstein cow breed will be imported from New Zealand with a goal of producing about 317,000 gallons of milk in the first year of operation. The farm is set to begin operating in November of 2011.

"This is the first time in history that our country will produce fresh cows' milk," said Srey Chanthou, managing director of 7NG Group. "We hope it will be successful, and that we can expand our business further."

Cambodia is looking to expand its agricultural productivity in other ways–late last year the firm Angkor Kasekam Roongroeung announced plans to operate its first rice-husk-powered generator to, you guessed it, mill rice.

Follow me, Jenara Nerenberg, on Twitter.

ក្រសួងមានផែនការផលិតប្រហុកឲ្យបាន៥ទៅ៦ម៉ឺនតោននៅឆ្នាំ២០១១

January 10, 2011 at 2:58 PM

ដោយ សុខ សេរី
2011-01-10
វិទ្យុអាស៊ីសេរី

ទោះបីជាស្ថានការណ៍ទឹកទន្លេសាប និងទន្លេមេគង្គនៅឆ្នាំ២០១០ កន្លងមកនេះ មានកម្ពស់ទឹកទាបជាងឆ្នាំ២០០៩ កន្លងទៅរវាង ១ម៉ែត្រ ទៅ ២ម៉ែត្រ ធ្វើបរិមាណផលត្រីថយចុះក៏ដោយ ក៏រដ្ឋបាលជលផលនៃក្រសួងកសិកម្ម នៅតែមានផែនការផលិតប្រហុកឲ្យបានច្រើនជាងឆ្នាំ២០០៩ កន្លងទៅ។

ស្ត្រី អ្នក ភូមិ ច្រាំងចំរេះ ក្នុង ខណ្ឌ ឫស្សីកែវ រាជធានី ភ្នំពេញ ប្រមូល ត្រី សម្រាប់ ធ្វើ ប្រហុក កាល ពី ថ្ងៃ ទី ២២ ខែ ១២ ឆ្នាំ ២០១០។ (RFA/Ouk Savborey)

មន្ត្រីជាន់ខ្ពស់រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទកម្ពុជា បានឲ្យដឹងថា រដ្ឋបាលជលផលមានផែនការផលិតប្រហុកឲ្យបានចំនួនរវាង ៥ម៉ឺនតោន ទៅ ៦ម៉ឺនតោនសម្រាប់ឆ្នាំ២០១១ ក្រោយពីបានប្រមូលផលត្រីសរុបនៅឆ្នាំ២០១០ កន្លងទៅនេះ។

មន្ត្រីជាន់ខ្ពស់នៃរដ្ឋបាលជលផល បានឲ្យដឹងថា ការបង្កើនបរិមាណផលិតប្រហុកបែបនេះ គឺដោយសារតែប្រជាពលរដ្ឋមានកំណើនច្រើន និងមានសេចក្ដីត្រូវការច្រើនជាងឆ្នាំមុនៗ។ កាលពីឆ្នាំ២០០៩ កន្លងទៅ កម្ពុជាបានផលិតប្រហុកបានចំនួន ៥ម៉ឺនតោន ដើម្បីផ្គត់ផ្គង់តាមសេចក្ដីត្រូវការរបស់ប្រជាពលរដ្ឋ។

ប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទកម្ពុជា លោក ណៅ ធួក បានមានប្រសាសន៍ប្រាប់វិទ្យុអាស៊ីសេរីថា មានសហគមន៍ប្រជាពលរដ្ឋចិញ្ចឹមត្រីទឹកសាបចំនួន ៦៥០សហគមន៍ នៅក្នុងប្រទេសកម្ពុជា ដើម្បីបង្កើនទិន្នផលត្រី។

លោក ណៅ ធួក មានប្រសាសន៍ទៀតថា ៖ «ដោយសារតែយើងបានបង្រ្កាបបទល្មើសនេសាទបានច្រើន ឃើញថា ត្រីនៅច្រើនណាស់ នៅក្នុងបឹងទន្លេសាប គ្រាន់តែថា វាមិនចុះមក ដោយសារតែធាតុអាកាសមិនល្អ។ រដូវនេះមិនភ័យនឹងខ្វះប្រហុកទេ ហើយសូមអញ្ជើញមកធ្វើប្រហុកហ្នឹង។ បើមេឃល្អ បើធាតុអាកាសល្អ សូមអញ្ជើញមកធ្វើប្រហុកក្នុង២ ឬ ៣ថ្ងៃទៀត។ អាចថា ក្នុងម្ដុំថ្ងៃទី១១ ខែមករា ទៅ។ ត្រីហ្នឹងអាចនឹងត្រូវច្រើន ចាប់ពីថ្ងៃទី១១ ១២ ១៣ ១៤ ខែមករា»។

របាយការណ៍បូកសរុបនៅឆ្នាំ២០១០ កន្លងមកនេះ បានឲ្យដឹងថា កម្ពុជាប្រមូលបានផលត្រីទឹកសាបសរុបចំនួន ៤៥០ពាន់តោន កើនលើសឆ្នាំ២០០៩ កន្លងទៅ ដែលមានចំនួន ៣៩៥ពាន់តោន ដោយសារតែរដ្ឋបាលជលផល បានបំផុសឲ្យប្រជាពលរដ្ឋឲ្យបង្កើតស្រះចិញ្ចឹមត្រីបានចំនួនជាង ៦ម៉ឺនស្រះ តាំងពីខែកក្កដា ឆ្នាំ២០០៩មក ដើម្បីកុំឲ្យប្រជាពលរដ្ឋពឹងផ្អែកខ្លាំងពេកលើត្រីក្នុងបឹងធម្មជាតិ ដូចជាបឹងទន្លេសាប និងទន្លេមេគង្គ។

ប្រធានស្ដីទីនៃសម្ព័ន្ធភាពដើម្បីអភិរក្សធនធានជលផល នៅក្នុងប្រទេសកម្ពុជា លោក ឱម សាវ៉ាត បានមានប្រសាសន៍ថា លោកនៅមិនទាន់ឯកភាពទាំងស្រុងលើការគ្រោងទុកនេះបានទេ ដោយសារតែភាពជាក់ស្ដែង ផលត្រីទឹបសាបកំពុងតែខ្សត់ជាងឆ្នាំមុនៗ ៖ «ឆ្នាំនេះដោយសារមានយុទ្ធនាការបង្ក្រាបបទល្មើសនេសាទច្រើន ហើយត្រីមានមួយចំនួនដែរ ក៏ប៉ុន្តែយើងមិនរំពឹងថា មានច្រើនរហូតទៅដល់ដូចការប៉ាន់ប្រមាណទុករបស់នាយកដ្ឋានជលផល»។

របាយការណ៍ប្រចាំឆ្នាំ២០១០ កន្លងមកនេះ បានបង្ហាញថា អាជ្ញាធររដ្ឋបាលជលផលបានបង្រ្កាបបទល្មើសនេសាទបានចំនួនជាង ៦.៦០០ករណី ច្រើនជាងឆ្នាំ២០០៩ កន្លងទៅ ហើយយុទ្ធនាការបង្ក្រាបបទល្មើសនេសាទកំពុងតែបន្តនៅទ្បើយ។

កាលពីថ្ងៃទី៧ ខែធ្នូ ឆ្នាំ២០១០ កន្លងទៅ តំណាងសហគមន៍អ្នកនេសាទចំនួនជាង ៥០០នាក់ បានមកជួបប្រជុំគ្នានៅក្នុងទីក្រុងភ្នំពេញ ជាមួយនឹងមន្ត្រីជាន់ខ្ពស់រដ្ឋបាលជលផល បានឯកភាពគ្នាទប់ស្កាត់ និងបង្ក្រាបបទល្មើសនេសាទនានា នៅឆ្នាំក្រោយៗទៀត ដើម្បីរក្សាផលត្រីទឹកសាប និងទឹកប្រៃ ឲ្យបានច្រើន នៅគ្រាដែលកម្ពស់ទឹកទន្លេសាប និងទន្លេមេគង្គ មានកម្រិតទាបជាងឆ្នាំមុនៗរវាង ១ម៉ែត្រ ទៅ ២ម៉ែត្រ ដែលធ្វើឲ្យត្រីមិនអាចពងកូនបានច្រើន។

សេចក្ដីរាយការណ៍ និងការសិក្សាស្រាវជ្រាវបានឲ្យដឹងថា សកម្មជនការពារបរិស្ថានបានបន្ទោសថា កម្ពស់ទឹកទន្លេមេគង្គទាប គឺបណ្ដាលមកពីប្រទេសចិន បានសាងសង់ទំនប់ទឹកវារីអគ្គិសនីជាង ១០កន្លែង នៅភាគខាងលើនៃទន្លេមេគង្គ ប៉ុន្តែមន្ត្រីរដ្ឋាភិបាលកម្ពុជា បានបន្ទោសថា គឺបណ្ដាលមកពីការប្រែប្រួលអាកាសធាតុសាកល៕

ថ្ងៃតវ៉ាចុងក្រោយរបស់អ្នកភូមិបឹងកក់នៅទីលានសេរីភាព

January 10, 2011 at 2:53 PM

ដោយ ទីន ហ្សាការីយ៉ា
2011-01-09
វិទ្យុអាស៊ីសេរី

កម្មករវាយកម្ទេចផ្ទះនៅតំបន់បឹងកក់ត្រូវបានផ្ទាំងថ្មដួលរំលំលើ បណ្ដាលឲ្យរងបួសធ្ងន់ធ្ងរ ខណៈដែលអ្នកភូមិបឹងកក់ជាច្រើនគ្រួសារផ្សេងទៀត កំពុងតែតវ៉ានៅទីលានសេរីភាព។

០៩-មករា-២០១១: អ្នក ភូមិ បឹងកក់ តវ៉ា នៅ ទីលាន សេរីភាព នៅ ថ្ងៃ បញ្ចប់ បន្ទាប់ ពី ពួកគេ បាន តវ៉ា អស់ រយៈ ពេល ជា ច្រើន ថ្ងៃ កន្លង មក មិន មាន ដំណោះស្រាយ។ (RFA/Tin Zakariya)

យុវនិស្សិតមួយរួបនៅតំបន់បឹងកក់ បានថ្លែងឲ្យដឹងនៅថ្ងៃទី៩ មករា ឆ្នាំ២០១១ ថាកម្មករស៊ីស្នូលវាយកម្ទេចផ្ទះនៅតំបន់បឹងកក់ម្នាក់រងរបួស ក្បាលធ្ងន់ធ្ងរ ដោយសារតែបំណែកថ្មដួលរំលំសង្កត់លើ នៅខណៈដែលគេកំពុងវាយផ្ទះរបស់អ្នកភូមិបឹងកក់តាមបញ្ជារបស់ ក្រុមហ៊ុនស៊ួកាគួ (Shukaku)។

យុវសិស្សឈ្មោះ សួង សុភ័ណ្ឌ និងជាប្រធានសហសម្ព័ន្ធមិត្តកុលបុត្រខ្មែរអ្នកស្នេហាជាតិ ដែលបានជួយសង្គ្រោះកម្មកររងរបួសដឹកទៅព្យាបាលនៅមន្ទីរពេទ្យ កាល់ម៉ែត្រ បន្ទាប់ពីរងបួសភ្លាមៗ នៅព្រឹកថ្ងៃទី៩ មករា នេះថា អ្នកដែលរងរបួសនេះឈ្មោះ សៅ វណ្ណនី អាយុ ៣២ឆ្នាំ បានស៊ីឈ្នួលម្ចាស់ផ្ទះដែលទទួលយកសំណងពីក្រុមហ៊ុនស៊ួកាគួ ចំនួន ៨.៥០០ដុល្លារ និងលុយខ្មែរ ២លានរៀល ដោយបង្ខំ ប៉ុន្តែត្រូវគ្រោះថ្នាក់ដោយសារជញ្ជាំងផ្ទះថ្មដួលរំលំលើខ្លួន ហើយឥឡូវនេះស្ថានភាពអ្នកជំងឺនៅក្នុងភាពធ្ងន់ធ្ងរនៅឡើយ។

យុវសិស្ស សួង សុភ័ណ្ឌ ឲ្យដឹងទៀតថា ៖ «បែកក្បាលត្រូវលលាដ៍ក្បាលពីក្រោយផង ហើយបែកពីមុខផង ថ្នាក់ហ្នឹង។ ឥឡូវហ្នឹងខ្ញុំកំពុងតែព្យាយាមធ្វើម៉េចឲ្យពេទ្យហ្នឹងជួយឲ្យមែនទែន ប៉ុន្តែមិនដឹងពេទ្យហ្នឹងជួយគាត់បានប៉ុណ្ណា ហើយខ្ញុំសង្ឃឹមថា ជីវិតគាត់នឹងថ្លៃ»។

ការរងគ្រោះថ្នាក់របស់កម្មករស៊ីស្នូលគេវាយកម្ទេចផ្ទះនេះ នៅខណៈដែលអ្នកភូមិបឹងកក់ផ្សេងទៀត ប្រមាណ ២០០នាក់ កំពុងតែធ្វើការតវ៉ានៅទីលានសេរីភាព ក្នុងទីក្រុងភ្នំពេញ ដែលជាថ្ងៃបញ្ចប់ការតវ៉ា ដើម្បីសុំឲ្យរដ្ឋាភិបាលដោះស្រាយជួនពួកគេឲ្យបានសមរម្យក្នុងការអភិវឌ្ឍបឹងកក់របស់ក្រុមហ៊ុនស៊ូកាគូ ប៉ុន្តែការតវ៉ារយៈពេល ៧ថ្ងៃជាប់ៗគ្នាកន្លងមកនេះគ្មានមន្ត្រីរដ្ឋាភិបាលណាម្នាក់ចេញមុខដោះស្រាយជួនពួកគេនៅឡើយ ដែលអ្នកភូមិរួមទាំងក្មេងៗផងនោះ បានស្រែកអំពាវនាវរកយុត្តិធម៌ពីរដ្ឋាភិបាល។

អ្នកភូមិជាច្រើនដែលធ្វើការតវ៉ានៅទីលានសេរីភាពនេះ មកពី ៧ភូមិនៃអ្នកភូមិបឹងកក់ ក្នុងគោលបំណងទាមទារចំនួនពីរចំណុច គឺសុំឲ្យអាជ្ញាធររាជធានីភ្នំពេញ ផ្ដល់ដីឲ្យពួកគេទំហំ ១៥ហិកតារ សម្រាប់អភិវឌ្ឍន៍នៅនឹងកន្លែង និងផ្ដល់សំណងឲ្យអ្នកចាកចេញចំនួន ១.៥០០ដុល្លារក្នុងផ្ទៃដី ១ម៉ែត្រការ៉េ ប៉ុន្តែរហូតមកទល់ពេលនេះ មិនទាន់មានដំណោះស្រាយនោះទេ ៖ «ការអភិវឌ្ឍត្រូវអភិវឌ្ឍជាយដែន ជនជាតិយួន ជនជាតិសៀម លួចដីខ្មែរអស់ហើយ សៀមចូលខ្មែរ ៧នាក់ ផ្អើអស់ពិភពលោក ហេតុអីមកយកដីខ្ញុំនៅបឹងកក់? ខ្ញុំមិនព្រមចេញពីផ្ទះខ្ញុំជាដាច់ខាត ខ្ញុំសុខចិត្ដស្លាប់នៅផ្ទះខ្ញុំនៅបឹងកក់»។

វិទ្យុអាស៊ីសេរីមិនអាចទាក់ទងសុំការបំភ្លឺពីមន្ត្រីសាលារាជធានីភ្នំពេញបានទេ នៅថ្ងៃអាទិត្យ ទី៩ មករា។ អភិបាលរងខណ្ឌដូនពេញ លោក សុខ ពេញវុធ មិនអធិប្បាយលើករណីអ្នកភូមិបឹងកក់តវ៉ានេះទេ ដោយលោកគ្រាន់តែបញ្ជាក់ថា ករណីអ្នករបួសដោយសាររំលំផ្ទះសង្កត់នេះ លោកមិនទាន់ដឹងនៅឡើយទេ។

ទោះយ៉ាងណា មន្ត្រីស៊ើបអង្កេតនៃសមាគមសិទ្ធិមនុស្សអាដហុក លោក អ៊ួច ឡេង ដែលបានឃ្លាំមើលបញ្ហាជម្លោះដីធ្លីនៅតំបន់បឹងកក់នោះ បានអះអាងថា ការអភិវឌ្ឍតំបន់បឹងកក់របស់ក្រុមហ៊ុនស៊ូកាគូ ប៉ះពាល់លំនៅឋានជាង ៤ពាន់គ្រួសារនេះ គឺរដ្ឋាភិបាលគ្មានឆន្ទៈក្នុងការដោះស្រាយជួនប្រជាពលរដ្ឋនោះទេ។

លោក អ៊ួច ឡេង មានប្រសាសន៍បន្ថែម ៖ «គ្រាន់តែសម្ដីរបស់រដ្ឋាភិបាល ដើម្បីឲ្យស្របទៅតាមលទ្ធិប្រជាធិបតេយ្យតែប៉ុណ្ណោះ តែការអនុវត្តជាក់ស្ដែង រដ្ឋាភិបាលគាត់បានទាត់ចោលនូវការគោរពសិទ្ធិមនុស្ស ក៏ដូចជាសិទ្ធិដីធ្លី»។

នៅថ្ងៃទី៩ មករា ជាថ្ងៃបញ្ចប់នៃការតវ៉ានៅទីលានសេរីភាពរបស់អ្នកភូមិបឹងកក់ ដែលបានចាប់ផ្ដើមតវ៉ាតាំងពីថ្ងៃទី៣ មករា មកនោះ ពួកគេបាននាំគ្នាដង្ហែក្បួនឆ្ពោះទៅទីកន្លែងរួបសំណាកលោកយាយដូនពេញ នៅខាងត្បូងវត្តភ្នំ នៅវេលាម៉ោងប្រមាណ ៤ល្ងាច ដើម្បីធ្វើការបួងសួងតាមព្រះពុទ្ធសាសនា សុំឲ្យជួយបន្ទន់ចិត្តមេដឹកនាំរដ្ឋាភិបាល និងភាគីក្រុមហ៊ុន ក្នុងការដោះស្រាយជួនពួកគេ។

ការនាំគ្នាដង្ហែក្បួនរបស់អ្នកភូមិបឹងកក់ ទៅទីកន្លែងរួបសំណាកលោកយាយដូនពេញ នៅក្រោយពេលអ្នកភូមិទាំងនេះ បានធ្វើការតវ៉ារយៈពេល ៧ថ្ងៃ នៅឯទីលានសេរីភាព ដែលពួកគាត់បានឈប់រកស៊ី និងធ្វើការងាររបស់ខ្លួន ដើម្បីមកតវ៉ាសុំឲ្យរដ្ឋាភិបាលជួយពួកគេ ផ្ទុយទៅវិញ រហូតដល់ថ្ងៃបញ្ចប់នេះ ក្តីអស់សង្ឃឹមរបស់ពួកគាត់នៅតែបន្តកើតមានដដែល។

អ្នកស្រី តុល ស្រីពៅ បានលើកឡើងថា អ្នកស្រីមិនចង់ឃើញក្តីឈឺចាប់ និងទុក្ខវេទនាកើតមានចំពោះគ្រួសារគាត់ និងអ្នកភូមិបឹងកក់ទៀតទេ នៅក្រោយពេលជាង ៣០ឆ្នាំដែលពួកគាត់បានចាប់ផ្តើមកសាងជីវិតថ្មី បន្ទាប់ពីរបបខ្មែរក្រហមដួលរលំ ហើយមានផ្ទះសម្បែងរស់នៅសមរម្យនៅតំបន់បឹងកក់ នៅក្នុងសង្គមបច្ចុប្បន្ន ប៉ុន្តែការរស់នៅសុខសាន្តនេះ គ្មានទៀតទេសម្រាប់គ្រួសារពួកគាត់ បន្ទាប់ពីក្រុមហ៊ុនបានចូលទៅធ្វើការអភិវឌ្ឍតំបន់បឹងកក់នោះមក។

អ្នកស្រី តុល ស្រីពៅ បន្តថា ៖ «កាលពីជំនាន់ ប៉ុល ពត ទេ ដែលជិះជាន់ប្រជាពលរដ្ឋ តែក្រុមហ៊ុនស៊ូកាគូ និងសាលាក្រុង បែរជាជិះជាន់បំពានប្រជាពលរដ្ឋលើសពីជំនាន់ ប៉ុល ពត ទៅទៀត។ កាលពីជំនាន់ ប៉ុល ពត គេគ្រាន់តែជម្លៀសប្រជាជនចេញទេ តែជំនាន់នេះគេបានបូមខ្សាច់ពន្លិចផ្ទះប្រជាជនទាំងរស់វិញ។ ពួកខ្ញុំយល់ឃើញថា សម័យនេះវាអយុត្តិធម៌សម្រាប់ពួកខ្ញុំណាស់»។

នៅឯទីលានសេរីភាព នៅក្បែរស្ថានទូតសហរដ្ឋអាមេរិក នាទីក្រុងភ្នំពេញ ដែលជាទីកន្លែងអ្នកភូមិទៅសម្ដែងការតវ៉ា ទាមទាររកយុត្តិធម៌ពីរដ្ឋាភិបាលនេះ គេក៏សង្កេតឃើញក្មេងៗ ដែលជាកូនៗរបស់អ្នកភូមិក៏បានទៅចូលរួមធ្វើការតវ៉ាជាមួយឪពុកម្ដាយរបស់ពួកគេផងដែរ។

កុមារី សុគន្ធ កញ្ញា រៀនថ្នាក់ទី៤ បានរៀបរាប់ដូច្នេះ ៖ «ជួយតវ៉ាដើម្បីយកដីធ្លី ក្រុមហ៊ុនអភិវឌ្ឍន៍ត្រូវឲ្យសំណងតាមទីផ្សារ។ ខ្ញុំភ័យខ្លាចថ្ងៃណាមួយខ្សាច់មកសង្កត់លើផ្ទះខ្ញុំ ធ្វើឲ្យបាត់បង់បងប្អូនខ្ញុំ ធ្វើឲ្យបាត់បង់ប៉ាម៉ាក់ខ្ញុំ»។

ទោះជាយ៉ាងណា ក្រុមអ្នកភូមិបានអះអាងថា ទោះបីជាកន្លងមកពួកគេធ្លាប់ធ្វើការតវ៉ា និងដាក់លិខិតសុំអន្តរាគមន៍ទៅលោកនាយករដ្ឋមន្ត្រីជាបន្តបន្ទាប់ ហើយគ្មានដំណោះស្រាយក្តី ប៉ុន្តែពួកគេបានលើកឡើងថា ពួកគេនៅតែធ្វើការតវ៉ាជាបន្តទៀតនៅពេលខាងមុខ។

លោក អ៊ួច ឡេង បានបញ្ជាក់ថា មានផ្ទះអ្នកភូមិប្រមាណជាង ១០០ខ្នង ដែលក្រុមហ៊ុនបានបូមខ្សាច់ពន្លិចផ្ទះអ្នកភូមិរហូតមកទល់ពេលនេះ ៖ «គឺជារូបភាពមួយដែលសាហាវព្រៃផ្សៃជាទីបំផុត ដែលមិនទុកឱកាសឲ្យប្រជាពលរដ្ឋធ្វើការរើ ប្រមូល (អីវ៉ាន់) មិនទាន់មានដំណោះស្រាយជាផ្លូវការអ្វីមួយទាល់តែសោះ មិនទាន់បានឆ្លើយតបសំណូមពររបស់ប្រជាពលរដ្ឋទាល់តែសោះ បែរជាបូមខ្សាច់ស្ងាត់ៗ ពន្លិចផ្ទះរបស់ប្រជាពលរដ្ឋ»។

នៅថ្ងៃទី៩ ខែមករា ឆ្នាំ២០១១នេះ ក្រុមអ្នកភូមិបឹងកក់ ដែលធ្វើការតវ៉ានេះ ក៏បានចេញសេចក្ដីថ្លែងការណ៍មួយបានសរសេរថា ក្រុមហ៊ុនស៊ូកាគូ បានចាប់ផ្ដើមបូមខ្សាច់ពន្លិចផ្ទះអ្នកភូមិកាលពីថ្ងៃទី២៨ សីហា ឆ្នាំ២០០៨មក ដែលធ្វើឲ្យប៉ះពាល់ដល់ប្រជាពលរដ្ឋនូវការបណ្ដេញចេញពីលំនៅឋានដោយបង្ខំ ហើយកងសន្តិសុខរបស់ក្រុមហ៊ុនបានគំរាមកំហែង និងបំបិទសិទ្ធិរបស់ប្រជាពលរដ្ឋពេលធ្វើការប្រជុំ និងប្រើអំពើហិង្សានៅពេលធ្វើការតវ៉ានាពេលកន្លងមកជាដើម។

សេចក្ដីថ្លែងការណ៍នេះ បានទទូចសុំទៅរដ្ឋាភិបាលបង្កើតគណៈកម្មាធិការដោះស្រាយបញ្ហារបស់ប្រជាពលរដ្ឋនៅតំបន់បឹងកក់ ដើម្បីទទួលបានយុត្តិធម៌ និងតម្លាភាពតាមយុទ្ធសាស្ត្រឈ្នះរបស់រដ្ឋាភិបាល។

សាលារាជធានីភ្នំពេញ បានជួលដីតំបន់បឹកក់ ដែលមានផ្ទៃដីសរុបប្រមាណ ១៣៣ហិកតារឲ្យក្រុមហ៊ុនស៊ូកាគូ រយៈពេល ៩៩ឆ្នាំ កាលពីថ្ងៃទី៦ ខែកុម្ភៈ ឆ្នាំ២០០៧មក ដែលធ្វើឲ្យប៉ះពាល់លំនៅឋានរបស់ប្រជាពលរដ្ឋចំនួន ៤.២៥២គ្រួសារ ដែលប្រជាពលរដ្ឋទាំងនោះ មួយចំនួនបានរស់នៅតំបន់បឹងកក់ តាំងពីឆ្នាំ១៩៧៩មក៕

រំលោភហើយ សំឡាប់ផ្តាច់ពូជ

January 10, 2011 at 2:42 PM

សរសេរដោយ ភ្នំពេញដេលីញូវ
ច័ន្ទ, 10 មករា 2011

កាលពីវេលា ម៉ោង៦និង៣០ នាទីព្រឹក ក្នុងថ្ងៃទី១០ ខែមករា ឆ្នាំ២០១១ នៅខាងក្រោយ វត្តស្វាយ ចម្ងាយ២០ម៉ែត្រ ក្នុងភូមិវត្តស្វាយ សង្កាត់សាលាកំរើក ក្រុង-ខេត្ត សៀមរាប មានឃាតកម្ម សាហាវ ឃោឃៅមួយ គឺចាប់រំលោភ ហើយសំឡាប់ យាយ ចាស់ នឹងចៅស្រី ។ លោកយាយ អាយុ៨០ឆ្នាំ ត្រូវក្រុមចោរ សំលាប់នឹង កាំបិតតាំងតោ ក្រោយពីពួកវា ចាប់រំលោភ ចៅស្រីអាយុ ២០ឆ្នាំ មក ។

លោកយាយ មានឈ្មោះថា អេង លី ភេទស្រី មានទីលំនៅ ភូមិស្វាយ សង្កាត់សាលាកំរើក ក្រុង-ខេត្ត សៀមរាប ។ ចំណែកចៅស្រី មានឈ្មោះ អេង លាង អាយុ២០ឆ្នាំ ។ ក្រៅពីចៅ នឹងយាយនេះ នៅមាន ម្តាយចិញ្ចឹម ម្នាក់ទៀត ក៏ត្រូវពួកចោរ សំឡាប់ដែរ ។ អ្នកស្លាប់ទាំង៣ មានមុខរបរ លក់ចាប់ហួយ នៅផ្ទះខ្លួន ។

សុំឫស និង ដើមជ្រៃ យកទៅត្រាំទឹកហូប ព្យាបាលជំងឺ

January 10, 2011 at 2:32 PM

សរសេរដោយ ភ្នំពេញដេលីញូវ
ច័ន្ទ, 10 មករា 2011

ការគោរពបូជា ទៅលើ អារុក្ខអារក្ខ អ្នកតា និង វត្ថុស័ក្តិសិទ្ធិ នានា បានដិតដាម ជាប់ស្នាម ក្នុងផ្នត់ជំនឿ ខ្មែរយើងតាំងពី យូរលង់ណាស់ មកហើយ រហូតមកទល់ បច្ចុប្បន្ន ។ តួយ៉ាង ដើមជ្រៃមួយដើម ដែលមាន អាយុកាលជាង ពីរបីសតវត្សរ៍ មកហើយ នោះ ត្រូវគេកាប់រំលំ គាស់រំលើង ដើម្បីធ្វើផ្លូវ អស់រយៈពេល ជាងពីរខែ កន្លងមកហើយនោះ ស្រាប់តែងើប ឈរត្រង់វិញ ដោយឯកឯង ធ្វើឱ្យអ្នកស្រុក ភ្ញាក់ផ្អើល នាំគ្នាទៅបោច យកឫសស្ទោះសម្បក យកទៅ ត្រាំទឹកហូប និង សុំទឹកមន្ត លុបលាងមុខ ខ្លួន ប្រាណ ស្រោចក្បាល ព្រមទាំងអុជធូប ទៀន សុំសេចក្តីសុខ ចម្រើនយ៉ាងកុះករ ។

ដើមជ្រៃដែលត្រូវ គេកាប់ផ្តួល រួចងើបឈរ ដោយខ្លួនឯងវិញ ធ្វើឱ្យមនុស្សម្នា ផ្អើលឈូឆរ នាំគ្នាទៅអុជធូប បន់ស្រន់ និង បោចយកឫស និង ស្ទោះសម្បក ទៅត្រាំទឹកហូបនោះ ស្ថិតចំលើគម្រោង ផ្លូវលំមួយខ្សែ ក្នុងភូមិកណ្តាល ឃុំសន្លុង ស្រុកខ្សាច់ កណ្តាល ខេត្តកណ្តាល ។

លោកតា សុខ សុន វ័យ ៧១ ឆ្នាំ ជាអាចារ្យវត្ត ត្រពាំងប្រិយ ដែលកំពុងញាប់ដៃ ញាប់ជើង ច្រកទឹកមន្ត និង ចង អំបោះក្រហម ឱ្យអ្នកមានជំនឿ ក្នុងរោងក្បែរ គល់ជ្រៃ បានឆ្លៀតងាកមក រៀបរាប់ឱ្យដឹងថា ដើមជ្រៃនេះ មានអាយុ ប្រហែលពីរបី សតវត្សរ៍ មកហើយ តាំងពីកើតមក ឃើញដើមជ្រៃនេះ ធំប៉ុណ្ណឹងទៅហើយ ។ លោកតាបន្តថា ដើមជ្រៃ នេះមានអ្នកតានៅ ថែរក្សាតាំងពី ដើមរៀងមក និង មានឫទ្ធិបារមីណាស់ ឱ្យតែមាន ភ័យអាសន្ន អ្នកភូមិតែង នាំគ្នា មកបែរបន់ ហើយរមែងសុខ សប្បាយ និង សម្រេចបំណង ជានិច្ច ។

តាំងពីដើមមក ដើមជ្រៃនេះ ពុំដែលមាន នរណាហ៊ាន មកបំពានឡើយ ទើបតែកាលពី ថ្ងៃទី ៥ ខែវិច្ឆិកា ឆ្នាំ ២០១០ កន្លងទៅនេះ ខាងក្រុមហ៊ុនម៉ៅការ ធ្វើផ្លូវបានកាប់ និង គាស់រំលើងរំលំ ព្រោះចំគម្រោងផ្លូវ ដោយកាត់ បន្សល់គល់ កម្ពស់បីម៉ែត្រ ។ ទម្រាំតែកាប់ រំលំ និង គាស់រំលើងបាន គឺខូចឆេះ រណារយន្ត មួយគ្រឿង និង ខូចអេស្កាវ៉ាទ័រ អស់ពីរគ្រឿង លុះទុកចោល ជិតពីរខែស្រាប់តែ ដើមជ្រៃនេះ ងើបឈរឡើងវិញ ដោយខ្លួនឯង ហើយក្នុងភូមិនេះ មានតែមនុស្ស ម្នាក់ប៉ុណ្ណោះ ដែលបាន ឃើញដើមជ្រៃនេះ ងើបឈរវិញ គឺបុរសម្នាក់ ដែលមានផ្ទះនៅ ទល់មុខដើមជ្រៃ ឈ្មោះ សាយ សុង ។

សាយ សុង ជាអ្នកមើលឃើញ ដើមជ្រៃ ងើបឈរវិញ បាននិយាយថា ដើមជ្រៃនេះ មានឫទ្ធិណាស់ កាលពីមិនទាន់កាប់ រំលំតែងមានភ្លើង អ្នកតាហោះ ចេញចូលរាល់យប់ ហើយបែរបន់ ស័ក្តិសិទ្ធិណាស់ ។ កាលពីពាក់ កណ្តាលអធ្រាត្រ ថ្ងៃទី ២៤ ធ្នូក ន្លងទៅនេះ កំពុងតែសម្រាក លង់លក់ស្រាប់តែ ឃើញលោកតា ដើមជ្រៃ មកដាស់ឱ្យចុះ ទៅជួយលើក ដើមជ្រៃឱ្យឈរវិញ ។ ខណៈនោះ ខ្លួនក៏ចុះពីផ្ទះ ទាំងមមីមមើ ស្រាប់តែឃើញ មនុស្សប្រុសបីនាក់ មាឌធំៗកម្ពស់ ប្រហែល ប្រាំម៉ែត្រ ស្លៀកក្បិន និង ជួតក្បាលក្រណាត់ ក្រហម នាំគ្នាលើក ដើមជ្រៃបញ្ឈរ ហើយលោកតា ប្រាប់ថា ទាល់តែធ្វើអ៊ីចឹង ទើបគេជឿ រួចក៏រលាយរូប បាត់ទៅ ។ គ្រានោះដោយ សំឡេងឆ្កែលូ ខ្លាំងពេក ខ្លួនក៏រត់ឡើងផ្ទះវិញ ស្រាប់តែ ភ្លឺឡើង ឃើញដើមជ្រៃ ដែលរលំងើប ឈរត្រង់វិញ ទើបអ្នកស្រុកភ្ញាក់ ផ្អើលនាំគ្នាមក បោចឫស ស្ទោះសម្បក យកទៅត្រាំទឹកហូប ហើយនិយាយតៗ គ្នាថាបាន ធូរស្បើយពីរោគា ទើបបានជាមាន មនុស្សម្នានាំគ្នា មកពីឆ្ងាយជិត កាន់តែច្រើន ។

អ៊ំប្រុស ជឹម ថុល អាយុ ៦៣ ឆ្នាំ ដែលជាអ្នកចាត់ចែង មើលខុសត្រូវម្នាក់ ដែរនោះ បានមានប្រសាសន៍ថា ដើមជ្រៃ នេះពិតជាមាន ឫទ្ធិខ្លាំងណាស់ មុននឹងកាប់រំលំ ដើមជ្រៃ នេះបានគឺត្រូវ ចំណាយពេល ជិតមួយខែឯណោះ ។ បន្ទាប់ពី ដើមជ្រៃនេះ ងើបឈរវិញនៅ ព្រឹកថ្ងៃទី ២៥ ខែធ្នូ ក្នុងភូមិរបស់គាត់ បានធ្លាក់អ័ព្ទយ៉ាងក្រាស់ ដែលតាំងពីដើមមក មិនដែលជួបនូវ ហេតុភេទដូច្នេះឡើយ រហូតដល់ម៉ោងជាង ១០ ព្រឹក ទើបអស់អព្ទ ។

តាំងពីពេលនោះ មកក៏ផ្អើលមនុស្សម្នា មកចោមរោម សុំទឹកមន្ត និង ឫស សម្បក យកទៅត្រាំទឹកហូប ហើយតែង និយាយថាបាន ជាសះស្បើយគ្រប់គ្នា ទើបបានជាមានមនុស្ស មកកាន់តែច្រើនពីមួយ ថ្ងៃទៅមួយថ្ងៃ ។ មើលឃើញ ដូច្នេះហើយ ទើប ពួកគាត់ចាត់ បង្កើតជា គណៈកម្មការ ដើម្បីគ្រប់គ្រង បច្ច័យដែលញាតិញ្ញោម បូជាចំពោះដើមជ្រៃ ទុកគ្រាន់យកទៅជួយ កសាងសមិទ្ធផល ក្នុងវត្តត្រពាំងប្រិយ ។

លោកពូ មូល អួន បានអះអាងថា គាត់បានជាសះស្បើយ ពីរោគឈឺក្រពះ ដោយសារមកសុំឫសជ្រៃ នេះយកទៅត្រាំទឹក ផឹករយៈ ពេលបីថ្ងៃ ។

បងស្រី ម៉ាត់ សារី ជាជនជាតិខ្មែរ អ៊ិស្លាម បាននិយាយថា នៅពេលឮថា ដើមជ្រៃគេកាប់ដួល ហើយងើបឈរវិញ ក៏មកមើលហើយ បន្ទាប់ពីពូ អួន ប្រាប់ថា ហូបទឹកត្រាំឫសជ្រៃនេះ ទៅជាជំងឺឈឺក្រពះ បងស្រីក៏មិនភ្លេច សុំយក ទៅត្រាំទឹកហូបដែរ ក្រែងបានជា ដូចគេដែរ ។

មីង យឿន ក៏បានប្រាប់ផងដែរថា គាត់មានជំងឺ រលាកសន្លាក់ យូរមកហើយ ប៉ុន្តែក្រោយពេលកូន យកឫសជ្រៃត្រាំ ទឹកឱ្យហូបបាន ពីរថ្ងៃ ស្រាប់តែបាន ស្រួលខ្លួន អន់ឈឺទើបគាត់ ខំដើរមកបោច យកឫស នេះទៅត្រាំហូប បន្តទៀតក្រែង បានជាសះ ស្បើយ ។ ដោយឡែក បងស្រី នៅ សឺន មានទីលំនៅ ភូមិពោធិ៍សាបាង ឃុំរាប ស្រុកពារាំង ខេត្តព្រៃវែង ឯណោះបានឱ្យដឹងថា ដោយឮល្បីថាឫស និង សម្បក ដើមជ្រៃនេះ ពូកែស័ក្តិសិទ្ធិ លើការព្យាបាល រោគឈឺសន្លាក់ឆ្អឹង ទើប គាត់ខំឱ្យកូនជូនមក ក្រែងយកទៅហូប បានជាដូចគេ ព្រោះរូបគាត់ គ្រោះថ្នាក់ចរាចរ ឈឺចង្កេះ និង ខ្នងជិតបីឆ្នាំ មកហើយ ទោះព្យាបាល យ៉ាងណាក៏មិនបាន ធូរស្បើយដែរ ។

ទន្ទឹមនឹងមាន អ្នកជឿយ៉ាងច្រើននេះក៏មានមនុស្ស មួយចំនួន ដែលទៅមើលហើយ និយាយថា នេះមិនមែនជា អច្ឆរិយៈអីទេ វាគ្រាន់ តែជាបាតុភូតធម្មជាតិ តែប៉ុណ្ណោះ តែបែរជាមានអ្នក ជឿខុសទំនងទៅវិញ ៕

ឃាត់ខ្លួនស្នងការនិងស្នងការរងខេត្តបន្ទាយមានជ័យពីបទពាក់ពន្ធ័គ្រឿងញៀន

January 10, 2011 at 2:01 PM

ដោយ : មង្គល
ថ្ងៃទី 10 មករា 2011
CEN

លោក ហ៊ុន ហ៊ាន អតីត ស្នងការ ខេត្ត បន្ទាយមានជ័យ ដែល ត្រូវ គេ ដកហូត ដំណែង កាលពី ថ្ងៃ ៧ មករា ត្រូវបាន សមត្ថកិច្ច ក្រ សួង មហាផ្ទៃ ចាប់ខ្លួន កាលពី ថ្ងៃ ទី ៩ មករា ម្សិលមិញ ដោយ វ៉ៃ ខ្នោះដៃ ផង

បន្ទាយមានជ័យ: លោក ហ៊ុន ហ៊ាន អតីតស្នងការខេត្តបន្ទាយមានជ័យដែលត្រូវគេដកហូតដំណែងកាលពីថ្ងៃ៧ មករា ត្រូវបានសមត្ថកិច្ចក្រសួងមហាផ្ទៃចាប់ខ្លួនកាលពីថ្ងៃទី៩ មករាម្សិលមិញដោយវ៉ៃខ្នោះដៃផង ។

ចំណែកឯស្នងការរងម្នាក់ទៀតគឺលោក ឈាង សុន ទទួលបន្ទុកផែនមធ្យោបាយ និងពីមុនទទួលបន្ទុកផែនយុត្តិធម៌ ត្រូវបានគេចាប់ខ្លួននៅព្រឹកថ្ងៃទី១០ មករានេះដោយពុំមានវ៉ៃខ្នោះដៃទេ ។

គ្រឿងញឿនដែលពាក់ព័ន្ធលោក ហ៊ុន ហ៊ាន អតីត ស្នងការ ខេត្ត បន្ទាយមានជ័យ

អ្នកជួញគ្រឿងញឿនដែលពាក់ព័ន្ធលោក ហ៊ុន ហ៊ាន អតីត ស្នងការ ខេត្ត បន្ទាយមានជ័យនិងអតីត ប្រធាន ប៉ូលិស ប្រឆាំង គ្រឿងញៀន ខេត្តឈ្មោះលឹម ម៉ាប់

ការឃាត់ខ្លួនមន្ត្រីប៉ូលិសខេត្តបន្ទាយមានជ័យទាំងពីរនាក់នេះត្រូវគេដឹងថា មានជាប់ពាក់ពន្ធ័នឹងការជួញដូរគ្រឿងញៀនដ៏ធំមួយដែលគេបង្ក្រាបបានកាលពីពេលថ្មីៗនេះ។ ឥឡូវនេះសំណុំរឿងស្ថិតនៅក្នុងដៃស្ថាប័នប្រឆាំងអំពោះពុករលួយនិងតុលាការខេត្តបន្ទាយមានជ័យ។

លោក ហ៊ុន ហ៊ាន ត្រូវបានដកហូតមុខតំណែងកាលពីថ្ងៃ៧ មករា បន្ទាប់ពីដំណើរទៅកាន់ខេត្តបន្ទាយមានជ័យរបស់លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងលោក កែ គឹមយ៉ាន ប្រធានអាជ្ញាធរជាតិប្រឆាំងគ្រឿងញៀន។

មានមនុស្ស៣នាក់ហើយដែលត្រូវបានចាប់ខ្លួនក្នុងសំណុំរឿងនេះ។ អតីតប្រធានប៉ូលិសប្រឆាំងគ្រឿងញៀនខេត្តឈ្មោះលឹម ម៉ាប់ ត្រូវបានគេចាប់ខ្លួននិងឃុំខ្លួនរយៈពេល ៦ ខែមកហើយ។ តាមព័ត៌មានថា សម្តេចតេជោ ហ៊ុន សែនបានបញ្ជាឲ្យចាប់ខ្លួនអ្នកជាប់ពាក់ពន្ធ័គ្រឿងញៀនទាំងនោះ ៕

មកពីអូស្ត្រាលីដើម្បីជួបគូដណ្តឹងនៅភ្នំពេញត្រូវគេបាញ់ស្លាប់

January 10, 2011 at 1:51 PM

ដោយ : សុពិសិដ្ឋ
ថ្ងៃទី 9 មករា 2011
CEN

ភ្នំពេញ: បុរសជនជាតិអូស្ត្រាលីដើមកំណើតខ្មែរម្នាក់អាយុ ៤៥ឆ្នាំ ត្រូវបានឃាតករមិនស្គាល់មុខបាញ់សម្លាប់កាលពីវេលាម៉ោង៩និង៣០នាទីយប់ ថ្ងៃទី៨ មករា ម្សិលមិញនៅពីមុខផ្ទះសំណាក់រស្មីឋានសួគ៌ ស្ថិតនៅតាមបណ្តោយផ្លូវមុនីរ៉េត ។

ប៉ូលិសឲ្យដឹងថា ជនរងគ្រោះឈ្មោះ លុយ អេរិច ( Lui Eric ) អាយុ ៤៥ឆ្នាំ បុរសរូបនោះមកស្រុកខ្មែរដើម្បីជួបគូដណ្តឹង ។ គាត់បានមកដល់ពោធិចិនតុងវេលាម៉ោង៨និង៤០នាទីយប់រួចហើយគ្រួសារខាងគូដណ្តឹងទៅទទួលដោយដឹកទៅសំណាក់នៅផ្ទះសំណាក់ខាងលើ ។ លុះទៅដល់ផ្ទះសំណាក់ក៏ចុះពីលើឡានដើរចូលដល់ក្នុងផ្ទះសំណាក់ ស្រាប់ តែត្រូវឃាតករមិនស្គាល់ឈ្មោះដកកាំភ្លើងបាញ់ពីរគ្រាប់ចំដើមទ្រូងនិងដើមដៃខាងឆ្វេងបណ្តាលឲ្យស្លាប់នៅពេលបញ្ជូនដល់មន្ទីរពេទ្យរុស្ស៊ី ។

ប៉ូលិសសន្និដ្ឋានថា ជាអំពើមនុស្សឃាតដោយមិនមែនជាករណីប្លន់ឡើយ ពីព្រោះជនដៃដល់មិនបានយកទ្រព្យសម្បត្តិទេ ។ ជនដៃដល់មានគ្នាពីរនាក់ជិះម៉ូតូមកឈប់ពីមុខផ្ទះសំណាក់ ។ ពេលបាញ់ហើយក៏រត់គេខ្លួនបាត់ ៕

កំពុងតាមដាន ករណីឃាតកម្ម លើជនជាតិអូស្រ្តាលី

January 10, 2011 at 1:50 PM

សរសេរដោយ ភ្នំពេញដេលីញូវ
ច័ន្ទ, 10 មករា 2011

នៅខណ្ឌមានជ័យ ថ្ងៃទី ០៨ ខែ មករា ឆ្នាំ ២០១១ មានករណី ឃាតកម្ម កើតឡើងនៅ ផ្ទះសំណាក់ លេខ២៩ ក្រុមទី១០ ភូមិដំណាក់ធំ សង្កាត់ស្ទឹង មានជ័យ បង្កដោយ ជនល្មើស ចំនួន ០២នាក់ មិនស្គាល់ អត្តសញ្ញាណ ស្លៀកពាក់ស៊ីវិល ដោយអាវុធ ខ្លី K59 មួយដើម ជិះម៉ូតូ ០១គ្រឿង HONDA C125 ពណ៌ខ្មៅ ( ស្លាកលេខមិនចាំ ) បានបាញ់ចំនួន ០២គ្រាប់ មកលើជន រងគ្រោះឈ្មោះ LUI ERIC ភេទប្រុស អាយុ ៤៤ឆ្នាំ ជនជាតិ អូស្រ្តាលី កាន់លិខិត ឆ្លងដែន លេខ N. ១៣៨២១៣៧ បណ្តាលឲ្យ រងរបួសធ្ងន់ (ចំដើមទ្រូង ខាងឆ្វេង ០១គ្រាប់ និងដើមដៃ ខាងឆ្វេង ០១គ្រាប់ ) ហើយបានស្លាប់ ពេលបញ្ជូនទៅ សង្គ្រោះនៅ មន្ទីរពេទ្យ មិត្តភាពខ្មែរ-សូវៀត ។

មុនពេលកើតហេតុ ជនរងគ្រោះ បានចុះពី យន្តហោះ នៅវេលាម៉ោង ២០,៤០នាទី មកពីប្រទេស អូស្រ្តាលី តែម្នាក់ឯង ត្រូវបានគូដណ្តឹង និង ក្រុមគ្រួសារ ទៅទទួលពី ព្រលានយន្តហោះ អន្តរជាតិភ្នំពេញ មកសំរាកនៅ ផ្ទះសំណាក់ កើតហេតុខាងលើ ។ ពេលជនរងគ្រោះ និងគូដណ្តឹងចុះពី លើរថយន្តដើរ ចូលផ្ទះសំណាក់ ជនល្មើសបាន ដើរតាមពីក្រោយ ហើយបានបាញ់ ប្រហារលើ ជនរងគ្រោះ រួចនាំគ្នាជិះ ម៉ូតូគេចខ្លួន ។ សមត្ថកិច្ចបាន រកឃើញ សំបកគ្រាប់ ០២គ្រាប់ ( គ្រាប់ K59 កែច្នៃ ) ដើម្បី ធ្វើការស្រាវជ្រាវ ។

ម៉ាយ៉ាវីនចង់នៅម្នាក់ឯងមានសិទ្ធិសេរីភាពជាងមានស្វាមី

January 10, 2011 at 1:41 PM

ដោយ : សាវរក្ស
ថ្ងៃទី 10 មករា 2011
CEN

ភ្នំពេញ: អតីតតារាចម្រៀងប្រចាំរង្គសាលកញ្ញា ម៉ាយ៉ាវីន ក្រោយខកស្នេហ៍ជាមួយបុរសអាណិកជន នាង មិនធ្លាប់គិតថាមានចំណងអាពាហ៍ពិពាហ៍កើតមានចំពោះខ្លួនឯងទេ ដោយនាងយល់ថា មានប្ដីមិនមាន សំណាងអីទេ គឹមានតែបាត់បង់សិទ្ធិសេរីភាពតែប៉ុណ្ណោះ ហើយមិនស្រួលត្រូវប្ដីធ្វើបាបចិត្ដទៀត ម្ល៉ោះ ហើយនាងគិតថា នៅម្នាក់ឯងស្រួលជាង ។ ដើម្បីបន្សាបនូវព័ត៌មាននេះនាងបានអះអាងថា ខ្លួនកំពុង ទទួលយកបុរសម្នាក់មកពិចារណា កាលពីខកស្នេហ៍ដំបូងនាងគិតថា មិនចង់រៀបការឬមានសង្សារមែន ប៉ុន្ដែឥឡូវនេះនាងគិតថា ដល់ពេលគិតគូរហើយទើបនាងកំពុងស្វែងយល់ចិត្ដបុរសម្នាក់នោះ ៕

សម ម៉ាណា ហ៊ានថត ឈុតសិចស៊ី

January 10, 2011 at 1:33 PM

សរសេរដោយ ភ្នំពេញដេលីញូវ
ច័ន្ទ, 10 មករា 2011

អ្នកសម្តែង និង ចម្រៀង សម ម៉ាណា បានចូលជា សមាជិកនៃក្រុម CAMBODIA SUPER MODEL កាលពីពេល ថ្មីៗមកនេះ បានប្រាប់ថា ដើម្បីស្តារ កេរ្តិ៍ឈ្មោះ សិល្បៈរបស់នាង ឡើងវិញ បន្ទាប់ពីបាត់មុខ រយៈពេលជាង ពីរឆ្នាំ កន្លងមក ។ ក្រោយពី ចូលជាសមាជិក ក្រុមនេះបាន រយៈពេលជាង មួយខែ ក្នុងនាមជាអ្នក បង្ហាញម៉ូដ សម ម៉ាណា បាននិយាយថា នាងហ៊ានថត ជាមួយនឹង ឈុតប៊ីគីនី បញ្ចោញរូបរាង សិចស៊ីរបស់នាង ព្រោះនាង អះអាងថា នេះមិនមែន ជាការងារថ្មី នោះទេ គឺធ្លាប់ថត ដូច្នេះកាលពីមុន រួចមកហើយ ។

សម ម៉ាណា បានលេចមុខ ក្នុងការ បង្ហាញម៉ូដ លើកដំបូង ក្នុងពិព័រណ៍ ដែលបានធ្វើឡើង នៅកោះពេជ្រ កាលពី ពេលថ្មីៗ មកនេះ នៅក្នុងក្រុម CAMBODIA SUPER MODEL ។ នាងមានរូបរាង ស្តើង មានទម្ងន់ ៥៣ គីឡូក្រាម និង ទើបតែចូល ជា សមាជិកថ្មី នៃក្រុមនេះ រយៈពេល ជាងមួយខែ មកនេះប៉ុណ្ណោះ ។

ការបង្ហាញម៉ូដ មិនមែនជា ការងារថ្មី របស់តារា រូបនេះទេ ព្រោះកាលពីជាង ពីរឆ្នាំមុន នាងក៏ជាអ្នក បង្ហាញម៉ូដ មួយរូបដែរ ប៉ុន្តែនាងបាន ឈប់ពីសិល្បៈ ក្រោយពីនាង អះអាងថា មានសង្សារ ជាមួយឧកញ្ញ៉ា ហើយរវល់ រៀនសូត្រ ។

ថ្មីៗនេះ នាងបានលេចមុខ ជាមួយនឹងការងារ សិល្បៈមកវិញ បន្ទាប់ពីបាត់មុខ យ៉ាងយូរ ជាពិសេស ចូលក្រុម CAMBODIA SUPER MODEL ហើយអ្វី ដែលធ្វើឱ្យ ចាប់អារម្មណ៍នោះ នៅពេលដែលសួរថា តើ សម ម៉ាណា ក្លាហានហ៊ានថត បែបសិច ស៊ី ស្លៀកប៊ីគីនីទេ ប្រសិនបើមាន ផលិតផល ណាមួយតម្រូវ ឱ្យនាងធ្វើ ?

សម ម៉ាណា បាននិយាយថា "អត់អីទេបង ! គឺខ្ញុំហ៊ានតើ ! ព្រោះការស្លៀក បែបនេះ ខ្ញុំធ្លាប់ ធ្វើរួចមកហើយ កាលពីមុន ខ្ញុំមិនហ៊ានថត ស្រាតទេ តែប៊ីគីនីប្រភេទ ណាក៏បានដែរ" ។ នាង ថែមទាំងបញ្ជាក់ ទៀតថា "ឱ្យតែអាជីពសិល្បៈ ខ្ញុំមិនប្រកាន់ទេ ខ្ញុំអាចទៅរួច ទាំងអស់ ប៉ុន្តែមិនហួសពី ប្រពៃណីខ្មែរទេ ហើយ CAMBODIA SUPER MODEL ឱ្យចូលក្នុងក្រុមនេះ គឺដោយសារតែ ខ្ញុំមានកម្ពស់ខ្ពស់ អាចដើរម៉ូដបាន ម៉្យាងកាលពីឆ្នាំ ២០០៧ កន្លងមក ខ្ញុំក៏ធ្លាប់ជាអ្នក បង្ហាញម៉ូដ ដែរ" ។

អ្នកចម្រៀង និង សម្តែង សម ម៉ាណា បានលេចមុខ មកវិញសព្វថ្ងៃនេះ មិនទាន់ត្រូវបាន គេចាប់អារម្មណ៍ ដូចមុននោះទេ ដូច្នេះនាងបាន ប្រឹងប្រែងដើម្បី ស្តារកេរ្តិ៍ឈ្មោះ របស់នាងឡើងវិញ តាមរយៈការ បង្ហាញម៉ូដ នៅក្នុងក្រុម CAMBODIA SUPER MODEL នេះតែម្តង ។

ការសម្រេចចិត្ត ចូលក្រុមបង្ហាញម៉ូដ បែបនេះត្រូវបាន អ្នកសិល្បៈមួយចំនួន និយាយថា ដោយសារ ប្រជាប្រិយភាព នៃការសម្តែង និង ចម្រៀងរបស់នាង មានការធ្លាក់ចុះ មិនទាន់អាច ស្តារឡើងវិញបានទេ ក្រោយពីនាង បាត់មុខ មួយរយៈធំរួចមក នោះ ដូច្នេះទើបនាង ប្រឹងស្តារ កេរ្តិ៍ឈ្មោះឡើងវិញ ព្រោះថាក្រុម CAMBODIA SUPER MODEL កំពុងតែមានការ ពេញនិយម ហើយថែមទាំងបាន បញ្ចូលជាមួយ ក្រុមបុរស ថែមទៀតផង ។

នាងសង្ឃឹមថា ការចាប់យកអាជីព ជាអ្នកបង្ហាញម៉ូដ ឡើងវិញនៅក្នុងក្រុម CAMBODIA SUPER MODEL នេះនឹងធ្វើឱ្យ ទទួលបាន ជោគជ័យ ជាពិសេស ចំពេលដែលនាង សម្រេចចិត្តចូល ប្រឡូកក្នុងវិស័យ សិល្បៈវិញ នាពេលនេះ ។

ទោះជាគេ មិនសូវឃើញ ការងារសិល្បៈ របស់ សម ម៉ាណា មមាញឹកក៏ដោយ តែនាងបានអះអាងថា សព្វថ្ងៃនេះ រវល់ច្រើន ជាពិសេសនៅក្នុង ខែមករានេះ រវល់ថតខារ៉ាអូខេ MTV ច្រៀង ក្នុងពិធីមង្គលការ ផ្សេងៗទៀតផង ហើយថ្មីៗមកនេះ ទើបតែ ថត ចម្រៀងចប់ឱ្យ ផលិតកម្ម បុប្ផា និង រៃមាស តោមាស ៕